ជំនន់ទឹកភ្លៀងនៅតាមខេត្តជាប់មាត់សមុទ្រ ចាប់ផ្ដើមស្រកបណ្ដើរៗ ហើយខណៈខេត្តចំនួន ២ នៅតំបន់ខ្ពង់រាបភាគឦសាន គឺខេត្តរតនគិរី និងខេត្តមណ្ឌលគិរី កំពុងជន់លិចខ្លាំង។
ក្រុមពលរដ្ឋ និងមន្ត្រីអង្គការសង្គមស៊ីវិល ឱ្យដឹងថា តំបន់មួយចំនួន ដែលរងការជន់លិចដោយទឹកភ្លៀង នៅខេត្តព្រះសីហនុ កោះកុង កំពត និងកែប បានស្រកចុះបណ្ដើរៗហើយ ដោយសារគ្មានភ្លៀងធ្លាក់បន្ត និងការហូរចាក់ច្រោះទៅក្នុងសមុទ្រ។ ប៉ុន្តែពលរដ្ឋនៅឯស្រុកកោះញែក ខេត្តមណ្ឌលគិរី និងនៅស្រុកលំផាត់ ខេត្តរតនគិរី វិញ កំពុងជន់លិចខ្លាំង។
សកម្មជនបរិស្ថាន លោក ថុន រដ្ឋា ដែលចុះទៅឃ្លាំមើលជំនន់ទឹកភ្លៀងនៅខេត្តព្រះសីហនុ ឱ្យដឹងថា ទឹកចាប់ផ្ដើមស្រកឃើញដីបណ្ដើរៗ ហើយ នៅថ្ងៃទី១០ សីហា។ តែពលរដ្ឋមិនទាន់ហ៊ានជញ្ជូនអីវ៉ាន់ចូលផ្ទះ ឬទម្លាក់ចុះក្រោមទេ ដោយសារ ទឹកអាចជន់វិញគ្រប់ពេល នៅពេលភ្លៀងចាប់ផ្ដើមធ្លាក់។ លោកថា សម្រាប់ខេត្តព្រះសីហនុ ភ្លៀងត្រឹមកម្រិត ២ម៉ោងជាប់គ្នា គឺអាចលិចលង់តំបន់មួយចំនួនក្នុងកម្រិតធ្ងន់ធ្ងរបាន។ ចំណែកភ្ញៀវទេសចរ មានលក្ខណៈធម្មតា ពួកគេអង្គុយហូបអាហារនៅតូបមាត់សមុទ្រ តែមិនចុះលេងទឹកសមុទ្រទេ ព្រោះតែមានរលកធំៗ បក់បោក៖ «ពួកគាត់ចាប់ផ្ដើមសំអាតភក់ ដែលវាកក នៅលើ និងកៀនៗផ្ទះរបស់ពួកគាត់ហ្នឹង។ ប៉ុន្តែខ្ញុំឃើញថា អ្នកខ្លះមិនទាន់ហ៊ានយកអីវ៉ាន់ ដាក់ត្រឹមត្រូវទេ ព្រោះបារម្ភថា បើសិនជាមានភ្លៀង ដូចខ្ញុំបញ្ជាក់អ៊ីចឹង តែលើសពី២ម៉ោង ជាប់គ្នា គឺចាប់ផ្ដើមលិចទៀត។ ថ្ងៃហ្នឹង ដោយសារតែមេឃបើកថ្ងៃ គួរសម ហើយយើងឃើញថា មិនមានភ្លៀងអ្វីទេ អ៊ីចឹងពួកគាត់បើកលក់ជាធម្មតា ហើយមានអ្នកមកអង្គុយញ៉ាំ នៅមាត់សមុទ្រជាធម្មតា។ បញ្ហាអត់មានលូ ហើយនិងប្រឡាយតូចហ្នឹង ដែលមិនអាចឱ្យទឹក មានលទ្ធភាពទាញទឹកចូលទៅ សមុទ្របាន។ តែនៅពេលដែលមានភ្លៀងទៅ ទឹកហ្នឹងអាចហូរបន្តិចម្ដងៗ អស់ដោយខ្លួនឯង»។
ចំណែកគេហទំព័រហ្វេសប៊ុក (facebook) របស់រដ្ឋបាលខេត្តព្រះសីហនុ មិនទាន់ចុះផ្សាយអំពី ស្ថានភាពទឹកថា មានកម្រិតណា ហើយទ្រព្យសម្បត្តិពលរដ្ឋចំនួនប៉ុន្មានត្រូវខូចខាតនៅឡើយទេ។ ប៉ុន្តែកាលពីថ្ងៃទី៩ សីហា មនុស្ស ៣នាក់ បានស្លាប់ ដោយសាររលំបាក់របងសង្កត់ពីលើ នៅពេលមានជំនន់ទឹកភ្លៀង។ អ្នកស្លាប់ម្នាក់ជាមេការសំណង់ជនជាតិចិន និង ២នាក់ ជាកម្មករជនជាតិខ្មែរ។ ប្រភពដដែលចុះផ្សាយថា អភិបាលខេត្តព្រះសីហនុ លោក គួច ចំរើន បានចុះទៅមើលតាមទីតាំងទឹកជំនន់ផ្លូវជាតិ ដែលរងការខូចខាត និងបញ្ជាឱ្យរៀបចំគម្រោងជួសជុលផ្លូវឡើងវិញជាបន្ទាន់។
នៅឯខេត្តកោះកុងវិញ អ្នកសម្របសម្រួលសមាគមអាដហុក (Adhoc) លោក មាន ព្រហ្មមុនី ឱ្យដឹង ថា មិនមានការលិចលង់ធ្ងន់ធ្ងរទេ ប៉ុន្តែមានការបាក់ស្រុតផ្លូវជាតិលេខ៤៨ ម្ដុំផ្លូវទៅតំបន់ទេសចរណ៍តាតៃ។ លោកថា នៅខេត្តកោះកុង មិនទាន់មានព័ត៌មានអំពីអ្នករងគ្រោះពីទឹកជំនន់ទេ តែអ្នកនេសាទ បានផ្អាកចេញទូកទៅរកត្រី នៅសមុទ្រ ជាង ១សប្ដាហ៍ហើយ៖ «តាតៃបាក់ផ្លូវស្រុតទៅក្រោមហ្មង។ អត់ទំនប់ទេ អាហ្នឹងកន្លែងផ្លូវជាតិ ៤៨ បាក់មួយកំណាត់ចុះទៅក្រោម។ អាហ្នឹងបាក់តែញយ ផ្លូវចាក់ស្ដើង ហើយវាតូចផង»។
គេហទំព័រហ្វេសប៊ុករបស់រដ្ឋបាលខេត្តកោះកុង ផ្សាយថា ពលរដ្ឋរងគ្រោះពីជំនន់ទឹកភ្លៀងខ្លាំង គឺនៅភូមិកោះប៉ោ ឃុំប៉ាក់ខ្លង ស្រុកមណ្ឌលសីមា មានការប៉ះពាល់ដល់ស្ពាន វត្ត សាលារៀន ផ្ទះប្រជាពលរដ្ឋ ជាដើម។ អាជ្ញាធរស្រុកមណ្ឌលសីមា អំពាវនាវដល់ពលរដ្ឋឱ្យបង្កើនការប្រុងប្រយ័ត្ននិងស្វែងរកទីទួលមានសុវត្ថិភាព។ លោក មាន ព្រហ្មមុនី ឱ្យដឹងដែរថា ទឹកបានស្រកខ្លះហើយ នៅថ្ងៃទី១០ សីហា ដោយសារគ្មានភ្លៀងធ្លាក់បន្ត។
ចំណែកគេហទំព័ររបស់រដ្ឋបាលខេត្តកំពត ចុះផ្សាយថា កន្លែងដែលរងគ្រោះខ្លាំង គឺស្រុកទឹកឈូ និងក្រុងកំពត ដែលនៅជាប់មាត់ព្រែកកំពត និងជាផ្លូវទឹក ហូរចុះពីទំនប់វារីអគ្គិសនីភ្នំកំចាយ។ តំបន់លិចលង់ខ្លាំង គឺនៅភូមិអណ្ដូងជីម៉ឺន និងភូមិកំពង់គ្រែង ក្នុងឃុំកំពង់គ្រែង ស្រុកទឹកឈូ និងម្ដុំស្ថានីយរថភ្លើងខេត្តកំពត ស្ថិតនៅភូមិស្វាយធំ និងភូមិក្រាំង សង្កាត់ក្រាំងអំពិល ក្រុងកំពត។
សមាជិកក្រុមប្រឹក្សាជាប់ឆ្នោតខេត្តកំពត មកពីគណបក្សសង្គ្រោះជាតិ លោក កូវ យិតឡាយ ឱ្យដឹងថា តំបន់លិចលង់នៅផ្លូវរថភ្លើង ជាប់មាត់ព្រែកកំពត រងការលិចជម្រៅកន្លះម៉ែត្រ។ លោកថា លិចខ្លាំងនៅថ្ងៃទី៩ សីហា ដោយសារធ្លាក់ភ្លៀង ទឹកសមុទ្រជោរឡើង និងការបង្ហូរទឹកពីទំនប់វារីអគ្គិសនីលើភ្នំកំចាយ។ លោក កូវ យិតឡាយ ឱ្យដឹងទៀតថា អ្នកស្រុកទឹកឈូ ច្រើនធ្វើផ្ទះខ្ពស់ពីដីខ្លាំង ដើម្បីបង្ការទឹកជំនន់រាល់ឆ្នាំ បង្កឡើងដោយសារការបើកបង្ហូរទឹកពីវារីអគ្គិសនី ទឹកភ្លៀង និងការជោរឡើងនៃទឹកសមុទ្រនោះ៖ «និយាយរួមវាគួបផ្សំគ្នា ទឹកជំនោរ អាទឹកជោរផង ទឹកភ្លៀងផង ការបើកទឹកជ្រោះមកផង។ ក្រុងកំពតលិចដែរបង ប៉ុន្តែវាលិចតិចតួចដែរទេ។ ធម្មតាយើងមានលូ កាលណាអត់ភ្លៀងលូ មិនចុះទៅព្រែក ទឹកស្អុយក្នុងក្រុងវាត្រូវចុះទៅព្រែក។ កាលណាយើងទប់មាត់ព្រែក ក៏វាឡើងតាមលូដែរ អាហ្នឹងគឺអត់មានវិធីសាស្ត្រទប់ទេណា។ ខាន ( ភ្លៀង ) ប៉ុន្មានឆ្នាំដែរ ទើបលិចឆ្នាំហ្នឹងវិញ។ វាមិនទៀងទាត់ទេ។ និយាយទៅ បើភ្លៀងហើយអត់ទឹកជំនោរមក ក៏វាអត់សូវអ្វីដែរ។ អ៊ីចឹងណា បើកាលណាភ្លៀងហើយ មានទឹកជំនោរ វាទល់គ្នា ទឹកសមុទ្រចូលមក ហើយអាមេឃភ្លៀងមក មិនអាចបុកចុះបាន វានៅទល់ហ្នឹង។ ព្រឹកមិញភ្លៀង តែថ្ងៃរសៀលហ្នឹងរាំងចេស។ បើកាលណា មិនភ្លៀងអ៊ីចឹង ធ្វើឱ្យទឹកហ្នឹងចុះហើយណា»។
ចំណែកគេហទំព័ររដ្ឋបាលខេត្តកែប មិនបានចុះផ្សាយពីស្ថានភាពភ្លៀងនៅខេត្តជាប់មាត់សមុទ្រនេះឡើយ។ អាស៊ីសេរី ក៏មិនអាចសុំការទាក់ទងអភិបាលខេត្តកែប លោក កែន សត្ថា បានដែរ។អ្នកសម្របសម្រួលសមាគមអាដហុក ខេត្តកំពត និងកែប លោក យន់ ផល្លី ឱ្យដឹងថា នៅខេត្តកែប ក៏មានភ្លៀងធ្លាក់រ៉ាំរ៉ៃដែរ តែតំបន់ជាប់មាត់សមុទ្រមិនរងគ្រោះលិចលង់ទេ។ លោកប្រាប់ថា តំបន់ដែលលិចលង់ គឺនៅសង្កាត់អូរក្រសារ និងសង្កាត់ព្រៃធំ នៃក្រុងកែប និងផ្នែកខ្លះ នៃស្រុកដំណាក់ចង្អើរ។ មូលហេតុនៃការលិចនោះ គឺដោយសារទឹកហូរធ្លាក់ចុះពីភ្នំ។
ដោយឡែក នៅឯខេត្តភាគឦសានវិញ គឺខេត្តរតនគិរី និងមណ្ឌលគិរី ក៏រងការជន់លិចខ្លាំងដែរ។ ក្មេងស្រី អាយុ ១៥ឆ្នាំម្នាក់ រស់នៅភូមិដីឡូតិ៍ ឃុំជ័យឧត្ដម ស្រុកលំផាត់ ខេត្តរតនគិរី បានលង់ទឹកស្លាប់ កាលពីថ្ងៃទី៩ សីហា ដោយសារលិចទូក នៅពេលភ្លៀងកំពុងធ្លាក់។
ពលរដ្ឋរងគ្រោះលិចផ្ទះ ពីជំនន់ទឹកភ្លៀង នៅស្រុកលំផាត់ ម្នាក់ អ្នកស្រី សុខ ស្រីដុំ ប្រាប់ថា ពលរដ្ឋប្រហែល ៨០ភាគរយ នៃឃុំសេដា និងឃុំជ័យឧត្ដម ត្រូវបានអាជ្ញាធរជម្លៀសចេញទាំងយប់ ដោយសារជំនន់ទឹកភ្លៀង។ អ្នកស្រីថា នៅថ្ងៃទី១០ សីហា ទឹកបានស្រកប្រហែលកន្លះម៉ែត្រ ហើយមើលឃើញផ្លូវថ្នល់ក្នុងភូមិខ្លះហើយ។ តែផ្ទះ និងផលដំណាំពលរដ្ឋ កំពុងរងការជន់លិច និងខូចខាត។ អ្នកស្រីបន្តទៀតថា សត្វគោក្របី ក៏ត្រូវជម្លៀសចេញ ទៅរកទីទួលក្នុងភូមិ ដើម្បីស្នាក់នៅបណ្ដោះអាសន្នដែរ៖ «វាឡើងខ្លាំង តែស្រកយឺតដែរហ្នឹង។ នៅតាមចម្ការ តាមភូមិអ្វី វាលស្រែនៅ លិចដដែលហ្នឹង ស្រកតែតាមផ្លូវបន្តិចៗហ្នឹង។ ភូមិ វាលិច មានទួល។ កន្លែងខ្លះទៅ វាទួល វាអត់លិចទេ។ ប៉ុន្តែកន្លែងខ្លះ អត់មានទួលវាលិច នៅមើលមិនទាន់ឃើញផងហ្នឹងបង។ គោ ក្របី មកដល់ថ្ងៃហ្នឹង ខ្ញុំអត់ទាន់ដឹងថា ម្ដេចដែរ ដោយសារគេជម្លៀសចេញក្រៅ។ ប្រជាជន ជម្លៀសខ្លះ នៅខ្លះ។ ខ្លះ គេនៅផ្ទះខ្ពស់ៗ គេនៅផ្ទះគេសិន។ ជម្លៀសច្រើនជាងបង ប្រហែល៨០ភាគរយ»។
ពលរដ្ឋជនជាតិដើមភាគតិចរស់នៅខេត្តមណ្ឌលគិរី ឯណោះវិញ ក៏ប្រាប់ថា អ្នកស្រុកកោះញែក ជិត ១០០គ្រួសារ ក៏រងការជន់លិចពីជំនន់ទឹកភ្លៀងទាំងយប់ដូចគ្នា។
តំណាងជនជាតិដើមភាគតិច លោក ក្រើង តុលា ប្រាប់ថា ទឹកជន់លិចផ្ទះអ្នកភូមិកោះញែកខ្លាំង នៅថ្ងៃទី៩ និងទី១០ សីហា។ អាជ្ញាធរបានជម្លៀសអ្នកភូមិចេញទាំងយប់ នៅយប់ថ្ងៃទី៩ សីហា។ ឯគោ ក្របី និងជ្រូក របស់អ្នកស្រុក ងាប់ច្រើនក្បាល ដោយសារលង់ទឹកស្លាប់។ លោក ក្រើង តុលា ប្រាប់ថា ផ្ទះអ្នកស្រុក ដែលជន់លិចភាគច្រើនជាផ្ទះតូចៗ ហើយតំបន់នោះទាប ស្ថិតនៅ វាលទំនាបទន្លេស្រែពក ទើបរងការជន់លិចខ្លាំង៖ «យប់មិញ ឯកឧត្ដមអភិបាលខេត្ត ( មណ្ឌលគិរី ) ទៅស្រង់ប្រជាពលរដ្ឋទាំងយប់ យប់មិញ។ ម្សិលមិញ ខ្លាំង ហើយថ្ងៃហ្នឹងខ្លាំង ម្សិលម្ង៉ៃចាប់ផ្ដើម។ អត់ទាន់ស្រក ឯកឧត្ដមអភិបាលខេត្តគាត់ចុះទៅជួយចែកអំណោយ ជួយស្រង់ គោ ក្របី ជ្រូក មាន់ ទា ទៅដាក់នៅកន្លែងសុវត្ថិភាព ហើយងាប់គោ ងាប់ក្របី ងាប់ជ្រូក អ្វីច្រើន។ មណ្ឌលគិរី មានតែមួយកន្លែងទេ នៅឃុំណង់ឃីឡឹក នៅខាងកោះម្យើឡ ខាងភូមិកោះម្យើឡ ឃុំណង់ឃីឡឹក ស្រុកកោះញែក»។
អាស៊ីសេរី បានព្យាយាមទូរស័ព្ទសុំការបញ្ជាក់ពីអ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី អ្នកនាំពាក្យក្រសួងធនធានទឹក លោក ចាន់ យុត្ថា និងអភិបាលខេត្តទាំង៦ ច្រើនដង នៅថ្ងៃសៅរ៍ ទី១០ សីហា ប៉ុន្តែគ្មានអ្នកទទួលទូរស័ព្ទ។
ក្រសួងធនធានទឹក និងឧតុនិយម បានជូនដំណឹងថា ចាប់ពីថ្ងៃទី១០ ដល់ថ្ងៃទី១៦ ខែសីហា ខេត្តជាប់មាត់សមុទ្រ ពិសេសខេត្តព្រះសីហនុ និងកោះកុង រួមទាំងខេត្តជាប់ព្រំដែនវៀតណាម នឹងមានភ្លៀងធ្លាក់ខ្លាំង បង្កជាជំនន់ទឹកភ្លៀង ព្រោះតំបន់ទាំងនោះ ត្រូវរងឥទ្ធិពលព្យុះ និងខ្យល់មូសុងនិរតី។ ក្រសួងធនធានទឹក អំពាវនាវដល់អ្នកនេសាទឱ្យផ្អាកចេញទូកទៅនេសាទ ព្រោះផ្ទៃសមុទ្រ អាចមានភ្លៀងធ្លាក់គ្រប់ពេល ខ្យល់ខ្លាំង និងរលកសមុទ្រ អាចមានកម្ពស់ ១ម៉ែត្រ ទៅ ២ម៉ែត្រ។
ស្របពេលអ្នករស់នៅតំបន់ជាប់មាត់សមុទ្រកំពុងរងឥទ្ធិពលបែបនេះ ពលរដ្ឋរស់នៅតាមដងទន្លេមេគង្គ នៅខេត្តស្ទឹងត្រែង ក្រចេះ កំពង់ចាម ត្បូងឃ្មុំ កណ្ដាល ភ្នំពេញ និងព្រៃវែង វិញ ប្រាប់ថា ទឹកទន្លេ ក៏ហក់ឡើងខ្ពស់ដែរ រយៈពេល ២ថ្ងៃ គឺនៅថ្ងៃទី៩ និងថ្ងៃទី១០ សីហា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។