តំបន់​បាត​អាង​នៃ​ទំនប់​វារីអគ្គិសនី​សេសាន​ក្រោម​ពីរ បាន​ក្លាយ​ជា​កន្លែង​អភិរក្ស​ត្រី​ជួយ​សេដ្ឋកិច្ច​ជនជាតិ​ដើម​ភាគតិច

ដោយ ជីវិតា
2024.01.04
តំបន់​បាត​អាង​នៃ​ទំនប់​វារីអគ្គិសនី​សេសាន​ក្រោម​ពីរ បាន​ក្លាយ​ជា​កន្លែង​អភិរក្ស​ត្រី​ជួយ​សេដ្ឋកិច្ច​ជនជាតិ​ដើម​ភាគតិច អាជ្ញាធរ​ឃុំ​ស្រែគរ និង​មន្ត្រី​រដ្ឋបាល​ជលផល ចុះ​ល្បាត​នៅ​តំបន់​បាត​អាង នៃ​ទំនប់​វារីអគ្គិសនី​សេសាន​ក្រោម​ពីរ ខេត្ត​ស្ទឹងត្រែង កាល​ពី​ថ្ងៃទី១ ធ្នូ ២០២៤។
រូប​៖ សហគមន៍​ផ្តល់​ឱ្យ

ផ្នែក​ខ្លះ​នៃ​តំបន់​បាត​អាង​នៃ​ទំនប់​វារីអគ្គិសនី​សេសាន​ក្រោម​ពីរ មាន​ផ្ទៃ​ដី​ជាង ៣​ម៉ឺន​ហិកតារ បាន​ក្លាយ​ជា​កន្លែង​អភិរក្ស​ត្រី​ដ៏​សំខាន់ ផ្តល់​ប្រយោជន៍​សេដ្ឋកិច្ច​ដល់​ជនជាតិ​ដើម​ភាគតិច​ជាង ១០០​គ្រួសារ រស់នៅ​ក្នុង​ឃុំ​ស្រែគរ និង​ឃុំ​ក្បាលរមាស ខេត្ត​ស្ទឹងត្រែង។

ប្រជា​សហគមន៍​បារម្ភ​ថា ការ​នេសាទ​ខុសច្បាប់​នៅ​តំបន់​បាត​អាង​នៅតែ​ជា​បញ្ហា​ប្រឈម ធ្វើ​ឱ្យ​ធនធាន​ត្រី​ថយ​ចុះ​ជា​បន្តបន្ទាប់។

ពលរដ្ឋ​ដែល​រងគ្រោះ​ដោយសារ​ទំនប់​វារីអគ្គិសនី​សេសាន​ក្រោម​ពីរ​រស់នៅ​ក្នុង​ឃុំ​ស្រែគរ និង​ឃុំ​ក្បាល​រមាស ស្រុក​សេសាន ទទូច​ឱ្យ​អាជ្ញាធរ​ខេត្ត​ស្ទឹងត្រែង ពង្រឹង​អនុវត្ត​ច្បាប់​នេសាទ​ឱ្យ​គ្រប់​ជ្រុងជ្រោយ។

ពួកគាត់​សង្កេត​ឃើញ​ថា បច្ចុប្បន្ន​មាន​ពលរដ្ឋ​ចំណូលស្រុក​រាប់​រយ​គ្រួសារ បាន​តាំង​ទីលំនៅ​ក្បែរ​តំបន់​បាត​អាង​នៃ​ទំនប់​វារីអគ្គិសនី​សេសាន​ក្រោម​ពីរ ដោយ​ប្រកប​មុខរបរ​នេសាទ​ត្រី ហើយ​ពួកគេ តែងតែ លួច​ពង្រាយ​អួន និង​ឧបករណ៍​នេសាទ​ខុសច្បាប់​ចាប់​ត្រី​នៅ​តំបន់​បាត​អាង។

តំណាង​សហគមន៍​ភូមិ​ក្បាលរមាស លោកស្រី ស្រាញ់ ឡាញ់ ប្រាប់​វិទ្យុ​អាស៊ីសេរី នៅ​ថ្ងៃទី៣ មករា​ថា ភូមិ​ក្បាល​រមាស​ចាស់ ដែល​ជា​ភូមិកំណើត របស់​លោក​ស្រី ពេលនេះ​បាន​ក្លាយជា​ផ្ទៃ​អាង​នៃ​ទំនប់​វារីអគ្គិសនី​សេសាន​ក្រោម​ពីរ ហើយក៏​ជា​កន្លែង​អភិរក្ស​ត្រី ដែល​មាន​ទំហំ​ផ្ទៃ​ទឹក​ជាង ២​ពាន់​ហិកតារ។

លោកស្រី​ថា អាជ្ញាធរ​បាន​កំណត់​ផែនទី និង​លក្ខន្តិកៈ​សហគមន៍​ក្នុង​ការ​បង្កើត​តំបន់​អភិរក្ស​នេសាទ​នេះ​ហើយ ក៏ប៉ុន្តែ​បទល្មើស​នេសាទ នៅតែ​កើត​មាន​ពិបាក​នឹង​ទប់ស្កាត់។

លោកស្រី ស្រាញ់ ឡាញ់៖ «គេ​ឱ្យ​ខាង​អ្នក​មកពី​ចម្ងាយ ខេត្ត​ឆ្ងាយៗ មក​រស់នៅ បោះតង់​បោះ​រោង ពាសពេញ ធ្វើ​ឱ្យ​បាត់​ទឹកដី និង​ត្រី ដែល​យើង​អភិរក្ស​ធ្វើ​ឱ្យ​បាត់បង់»

ជំទប់​ទី ២ ឃុំ​ស្រែគរ មកពី​គណបក្ស​ភ្លើង​ទៀន ទទួល​បន្ទុក​ទប់ស្កាត់​បទល្មើស​នេសាទ លោក សៀក មេគង្គ ប្រាប់​វិទ្យុ​អាស៊ីសេរី​ថា អាជ្ញាធរ​ខេត្ត​បាន​បង្កើត​ទីស្នាក់ការ​អភិរក្ស​ត្រី និង​ដាក់​វេន​គ្នា​ចុះ​ល្បាត​ជាប្រចាំ នៅ​តំបន់​បាត​អាង ដោយ​មិន​អនុញ្ញាត​ឱ្យ​មាន​ការ​នេសាទ​ខុសច្បាប់​នោះ​ទេ។

លោក​ថា តំបន់​អភិរក្ស​ត្រី​មាន​ទំហំ​សរុប​ជាង ៦​ពាន់​ហិកតារ (.១៤៣) ឋិត​ក្នុង​ផ្ទៃ​អាង ហើយ​គម្រោង​នេះ សហការ​ជាមួយ​អង្គការ​ភូមិ​ខ្ញុំ និង​រដ្ឋបាល​ជលផល ដើម្បី​លើកកម្ពស់​សេដ្ឋកិច្ច​សហគមន៍ និង​ពង្រឹង​ការអនុវត្ត​ច្បាប់។

លោក សៀក មេគង្គ៖ «កន្លែង​គេ​មិន​ឱ្យ​ដាច់​ទេ ២៤ ម៉ោង លើ ២៤ ម៉ោង ដាក់​វេន​គ្នា​ប្រចាំការ ការ​យកចិត្តទុក​ដាក់​អភិរក្ស​ខ្សែទឹក​ខាងលើ មិនមែន​អាស្រ័យ​ផល​ទាំង ២​ឃុំ​ទេ ភូមិ​ផ្សេងៗ​ជុំវិញ​ខេត្ត​ស្ទឹងត្រែង និង​ខេត្ត​ផ្សេងៗ​ក៏​មក​អាស្រ័យ​ផល​។ ដូច្នេះ​បាន​គេ​យកចិត្តទុកដាក់​អភិរក្ស»

វិទ្យុ​អាស៊ីសេរី​បាន​មិន​ទាន់​អាច​ទាក់ទង​សុំ​ការ​អធិប្បាយ​រឿង​នេះ ពី​ប្រធាន​រដ្ឋបាល​ជលផល ខេត្ត​ស្ទឹងត្រែង លោក ទុំ នីរ៉ូ បាន​នៅ​ឡើយ​ទេ នៅ​ថ្ងៃទី៣ មករា ដោយ​ទូរសព្ទ​មិន​អាច​ទាក់ទង​បាន។

ក៏ប៉ុន្តែ​អ្នកនាំពាក្យ​សាលាខេត្ត​ស្ទឹងត្រែង លោក ម៉ែន គុង ប្រាប់​វិទ្យុ​អាស៊ីសេរី​ថា តំបន់​បាត​អាង​នៃ​ទំនប់​វារីអគ្គិសនី​សេសាន​ក្រោម​ពីរ មាន​សក្ដានុពល សម្រាប់​មច្ឆា​ជាតិ និង​វិស័យ​ទេសចរណ៍​ដែល​អាជ្ញាធរ​ត្រូវការ​ពេល​វេលា​រៀបចំ ទីតាំង​ទេសចរ​ធនធានធម្មជាតិ​នៅ​ខ្សែទឹក​ខាងលើ។

លោក​ថា អាជ្ញាធរ​បន្ត​អប់រំ​ពលរដ្ឋ​ឱ្យ​យល់ដឹង​ពី​ច្បាប់​ជលផល និង​រួមគ្នា អភិរក្ស​ធនធាន​ត្រី ក្នុង​ដែន​អភិរក្ស​នេះ និង​បន្ត​ពង្រឹង​អនុវត្ត​គោលនយោបាយ​គ្រប់គ្រង​ដែន​អភិរក្ស។

លោក ម៉ែន គុង៖ «តំបន់​ផ្នែក​ខាងលើ នៃ​តំបន់​បាត​អាង គឺជា​តំបន់​មាន​សក្ដានុពល​ដោយសារ​ទឹក​ចាប់ផ្តើម គ្រប​ដណ្តប់​លើ​ផ្ទៃដី​មួយចំនួន កាលពីមុន​ដែល​មិនមែន​ជា​ផ្ទៃដី​លិច​ទឹក។ តំបន់​ទាំងអស់​នោះ ក្លាយ​ជា​ជម្រក​ត្រី​ពង​កូន និង​បង្ក​កំណើត​រីក​រាលដាល ពពួក​ត្រី​មេ​ពូជ​មួយ​ចំនួន​ផង​ដែរ»

ប្រជា​សហគមន៍​សង្កេត​ឃើញ​ថា ចាប់តាំងពី​ក្រុមហ៊ុន និង​អាជ្ញាធរ​បិទ​ខ្ទប់​ទន្លេសេសាន ក្នុង​ខេត្តស្ទឹងត្រែង ដើម្បី​សាងសង់​ទំនប់​វារីអគ្គិសនី​សេសាន​ក្រោម​ពីរ កាលពី​ចុង​ឆ្នាំ​២០១៧ ត្រី​រាប់​រយ​ប្រភេទ​បាន​កឿង ក្នុង​តំបន់​បាត​អាង មិន​អាច​ផ្លាស់​ទី មក​ខ្សែ​ទឹក​ខាងក្រោម​បាន។

រីឯ​ត្រី​ជាច្រើន​ប្រភេទ​ទៀត​រួមមាន ត្រី​ឆ្ពិន ត្រី​ក្រាញ់ និង​ត្រី​សណ្ដាយ បាន​កើនឡើង​ច្រើន ក្នុង​តំបន់​អភិរក្ស​នោះ​។ ចំណែក ត្រី​ប៉ា​សេ​អ៊ី និង​ត្រី​ប៉ា​វ៉ា ដែល​ជា​ប្រភេទ​ត្រី​កម្រ​ក្នុង​តំបន់ បាន​ធ្លាក់ចុះ​ខ្លាំង​ស្ទើរតែ​ផុត​ពូជ។

ជុំវិញ​រឿង​នេះ អ្នកសម្របសម្រួល​សមាគម​ការពារ​សិទ្ធិមនុស្ស​អាដហុក (Adhoc) ខេត្ត​ស្ទឹងត្រែង លោក ចឹក ចិត្រា យល់​ថា ការ​ពង្រឹង​អនុវត្ត​ច្បាប់​នេសាទ និង​អប់រំ​ផ្សព្វផ្សាយ​ពី​ច្បាប់​ជលផល ឱ្យ​បាន​ទូលំទូលាយ គឺជា​រឿង​សំខាន់ ដែល​អាជ្ញាធរ​យកចិត្តទុកដាក់​ដោះស្រាយ។

លោក ចឹក ចិត្រា៖ «ប្រើប្រាស់​ឧបករណ៍​នេសាទ​ផ្សេងៗ ខុសច្បាប់​គួរតែ​ចាត់វិធានការ​តឹងរ៉ឹង ដើម្បី​ដាក់​បន្ទុក​ជន​ដែល​ប្រព្រឹត្ត​បទល្មើស​នេសាទ​ក្នុង​មូលដ្ឋាន»

អ្នកភូមិ​ក្បាល​រមាស​សង្កេត​ឃើញ​ថា រយៈពេល​ជាង ៦​ឆ្នាំ​កន្លង​ទៅ​នេះ តំបន់​បាត​អាង បាន​ប្រែ​ក្លាយ​ជា​កន្លែង​នេសាទ​ត្រី​យ៉ាង​ពេញទំហឹង ដោយ​ក្រុម​អ្នកនេសាទ​ចំណូលស្រុក លួច​ពង្រាយ​អួន​ព័ទ្ធ​ភូមិ​ក្បាល​រមាស​ចាស់ និង​តំបន់​ត្រី​រស់នៅ​ដើម្បី​ចាប់​ត្រី​មេ​ពូជ នាំទៅ​លក់​នៅ​ប្រទេស​វៀតណាម និង​តាម​បណ្តា​ខេត្ត​មួយ​ចំនួន។

មក​ទល់​ពេល​នេះ បាត​អាង​ទំនប់​វារីអគ្គិសនី​សេសាន​ក្រោម​ពីរ មាន​ផ្ទៃដី​ជាង ៣​ម៉ឺន​ហិកតារ និង​មាន​វិសាលភាព​ផ្ទៃ​ទឹកធំ​ធេង គ្រប​ដណ្តប់​ក្នុង​ឃុំ​ចំនួន ៣ គឺ​ឃុំ​ក្បាលរមាស ឃុំ​ស្រែគរ និង​ឃុំ​តាឡាត ស្រុក​សេសាន ខេត្ត​ស្ទឹងត្រែង លាតសន្ធឹង​ទល់​នឹង​ខេត្ត​រតនគិរី៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។