ក្រុមយុវជននៅតាមតំបន់ព្រៃឡង់ធ្វើយុទ្ធនាការលើអនឡាញ ទាមទារឱ្យអាជ្ញាធរទប់ស្កាត់បទល្មើសអារឈើ
2025.01.09
យុវជនកំពុងតែពិភាក្សាគ្នាអំពីសារសំខាន់នៃការថែរក្សាព្រៃឈើ នៅតំបន់ព្រៃឡង ខេត្តកំពង់ធំ។ រូបភាពយុវជនផ្ដល់ឱ្យ នៅថ្ងៃ៨ ខែមករា ឆ្នាំ២០២៥។
Photo Provided
ក្រុមយុវជននៅតាមតំបន់ព្រៃឡង់ ធ្វើយុទ្ធនាការបង្ហោះវីដេអូ និងរូបភាពពាក់ព័ន្ធបទល្មើសព្រៃឈើ នៅលើបណ្ដាញសង្គមហ្វេសប៊ុក (Facebook) ដើម្បីទាមទារឱ្យនាយករដ្ឋមន្ត្រី លោក ហ៊ុន ម៉ាណែត និងអាជ្ញាធរពាក់ព័ន្ធទប់ស្កាត់បទល្មើសអារឈើ នៅក្នុងតំបន់ព្រៃឡង់ ឱ្យមានប្រសិទ្ធភាព។
ប្រជាសហគមន៍ព្រៃឈើ និងយុវជនលើកឡើងថា ឧក្រិដ្ឋកម្មអារឈើ ទ្រង់ទ្រាយ ធំ និងតូច នៅតែបន្តកើតមាន ស្ទើរតែរាល់ថ្ងៃ នៅក្នុងតំបន់ព្រៃអភិរក្ស ជាពិសេសព្រៃឈើនៅក្នុងតំបន់ព្រៃឡង់ ដែលស្ថិតក្នុងខេត្តចំនួន៤ គឺខេត្តកំពង់ធំ ព្រះវិហារ ស្ទឹងត្រែង និងក្រចេះ។ ពួកគាត់ថា ព្រៃអភិរក្សមួយនេះ បានក្លាយជា ចំណុចគោលដៅនៃបទល្មើសអារឈើ បរបាញ់សត្វព្រៃ និងកាប់ទន្ទ្រានយកដី ធ្វើជាកម្មសិទ្ធិឯកជន។
បណ្ដាញយុវជនព្រៃឡង់ នៅស្រុកសណ្ដាន់ ខេត្តកំពង់ធំ លោក ស ឃីន ប្រាប់វិទ្យុអាស៊ីសេរី នៅថ្ងៃទី៨ ខែមករា ថា យុវជន និងប្រជាសហគមន៍ដែលរស់នៅជុំវិញតំបន់ព្រៃឡង់ នាំគ្នាធ្វើយុទ្ធនាការបង្ហោះ វីដេអូ និងរូបភាពឱ្យសាធារណជន បានដឹងអំពីគុណតម្លៃព្រៃឈើនៅកម្ពុជា និង ដើម្បីជំរុញឱ្យអាជ្ញាធរពាក់ព័ន្ធ បង្កើនវិធានការទប់ស្កាត់បទល្មើសអារឈើ នៅក្នុងព្រៃឡង់ ឱ្យមានប្រសិទ្ធភាព។
លោកបន្តថា ជាច្រើនឆ្នាំមកនេះ ប្រជាសហគមន៍ជនជាតិដើមភាគតិច និងពលរដ្ឋខ្មែរ ដែលរស់នៅជាប់តំបន់ ព្រៃឡង់ ពុំអាចទប់ស្កាត់បទល្មើសអារឈើបានគ្រប់ជ្រុងជ្រោយនោះទេ ខណៈដែលក្រុមឈ្មួញ និងក្រុមជនល្មើសភាគច្រើន ហាក់ពុំខ្លាចក្នុងការប្រព្រឹត្ត បទល្មើសអារឈើ នោះឡើយ ព្រោះថា ពួកគាត់មានមន្ត្រីអាជ្ញាធរខ្លះ ចាំកាងពីក្រោយ។
លោក ស ឃីន៖ «ការកាប់នឹងនៅតែមានការលួចកាប់ ហើយការកាប់សព្វដង គេមានទុកជាចំនៀរ ច្រៀក តែឥឡូវវិធីសាស្ត្ររបស់គេកាប់ហើយ គេដឹកដើមទាំងមូលៗចេញ គេយកទៅកាប់នៅផ្ទះ។ គេបន្សល់ទុកតែគល់និងចុង បន្តិចទេ ដែលយើងទៅឃើញក្រោយៗមកនេះ»។
យុវជន និងប្រជាសហគមន៍ព្រៃឈើ បាននាំគ្នាធ្វើយុទ្ធនាការបង្ហោះវីដេអូខ្លីៗ អំពីសកម្មភាពចុះល្បាតព្រៃឈើ និងភ្ជាប់ជាមួយ រូបភាព នៃបទល្មើសអារឈើ មានរយៈពេលជិត ១ខែមកហើយ។ ពួកគាត់ថា នឹងបន្តយុទ្ធនាការនេះ រាល់ថ្ងៃទាល់តែព្រៃឈើនៅកម្ពុជា ជាពិសេស នៅតំបន់ព្រៃ សហគមន៍ និងព្រៃឡង់ ឈប់មានការកាប់បំផ្លាញបន្តទៀត។ ទន្ទឹមនឹងនោះ យុវជនខ្លះ បានធ្វើវីដេអូ ៣ទៅ ៤នាទី បង្ហាញពីក្ដីបារម្ភនៃការបាត់បង់ព្រៃឈើ ហើយស្នើឱ្យរដ្ឋាភិបាល និងអាជ្ញាធរពាក់ព័ន្ធទប់ស្កាត់បទល្មើសអារឈើ កុំឱ្យមានបន្តទៀត។
សំណេរនៅក្នុងវីដេអូ៖ «ខ្ញុំសូមស្នើសុំទៅដល់សមត្ថកិច្ច និងក្រសួងពាក់ព័ន្ធនានា គួរតែអនុវត្តដល់បុគ្គលណាដែលកាប់បំផ្លាញព្រៃឈើ ទៅតាមនីតិច្បាប់ ហើយ ខ្ញុំសូមឱ្យបងប្អូន ដែលចូលចិត្តកាប់បំផ្លាញព្រៃឈើ សូមបញ្ឈប់ការកាប់បំផ្លាញព្រៃឈើ ហើយងាកមករក្សាទាំងអស់គ្នា ជាពិសេសបងប្អូនយុវជន»។
ក្រៅពីការធ្វើយុទ្ធនាការ នៅលើបណ្ដាញសង្គម យុវជនទាំងនោះនាំគ្នាចងក្រង ជា បណ្ដាញយុវជន នៅជុំវិញតំបន់ព្រៃឡង់ ដើម្បីងាយស្រួលចែករំលែកចំណេះដឹង ដល់គ្នា ពាក់ព័ន្ធ ផ្នែកច្បាប់ និងរបៀបប្រើប្រាស់ទូរស័ព្ទដៃ សម្រាប់ថតបទល្មើសអារឈើ នៅពេលចុះល្បាត ២ ទៅ៣លើកក្នុង១ខែ។
ក្នុងពេលចុះល្បាតពួកគាត់ថា តែងជួបប្រទះបទល្មើសអារឈើ ចន្លោះពី៥០ ទៅ១០០ករណី ហើយគោយន្ត និង ឧបករណ៍អារឈើខ្លះ ឃាត់បានហើយបញ្ជូនទៅឱ្យមន្ត្រីបរិស្ថាន ប៉ុន្តែ ឧបករណ៍បទល្មើសទាំងនោះ ភាគច្រើនក្រុមជនល្មើសមកលោះយកវិញ ដោយគ្រាន់តែ ឱ្យលុយទៅមន្ត្រីទាំងនោះ។ ករណីនេះ ពួកគាត់ថា ជារឿងដែលហួសចិត្ត ហើយអាជ្ញាធរ និងជនល្មើសហាក់ឃុបឃិតគ្នាជាប្រព័ន្ធ។
វិទ្យុអាស៊ីសេរី ពុំអាចទាក់ទងអ្នកនាំពាក្យក្រសួងបរិស្ថាន លោក ខ្វៃ អាទិត្យា និងប្រធានអង្គភាព អ្នកនាំពាក្យរដ្ឋាភិបាល លោក ប៉ែន ប៉ូណា ដើម្បីឆ្លើយតបជុំវិញរឿងនេះបានទេនៅថ្ងៃទី៨ ខែមករា។ រីឯ ប្រធានមន្ទីរបរិស្ថានខេត្តកំពង់ធំ លោក តុប កក្ដដា និងប្រធានមន្ទីរបរិស្ថាន ខេត្តព្រះវិហារ លោក សុង ច័ន្ទសុជាតិ ក៏មិនអាចទាក់ទងដើម្បីឆ្លើយតបបានដែរ នៅថ្ងៃដដែលនេះ។
មន្ត្រីសម្របសម្រួលគម្រោងនៃសមាគមបណ្ដាញយុវជនកម្ពុជា (CYN) លោក អូត ឡាទីន សង្កេតឃើញថា បទល្មើសអារឈើនៅតំបន់ព្រៃឡង់ មិនដែលស្រាកស្រាន្តនោះទេ ពីមួយថ្ងៃទៅមួយថ្ងៃ ខណៈដែលបច្ចុប្បន្នព្រៃឡង់ បានក្លាយជាកន្លែង ដែលក្រុមឈ្មួញ ទាញយកអាជីវកម្មរ៉ែ ការកាប់ទន្ទ្រានយកដីធ្វើជាកម្មសិទ្ធិឯកជន និងជាកន្លែង ដែលជនល្មើស ប្រកបរបរបរបាញ់សត្វព្រៃដោយខុសច្បាប់។
លោកបន្តថា ការចូលរួមរបស់យុវជនព្រៃឡង់តាមរយៈយុទ្ធនាការ នៅលើបណ្ដាញសង្គម ហ្វេសប៊ុក នេះគឺជារឿងល្អ ដើម្បីបង្ហាញដល់ សាធារណជន ឱ្យឃើញកាន់តែច្បាស់អំពីបច្ចុប្បន្នភាពនៃការហិនហោចព្រៃឈើ ដោយសារអសមត្ថភាពទប់ស្កាត់របស់មន្ត្រីមូលដ្ឋានអសមត្ថភាព។ លោកបន្តថារដ្ឋាភិបាលគួរតែងាកមក រក្សាព្រៃឈើ ដែលនៅសេសសល់តិចតូច ឱ្យបានគង់វង្ស។
លោក អូត ឡាទីន៖ «យើងចង់ឃើញរដ្ឋាភិបាល ពង្រឹងការអនុវត្តច្បាប់ជាប្រចាំ ហើយការបង្ហាញរបស់យុវជនសំខាន់ណាស់ ជាពិសេសគឺគេហៅ ជាធាតុចូលមួយនៅក្នុងយុគសម័យទំនើប ដែលពួកគាត់ប្រើប្រាស់បច្ចេកវិទ្យាក្នុងសម័យធនធានធម្មជាតិ ការពារព្រៃ ការពារបរិស្ថានហ្នឹង»។
ប្រជាពលរដ្ឋ និងយុវជនរិះគន់ថា រដ្ឋាភិបាល លោក ហ៊ុន ម៉ាណែត ពុំមានឆន្ទៈពិតប្រាកដ ក្នុងការការពារព្រៃឈើ ឱ្យបានគង់វង្សនោះទេ ដោយសារតែបទល្មើសអារឈើ នៅតែបន្តកើតមានឥតស្រាកស្រាន្តនៅក្នុងតំបន់ព្រៃអភិរក្ស និងព្រៃឡង់ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋរិះគន់ថា ភ្លើងឆេះព្រះឆាយាល័ក្ខណ៍ព្រះមហាក្សត្រ ជាការធ្វេសប្រហែសរបស់អាជ្ញាធរក្រុងភ្នំពេញ
- ប៉ូលិសថៃស៊ើបអង្កេតឃើញថា ករណីធ្វើឃាតលើលោក លិម គិមយ៉ា មានការរៀបចំជាប្រព័ន្ធ ដោយមានមេខ្លោងនៅកម្ពុជា
- អតីតតំណាងរាស្ត្រគណបក្សសង្គ្រោះជាតិលោក លិម គិមយ៉ា ត្រូវឃាតកបាញ់សម្លាប់នៅប្រទេសថៃ
- អតីតតំណាងរាស្ត្រគណបក្សសង្គ្រោះជាតិ លោក លិម គិមយ៉ា ដែលរិះគន់រដ្ឋាភិបាលត្រកូល ហ៊ុន ត្រូវឃាតកបាញ់សម្លាប់នៅប្រទេសថៃ
- ជនសង្ស័យ ដែលបាញ់សម្លាប់លោក លិម គិមយ៉ា នៅបាងកក អាជ្ញាធរចាប់បាននៅក្នុងទឹកដីខ្មែរ