ក្រុមយុវជនរកឃើញថា ការលួចកាប់ទន្ទ្រានព្រៃឈើតូចធំនៅតំបន់អារ៉ែងបានកើនឡើងច្រើន
2023.04.29
មន្ត្រីសម្របសម្រួលគម្រោងនៃសមាគមបណ្ដាញយុវជនកម្ពុជា (CYN) និងជាអ្នកស្រាវជ្រាវបទល្មើសព្រៃឈើលោក អូត ឡាទីន ពេលចុះល្បាតព្រៃនាពេលកន្លងទៅ។
រូប៖ ហ្វេសប៊ុក
ក្រុមយុវជនអះអាងថា ករណីលួចកាប់ទន្ទ្រានព្រៃឈើនៅតំបន់អារ៉ែងបានកើនឡើងច្រើនដែលធ្វើឱ្យពួកគេព្រួយបារម្ភពីជោគវាសនាតំបន់នោះនៅថ្ងៃអនាគត។ យុវជន និងមន្ត្រីសង្គមស៊ីវិលស្នើដល់រដ្ឋាភិបាលបង្ហាញឆន្ទៈពិតប្រាកដក្នុងការទប់ស្កាត់បទល្មើសព្រៃឈើ និងការកាប់ទន្ទ្រានព្រៃយកដីធ្វើជាកម្មសិទ្ធិឱ្យមានប្រសិទ្ធភាព។
ព្រះសង្ឃ រួមទាំងក្រុមយុវជនករុណាព្រៃអារ៉ែងជិត ៣០អង្គនិងនាក់ ភាគច្រើនជាសិស្សនិស្សិត បានចុះការពារតំបន់អារ៉ែងរយៈពេលបីយប់ ៤ថ្ងៃ ចាប់ពីថ្ងៃទី២៦ ដល់ថ្ងៃទី២៨ ខែមេសា នៅភូមិច្រក ឬស្សី ឃុំជំនាប់ ស្រុកថ្មបាំង ក្នុងបំណងសិក្សាពីកន្លែងកាប់បំផ្លាញព្រៃឈើ និងទប់ស្កាត់បទល្មើសព្រៃឈើជាដើម។ ក្រុមយុវជនបានចុះដល់ទីតាំងកាប់ឈើខុសច្បាប់នៅតាមដងស្ទឹងអារ៉ែងស្តាយស្រណោះដើមឈើធំៗ និងមានអាយុកាលរាប់រយឆ្នាំដែលជាអត្តសញ្ញាណប្រពៃណីជនជាតិដើមភាគតិចកំពុងប្រឈមការកាប់បំផ្លាញទ្រង់ទ្រាយធំ។
យុវជនសង្គម គឺលោក ស្វាយ សំណាង ប្រាប់វិទ្យុអាស៊ីសេរីនៅថ្ងៃទី២៨ ខែមេសា ថា លោក និងក្រុមយុវជនផ្សេងទៀតបានដើរក្នុងព្រៃតែមួយជ្រុង ហើយរកឃើញឈើធំៗជាង២០ដើមនៅតាមបណ្តោយដងស្ទឹងអារ៉ែង មានមុខកាត់កន្លះម៉ែត្រដល់ជាង ១ម៉ែត្រ ភាគច្រើនជាប្រភេទឈើគគីរ ឈើទាល ត្រូវបានគេអារផ្តួលរំលំធ្វើអាជីវកម្មកាលពីថ្មីៗនេះ ខណៈទំហំដីព្រៃប្រមាណ១០ហិកតារគេកាប់ទន្ទ្រានយកដីកាន់កាប់ ដោយគ្មានអាជ្ញាធរពាក់ព័ន្ធចាត់វិធានការទប់ស្កាត់ឱ្យមានប្រសិទ្ធភាពនៅឡើយ។ លោកយល់ថា ប្រសិនបើដើមឈើបន្តបាត់បង់តទៅទៀត នោះនឹងប៉ះពាល់ធ្ងន់ធ្ងរដល់បរិស្ថានដងស្ទឹងអារ៉ែង ជីវចម្រុះ និងជីវភាពសហគមន៍។
លោក ស្វាយ សំណាង៖ «យើងមើលភាពជាក់ស្តែងបទល្មើសនៅតំបន់អារ៉ែង បើវាកាត់បន្ថយអាហ្នឹងយើងមិនចាំបាច់ចូលរួមការពារទេ ប៉ុន្តែតំបន់អារ៉ែងត្រូវបានកាប់បំផ្លាញជារឿងរាល់ថ្ងៃ ហើយកាន់តែហិនហោចខ្លាំងនៅតាមដងស្ទឹង ដូចជាប្រភេទដើមគគីរ ដើមឈើទាលជាដើម គឺត្រូវបានបាត់បង់ជារៀងរាល់ថ្ងៃ មែនទែនទៅដើមឈើទាំងអស់ហ្នឹងវាមានសារៈសំខាន់ណាស់ចំពោះដងស្ទឹងអារ៉ែង ហើយដងស្ទឹងអារ៉ែងនេះ វាផ្តល់ប្រយោជន៍ដល់សហគមន៍ជនជាតិភាគតិច»។
ស្រដៀងគ្នានេះដែរ យុវតីករុណាព្រៃអារ៉ែងកញ្ញា សៅ អ៊ីលិញ ថ្លែងថា អារ៉ែងជាតំបន់អភិរក្សដែលយុវជនមានសិទ្ធិចូលរួមការពារ និងទប់ស្កាត់បទល្មើសព្រៃឈើដើម្បីថែរក្សាឱ្យបានគង់វង្ស ប៉ុន្តែអាជ្ញាធរមិនសហការជាមួយក្រុមយុវជនទៅវិញ។ កញ្ញាបារម្ភថា ព្រៃតំបន់អារ៉ែងដែលទាក់ទាញភ្ញៀវទេសចរណ៍ និងជាជម្រកសត្វដែលផ្តល់ប្រយោជន៍សម្រាប់ពលរដ្ឋអាស្រ័យផលកំពុងប្រឈមការកាប់បំផ្លាញកាន់តែខ្លាំងឡើង។ កញ្ញាស្នើដល់រដ្ឋាភិបាលឱ្យទប់ស្កាត់បទល្មើសព្រៃឈើ និងអនុញ្ញាតឱ្យក្រុមយុវជនចូលរួមការពារថែរក្សាសម្បត្តិធម្មជាតិ។
កញ្ញា សៅ អ៊ីលិញ៖ «ព្រៃឈើមានលក្ខណៈធំៗហើយដីស្ថិតនៅតំបន់អភិរក្ស ប៉ុន្តែហេតុវានៅតែមានការកាប់បំផ្លាញ បើនៅទីហ្នឹងស្ថិតនៅតំបន់អភិរក្ស តើអាជ្ញាធរ ឬមន្ត្រីទទួលបន្ទុកហ្នឹងគាត់នៅទីណា គាត់កំពុងគេងលក់ ឬយ៉ាងណាបានជាមានការដឹកជញ្ជូនឈើចេញទៅបែបនេះ ផ្លូវនៅទីនេះមានតែមួយខ្សែទេ តើហេតុអ្វីបានជាអាជ្ញាធរអត់ដឹង»។
ទន្ទឹមនឹងវត្តមានរបស់ក្រុមយុវជននៅតំបន់អារ៉ែងប៉ុន្មានថ្ងៃនេះគេមើលឃើញថា សកម្មភាពដឹកជញ្ជូនឈើត្រូវបានផ្អាក ចំណែកអាជ្ញាធរមូលដ្ឋានវិញបានបដិសេធមិនចូលរួមល្បាតព្រៃជាមួយយុវជននោះទេ ប៉ុន្តែប៉ូលិសជាច្រើននាក់បានចុះទៅដល់ផ្ទះសហគមន៍អារ៉ែង ដោយបញ្ជាឱ្យក្រុមយុវជនបញ្ឈប់សិក្ខាសាលាស្តីពីការផ្សព្វផ្សាយអំពីតួនាទី និងសិទ្ធិនយោបាយយុវជន និងសហគមន៍សម្រាប់ការបោះឆ្នោតខាងមុខនេះ កាលពីថ្ងៃ២៦ ខែមេសា។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះពីអភិបាលខេត្តកោះកុងអ្នកស្រី មិថុនា ភូថង និងអ្នកនាំពាក្យក្រសួងបរិស្ថាន លោក នេត្រ ភក្ត្រា បាននៅឡើយទេ នៅថ្ងៃទី២៨ ខែមេសា។ ចំណែកអ្នកនាំពាក្យកងរាជអាវុធហត្ថលើផ្ទៃប្រទេសលោក អេង ហ៊ី ក៏មិនអាចទាក់ទងបានដែរ។
ជុំវិញរឿងនេះ មន្ត្រីសម្របសម្រួលគម្រោងនៃសមាគមបណ្ដាញយុវជនកម្ពុជា (CYN) និងជាអ្នកស្រាវជ្រាវបទល្មើសព្រៃឈើលោក អូត ឡាទីន មានប្រសាសន៍ថាមកដល់ពេលនេះសកម្មភាពកាប់បំផ្លាញឈើនៅតំបន់អារ៉ែង និងតំបន់ផ្សេងទៀតមិនថមថយនោះទេ ដោយសារបច្ចុប្បន្នក្រុមឈ្មួញរកស៊ីឈើបានដាក់គោលដៅផ្ដោតតំបន់ការពារធម្មជាតិដែលនៅសេសសល់ចុងក្រោយ។ លោកទម្លាក់ការទទួលខុសត្រូវរឿងទាំងនេះលើរដ្ឋាភិបាល ជាពិសេសមន្ត្រីបរិស្ថាន និងអាជ្ញាធរដែលបណ្តែតបណ្តោយឱ្យក្រុមឈ្មួញលួចកាប់ឈើខុសច្បាប់ ។ លោកថា ព្រៃព្រឹក្សានៅតំបន់នោះ គឺជាអាយុជីវិត និងអត្តសញ្ញាណប្រពៃណីជនជាតិដើមភាគតិចជងដែលអាជ្ញាធរត្រូវតែចាត់វិធានការឱ្យបានម៉ឺងម៉ាត់ចំពោះក្រុមឈ្មួញជាជាងរឹតត្បិតសកម្មជនបរិស្ថាន និងយុវជនដែលគ្រាន់តែចុះល្បាតការពារព្រៃឈើឱ្យនៅគង់វង្សនោះ។
លោក អូត ឡាទីន៖ «ខ្ញុំស្នើអាជ្ញាធរថ្នាក់ជាតិធ្វើសកម្មភាពចុះបង្ក្រាបបទល្មើសព្រៃឈើជារៀងរហូត គឺមិនមែនធ្វើព្រឹត្តិការណ៍ខ្លីម្តងម្កាលទេ ហើយសុំឱ្យក្រសួងបរិស្ថានទទួលស្គាល់ផង កុំឱ្យបដិសេធរហូតដោយចុងក្រោយបទល្មើសព្រៃឈើនៅតែបន្តកើតមាន និងស្នើសុំរាជរដ្ឋាភិបាលឱ្យបើកលំហសេរីភាពដល់សាធារណជន សកម្មជនមូលដ្ឋានអាចបំពេញកាតព្វកិច្ចក្នុងនាមជាប្រជាពលរដ្ឋដើម្បីរួមចំណែកការពារព្រៃឈើប្រទេសកម្ពុជា»។
ជ្រលងអារ៉ែង គឺជាកន្លែងដ៏ស្រស់ស្អាតមួយក្នុងខេត្តកោះកុងដែលមានប្រភេទសត្វព្រៃដ៏កម្រ អមដោយព្រៃឈើដ៏ស្រស់ត្រកាល បន្សល់ចុងក្រោយនៅកម្ពុជា។ តំបន់នោះជាកន្លែងដែលជនជាតិដើមភាគតិចជងជាង ១ពាន់ ៥រយនាក់ កំពុងរស់នៅ ជាមួយនឹងបរិស្ថានធម្មជាតិស្រស់បំព្រង តាមបណ្តោយជ្រលងភ្នំ ដែលមានសត្វព្រៃកម្ររស់នៅ រួមមាន សត្វក្រពើភ្នំ ត្រីនាគ និងដំរីធំៗជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- សមត្ថកិច្ចថៃចាប់បញ្ជូនជនភៀសខ្លួនខ្មែរជិត១០នាក់ទៅកម្ពុជា
- UNHCR អំពាវនាវដល់កម្ពុជា និងថៃ ឱ្យគោរពតាមច្បាប់ស្ដីពីការមិនចាប់បញ្ជូនជនភៀសខ្លួនត្រឡប់ទៅឱ្យរងទុក្ខបុកម្នេញនៅប្រទេសកំណើត
- បទសម្ភាសន៍លោក សុខ ឥសាន ស្ដីពីគម្រោងរដ្ឋាភិបាលបង្កើតច្បាប់ប្រឆាំងភេរវកម្ម ដើម្បីទប់ទល់លោក សម រង្ស៊ី
- ជនភៀសខ្លួនខ្មែរ ៦នាក់ ដែលបញ្ជូនពីថៃ ត្រូវបានឃុំខ្លួននៅពន្ធនាគារផ្សេងគ្នា អំពីបទក្បត់ជាតិ