ឧកញ៉ា គង់ ក្រឹង និង​បក្សពួក​អាច​នឹង​ត្រូវ​ឃុំខ្លួន​នៅ​ពន្ធនាគារ​ខេត្ត​ក្រចេះ

ដោយ វ៉ែន សុមេធ
2019-08-17
អ៊ីម៉ែល
មតិ
Share
បោះពុម្ព
ឧកញ៉ា គង់ ក្រឹង ពេល​ត្រូវ​បាន​ឃាត់​ខ្លួន​ករណី​ព្រៃឈើ កាល​ពី​ថ្ងៃ​ទី១៥ ខែ​សីហា ឆ្នាំ​២០១៩។
ឧកញ៉ា គង់ ក្រឹង ពេល​ត្រូវ​បាន​ឃាត់​ខ្លួន​ករណី​ព្រៃឈើ កាល​ពី​ថ្ងៃ​ទី១៥ ខែ​សីហា ឆ្នាំ​២០១៩។
រូបពី​កងរាជអាវុធ​ហត្ថ​លើផ្ទៃប្រទេស

អ្នកនាំពាក្យ​គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ ប្រាប់​អាស៊ីសេរី​នៅ​រសៀល​ថ្ងៃទី១៦ សីហា​ថា ជនសង្ស័យ​ជា ឧកញ៉ា គង់ ក្រឹង អាច​នឹង​ឃុំខ្លួន​នៅ​ពន្ធនាគារ​ខេត្ត​ក្រចេះ ហើយ​មក​​ទល់​​ពេល​នេះ​​សមត្ថកិច្ច​កំពុង​សាកសួរ​នៅ​បញ្ជាការដ្ឋាន​អាវុធហត្ថ​ខេត្ត​នេះ​នៅឡើយ។ សកម្មជន​បរិស្ថាន​ជំរុញ​ឲ្យ​គណៈកម្មការ​ជាតិ ស៊ើបអង្កេត​សមត្ថកិច្ច និង​អាជ្ញាធរ​ពាក់ព័ន្ធ​ណា ដែល​ទទួល​សំណូក​ពី​បទ​ល្មើស​ព្រៃឈើ មក​អនុវត្ត​ច្បាប់​ជា​ធរមាន។

អ្នកនាំពាក្យ​គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ លោក អេង ហ៊ី បញ្ជាក់​ថា គណៈកម្មការ​ជាតិ​នៅតែ​បន្ត​សាកសួរ​ជនសង្ស័យ ឧកញ៉ា គង់ ក្រឹង និង​បក្ខពួក​ម្នាក់ទៀត​នៅ​បញ្ជា​ការដ្ឋាន​អាវុធហត្ថ​ខេត្ត​ក្រចេះ ដោយមាន​ការ​សម្របសម្រួល​ពី​ព្រះរាជអាជ្ញា នៅ​រសៀល​ថ្ងៃ​ទី១៦ ខែ​សីហា​នេះ។ លោក​អះអាង​ថា ជន​ណា​ដែល​ពាក់ព័ន្ធ​បទល្មើស​ព្រៃឈើ និង​ប្រព្រឹត្ត​អំពើពុករលួយ​រឿង​បទល្មើស គណៈកម្មការ​ជាតិ​នឹង​អនុវត្ត​ច្បាប់ ប្រសិនបើ​រក​ឃើញ​ភស្តុតាង និង​បទល្មើស​ជាក់ស្ដែង​ច្បាស់លាស់។

ចំពោះ​សំនួរ​ដែល​សួរ​ថា ឧកញ៉ា គង់ ក្រឹង ជួញដូរ​ឈើ​ខុសច្បាប់ ៦ ឆ្នាំ​មក​ហើយ ហេតុអ្វី​ទើបតែ​អនុវត្ត​ច្បាប់​ពេលនេះ​? អ្នកនាំពាក្យ​រូប​នេះ ឆ្លើយ​ថា លោក​ដឹង​តែ​ការស៊ើបអង្កេត​របស់​គណៈកម្មការ​ជាតិ ហើយ​កាលពី ៦​ឆ្នាំមុន ពុំ​ទាន់​បង្កើត​គណៈកម្មការ​ជាតិ​នៅឡើយ​ទេ​៖ «ខ្ញុំ​អត់​ដឹង​ដែរ ខ្ញុំ​ដឹង​តែ​ការស៊ើបអង្កេត​របស់​គណៈកម្មការ​ជាតិ ចំពោះ​ជន​ស៊ីវិល (​សង្គម​ស៊ីវិល និង​សកម្មជន​បរិស្ថាន​) មិន​ដឹង​យក​ច្បាប់​ណា​មក​ស៊ើបអង្កេត ខ្ញុំ​អត់​ដឹង​ដែរ? ៦ និង ៧ ឆ្នាំមុន គណៈកម្មការ​ជាតិ​មិនទាន់​បង្កើត​ផង»

ព្រះរាជអាជ្ញា​អម​សាលាដំបូង​ខេត្ត​ក្រចេះ លោក កែវ សុភាព បដិសេធ​មិន​អធិប្បាយ​រឿង​នេះ​ប្រាប់​​អាស៊ី​សេរី​ទេ នៅ​ថ្ងៃ​ទី​១៦ ខែ​សីហា ដោយ​លោក​បាន​ចុច​ផ្តាច់​ទូរស័ព្ទ។

កាល​ពី​យប់​ថ្ងៃ​ទី១៥ សីហា គណៈកម្មការ​ជាតិ​បាន​ឃាត់ខ្លួន​ជនសង្ស័យ ២​នាក់ ទាក់ទិន​បទល្មើស​ព្រៃឈើ គឺ​ឧកញ៉ា គង់ ក្រឹង និង​បុរស​ម្នាក់ទៀត​ត្រូវជា​កូន​ប្រសារ ឈ្មោះ ម៉ាត់ ណាស៊ាត។ ការ​ឃាត់ខ្លួន​នេះ ក្រោយ​ពី​សាកសួរ​ពេញ​មួយថ្ងៃ ទាក់ទិន​បទល្មើស​ព្រៃឈើ ឆ្លងដែន​ទៅ​វៀតណាម និង​ការ​បើក​ទីតាំង​ប្រមូល​ទិញ​ឈើ​ខ្នាត​ធំ ជាប់​ព្រំដែន​វៀតណាម ក្នុង​ស្រុក​ស្នូល ខេត្ត​ក្រចេះ។

សកម្មជន​បរិស្ថាន ដែល​ចុះ​អង្កេត​រឿង​នេះ និង​បាន​បន្លំ​ខ្លួន​ជា​អ្នក​រកស៊ី​ឈើ អះអាង​ថា ក្រុម​អ្នក​ដឹកឈើ​តាម​ម៉ូតូ លក់​ឲ្យ​ឧកញ៉ា គង់ ក្រឹង បាន​បង្ហើប​ថា ការ​ដឹក​ជញ្ជូន​ឈើ​ចេញពី​ព្រៃ​អភិរក្ស​ក្នុង​ខេត្ត​មណ្ឌលគិរី ចូល​ក្នុង​ឃ្លាំង ឧកញ៉ា គង់ ក្រឹង អាច​ធ្វើ​ទៅ​បាន ត្រូវ​បង់លុយ​ឲ្យ​សមត្ថកិច្ច​ពាក់ព័ន្ធ​ចាប់ពី ៥​ម៉ឺន​រៀល ទៅ ១០​ម៉ឺន​រៀល ជា​ថ្នូរ​មិន​អនុវត្ត​ច្បាប់។ ពួកគេ​អះអាង​ថា ឧកញ៉ា​រូប​នេះ ជា​អ្នក​កាង​ជំនួញ​ឈើ​តាម​ម៉ូតូ យ៉ាងហោចណាស់ ៣០០​គ្រឿង ក្នុង​មួយ​ថ្ងៃៗ ចូល​ការដ្ឋាន​ស្តុក​ឈើ​របស់​ខ្លួន។ នេះ​មិន​រាប់បញ្ចូល​ការ​ដឹក​ឈើ​តាម​គោយន្ត និង​កាង​រថយន្ត​យី​ឌុប​របស់​ឈ្មួញ​ដទៃ​ទៀត​ទៅ​លក់​នៅ​ប្រទេស​វៀតណាម​តាម​ច្រក​អន្តរជាតិ​ត្រពាំង​ស្រែ និង​ចក្រ​របៀង​មួយ​ចំនួន​ទៀត ក្នុងស្រុក​ស្នួល។

សកម្មជន​បរិស្ថាន លោក ហេង ស្រស់ ដែល​ចុះ​អង្កេត​រឿង​នេះ អះអាង​ថា ក្រុម​អ្នក​ដឹកឈើ​បាន​បង្ហើប​ថា ឧកញ៉ា គង់ ក្រឹង បាន​សូកប៉ាន់​សមត្ថកិច្ច និង​អាជ្ញាធរ​ខេត្ត​ក្រចេះ ៩​ស្ថាប័ន ជា​ថ្នូរ​ធ្វើ​អាជីវកម្ម​ឈើ​ខ្នាត​ធំ​លក់​ទៅ​ប្រទេស​វៀតណាម និង​បើក​ទីតាំង​ទិញ​ឈើ​ពី​ក្រុម​កម្មករ​។ តែ​យ៉ាងណា​ពួកគេ​មិន​បញ្ជាក់​លម្អិត​ពី​ឈ្មោះ ស្ថាប័ន​ណាខ្លះ​នោះ​ទេ​? ក៏ប៉ុន្តែ​ក្នុងចំណោម ៩​ស្ថាប័ន​ទាំង​នោះ មាន​ពីរ ស្ថាប័ន​ដែល​ទទួល​សំណូក​ច្រើន​ជាងគេ គឺ​មន្ត្រី​ជំនាញ​រដ្ឋបាល​ព្រៃឈើ និង​មន្ត្រី​បរិស្ថាន៖ «យើង​ចង់​ឲ្យ​តុលាការ​ចុះ​ស៊ើបអង្កេត និង​ហៅ​អ្នក​ពាក់ព័ន្ធ​ដូចជា​មន្ត្រី ថ្នាក់​ខេត្ត​ហ្នឹង​មក​សាកសួរ​ទាំងអស់ ព្រោះ​យើង​ដឹង​ស្រាប់​ហើយ​ថា សម្តេច ស ខេង គាត់​បាន​ប្រកាស​ថា រាល់​ក្នុង​ទឹកដី​របស់​អ្នកណា​ដែល​មាន​បទល្មើស​ព្រៃឈើ គឺ​អាជ្ញាធរ​ខេត្ត​នោះ ត្រូវតែ​ទទួលខុសត្រូវ។ អ៊ីចឹង​ហើយ តុលាការ​ត្រូវតែ​ហៅ អាជ្ញាធរ​ខេត្ត​នោះ មក​សាកសួរ​និង​ដេញដោល ហេតុ​អី​បាន​ជា បណ្ដែតបណ្ដោយ​ឲ្យ​មានការ​កាប់​បំផ្លាញ​ព្រៃឈើ និង​បណ្ដោយ​ឲ្យ​មានការ​ដឹកជញ្ជូន​ឈើ​ទៅវិញ?»

មន្ត្រី​ជាន់ខ្ពស់​សមាគម​ អាដហុក (Adhoc) លោក ប៉ែន ប៊ុណ្ណារ៍ ឲ្យ​ដឹង​ថា អាជ្ញាធរ​ពាក់ព័ន្ធ​ខេត្ត​ក្រចេះ និង​សមត្ថកិច្ច​មួយ​ចំនួន​មាន​ទម្លាប់​ទទួល​ប្រយោជន៍​ពី​ឧកញ៉ា គង់ ក្រឹង ជា​ថ្នូរ​មិន​អនុវត្ត​ច្បាប់​ព្រៃឈើ ជាច្រើន​ឆ្នាំ​មក​ហើយ ល្មម​ដល់​ពេល​ដែល​គណៈកម្មការ​ជំនាញ និង​អយ្យការ​ស៊ើបអង្កេត ករណី​អំពើពុករលួយ​មន្ត្រី​គ្រាក់ៗ ​ទាំង​នោះ​មក​អនុវត្ត​ច្បាប់​។ លោក​អំពាវនាវ​ឲ្យ​ពលរដ្ឋ​រួមគ្នា​តាមដាន ការអនុវត្ត​ច្បាប់​របស់​គណៈកម្មការ​ជាតិ និង​តុលាការ​ករណី​នេះ ក្នុង​បំណង​រួមចំណែក​ការពារ​ធនធានធម្មជាតិ​នៅ​សេសសល់​ចុង​ក្រោយ​៖ «អំពើពុករលួយ​ពុំ​មែន​មាន​តែ​នេះ​ទេ (សមត្ថកិច្ច និង​អាជ្ញាធរ​) គឺ​ក្រុម​តុលាការ​ក៏​ទទួល​បាន​ដែរ ហើយ​ច្រើន​ៗ​ ទៀត ឥឡូវ​ឋិត​ក្នុង​ភាព​ភិតភ័យ​កើតទុក្ខ​ទាំងអស់​គ្នា​។ យើង​ដឹង​ថា តើ​សំណុំរឿង​ហ្នឹង តើ​គណៈកម្មការ​ជាតិ​គាត់​យល់​ឃើញ​ថា ស្ថាប័ន​តុលាការ មាន​ភាព​ពាក់ព័ន្ធ ឬ​មិន​អាច​ស្រាវជ្រាវ​រឿង​បទល្មើស​ឧក្រិដ្ឋ គេ​អាច​បញ្ជូន​ទៅ​សាលាដំបូង​រាជធានី​ភ្នំពេញ​។ ឥឡូវ​យើង​មិនទាន់​ដឹង​ថា តើ​គណៈកម្មការ​ជាតិ​លោក​ដាក់ (​បញ្ជូន គង់ ក្រឹង) ទៅ​ណា​ទេ​

សកម្មជន​បរិស្ថាន​រក​ឃើញ​ថា ឧកញ៉ា គង់ ក្រឹង បាន​ចាប់ផ្ដើម​ធ្វើ​អាជីវកម្ម​ឈើ​ខុសច្បាប់​ទ្រង់ទ្រាយ​ធំ និង​រត់ពន្ធ​ឈើ​ឆ្លងដែន​ខុសច្បាប់​ទៅ​វៀតណាម តាំងពី​ឆ្នាំ​២០១៣ ចំណេញ​ប្រាក់​រាប់​លាន​ដុល្លារ និង ទទួល​បាន​ងារ​ជា​ឧកញ៉ា។ ឧកញ៉ា​រូប​នេះ មាន​ឃ្លាំង​ស្តុក​ឈើ​ធំៗ ៣​ទីតាំង​ផ្សេងគ្នា​ក្នុងស្រុក​ស្នូល ដែល​មាន​សន្តិសុខ និង​យោធា យាមកាម​យ៉ាង​ប្រុងប្រយ័ត្ន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល