ប្រជា​​សហគមន៍​​ឧត្ដម​​ស្រែ​ពស់​​ខេត្ត​កំពង់ស្ពឺ​​បន្ត​ចុះ​​ការពារ​​ព្រៃ​​មេត្តា​​ធម្មជាតិ​​ទោះ​​ក្រុម​​ទាហាន​​​បាញ់​​គំរាម

ដោយ សុជីវី
2022.08.07
Share on WhatsApp
Share on WhatsApp
ប្រជា​​សហគមន៍​​ឧត្ដម​​ស្រែ​ពស់​​ខេត្ត​កំពង់ស្ពឺ​​បន្ត​ចុះ​​ការពារ​​ព្រៃ​​មេត្តា​​ធម្មជាតិ​​ទោះ​​ក្រុម​​ទាហាន​​​បាញ់​​គំរាម ក្រុមស្ត្រីប្រជាសហគមន៏​ការពារ​ធនធាន​ធម្មជាតិ​ឧត្តមស្រែពស់ ស្រុកឱរ៉ាល់ ខេត្តកំពង់ស្ពឺកាលពីថ្ងៃទី៧ ខែសីហា ឆ្នាំ២០២២។
រូប៖ ពលរដ្ឋ​ផ្ដល់​ឲ្យ

ប្រជា​សហគមន៍​ឧត្ដម​ស្រែ​ពស់​នៅ​ខេត្ត​កំពង់ស្ពឺ​ បន្ត​ចុះ​ការពារ​ព្រៃ​មេត្តា​ធម្មជាតិ​ បើ​ទោះបី​ជា​មាន​ក្រុម​ទាហាន​​ និង​ក្រុម​រថក្រោះ​ង៧០បាញ់​គំរាម​សម្លាប់​ពួកគាត់​​ក៏ដោយ ក៏​ពួកគាត់​មិន​ចុះញ៉ម​ និង​មិន​ខ្លាច​ស្លាប់​ឡើយ។ ប្រជា​សហគមន៍​ថា ពួកគាត់​នឹង​ខិតខំ​រក្សា​ព្រៃ​ឈើ​ដែល​នៅសល់​បន្តិចបន្តួច​នេះ​ទុក​ឲ្យ​កូនចៅ​ជំនាន់​ក្រោយ​មើល និង​គ្រាន់​អាស្រ័យ​ផល​ពី​ធនធាន​ធម្មជាតិ​ទាំងអស់​នេះ។

ប្រជាពលរដ្ឋ​ដែល​រស់​នៅ​ក្នុង​សហគមន៍​ឧត្ដម​ស្រែ​ពស់ ភូមិ​ពោធិ៍​មាស ឃុំ​ត្រពាំង​ជោរ ស្រុក​ឱរ៉ាល់ ប្ដេជ្ញា​នឹង​​រក្សា​ព្រៃ​សហគមន៍​ឧត្ដម​ស្រែ​ពស់ ឬ​ព្រៃ​មេត្តា​ធម្មជាតិ ឲ្យ​នៅ​គង់វង្ស​ដល់​ក្មេង​ជំនាន់​ក្រោយ ទោះបី​ជា​ពួកគាត់​ពលី​ជីវិត​ក៏​ដោយ​ ​ក៏​មិន​រួញរា​ដែរ។ ពលរដ្ឋ​ឃើញ​ការ​ឈូស​ឆាយ​​​ព្រៃ​របស់​សហគមន៍​ដែល​ប្រឹងប្រែង​រក្សា​​ជាង​ម្ភៃ​ឆ្នាំ​មក​ហើយ ពី​សំណាក់​ក្រុម​ទាហាន និង​ក្រុង​រថក្រោះ នៃ​អគ្គបញ្ជាការ​កងទ័ពជើងគោក​ ង៧០ ឥត​ស្រាកស្រាន្ត តាំង​ពី​ខែ​មករា មក​ទល់​នឹង​ខែ​កក្កដា​ឆ្នាំ​២០២២​នេះ។

ពលរដ្ឋ​រស់នៅ និង​អាស្រ័យ​ផល​ពី​ការ​រក​បន្លែ និង​អនុផល​ព្រៃឈើ​​នៅ​ក្បែរ​ភ្នំ​ឱរ៉ាល់​ ខេត្ត​កំពង់ស្ពឺ​លោកស្រី ឈួន សុំ ប្រាប់​វិទ្យុ​អាស៊ី​សេរី នៅថ្ងៃទី៧ខែសីហា​ថា មាន​ពួក​ទាហាន​កង ង៧០ មក​ឈូស​ឆាយ​ដី និង​ព្រៃឈើ​នៅ​តំបន់​ព្រៃ​ឧត្ដម​ស្រែ​ពស់ ពេល​ដែល​ពួក​សហគមន៍​ចូល​ទៅ​ឃាត់ ពួក​ទាហាន​ទាំងនោះ​បាន​ដក​កាំភ្លើង​បាញ់​ប្រឆិត​ជើង​ពួកគាត់ គំរាម​សម្លាប់​បើ​ពលរដ្ឋ​ណា​ហ៊ាន​រារាំង​ក្បួន​ឈូស​ឆាយ​នេះ និង​ប្រើ​ពាក្យ​ជេរ​ប្រមាថ​មក​លើ​ពួកគាត់​ជា​ស្ត្រី​ដែល​មាន​អាយុ​ស្មើ​នឹង​ម្ដាយ​របស់​ក្រុម​ទាហាន​នោះ។ លោកស្រី​ពោល​ទាំង​អួល​ដើម​ក​ថា លោកស្រី​មិន​នឹក​ស្មាន​ក្រុម​ទាហាន​​ក្មេងៗ​ទាំងអស់​នោះ ប្រើ​អាកប្បកិរិយា​ច្រឡោងខាម​ និង​​កំហឹង​មក​លើ​ពួកគាត់​ដូច្នេះ​ទេ៖ «គ្រាប់​កាំភ្លើង​ជ្រិះ​ៗ​ជើង អីចឹង​ខ្ញុំ​មាន​ការ​ភ័យ​ហើយ​ភ័យ​ខ្លាច​តាំង​ពី​កាល​នោះ​មក ពួក​ខ្ញុំ​វា​ភ័យ​ខ្លាំង​មែនទែន​​ថ្ងៃ​ហ្នុង​​ហើយ ដល់​ពេល​រត់​មក​​វា​កញ្ឆក់​ខាង​នេះ កញ្ឆក់​កាំបិត​ខ្ញុំ ហើយ​អា​ខាង​នេះ​កញ្ឆក់​ទូរស័ព្ទ​កាបូប​ទូរស័ព្ទ។ ដល់​ពេល​អីចឹង​ខ្ញុំ​ណែន​ដើមទ្រូង​ពេក​ ដើមទ្រូង​ពេក​ក៏​ឡើង​លើ​ច្រាំង​ហ្នឹង​មក ឡើង​អត់​ចង់​រួច​ទេ​ភ័យ​ខ្លាំង​ពេក ។ ដល់​ពេល​ភ័យ​ខ្លាំង​ពេក​ពួក​ខ្ញុំ​កាល​នុះ ​តាំង​ពី​កាល​នុះ​ខ្ញុំ​បាក់​ស្បាត​ចឹង​រហូត​មក​ទល់​ឥឡូវ​ហ្នឹង។ តែ​មាន​ការ​ទៅ(តវ៉ា)ទៀត ​ខ្ញុំ​ក៏​ទៅ​ទៀត ថ្ងៃ​មុន​ខ្ញុំ​ទៅ​មើល​អា​អ៊ីច​​ឈូស​ហ្នឹង»។​

ស្រដៀង​គ្នា​នេះ​ដែរ ពលរដ្ឋ​ម្នាក់​ទៀត ដែល​រស់​ពឹង​លើ​ការ​រក​បន្លែ​ផ្លែឈើ​នៅ​ភ្នំ​ឱរ៉ាល់​នេះ​ដែរ លោកស្រី ឈន សុខ ប្រាប់​ថា ពី​មុន​ពលរដ្ឋ​នៅ​ក្បែរ​នេះ​ អាច​ឃ្វាលគោ ក្របី នៅ​តំបន់​ស្រែ​ពស់​នេះ​បាន តែ​តាំង​ពី​មាន​ក្រុម​ទាហាន​ប្រមាណ​៤០គ្រួសារ​​មក​តាំង​ទី​លំនៅ នៅ​ទី​នេះ និង​បាន​កាប់​បំផ្លាញ​ព្រៃឈើ ឈូស​ឆាយ​ដី​គ្មាន​សល់។ លោកស្រី​បន្ត​ថា នៅ​ពេល​ដែល​ពលរដ្ឋ​បាត់​គោ ក្របី ចូល​ទៅ​រក​ក្នុង​ព្រៃ​ដែល​ពួក​ទាហាន​កំពុង​កាន់កាប់​គឺ​ឃើញ​ហើយ តែ​ឥឡូវ​ពួក​ទាហាន​មិន​ឲ្យ​ចូល​ទៅ​ជិត​តំបន់​នោះ​ទៀត​ទេ។ លោក​ស្រី​និយាយ​ទាំងអស់​សង្ឃឹម​ថា ពលរដ្ឋ​ពឹង​លើ​រដ្ឋាភិបាល​ជួយ​រក្សា​ព្រៃ​ឧត្ដម​ស្រែ​ពស់​​ដែល​សេសសល់​បន្តិចបន្តួច​នេះ។លោក​ស្រី​បន្ត​ថា ​ព្រៃ​ស្រោង​ទាំងនេះ​គង់វង្ស​មក​ដល់​សព្វថ្ងៃ​ដោយសារ​ពួកគាត់​នាំ​គ្នា​ការពារ។​លោកស្រី​បញ្ជាក់​ថា​ ពួក​ទាហាន​កង​ ង៧០ បាន​ប្រមាថ​អាយុ​ជីវិត​លោក​ស្រី ដោយ​ពោល​ថា​បើ​ពួកគេ​បាញ់​សម្លាប់​ពួក​លោកស្រី​បោះ​ខ្មោច​ចោល​កណ្ដាល​ព្រៃ ក៏​គ្មាន​ច្បាប់​ណា​ធ្វើ​អ្វី​ពួកគេ​បាន​ដែរ៖ «ចង់​ចាប់​ដាក់​គុក។ អ្នក​ឈូស​ឆាយ​អត់​រក​ចាប់​ដាក់​គុក​ទេ បែរ​រក​​អ្នក​ការពារ​ចង់​ចាប់​ដាក់​គុក​វិញ​។ ខ្ញុំ​ឆ្ងល់ ហើយ​ខ្ញុំ​ក៏​តូច​ចិត្ត​ជា​ខ្លាំង ពិបាក​ជា​ខ្លាំង សូម្បី​តែ គោ ពពែ លែង​ទៅ ​មើល​ក៏​មិន​បាត់។ ពេល​បាត់​ក៏​អត់​ហ៊ាន​ទៅ​រក​គោ​ដែរ ​ខ្លាច ខ្លាច​គេ​គំរាម​គេ​កំហែង​គេ​ចាប់ ចង់​ចាប់​ដាក់​គុក​ដាក់​អី ដាក់​គុក​ដាក់​ច្រវាក់»

វិទ្យុ​អាស៊ី​សេរី មិន​អាច​ទាក់ទង​សុំ​ការ​អត្ថាធិប្បាយ​​ជុំវិញ​បញ្ហា​នេះ ពី​អភិបាល​​ខេត្ត​កំពង់ស្ពឺ លោក វ៉ី សំណាង និង​ក្រុម​ទាហាន​​កង​រថក្រោះ​ ង៧០ បានទេ នៅល្ងាចថ្ងៃទី៧ ខែសីហា។

តែ​លោក​ធ្លាប់​មាន​ប្រសាសន៍​ថា កន្លងមក​នៅ​ពេល​មាន​បទល្មើស លោក​តែងតែ បញ្ជា​ឲ្យ​អាជ្ញាធរ​ពាក់​ព័ន្ធ​ចុះ​ទៅ​បង្ក្រាប​ភ្លាម ហើយ​លោក​បាន​ស្នើ​ឲ្យ​ប្រជា​សហគមន៍ និង​អង្គការ​សង្គម​ស៊ីវិល​ទាំងអស់​ សហការ​គ្នា​ជាមួយ​អាជ្ញាធរ ត្រូវ​រាយ​ការណ៍​ឲ្យ​បាន​ឆាប់​រហ័ស​ បើ​ឃើញ​បទ​ល្មើស​ព្រៃឈើ​កើតឡើង​នៅ​កន្លែងណា។

ជុំវិញ​រឿង​នេះ​ដែរ ប្រធាន​ផ្នែក​ស្រាវជ្រាវ​ និង​តស៊ូ​មតិ​នៃ​បណ្ដាញ​យុវជន​កម្ពុជា CYN លោក ហេង គឹម​ហុង យល់ឃើញ​ថា កង​កម្លាំង​ទាហាន ដែល​ជា​កម្លាំង​ពិសេស​សម្រាប់​ការពារ​ប្រទេស​ជាតិ មិន​គួរ​ប្រើ​ឥរិយាបថ​គ្មាន​សីលធម៌ ជេរ​ប្រមាថ​មើល​ងាយ រហូត​បាន​ដក​កាំភ្លើង​បាញ់​មក​លើ​ពលរដ្ឋ​ខ្លួន​ដូច្នេះ​ទេ បើ​ទោះជា​ក្រុម​ទាហាន​ទទួល​បាន​ដី​សម្បទាន​ពី​រដ្ឋ​នៅ​ព្រៃ​សហគមន៍​ឧត្ដម​ស្រែ​ពស់​ក៏​ដោយ។ លោក​ស្នើ​ដល់​រដ្ឋាភិបាល ឱ្យ​បញ្ឈប់​ក្រុម​ទាហាន​ទាំង​នោះ​យក​កាំភ្លើង​បាញ់​គំរាម​ប្រជាពលរដ្ឋ​បន្ត​ទៀត ទី២សុំ​ឲ្យ​សង្គ្រោះ​ព្រៃ​សហគមន៍​ឧត្ដម​ស្រែ​ពស់​ ឡើង​វិញ ឲ្យ​ដូចជា​សង្គ្រោះ​ព្រៃឈើ​នៅ​ភ្នំ​តាម៉ៅ​ដែរ៖ «ខ្ញុំ​មាន​សំណូមពរ​ពីរ​បាទ ទី១​ខាង​រដ្ឋបាល​ខេត្ត​មិន​គួរ​ព្រងើយកន្តើយ នឹង​អ្វី​ដែល​ខ្លួន​ឯង​បាន​ដឹង​ ហើយ​បន្ត​ឲ្យ​អ្នក​នៅ​ទី​នោះ​បង្ក​គំរាមកំហែង​ដល់​សន្តិសុខ​ប្រជាពលរដ្ឋ​បែប​នេះ​ទេ​បាទ ទី២ បើសិនជា​រដ្ឋាភិបាល​មិន​ទាន់​បាន​ដឹង​ទេ ខ្ញុំ​ជឿ​ថា​ព័ត៌មាន​នេះ ហើយ​ថ្ងៃនេះ​ខ្ញុំ​បាន​ចូល​ខំ​មិន(យោបល់)នៅ​ក្នុង​ផេក​របស់​នាយករដ្ឋមន្ត្រី ហ៊ុន សែន​ ដែរ ឲ្យ​បាន​ដឹង ហើយ​ដោះស្រាយ​ខ្ញុំ​សង្ឃឹម​រំពឹង​ថា​នឹង​មាន​ការ​ដោះស្រាយ ដូច​ករណី​ភ្នំ​តាម៉ៅ​ដែរ​បាទ»

ក្រសួង​បរិស្ថាន​កាល​ពី​ឆ្នាំ២០០២​ប្រកាស​ជា​ផ្លូវ​ការ​ថា ក្រសួង​ចាត់​ទុក​ព្រៃ​សហគមន៍​ឧត្ដម​ស្រែ​ពស់ ឬ​ហៅថា​ព្រៃ​មេត្តា​ធម្មជាតិ ជា​ព្រៃ​អភិរក្ស ព្រោះ​ព្រៃ​នេះ​ជា​ទី​ជម្រក​សម្រាប់​ឲ្យ​សត្វ​ព្រៃ​គ្រប់​ប្រភេទ​រស់​នៅ និង​ជា​ព្រៃភ្នំ​សម្រាប់​ផ្ដល់​ប្រយោជន៍​ដល់​សហគមន៍​ស្រែ​ពស់។

ព្រៃ​មេត្តា​ធម្មជាតិ​មាន​ផ្ទៃ​ក្រឡា ៨០០ ហិកតារ​ តែ​មក​ទល់​នឹង​​ពេល​នេះ ត្រូវ​បាន​ក្រុម​ទាហាន រថក្រោះ​កង ង៧០ អ្នក​មាន​លុយ​ មាន​អំណាច បាន​ឃុបឃិត​គ្នា​វាតទី​យក​ស្ទើរ​អស់ នៅ​សល់​ប្រហែល​៣០ហិកតារ  ហើយ​អាច​នឹង​ហិនហោច​ក្នុង​ពេល​ដ៏​ខ្លី​ខាង​មុខ ប្រសិនបើ​អាជ្ញាធរ​ពាក់ព័ន្ធ​នៅ​តែ​មិន​ជួយ​ទប់​ស្កាត់។

កាលពី​ខែ​សីហា ឆ្នាំ​២០២១ កន្លងទៅ រដ្ឋាភិបាល​បាន​ចេញ​អនុក្រឹត្យ ឆ្វៀល​ដី​ព្រៃ​សហគមន៍​ឧត្ដម​ស្រែ​ខ្ពស់​មាន​ទំហំ​ជិត ៣ រយ​ហិកតារ (២៦២,២៤ហិកតារ ពី​ដែន​ជម្រក​សត្វព្រៃ​ភ្នំ​ឱរ៉ាល់ ក្នុង​ភូមិ​ពោធិ៍​មាស ឃុំ​ត្រពាំង​ជោរ ស្រុក​ឱរ៉ាល់ ខេត្ត​កំពង់ស្ពឺ ដើម្បី​បែងចែក​ជូន​គ្រួសារ​យោធិន "​ង​-៧០” កងរថក្រោះ ៤១​គ្រួសារ សម្រាប់​សង់​លំនៅឋាន និង​បង្កបង្កើន​ផល។

ព្រៃ​សហគមន៍​នេះ មាន​សត្វព្រៃ​កម្រ​ជាច្រើន​ប្រភេទ​រស់នៅ រួមមាន ទោច ស្វា ក្ងោក មាន់ព្រៃ ឈ្លូស និង​ស្វា​ព្រាម​ជាដើម កំពុង​ប្រឈម​បាត់បង់​ទីជម្រក និង​ខ្លះ​​រត់​ទៅ​ជ្រក​នៅ​តំបន់​ផ្សេង ដោយសារ​ពុំ​មាន​ទី​ជម្រក ហើយ​មាន​សត្វព្រៃ​ខ្លះ​ទៀត ត្រូវ​ពួក​ជន​ខិលខូច​លួច​បរ​បាញ់​សម្លាប់ ធ្វើ​អាជីវកម្ម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ក្រុម​អ្នក​វិទ្យាសាស្ត្រ រក​ឃើញ​ត្រី​កម្រ​ដែល​ជិត​ផុត​ពូជ​នៅ​ទន្លេ​មេគង្គ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។