កិច្ច​ប្រជុំ​ស្ដីពី​ផល​ប៉ះពាល់​បរិស្ថាន​នៅ​តាម​ដង​ទន្លេ​មេគង្គ

ប្រទេស​កម្ពុជា នៅ​ថ្ងៃ​ទី​២៨ ខែ​កក្កដា ឆ្នាំ​២០១១ បាន​បើក​កិច្ច​ប្រជុំ​ថ្នាក់​រដ្ឋមន្ត្រី​បរិស្ថាន​លើក​ទី​៣ នៃ​មហា​អនុ​តំបន់​ទន្លេ​មេគង្គ ដើម្បី​ពិនិត្យ​មើល​ថា ការ​អភិវឌ្ឍ​នានា​នៅ​តាម​បណ្ដោយ​ទន្លេ​មេគង្គ​មិន​ប៉ះពាល់​ដល់​បរិស្ថាន និង​ធានា​ថា ប្រជាពលរដ្ឋ​ទទួល​បាន​អត្ថប្រយោជន៍​ពី​ការ​អភិវឌ្ឍ​នោះ នៅ​គ្រា​ដែល​មាន​ការ​ព្រួយ​បារម្ភ​ជា​ច្រើន​ផ្ដោត​លើ​ការ​បំផ្លាញ​បរិស្ថាន​នៅ​ទន្លេ​មេគង្គ ដោយសារ​តែ​ការ​សាងសង់​ទំនប់​វារីអគ្គិសនី​ដើម្បី​ផលិត​ថាមពល​អគ្គិសនី។
ដោយ សុខ សេរី
2011.07.28
Share on WhatsApp
Share on WhatsApp
កិច្ចប្រជុំ ៣០៥ ២៨-កក្កដា-២០១១៖ លោក​នាយករដ្ឋមន្ត្រី ហ៊ុន សែន (ឆ្វេង) ថ្លែង​ក្នុង​ពិធី​បើក​កិច្ច​ប្រជុំ​ថ្នាក់​រដ្ឋមន្ត្រី​បរិស្ថាន​លើក​ទី​៣ នៃ​មហា​អនុ​តំបន់​ទន្លេ​មេគង្គ នៅ​វិមាន​សន្តិភាព រាជធានី​ភ្នំពេញ។
RFA/Sok Serey

មាន​មន្ត្រី​តំណាង​មក​ពី​ប្រទេស​ចំនួន​៦ នៅ​តាម​បណ្ដោយ​ទន្លេ​មេគង្គ​មក​ចូល​រួម​ក្នុង​កិច្ច​ប្រជុំ​នោះ គឺ​មក​ពី​ប្រទេស​កម្ពុជា ជា​ម្ចាស់​ផ្ទះ​នៃ​កិច្ច​ប្រជុំ មក​ពី​ប្រទេស​ចិន ប្រទេស​ឡាវ ប្រទេស​វៀតណាម ប្រទេស​ថៃ និង​ប្រទេស​ភូមា ព្រម​ទាំង​មាន​តំណាង​មក​ពី​ធនាគារ​អភិវឌ្ឍន៍​អាស៊ី ក្រោម​អធិបតី​របស់​លោក​នាយករដ្ឋមន្ត្រី ហ៊ុន សែន នៅ​ឯ​វិមាន​សន្តិភាព។

លោក​នាយករដ្ឋមន្ត្រី ហ៊ុន សែន បាន​មាន​ប្រសាសន៍​នៅ​ក្នុង​ការ​បើក​កិច្ច​ប្រជុំ​នោះ​ថា ថាមពល​គឺ​ជា​មូលដ្ឋាន​យ៉ាង​រឹងមាំ​បំផុត​សម្រាប់​កំណើន​សេដ្ឋកិច្ច និង​ការ​អភិវឌ្ឍ​សង្គម ប៉ុន្តែ​ថាមពល​ក៏​បង្កើត​ឲ្យ​មាន​ហានិភ័យ និង​គ្រោះថ្នាក់​ដល់​បរិស្ថាន​ផង​ដែរ ៖ «ភាព​ព្រងើយកន្តើយ​ចំពោះ​ហានិភ័យ​នៃ​​បរិស្ថាន ដូចជា​ការ​ប្រែប្រួល​អាកាសធាតុ នឹង​បង្ក​ផល​ប៉ះពាល់​យ៉ាង​ធំ​ធេង​ទៅ​លើ​ការ​ប្រើប្រាស់ និង​ការ​ផ្គត់ផ្គង់​ទឹក ហេដ្ឋារចនាសម្ព័ន្ធ គមនាគមន៍ សន្តិសុខ​ស្បៀង និង​ថាមពល និង​ជីវចម្រុះ»

រដ្ឋមន្ត្រី​ក្រសួង​បរិស្ថាន លោក ម៉ុក ម៉ារ៉េត បាន​មាន​ប្រសាសន៍​ថា ការ​អភិវឌ្ឍ​ដោយ​មាន​ការ​គិតគូរ​ដល់​បរិស្ថាន និង​ការ​ទទួល​ខុស​ត្រូវ ​គឺ​ជា​ការ​ចាំបាច់ ៖ «ជា​ពិសេស​គឺ​ការ​យក​ចិត្ត​ទុក​ដាក់​ដល់​និរន្តរភាព​នៃ​ទ្វារ​ទឹក និង​លំហូរ​ទឹក​នៃ​ដង​ទន្លេ​មេគង្គ ដែល​វា​ជា​ប្រភព​ចម្បង​នៃ​ការ​ទ្រទ្រង់​បរិស្ថាន​ធម្មជាតិ និង​ជីវចម្រុះ​សម្រាប់​ការ​ផ្គត់ផ្គង់ ការ​ចិញ្ចឹម​ជីវិត​ប្រចាំ​ថ្ងៃ​របស់​ប្រជាជន»

កន្លង​មក​មន្ត្រី​ជំនាញ​បរិស្ថាន​បាន​សម្ដែង​ការ​ព្រួយ​បារម្ភ​ថា គម្រោង​ការ​សាងសង់​ទំនប់​វារីអគ្គិសនី​នៅ​ទន្លេ​មេគង្គ​ភាគ​ខាង​លើ​នៅ​ប្រទេស​ចិន និង​ប្រទេស​ឡាវ​ជាដើម គឺ​ធ្វើ​ឲ្យ​ខូចខាត​បរិស្ថាន ដូចជា​ការ​ប្រែប្រួល​ចរន្ត​ទឹក និង​ការ​រាំង​ស្ងួត​ជាដើម។

សេចក្ដី​ប្រកាស​ព័ត៌មាន​របស់​ធនាគារ​អភិវឌ្ឍន៍​អាស៊ី ចេញ​ផ្សាយ​នៅ​ថ្ងៃ​ទី​២៨ ខែ​កក្កដា ឆ្នាំ​២០១១ បាន​ឲ្យ​ដឹង​ថា ការ​អភិវឌ្ឍ​សេដ្ឋកិច្ច​នៅ​មហា​អនុ​តំបន់​ទន្លេ​មេគង្គ​មាន​ល្បឿន​លឿន​ជាង​ការ​អភិវឌ្ឍ​នៅ​តាម​តំបន់​ផ្សេងៗ​ទៀត​នៅ​លើ​ពិភពលោក ដោយ​កំណើន​ផលិតផល​ក្នុង​ស្រុក​សរុប (GDP) ជា​មធ្យម​មាន​អត្រា​ចន្លោះ​ពី ៥% ទៅ ១០% នៅ​ពេល​នេះ។

កាល​ពី​ថ្ងៃ​ទី​១៩ ខែ​មេសា ឆ្នាំ​២០១១ កន្លង​ទៅ​នេះ គណៈកម្មការ​ទន្លេ​មេគង្គ​បាន​ប្រកាស​ថា កម្ពុជា​ឡាវ ថៃ និង វៀតណាម បាន​ឯកភាព​គ្នា​ថា ត្រូវ​តែ​មាន​ការ​ពិគ្រោះ​យោបល់​ជា​មុន​សិន​មុន ការ​សម្រេច​ឲ្យ​ប្រទេស​ឡាវ សាងសង់​ទំនប់​វារីអគ្គិសនី​ឈ្មោះ សាយ៉ាបូរី​នោះ ដោយសារ​តែ​មាន​ការ​ព្រួយ​បារម្ភ​ថា ការ​សាងសង់​នោះ​គឺ​ប៉ះពាល់​ដល់​បរិស្ថាន និង​ការ​រស់​នៅ​របស់​ប្រជាពលរដ្ឋ​នៅ​តាម​បណ្ដោយ​ទន្លេ​មេគង្គ​នៃ​ប្រទេស​នីមួយៗ៕

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
លោក ហ៊ុន សែន បន្ត​ប្រកាស​ថា ​​​នឹង​ការពារ​មិន​ឱ្យ​មាន​​​រដ្ឋប្រហារ​ ដើម្បី​​​អភិវឌ្ឍប្រទេស​ឱ្យ​រីក​ចំរើន
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។