សហគមន៍​ព្រៃ​ឡង់​បារម្ភ​ខ្លាច​សត្វ​ព្រៃ​ត្រូវ​ផុត​ពូជ​បន្ទាប់​ពី​ឃើញ​ឧបករណ៍​ចាប់​សត្វ​ជាច្រើន

ដោយ សូត សុខប្រាថ្នា
2016-12-28
អ៊ីម៉ែល
មតិ
Share
បោះពុម្ព
ឧបករណ៍​ទាក់​សត្វ​ព្រៃ និង​អាវុធ​កែច្នៃ​របស់​ក្រុម​ជន​ល្មើស ដែល​សហគមន៍​រឹប​អូស​ពេល​ចុះ​ល្បាត​នៅ​ស្រុក​សណ្ដាន់ ខេត្ត​កំពង់ធំ កាល​ពី​ថ្ងៃ​ទី​២២ ដល់​ថ្ងៃ​ទី​២៦ ខែ​ធ្នូ ឆ្នាំ​២០១៦។ Photo Provided
ឧបករណ៍​ទាក់​សត្វ​ព្រៃ និង​អាវុធ​កែច្នៃ​របស់​ក្រុម​ជន​ល្មើស ដែល​សហគមន៍​រឹប​អូស​ពេល​ចុះ​ល្បាត​នៅ​ស្រុក​សណ្ដាន់ ខេត្ត​កំពង់ធំ កាល​ពី​ថ្ងៃ​ទី​២២ ដល់​ថ្ងៃ​ទី​២៦ ខែ​ធ្នូ ឆ្នាំ​២០១៦។ Photo Provided
Photo Provided

ប្រជា​សហគមន៍​ការពារ​ព្រៃ​ឡង់ នៅ​ស្រុក​សណ្ដាន់ ខេត្ត​កំពង់ធំ ព្រួយ​បារម្ភ​ចំពោះ​វាសនា​សត្វ​ព្រៃ ថា​នឹង​អាច​ថយ​ចុះ​បន្តិច​ម្តងៗ ហើយ​នឹង​ឈាន​ទៅ​ផុត​ពូជ​នៅ​ពេល​ខាង​មុខ។ ក្តី​បារម្ភ​នេះ ក្រោយ​ពេល​ប្រជា​សហគមន៍ បាន​នាំ​គ្នា​ចុះ​ល្បាត​រយៈពេល ៥​ថ្ងៃ ដោយ​ប្រទះ​ឃើញ​អន្ទាក់​ដាក់​សត្វ​ព្រៃ​រាប់​រយ​ខ្សែ ព្រម​ទាំង​ឃើញ​អាវុធ​កែច្នៃ​កាន់​តែ​ច្រើន​នៅ​ក្នុង​តំបន់​ព្រៃ​ការពារ​មួយ​នេះ។ ចំណែក​ប្រធាន​មន្ទីរ​បរិស្ថាន​ខេត្ត​កំពង់ធំ គឺ​យល់ស្រប​ចំពោះ​ក្តី​បារម្ភ​របស់​សហគមន៍​ដែរ។

អន្ទាក់​សម្រាប់​ដាក់​សត្វ​ព្រៃ​ប្រមាណ ៥០០​ខ្សែ ដោយ​ក្នុង​មួយ​ខ្សែៗ​មាន​ប្រវែង ២ ទៅ ៣​ម៉ែត្រ ព្រម​ទាំង​កាំភ្លើង​កែច្នៃ និង​ឧបករណ៍​បរបាញ់​សត្វ​មួយ​ចំនួន ត្រូវ​បាន​ក្រុម​អ្នក​ចុះ​ល្បាត​ព្រៃ​ឡង់​ខេត្ត​កំពង់ធំ រឹប​អូស​ពី​ក្រុម​ជន​ល្មើស និង​ធ្វើ​កិច្ចសន្យា​ឲ្យ​ពួក​គេ​បញ្ឈប់​សកម្មភាព​ប្រមាញ់​សត្វ​ព្រៃ​បន្ត​ទៀត។

ប្រជា​សហគមន៍​ការពារ​ព្រៃ​ឡង់​នៅ​ខេត្ត​កំពង់ធំ កត់​សម្គាល់​ថា រយៈពេល​ចុះ​ល្បាត​ព្រៃ ៥​ថ្ងៃ ចាប់​ពី​ថ្ងៃ​ទី​២២ ដល់​ថ្ងៃ​ទី​២៦ ធ្នូ បទល្មើស​កាប់​បំផ្លាញ​ព្រៃ​ឈើ​ហាក់​ស្ងប់ស្ងាត់​បន្តិច ដោយ​មិន​ឃើញ​មាន​ស្នាម​កាប់​ឈើ​ថ្មីៗ​ទេ ប៉ុន្តែ​រូបភាព​ប្រមាញ់​សត្វ​ព្រៃ គឺ​មាន​ច្រើន។

សកម្មជន​ការពារ​ព្រៃ​ឡង់​ស្រុក​សណ្ដាន់ ខេត្ត​កំពង់ធំ លោក ហឿន សុភាព មាន​ប្រសាសន៍​ថា អាវុធ​កែច្នៃ​ទាំងនោះ​ពុំ​មែន​សម្រាប់​តែ​បាញ់​សត្វ​ព្រៃ​ប៉ុណ្ណោះ​ទេ ប៉ុន្តែ​វា​ជា​ការ​គំរាម​កំហែង​ដល់​ប្រជា​សហគមន៍ ឬ​មន្ត្រី​អាជ្ញាធរ​ក្នុង​ពេល​ចុះ​ល្បាត​ព្រៃ​ទៀត​ផង។ លោក​ឲ្យ​ដឹង​ទៀត​ថា សត្វ​ព្រៃ​ដែល​ក្រុម​ជន​ល្មើស​ដាក់​អន្ទាក់ ឬ​បាញ់​បាន រួម​មាន​ជ្រូក​ព្រៃ ឈ្លូស ជាដើម ត្រូវ​បាន​យក​ទៅ​លក់​បន្ត​ឲ្យ​ឈ្មួញ ឬ​ម៉ូយ​នៅ​តាម​ទីផ្សារ និង​លក់​ខ្លួន​ឯង​ដោយ​តម្លៃ ១​គីឡូក្រាម ១៥.០០០​រៀល ទៅ​ជាង ២​ម៉ឺន​រៀល៖ «យើង​ឃើញ​គ្រប់​រោង ឲ្យ​តែ​យើង​ឆែកឆេរ​ទៅ គឺ​ឃើញ​យ៉ាង​ហោច​ណាស់​មាន​កាំភ្លើង​ខ្យល់​មួយ​ដើម ហើយ​ដង្ហក់ ឬ​ស្នា​កេះ​ហ្នឹង វា​មាន​ពីរ​បី​គ្រឿង​ដែរ»

សកម្មជន​ការពារ​ព្រៃ​ឡង់​ដដែល ស្នើ​ឲ្យ​អាជ្ញាធរ គប្បី​ចុះ​ស៊ើប​អង្កេត​តាម​មូលដ្ឋាន​ផ្ទាល់ ដើម្បី​ប្រមូល​យក​អាវុធ​កែច្នៃ​ពី​ពលរដ្ឋ និង​អប់រំ​ពួក​គេ​ឲ្យ​បញ្ឈប់​សកម្មភាព​ទាក់​សត្វ​បន្ត​ទៀត។

ទាក់ទង​បញ្ហា​នេះ ប្រធាន​មន្ទីរ​បរិស្ថាន​ខេត្ត​កំពង់ធំ លោក តុប កក្កដា មាន​ប្រសាសន៍​នៅ​ថ្ងៃ​ទី​២៨ ធ្នូ ថា បញ្ហា​ប្រើប្រាស់​អាវុធ​កែច្នៃ​នេះ ក៏​ជា​ក្តី​បារម្ភ​របស់​មន្ត្រី​ជំនាញ​ដែរ។ លោក​អះអាង​ថា បទល្មើស​កាប់​បំផ្លាញ​ព្រៃ​ឈើ​នៅ​ខេត្ត​កំពង់ធំ គឺ​ថយ​ចុះ​ច្រើន​តាំង​តំបន់​ព្រៃ​ឡង់​ត្រូវ​បាន​ដាក់​ជា​តំបន់​ព្រៃ​ការពារ កាល​ពី​ខែ​ឧសភា ប៉ុន្តែ​ថ្មីៗ​នេះ បទល្មើស​ទាក់ ឬ​បាញ់​សត្វ​ព្រៃ បែរ​ជា​កើត​ឡើង​វិញ។ លោក​បន្ថែម​ថា ពាក់ព័ន្ធ​បញ្ហា​អាវុធ​កែច្នៃ លោក​ធ្លាប់​បាន​ស្នើ​ទៅ​អាជ្ញាធរ​ខេត្ត​ឲ្យ​ចាត់​វិធានការ ពីព្រោះ​មាន​អាវុធ​កែច្នៃ​ខ្លះ​អាច​បាញ់​បាន​រហូត​សត្វ​ដំរី​ទៀត​ផង៖ «បញ្ហា​ប្រឈម​ខ្ញុំ​ក៏​បាន​ដាក់​ទៅ​អាជ្ញាធរ​ខេត្ត ដែល​មាន​ប៉ូលិស ប៉េអិម ដែល​នៅ​ជិត​តំបន់​ហ្នឹង​ធ្វើ​ការ​ប្រជុំ​ផ្សព្វផ្សាយ​ដល់​ប្រជាពលរដ្ឋ ហើយ​ឲ្យ​គាត់​ប្រមូល​អាវុធ​កែច្នៃ​ប្រគល់​ឲ្យ​សមត្ថកិច្ច»

លោក តុប កក្កដា បញ្ជាក់​ថា ក្នុង​រដូវ​ប្រាំង​នេះ ខាង​លោក​នឹង​រៀបចំ​កង​កម្លាំង​ពិសេស​សម្រាប់​ឃ្លាំ​មើល​ក្រុម​ជន​ល្មើស ទាំង​អ្នក​ចូល​ទៅ​កាប់​ឈើ និង​បរបាញ់​សត្វ​នៅ​កណ្ដាល​ព្រៃ​តែ​ម្តង បើ​ទោះ​បី​ជា​កម្លាំង​ជំនាញ​ត្រូវ​ជួប​ប្រទះ​បញ្ហា​ប្រឈម​មួយ​ចំនួន​ក៏ដោយ។

អ្នក​សម្របសម្រួល​លេខាធិការដ្ឋាន​បណ្ដាញ​ព្រៃ​ឡង់​ទាំង​បួន​ខេត្ត លោក សេង សុខហេង មើល​ឃើញ​ថា បទល្មើស​ប្រើប្រាស់​អាវុធ​កែច្នៃ និង​ដាក់​អន្ទាក់​សត្វ គឺ​កើត​មាន​ជុំវិញ​តំបន់​ព្រៃ​ការពារ​ទាំងមូល។ លោក​ថា កន្លែង​ខ្លះ​មាន​ទាំង​ការ​ដាក់​អន្ទាក់​សត្វ​ដោយ​ប្រើ​ខ្សែ​ភ្លើង​ឆក់ ដែល​ធ្វើ​ឲ្យ​ប៉ះពាល់​ដល់​ពពួក​សត្វ​ព្រៃ​ជិត​ផុត​ពូជ ជាដើម៖ «ខ្ញុំ​ថា​អាជ្ញាធរ​គ្រប់​ខេត្ត​ទាំង​បួន​ហ្នឹង គួរ​តែ​ផ្សព្វផ្សាយ និង​ដក​ហូត​អាវុធ​កែច្នៃ​ហ្នឹង​ឲ្យ​បាន​គ្រប់​ខេត្ត​ទាំងអស់»

លោក សុខហេង យល់​ថា ដើម្បី​ទប់ស្កាត់​ការ​បរបាញ់​សត្វ​ព្រៃ​បន្ត​ទៀត អាជ្ញាធរ​អាច​អនុវត្ត​នៅ​ក្នុង​ព្រៃ​ផ្ទាល់​តាម​រយៈ​ការ​ធ្វើ​កិច្ចសន្យា ឬ​អនុវត្ត​តាម​ច្បាប់ ហើយ​ត្រូវ​មាន​វិធានការ​លើ​ក្រុម​ឈ្មួញ​ដែល​ទទួល​ទិញ​សត្វ​ព្រៃ​ពី​អ្នក​បរបាញ់ ជាដើម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល