សង្គម​ស៊ីវិល​ទាមទារ​ឲ្យ​ត្រួត​ពិនិត្យ​សកម្មភាព​ក្រុមហ៊ុន​កែច្នៃ​ឈើ​បាត​អាង​ទំនប់​វារីអគ្គិសនី

ដោយ ប្រាជ្ញ ចេវ
2015-04-28
Share
កាប់​ឈើ​ក្រៅ​អាង​ស្តុក​ទឹក ស្ទឹងត្រែង ៦២០ កំណាត់​ឈើ​ដែល​គេ​កាប់​ក្នុង​ព្រៃ​ក្រៅ​បរិវេណ​អាង​ស្តុក​ទឹក​នៃ​គម្រោង​សាងសង់​វារីអគ្គិសនី​សេសាន​ក្រោម​ពីរ នា​ខេត្ត​ស្ទឹងត្រែង កាល​ពី​ខែ​វិច្ឆិកា ឆ្នាំ​២០១៤។
Photo Adhoc

ឈើ​បាត​អាង​ដែល​អាជ្ញាធរ​ខេត្ត​ស្ទឹងត្រែង និង​ក្រុមហ៊ុន​សាងសង់​ទំនប់​វារីអគ្គិសនី​សេសាន​ក្រោម​២ ធ្លាប់​តែ​អះអាង​ថា ត្រូវ​ដុត​ចោល​នេះ ពេល​នេះ​មាន​ក្រុមហ៊ុន​ក្នុង​ស្រុក​អះអាង​ទទួល​បាន​សិទ្ធិ​ដើម្បី​កែច្នៃ​ឈើ​ទាំង​នោះ សម្រាប់​នាំ​ចេញ​ទៅ​លក់​នៅ​ប្រទេស​វៀតណាម។

ស្ថាប័ន​ជាតិ​គ្រប់​លំដាប់​ថ្នាក់ ស្វាគមន៍​ការ​វិនិយោគ​នេះ ប៉ុន្តែ​សង្គម​ស៊ីវិល ទាមទារ​ឲ្យ​មាន​ការ​ត្រួត​ពិនិត្យ​សកម្មភាព​នេះ​ច្បាស់លាស់ ជៀសវាង​ការ​កេង​បន្លំ​របស់​របស់​ឈ្មួញ​ខិលខូច។

បន្ទាប់​ពី​ទទួល​បាន​សិទ្ធិ​កែច្នៃ​ឈើ​ពី​ក្រុមហ៊ុន​សាងសង់​ទំនប់​វារីអគ្គិសនី​សេសាន​ក្រោម​២ នៅ​ពេល​នេះ អ្នក​ម៉ៅការ​នាំ​ចូល​ស៊ីម៉ងត៍​សាងសង់​ទំនប់​នេះ កំពុង​រៀបចំ​ឯកសារ​សុំ​គោលការណ៍​ពី​ប្រមុខ​រដ្ឋាភិបាល។ តំណាង​ក្រុមហ៊ុន​អះអាង​ថា ឈើ​តំបន់​បាត​អាង​ជា​ប្រភេទ​ឈើ​មិន​ជាប់​លំដាប់​ថ្នាក់​ឈើ​ច្នៃ​នេះ ត្រូវ​នាំ​ចេញ​យក​ទៅ​លក់​នៅ​ប្រទេស​វៀតណាម។

អ្នក​ម៉ៅការ​នាំ​ចូល​ស៊ីម៉ងត៍​ដែល​ទទួល​បាន​សិទ្ធិ​កែច្នៃ​ឈើ គឺ​លោក សួស ប៊ុណ្ណារិទ្ធិ ប្រាប់​ឲ្យ​ដឹង​នៅ​ថ្ងៃ​ទី​២៧ ខែ​មេសា ថា គម្រោង​វិនិយោគ​នេះ​ត្រូវ​ចំណាយ​ទឹក​ប្រាក់​ជាង ២​លាន​ដុល្លារ​សហរដ្ឋ​អាមេរិក ហើយ​លោក​កំពុង​កែច្នៃ​ឡាន និង​សាងសង់​រោងចក្រ។ លោក​បន្ត​ទៀត​ថា នៅ​ពេល​គម្រោង​ដំណើរ​ការ​ឡាន​របស់​លោក​ដឹក​ស៊ីម៉ងត៍​ចូល​ការដ្ឋាន​សាងសង់​ទំនប់ និង​ត្រូវ​ដឹក​ឈើ​ចេញ​ពី​បាត​អាង៖ «សម្ដេច​មក​ពី​ម៉ាឡេស៊ី វិញ យើង​ដាក់​សំណើ​ទៅ​សម្ដេច បើ​សម្ដេច​អនុញ្ញាត យើង​បាន​ក្រុមហ៊ុន​បី»

តាម​គម្រោង ឈើ​ច្នៃ​ទាំង​នោះ​លក់​ចេញ​ក្នុង​តម្លៃ​ប្រមាណ​ពី ១០០ ទៅ ២០០​ដុល្លារ​ក្នុង​ទម្ងន់​មួយ​តោន។ ក្រុមហ៊ុន​អះអាង​ថា មិន​បង់​លុយ​តាម​ផ្លូវ​ដូច​ឡាន​ដឹក​ឈើ​របស់​អ្នក​ជំនួញ​ផ្សេងៗ​ទេ។

វិទ្យុ​អាស៊ីសេរី មិន​អាច​សុំ​ការ​បញ្ជាក់​បន្ថែម​ពី​តំណាង​ក្រុមហ៊ុន​សាងសង់​ទំនប់​វារីអគ្គិសនី​សេសាន​ក្រោម​២ លោក កៅ វ៉ាងអ៊ីវ បាន​ទេ​នៅ​ថ្ងៃ​ទី​២៧ ខែ​មេសា។

អភិបាល​រង​ខេត្ត និង​ជា​អ្នក​នាំ​ពាក្យ​សាលា​ខេត្ត​ស្ទឹងត្រែង លោក ដួង ពៅ និយាយ​ថា លោក​មិន​ទាន់​ទទួល​ព័ត៌មាន​ថា មាន​ក្រុមហ៊ុន​កែច្នៃ​ឈើ​បាត​អាង​នៅ​ឡើយ​ទេ។ ក្រៅ​ពី​នេះ លោក​អភិបាល​រង​ខេត្ត​បដិសេធ​ព័ត៌មាន​ដែល​ថា មាន​កុងត្រូល​ជជុះ​កាក់​លុយ​ពី​ឡាន​ដឹក​ឈើ។ លោក​បញ្ជាក់​ថា ប្រសិន​បើ​ការ​ដឹក​ជញ្ជូន​នោះ​មាន​ច្បាប់​ត្រឹមត្រូវ គ្មាន​សមត្ថកិច្ច​ណា​ហ៊ាន​មក​ប៉ះពាល់​ឡើយ៖ «បើ​ក្រុមហ៊ុន​គាត់​មាន​ច្បាប់​ត្រឹមត្រូវ គ្មាន​អ្នក​ណា​គេ​ធ្វើ​អី​គាត់​ទេ»

ឈើ​បាត​អាង​ជា​ប្រធានបទ​ក្តៅ​មួយ​ដែល​មាន​សាធារណជន​តាម​ឃ្លាំ​មើល ក្នុង​ពេល​សាងសង់​ទំនប់​អគ្គិសនី ស្រប​ពេល​ដែល​អាជ្ញាធរ និង​ក្រុមហ៊ុន​នេះ​កន្លង​មក​អះអាង​ថា ឈើ​បាត​អាង​ត្រូវ​ដុត​កម្ទេច​ចោល ប៉ុន្តែ​ពេល​នេះ​បែរ​ជា​មាន​ឈើ​ប្រណីត​ជាច្រើន​មាន​នៅ​ទីនោះ​ទៅ​វិញ។ តំបន់​ផ្ទៃ​បាត​អាង​ជា​កន្លែង​សម្រាប់​ផ្ទុក​ទឹក​របស់​ទំនប់​វារីអគ្គិសនី​សេសាន​ក្រោម​២ មាន​ទំហំ ៣៦.០០០​ហិកតារ។ តំបន់​បាត​អាង ត្រូវ​គេ​សម្អាត​ឲ្យ​រាប​ស្មើ ដោយ​កាប់​ព្រៃ​ឈើ​នៅ​តំបន់​នោះ​ចេញ។

រដ្ឋលេខាធិការ និង​ជា​អ្នក​នាំ​ពាក្យ​នៃ​ទីស្ដីការ​គណៈរដ្ឋមន្ត្រី លោក ផៃ ស៊ីផាន មាន​ប្រសាសន៍​ថា លោក​ក៏​មិន​ដឹង​រឿង​នេះ​នៅ​ឡើយ​ទេ ប៉ុន្តែ​លោក​ថា មុន​នឹង​ឯកសារ​ព្រមព្រៀង​នេះ​មក​ដល់​ទីស្ដីការ​គណៈរដ្ឋមន្ត្រី លុះត្រា​ឆ្លង​កាត់​ក្រសួង​កសិកម្ម ក្រសួង​បរិស្ថាន និង​ក្រសួង​សេដ្ឋកិច្ច ជា​មុន​សិន។ ទោះ​យ៉ាង​ណា មន្ត្រី​រដ្ឋាភិបាល​រូប​នេះ​ស្វាគមន៍​ចំពោះ​ការ​វិនិយោគ​ណា​ដែល​មិន​បំផ្លាញ​បរិស្ថាន និង​ប្រយោជន៍​ជាតិ៖ «ការ​សុំ​អាជ្ញាប័ណ្ណ គឺ​សុំ​ទៅ​ក្រសួង​សាមី និង​ក្រសួង​ពាក់ព័ន្ធ ចុង​ក្រោយ​បាន​មក​ដល់​ការិយាល័យ​ខ្ញុំ»

ចំណែក​អ្នក​សម្រប​សម្រួល​នៃ​សមាគម​ការពារ​សិទ្ធិ​មនុស្ស​អាដហុក ប្រចាំ​ខេត្ត​ស្ទឹងត្រែង លោក ហូ សំអុល ស្នើ​ឲ្យ​ការ​វិនិយោគ​នេះ​ធ្វើ​ឡើង​ត្រឹមត្រូវ ដែល​មិន​មែន​ជា​ជំនួញ​ឈើ​ប្រណីត​ក្រោម​រូបភាព​ដឹក​ឈើ​ស្រប​ច្បាប់​នោះ​ទេ៖ «ខ្លាច​គេ​ប្រើ​រូបភាព​ថា​គេ​យក​តំបន់​ផ្សេង​ធ្វើ​ជា​ឈើ​បាត​អាង​វិញ»

តំណាង​ក្រុមហ៊ុន​ច្នៃ​ឈើ លោក សួស ប៊ុណ្ណារិទ្ធិ ថា ក្រុមហ៊ុន​លោក​ឋិត​ក្នុង​ចំណុះ​របស់​ក្រុមហ៊ុន​របស់​អ្នក​ឧកញ៉ា គិត ម៉េង។ លោក​ថា ថ្មីៗ​នេះ​ក្រោយ​ទទួល​បាន​សិទ្ធិ​ច្នៃ​ឈើ ក្រសួង​ពាក់ព័ន្ធ​ដូចជា​ក្រសួង​បរិស្ថាន ក្រសួង​កសិកម្ម និង​ក្រសួង​សេដ្ឋកិច្ច បាន​ចុះ​មក​ពិនិត្យ​ដល់​ទីតាំង​រួច​ហើយ។ ក្រៅ​ពី​នេះ លោក សួស ប៊ុណ្ណារិទ្ធិ ស្នើ​កុំ​ឲ្យ​មាន​កុងត្រូល​ជជុះ​កាក់​យក​លុយ​ឡាន​របស់​លោក​ពេល​នាំ​ឈើ​ចេញ​ពី​តំបន់​បាត​អាង​នោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល