ក្រុម​យុវជន​ស្នើ​រដ្ឋាភិបាល​លុប​អនុក្រឹត្យ​កាត់​ដី​ឧទ្យានជាតិ​គិរីរម្យ​ជាង ២រយ​ហិកតារ​ឱ្យ​ក្រុមហ៊ុន​ឯកជន

ដោយ យ៉ង ចាន់តារា
2023.01.17
ក្រុម​យុវជន​ស្នើ​រដ្ឋាភិបាល​លុប​អនុក្រឹត្យ​កាត់​ដី​ឧទ្យានជាតិ​គិរីរម្យ​ជាង ២រយ​ហិកតារ​ឱ្យ​ក្រុមហ៊ុន​ឯកជន ឧទ្យានជាតិព្រះសុរាម្រិតកុសុមៈ«គិរីរម្យ» ស្ថិតនៅ​ខេត្ត​កំពង់ស្ពឺ ថត​ពីលើអាកាស។
រូបពីវីដេអូ​ក្រសួង​បរិស្ថាន

ក្រុម​យុវជន​ស្នើ​ដល់​រដ្ឋាភិបាល​លុបចោល​អនុក្រឹត្យ​កាត់​ដី​ឧទ្យានជាតិ​គិរីរម្យ​ជាង ២រយហិកតារ​ឱ្យ​ក្រុមហ៊ុន​ឯកជន ដើម្បី​អភិរក្ស​តំបន់​ការពារ និង​ធនធាន​ធម្មជាតិ​ឱ្យ​នៅ​យូរអង្វែង​សម្រាប់​មនុស្ស​ជំនាន់​ក្រោយ។ សំណើ​នេះ​បន្ទាប់ពី​លោក​នាយករដ្ឋមន្ត្រី ហ៊ុន សែន បាន​កាត់​ឆ្វៀល​ដី​ឧទ្យានជាតិ​នេះ​ឱ្យទៅ​ក្រុមហ៊ុន វ៉នម៉រ (One More) ដែល​មាន​មុខ​ជំនួញ​ស្និត​នឹង​គ្រួសារ​ត្រកូល​ហ៊ុន។

ក្រុម​យុវជន​ការពារ​ព្រៃឈើ និង​ធនធាន​ធម្មជាតិ​បារម្ភ​ថា បើ​រដ្ឋាភិបាល​មិន​លុប​ចោល​ការ​កាត់​ដី​ឱ្យ​ក្រុមហ៊ុន​ឯកជន​បន្ត​ទៀត នោះ​នឹង​បង្ក​ផល​ប៉ះពាល់​ដល់​មុខរបរ​ពលរដ្ឋ សង្គម និង​សម្បត្តិ​ធម្មជាតិ។ ពួកគេ​ស្នើ​ដល់​រដ្ឋាភិបាល​លុប​អនុក្រឹត្យ​ផ្តល់​ដី​ឧទ្យាន​ជាតិ​គិរីរម្យ​ឱ្យ​ក្រុមហ៊ុន វ៉នម៉រ រួម​ទាំង​បញ្ឈប់​ការ​ឆ្វៀល​ដី​រដ្ឋ​បន្ត​ទៀត។

យុវជន​ខ្មែរ​ថាវរៈ​ដែល​សកម្ម​ចេញ​មុខ​ការពារ​បរិស្ថាន​លោក ស្វាយ សំណាង ថ្លែង​ថា លោក​មិន​ពេញចិត្ត​ចំពោះ​រដ្ឋាភិបាល​សម្រេច​កាត់​ដី​ក្នុង​ទំហំ​រាប់​រយ​ហិកតារ​នៅ​តំបន់​ឧទ្យានជាតិ​គិរីរម្យ​ដែល​អតីត​ព្រះមហាក្សត្រ​ខ្មែរ​ខិតខំ​ការពារ​កន្លង​មក បែរជា​ប្រគល់​ឱ្យ​ក្រុមហ៊ុន​អ្នក​មាន​លុយ​មាន​អំណាច​នោះ​ទេ។ លោក​បារម្ភ​ថា ការ​ប្រគល់​សិទ្ធិ​ឱ្យ​ក្រុមហ៊ុន​ឯកជន​គ្រប់គ្រង ឬ​វិនិយោគ​ដោយ​មិន​បាន​សិក្សា​ផល​ប៉ះពាល់​បរិស្ថាន និង​សង្គម​ជាមួយ​ភាគី​ពាក់ព័ន្ធ​ឱ្យ​បាន​ស៊ីជម្រៅ​ទេ​នោះ គឺ​ជៀស​មិន​ផុត​ពី​សកម្មភាព​ដាក់​គ្រឿងចក្រ​ចូល​ឈូស​បំផ្លាញ​ព្រៃ​ដូច​ក្រុមហ៊ុន ឡេង ណាវ៉ាត់ត្រា ឈូស​ព្រៃ​តំបន់​ភ្នំ​តាម៉ៅ​នោះ​ឡើយ។ លោក​ស្នើ​ដល់​រដ្ឋាភិបាល​គួរ​ពិចារណា​រឿង​នេះ​ឡើងវិញ​មុន​ពេល​ក្រុមហ៊ុន​ចុះ​អនុវត្ត​គម្រោង​ខាងមុខ​នេះ។

លោក ស្វាយ សំណាង៖ «ការ​កាត់​ឆ្វៀល​ដី​កន្លង​មក​នៅ​ក្នុង​ដី​អភិរក្ស ការ​កាត់​ដី​របស់​រដ្ឋ​ជូន​ក្រុមហ៊ុន​ឯកជន​នេះ វា​ប៉ះពាល់​ធ្ងន់ធ្ងរ​ណាស់​ដល់​ជីវៈ​ចម្រុះ ជាពិសេស​ធនធាន​ធម្មជាតិ ព្រៃឈើ​ទាំងអស់​ហ្នឹង។ ត្រូវ​លុប​អនុក្រឹត្យ​ហ្នឹង​ចេញ ពី​ព្រោះ​ថា វា​ប៉ះពាល់​ជីវចម្រុះ និង​ព្រៃឈើ​នៅក្នុង​ហ្នឹង​វា​ជា​តំបន់​កាត់​ឆ្វៀល​នោះ​ជា​កន្លែង​ដែល​មាន​ព្រៃឈើ ហើយ​ខ្ញុំ​នៅតែ​ព្រួយបារម្ភ​ថា​មិន​គួរ​ណា​កាត់​ឆ្វៀល​ដី​ឱ្យ​ក្រុមហ៊ុន​នោះ​ទេ ពីព្រោះ​ក្រុមហ៊ុន​នឹង​អភិវឌ្ឍ និង​ឈូស​ឆាយ​ហើយ»

លោក ស្វាយ សំណាង ឱ្យ​ដឹង​ថា ក្រុម​យុវជន​ខ្មែរ​ថាវរៈ​នឹង​នាំ​គ្នា​ផ្ដិត​មេដៃ​ធ្វើ​យុទ្ធនាការ​ចេញ​ដាក់​ញត្តិ​ដើម្បី​ស្នើ​ដល់​រដ្ឋាភិបាល​បញ្ឈប់​ការ​កាត់​ឆ្វៀល​ដី​តំបន់​ការពារ ឬ​ឧទ្យានជាតិ​បន្ត​ទៀត ដើម្បី​ថែរក្សា​សម្បត្តិ​របស់​រដ្ឋ និង​ការពារ​ធនធាន​ធម្មជាតិ​ឱ្យ​បាន​គង់វង្ស​សម្រាប់​មនុស្ស​ជំនាន់​ក្រោយ។

សំណើ​របស់​ក្រុម​យុវជន​ទាំងនេះ គឺ​បន្ទាប់​ពី​លោក​នាយករដ្ឋមន្ត្រី ហ៊ុន សែន កាល​ពី​ថ្ងៃ​ទី​២៧ ខែ​មិថុនា ឆ្នាំ​២០២២ បាន​ចុះ​ហត្ថលេខា​កាត់​ឆ្វៀល​ដី​ទំហំ​ជាង ២រយ​ហិកតារ (២២១.៩៤) ចេញ​ពី ឧទ្យានជាតិ​ព្រះសុរាម្រិត ឬ​ហៅថា​ឧទ្យានជាតិ​គិរីរម្យ ស្ថិត​នៅ​ឃុំ​ត្រែងត្រយឹង ស្រុក​ភ្នំស្រួច ខេត្ត​កំពង់ស្ពឺ ដើម្បី​ប្រគល់​ដី​នោះ​ឱ្យទៅ​ក្រុមហ៊ុន វ៉នម៉រ ។ ម្ចាស់​ក្រុមហ៊ុន​នេះ គឺ​អ្នកស្រី ជឹង សុគន្ធាវី ដែល​ជា​កូនស្រី​បង្កើត​របស់​អ្នកស្រី ជឹង សុភាព ហៅ​យាយ​ភូ។ អ្នកស្រី និង​ក្រុម​គ្រួសារ គឺជា​ដៃគូ​ជំនួញ​ស្និត​ជាមួយ​គ្រួសារ​ត្រកូល​ហ៊ុន ជាពិសេស​កូនស្រី​បង្កើត​លោក ហ៊ុន សែន គឺ​អ្នកស្រី ហ៊ុន ម៉ាណា។

វិទ្យុ​អាស៊ីសេរី​មិន​អាច​ទាក់ទង​ប្រធាន​អង្គភាព​អ្នកនាំពាក្យ​រដ្ឋាភិបាល​លោក ផៃ ស៊ីផាន និង​អ្នកនាំពាក្យ​ក្រសួង​បរិស្ថាន​លោក នេត្រ ភក្រ្តា ដើម្បី​បញ្ជាក់​ជុំវិញ​រឿង​នេះ​បាន​ទេ នៅ​ថ្ងៃ​ទី១៧ ខែ​មករា។

ប៉ុន្តែ​អភិបាល​ខេត្ត​កំពង់ស្ពឺ​លោក វ៉ី សំណាង ប្រាប់​វិទ្យុ​អាស៊ីសេរី​នៅ​ថ្ងៃទី​១៧ ខែ​មករា ថា​អាជ្ញាធរ​ខេត្ត​មិន​ចុះ​ដោះស្រាយ​ផល​ប៉ះពាល់​ពាក់ព័ន្ធ​រដ្ឋាភិបាល​កាត់​ដី​តំបន់​ឧទ្យានជាតិ​គិរីរម្យ​ឱ្យ​ក្រុមហ៊ុន​វ៉នម៉រ​នៅ​ឡើយ​ទេ។ យ៉ាងណា​លោក​អះអាង​ថា ក្រុមហ៊ុន​វ៉នម៉រ​នឹង​យក​ដី​នោះ​ទៅ​អភិវឌ្ឍ​វិស័យ​ទេសចរណ៍ និង​បង្កើត​ការងារ​ជូន​ប្រជា​ពលរដ្ឋ ដោយ​មិន​ធ្វើ​ឱ្យ​ប៉ះពាល់​បរិស្ថាន​នោះ​ទេ។

លោក វ៉ី សំណាង៖ «នៅ​តំបន់​គិរីរម្យ បូកគោ​នេះ​យើង​គ្រាន់តែ​ជួល​តើ​ឱ្យ​គាត់ (ក្រុមហ៊ុន) ធ្វើ​វិស័យ​ទេសចរណ៍ វា​មិន​បាន​កាត់​ដី​ទៅ​ឱ្យ​ឯណា មិន​បាត់បង់​ដី​ទៅ​ណា ខ្ញុំ​គិត​ថា បងប្អូន​មិន​គួរ​ទោមនស្ស​ទៅ​ដល់​រឿង​ហ្នឹង​ពេក​ដែរ»  

ឧទ្យានជាតិ​គិរីរម្យ ដែល​ជា​តំបន់​អភិរក្ស​កំណត់​ដោយ​ព្រះរាជក្រឹត្យ មាន​ផ្ទៃដី​ជាង ៣ម៉ឺន ៥ពាន់​ហិកតារ (៣៥.០០០ហិកតារ)។ ប៉ុន្តែ​កាល​ពី​ឆ្នាំ​២០១៣ លោក​នាយករដ្ឋមន្ត្រី ហ៊ុន សែន បាន​កាត់​ឆ្វៀល ទីតាំង​ឧទ្យានជាតិ​មួយ​ផ្នែក​ធំ ជួល​ឲ្យ​ក្រុមហ៊ុន​ឯកជន​យ៉ាង​ហោច​ណាស់​ចំនួន ២ ដើម្បី​វិនិយោគ​រយៈពេល​យូរឆ្នាំ ក្នុង​នោះ​ក្រុមហ៊ុន​មួយ​ជា​របស់​ឧកញ៉ា សុខ គង់ ដែល​ជា​អ្នក​ជំនួញ​ស្និទ្ធ​នឹង​លោក ហ៊ុន សែន។

ជុំវិញ​រឿង​នេះ មន្ត្រី​សម្របសម្រួល​គម្រោង នៃ​សមាគម​បណ្ដាញ​យុវជន​កម្ពុជា(CYN) លោក អូត ឡាទីន លើកឡើង​ថា ការ​សម្រេច​របស់​រដ្ឋាភិបាល​នេះ មិន​ឆ្លុះ​បញ្ចាំង​ពី​ការ​ប្ដេជ្ញាចិត្ត​ក្នុង​កិច្ចការពារ​ធនធាន​ធម្មជាតិ​ឡើយ ជា​ពិសេស ធ្វើ​ឱ្យ​ប៉ះពាល់ ដល់​ទឹក​ចិត្ត​អ្នក​ការពារ ធនធាន​ធម្មជាតិ។ យុវជន​រូប​នេះ​បន្ត​ថា ពេល​ក្រុមហ៊ុន​ចុះ​អនុវត្ត​គម្រោង នៅ​ថ្ងៃ​ខាងមុខ ព្រៃឈើ​ក្នុង​ឧទ្យានជាតិ​នឹង​រង​ការ​បំផ្លាញ​ដែល​នាំ​មក​នូវ​ផល​ប៉ះពាល់​ជាច្រើន។

លោក អូត ឡាទីន៖ «បើសិន​ការ​សម្រេច​បែប​នេះ​ផ្តល់​ផល​ប្រយោជន៍​ដល់​ប្រជា​ពលរដ្ឋ​ជា​ទូទៅ​នៅក្នុង​ប្រទេស​របស់​យើង និង​ប្រជាជន​មូលដ្ឋាន​នៅ​ទីនោះ​ស្រាប់​វា​មិន​ជា​បញ្ហា​ចោទ​ទេ ប៉ុន្តែ​អ្វី​ជា​បញ្ហា​ចោទ​គឺ​ផលប្រយោជន៍​ទទួល​បាន​តែ​ក្រុមហ៊ុន​ឯកជន ​លើ​ក្រុម​អ្នក​មាន​អំណាច អ្នកមាន​ធនធាន​ស្រាប់​ហើយ ហើយ​ប្រជាពលរដ្ឋ​យើង​នៅ​រង​ផល​ប៉ះពាល់​ដដែល នេះ​ជា​បញ្ហា​ខ្លាំង»

មន្ត្រី​សង្គម​ស៊ីវិល និង​សកម្មជន​បរិស្ថាន​លើកឡើង​ថា រយៈពេល​ប៉ុន្មាន​ឆ្នាំ​ចុង​ក្រោយ​នេះ​រដ្ឋាភិបាល​បាន​បង្កើន​សកម្មភាព​ពុះ​ច្រៀក​តំបន់​អភិរក្ស​ដោយ​មិន​ប្រក្រតី និង​ខ្វះ​តម្លាភាព។ ពួកគេ​បារម្ភ​ថា ព្រៃឈើ និង​ជីវចម្រុះ​នៅ​ក្នុង​តំបន់​អភិរក្ស​ទាំង​នោះ​នឹង​កាន់តែ​រួម​តូច​ដោយសារ​ការ​ឈូស​បំផ្លាញ​ពី​សំណាក់​ក្រុមហ៊ុន​ឯកជន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។