សហគមន៍ខេត្តកំពត សៀមរាប និងខេត្តស្ទឹងត្រែងបានទទួលពានរង្វាន់ទេសចរណ៍អាស៊ាន
2023.02.07
ពិធីទទួលជ័យលាភីពានរង្វាន់ ទេសចរណ៍អាស៊ាន នៅទីក្រុង យុក្យាការតា(Yogyakarta ) ប្រទេសឥណ្ឌូណេស៊ី កាលពីថ្ងៃទី៥ កុម្ភៈ ២០២៣។
រូប៖ មន្ទីរទេសចរណ៍ខេត្តកំពត
សហគមន៍ខេត្តកំពត ខេត្តសៀមរាប និងខេត្តស្ទឹងត្រែង បានទទួលជ័យលាភីពានរង្វាន់សហគមន៍ទេសចរណ៍ស្តង់ដារអាស៊ាន ក្នុងឆ្នាំ២០២៣ នៅប្រទេសឥណ្ឌូណេស៊ី ក្នុងកិច្ចខិតខំប្រឹងប្រែងថែទាំបរិស្ថាន និងធនធានធម្មជាតិ បម្រើវិស័យទេសចរណ៍។
ក្រសួងទេសចរណ៍សាទរ ចំពោះពានរង្វាន់នេះដោយចាត់ទុកថា ជាការលើកទឹកចិត្តឱ្យសហគមន៍ បន្តកិច្ចខំប្រឹងប្រែងបន្ថែមទៀត ដើម្បីឱ្យជីវភាពពួកគាត់រីកចម្រើន។
ប្រធានសហគមន៍ត្រពាំងសង្កែ ស្រុកទឹកឈូ ខេត្តកំពត លោក សឹម ហ៊ីម បានបង្ហាញពីបទពិសោធ គ្រប់គ្រងសហគមន៍អេកូទេសចរណ៍ត្រពាំងសង្កែឱ្យរីកចម្រើន ចាំបាច់ត្រូវសាមគ្គីគ្នារឹងមាំ ថែរក្សាព្រៃកោងកាងឱ្យគង់វង្ស ដោយត្រូវសហការល្អជាមួយអាជ្ញាធរ ជាពិសេស ត្រូវគ្រប់គ្រងថវិកាឱ្យមានតម្លាភាព។
លោក សឹម ហ៊ីម ថ្លែងបែបនេះ ក្រោយពីលោកទើបតែទទួលជ័យលាភីពានរង្វាន់ ទេសចរណ៍អាស៊ាន នៅទីក្រុង យុក្យាការតា(Yogyakarta ) ប្រទេសឥណ្ឌូណេស៊ី កាលពីថ្ងៃទី៥ កុម្ភៈ។
លោកថា ការទប់ស្កាត់បទល្មើសនេសាទ និងការអភិរក្សព្រៃកោងកាងឱ្យគង់វង្ស គឺជារឿងសំខាន់ ព្រោះតំបន់នោះ ជាប្រភពសេដ្ឋកិច្ចរបស់អ្នកនេសាទ និងជាកន្លែងទាក់ទាញភ្ញៀវទេសចរណ៍។
លោកថា ពានរង្វាន់នេះ ឆ្លុះបញ្ចាំងពីកិច្ចខំប្រឹងប្រែងរបស់សមាជិកសហគមន៍ចំនួន ០៣ ភូមិ ដែលចាប់ដៃគ្នា អភិវឌ្ឍន៍តំបន់ទេសចរណ៍ ដោយមានអភិបាលខេត្តកំពត លោក ម៉ៅ ធនិន ជួយជ្រោមជ្រែង៖ «គ្រាន់ចង់ឱ្យសហគមន៍ទាំងអស់ គាត់មានការចាប់អារម្មណ៍ឱ្យមែនទែន សម្រាប់ធនធានជលផល ជាពិសេសព្រៃកោងកាង ព្រោះព្រៃកោងកាងជាឆ្នាំងបាយរបស់អ្នកនេសាទ ព្រោះព្រៃកោងកាង វាជាវីឡារបស់ជីវចម្រុះ បើសិនជាព្រៃកោងកាង វានឹងកាត់បន្ថយចំណាយស្រុក ជួយបង្កើនមុខរបរ និងប្រាក់ចំណូលរបស់អ្នកនេសាទ»។
អេកូទេសចរណ៍ សហគមន៍ត្រពាំងសង្កែឋិតក្នុងភូមិចំនួន ៣ នៃឃុំត្រពាំងសង្កែ ស្រុកទឹកឈូ ខេត្តកំពត ឆ្ងាយពីរង្វង់មូលផ្លែធូរេន ៧គីឡូម៉ែត្រ។
សហគមន៍នេះមានព្រៃកោងកាងជិត ៥០ហិកតារ មានដែននេសាទ ជាង ៥រយហិកតារ (៥១០) ឋិតនៅអមសងខាងព្រែកមួយ ជាប់ដៃសមុទ្រ អមដោយទេសភាពស្រស់បំព្រង។
សហគមន៍នេះមានសមាជិកជាង ៧រយនាក់ (៧៥៧) ដែលរួមគ្នាបង្កើតតំបន់ទេសចរណ៍ធម្មជាតិ បម្រើវិស័យទេសចរណ៍ ហើយពលរដ្ឋចំនួន ០៥ ឃុំ បានអាស្រ័យផល ធនធានធម្មជាតិ ក្នុងសហគមន៍នេះ។
ក្នុងវេទិកាទេសចរណ៍អាស៊ាន២០២៣ ដែលប្រព្រឹត្តទៅ ថ្ងៃទី៥ ខែកុម្ភៈ នៅទីក្រុងយុក្យាការតា ប្រទេសឥណ្ឌូណេស៊ី កម្ពុជាបានទទួលពានរង្វាន់សរុបចំនួន១៧ ពីការអនុវត្តស្តង់ដារទេសចរណ៍អាស៊ាន ក្នុងឆ្នាំ២០២៣។
ពានរង្វាន់ទាំងនោះ ចែងជា ៤ប្រភេទរួមមាន រង្វាន់ផ្ទះស្នាក់ស្តង់ដារអាស៊ាន ចំនួន៥ពានរង្វាន់សហគមន៍ទេសចរណ៍ស្តង់ដារអាស៊ាន ចំនួន៣ ពានរង្វាន់បង្គន់អនាម័យសាធារណៈស្តង់ដារអាស៊ាន ចំនួន៥ និងពានរង្វាន់សេវាស្ប៉ាស្តង់ដារអាស៊ាន ចំនួន៤ ។
ចំណែកឯពានរង្វាន់ សហគមន៍ទេសចរណ៍ស្តង់ដារអាស៊ាន ចំនួន ៣ខេត្ត គឺ សហគមន៍អេកូទេសចរណ៍ត្រពាំងសង្កែ ក្នុងខេត្តកំពត សហគមន៍អេកូទេសចរណ៍កោះហាន ក្នុងខេត្តស្ទឹងត្រែង និងសហគមន៍អេកូទេសចរណ៍អន្លង់ធំ ក្នុងខេត្តសៀមរាប។
ឆ្លើយតបរឿងនេះ អ្នកនាំពាក្យក្រសួងទេសចរណ៍លោក តុប សុភ័ក មានប្រសាសន៍ថា ការផ្តល់ពានរង្វាន់អន្តរជាតិនេះ ជាការលើកទឹកចិត្ត សហគមន៍ដែលរៀបចំតំបន់អេកូទេសចរណ៍បានល្អ និងឆ្លុះបញ្ចាំងពីគំរូភាពមួយ ឱ្យសហគមន៍ដទៃទៀត មកសិក្សា និងស្វែងយល់។
លោកបញ្ជាក់ថា ពានរង្វាន់នេះ ជាកិត្តិយសដ៏ពិសេស ជូនសហគមន៍ដែលប្រឹងប្រែងរៀបចំតំបន់ទេសចរណ៍បានល្អ ស្របតាមស្តង់ដារអាស៊ាន ទាក់ទាញភ្ញៀវទេសចរណ៍ ដោយអាចរកប្រាក់ចំណូលបាននៅហ្នឹងកន្លែង។
លោក តុប សុភ័ក៖ «សហគមន៍ទេសចរណ៍នេះ ក្រសួងទេសចរណ៍រដ្ឋមន្ត្រីលោកយកចិត្តទុកដាក់ណាស់ រដ្ឋាភិបាលក៏ជួយជំរុញបន្ថែម មានកន្លែងខ្លះមានដៃគូ អភិវឌ្ឍន៍ លោកជួយ រួមចំណែកឱ្យសហគមន៍បានល្អប្រសើរ ព្រោះនៅពេលដែលភ្ញៀវទេសចរចូលសហគមន៍ គឺចំណូលបានមក អំពីទេសចរណ៍ហ្នឹង វាបានចូលដល់សេដ្ឋកិច្ចផ្ទាល់ ដល់ប្រជាសហគមន៍តែម្តង»។
លោក សឹម ហ៊ីម បន្ថែមថា សហគមន៍របស់លោក មានបម្រើសេវាកម្មទេសចរណ៍រួមមាន ជិះទូកទស្សនាព្រៃកោងកាង តាមព្រែកត្រពាំងសង្កែ សេវាកម្មស្នាក់នៅ និងម្ហូបអាហារ។ បន្ថែមពីនេះ ការដាំកូនកោងកាង គឺជាគោលការណ៍សំខាន់ ដែលសហគមន៍របស់លោក លើកទឹកចិត្តឱ្យភ្ញៀវទេសចរណ៍ដាំ ជាអនុស្សាវរីយ៍។ លោកថា នៅពេលដែលពលរដ្ឋមូលដ្ឋានអាចរកប្រាក់ចំណូល ផ្គត់ផ្គង់ជីវភាព គឺកាត់បន្ថយការធ្វើចំណាកស្រុកបានច្រើន។
ប្រធានកម្មវិធីស្រាវជ្រាវ និងតស៊ូមតិ នៃសមាគមបណ្ដាញ យុវជនកម្ពុជាលោក ហេង គឹមហុង សាទរចំពោះជ័យលាភីនេះ ដែលលោកចាត់ទុកថា ពលរដ្ឋខ្មែរគ្រប់តំបន់ គួរតែចូលរួមការពារ និងប្រើប្រាស់សក្ដានុពលធនធានធម្មជាតិ និងបរិស្ថានឱ្យល្អប្រសើរ។
លោក ហេង គឹមហុង៖ «រឿងនេះបញ្ជាក់ឱ្យឃើញថា ពលរដ្ឋរបស់យើងគួរតែចូលរួមឱ្យបានច្រើនបន្ថែមទៀត ក្នុងកិច្ចគាំពារធនធានធម្មជាតិ ជាពិសេសជាសញ្ញាបង្ហាញទៅ អ្នកមានសមត្ថកិច្ច គួរតែបង្កើនការយកចិត្តទុកដាក់ ចំពោះសកម្មភាពអេកូទេសចរណ៍ឱ្យបានច្រើន និងផ្តល់មូលនិធិ ធនធានមនុស្ស និងធនធានបច្ចេកទេសជាដើម»។
ក្រសួងទេសចរណ៍ ឱ្យដឹងថា នៅកម្ពុជាមានសហគមន៍ អេកូទេសចរណ៍ ៨០កន្លែង ដែលភាគច្រើន ជាតំបន់អេកូទេសចរណ៍ធម្មជាតិមានព្រៃកោងកាងតាមសមុទ្រ ទន្លេ និងស្ទឹង។
តំបន់អេកូទេសចរណ៍ទាំងនេះ ក្រសួងចាត់ទុកជាគោលដៅ ទាញប្រយោជន៍ពីទេសភាព ធម្មជាតិ ទាក់ទាញភ្ញៀវទេសចរទៅលេងកម្សាន្ត ប្រកបដោយភាពងាយស្រួល កក់ក្តៅ សុវត្ថិភាព ស្អាត និងធម្មជាតិបៃតង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- អ្នកឃ្លាំមើលថា រដ្ឋមន្ត្រីការបរទេសកម្ពុជា និយាយភូតកុហកពិភពលោកថាកម្ពុជាគោរពសិទ្ធិមនុស្ស និងនីតិរដ្ឋ