នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល រម្លឹកពលរដ្ឋថា មិនត្រូវធ្វេសប្រហែសនឹងជំងឺកូវីដ-១៩ ជាពិសេសក្នុងរដូវទឹកជំនន់ ដោយសារប្រទេសជិតខាងកម្ពុជា និងពិភពលោកកំពុងបន្តរាតត្បាតជំងឺនេះ ដ៏ខ្លាំងក្លានៅឡើយ។ ជាងនេះទៅទៀត ក្រសួងស្នើឲ្យពលរដ្ឋ អនុវត្តវិធានការបង្ការជាប់ជានិច្ច។
វិធានការបង្ការដែលក្រសួងសុខាភិបាល បន្តរម្លឹក និងណែនាំកាលពីថ្ងៃទី២១ ខែ តុលានោះ រួមមាន ការអនុវត្តអនាម័យ មិនចេញក្រៅផ្ទះបើមិនចាំបាច់ បន្តអនុវត្តគម្លាតសង្គមបន្តទៀត ដូចជាពន្យារការរៀបអាពាហ៍ពិពាហ៍ ពិធីជប់លៀង និងការចាក់ធុងបាសរាំ។ ត្រូវបន្តរក្សាគម្លាតបុគ្គល ដូចជាអង្គុយ ឬ ឈររង់ចាំ ឬឈរជជែកគ្នា ឲ្យឃ្លាតពីគ្នាយ៉ាងហោចណាស់ ១ម៉ែត្រកន្លះ។ ម្យ៉ាងទៀត ត្រូវបន្តពាក់ម៉ាស់នៅពេលចាំបាច់ និងឧស្សាហ៍លាងដៃជាមួយសាប៊ូ អាល់កុល ឬជែលសម្លាប់មេរោគ។
ទោះជាមានសាររម្លឹក និងណែនាំជាប្រចាំបែបនេះក្តី ក៏ប្រជាពលរដ្ឋខ្មែរភាគច្រើន មិនបានអនុវត្តតាមនោះទេ។ សូម្បីតែលោក ហ៊ុន សែន ដែលជាប្រមុខរដ្ឋាភិបាល និងគួរតែជាគំរូក្នុងការអនុវត្តវិធានការបង្ការនេះ ក៏លោកមិនដែលឃើញពាក់ម៉ាស់ ឬរក្សាគម្លាតម្តងណាឡើយ រាល់ពេលដែលលោកចុះទៅជួបពលរដ្ឋ ជាពិសេស ការចុះជួបពលរដ្ឋដែលរងគ្រោះដោយសារទឹកជំនន់ក្នុងពេលថ្មីៗនេះ។ ចំណែកឯមន្ត្រីហែហមលោកទៀតសោត មានតិចតួចណាស់ ដែលពាក់ម៉ាស់ ឬរក្សាគម្លាត តាមការណែនាំរបស់ក្រសួងសុខាភិបាលនោះ។
ក្នុងពេលដែលមន្ត្រីជាច្រើនរបស់លោក ហ៊ុន សែន និងលោក ហ៊ុន សែន ផ្ទាល់មិនពាក់ម៉ាស់ ឬរក្សាគម្លាតបុគ្គលផងនោះ បែរលោកឆ្លៀតដាស់តឿនក្រើនរម្លឹកពលរដ្ឋ ដែលរងគ្រោះដោយសារទឹកជំនន់ខ្លះ នៅខេត្តបន្ទាយមានជ័យ ក្នុងពេលលោកចុះទៅជួបពួកគាត់ កាលពីថ្ងៃទី២១ ខែតុលា ឲ្យចេះប្រយ័ត្នប្រយែង និងការពារខ្លួនពីជំងឺនេះ៖ «តម្រូវឲ្យលោកយាយលោកតា និងប្រជាពលរដ្ឋទាំងអស់ ធ្វើការពាក់ម៉ាស់។ ពីមុនមកកម្រនឹងពាក់ណាស់ ! ក៏ប៉ុន្តែឥឡូវនេះ យើងត្រូវតែពាក់ម៉ាស់ ហើយមុននេះ យើងចាប់ដៃគ្នា។ ប៉ុន្តែ ឥឡូវយើង មិនចាប់ដៃគ្នាទៀតទេ។ លើកដៃសំពះគ្នា»។
កម្ពុជា ជាប្រទេសមួយ ក្នុងចំណោមប្រទេសបួន ក្នុងតំបន់អាស៊ីអាគ្នេយ៍ ដែលមានភព្វវាសនាជាងគេ នៅក្នុងតំបន់ ដោយសារតែមានករណីឆ្លងជំងឺកូវីដ-១៩ ក្រោម ៣០០ ករណី និងមិនមានអ្នកស្លាប់ ដោយសារជំងឺនេះ គិតមកត្រឹមថ្ងៃទី២១ ខែតុលា។ កម្ពុជាមាន ២៨៦ករណី ប្រ៊ុយណេ (Brunei) មាន ១៤៧ ករណី ទីម័រខាងកើត (East Timor) ២៩ ករណី និងឡាវ (Lao) ២៤ករណី។
ទោះបីជាក្រសួងសុខាភិបាលកម្ពុជា ដាក់ចេញវិធានការណែនាំ ដូចជាឲ្យពាក់ម៉ាស់ការពារ រក្សាគម្លាតសង្គម និងអនាម័យជាដើមក្ដី កុំថាឡើយប្រជាពលរដ្ឋខ្មែរភាគច្រើនលើសលប់ មិនបានអនុវត្តតាមវិធានការណ៍ទាំងនេះ សូម្បីតែមន្ត្រីរាជការ ជាពិសេសប្រមុខរដ្ឋាភិបាល ក៏នៅតែបំពានដែរ។កម្មកររោងចក្រ ក៏នៅតែជិះរថយន្ត ឬរ៉ឺម៉កម៉ូតូ ទៅធ្វើការ ដោយឈរ ឬអង្គុយប្រជ្រៀតគ្នាដូចម្រាមដៃ។ រីឯនៅតាមទីផ្សារវិញ ពលរដ្ឋនៅតែពាក់ពពូនគ្នា ទៅទិញអីវ៉ាន់ ដោយភាគច្រើន មិនពាក់ម៉ាស់ការពារនោះទេ។ ពេលបុណ្យទានម្តងៗ នៅទីអារាម មានប្រជាពលរដ្ឋ ច្រើនកុះករ នៅផ្ដុំគ្នា។
ប្រការនេះ ធ្វើឲ្យឱសថការីខ្មែរអូស្ត្រាលីលោក លឹម សួរ ថា ការណ៍ដែលកម្ពុជាមានអ្នកឆ្លងជំងឺនេះតិច គឺជាភព្វសំណាងមួយ ដោយសារកម្ពុជាមានអាកាសធាតុក្ដៅ កត្តាប្រជាសាស្ត្រ ដូចជាមិនសូវសម្បូរពលរដ្ឋ ដែលមានវ័យចាស់ជរាច្រើន កត្តារស់នៅមិនសូវស្អាតពេក ដែលធ្វើឲ្យប្រព័ន្ធការពារ (ឬប្រព័ន្ធភាពស៊ាំខ្លាំងក្លា) អាចទប់ទល់នឹងមេរោគ និងកត្តាជីវសាស្ត្រជាដើម៖ «ហើយបញ្ហាមួយទៀត ខ្ញុំយល់ឃើញថា ប្រហែលប្រព័ន្ធការពារក្នុងខ្លួនខ្លាំងក្លា ដោយសារការរស់នៅរបស់គាត់ តាមភាពធម្មតា គាត់ហូបបន្ថែផ្លែឈើច្រើន គាត់មិនសូវញ៉ាំសាច់ច្រើន ដូចនៅប្រទេសជឿនលឿន។ ប្រទេសជឿនលឿនគេតែងតែញ៉ាំសាច់ ៩០ ក្រាមក្នុងមួយថ្ងៃ។ តែពួកគាត់ឯណោះវិញ ហូបសាច់បន្តិចបន្តួច ហូបបន្លែផ្លែឈើច្រើន និងបញ្ចេញពលកម្មយ៉ាងច្រើន។ ម្ល៉ោះហើយការបញ្ចេញពលកម្មយ៉ាងម៉ឺងម៉ាត់បែបនេះ ធ្វើឲ្យខ្លួនរបស់គាត់ មានប្រព័ន្ធការពារខ្លាំងមួយដែរ»។
ទោះជាប្រទេសកម្ពុជា មានភព្វវាសនាបែបនេះក្ដី ករណីឆ្លងជំងឺកូវីដ-១៩ នេះ កំពុងរីករាលដាលជាថ្មី យ៉ាងគំហុក នៅលើពិភពលោក ជាពិសេសនៅសហរដ្ឋអាមេរិក។
ប្រធានវិទ្យាស្ថានជាតិផ្នែកសុខភាពរបស់សហរដ្ឋអាមេរិក លោក ហ្វ្រង់ស៊ីស ខូលីន (Francis Collins) ថាមូលហេតុចម្បងដែនាំឲ្យជំងឺនេះ ឆ្លងរាលដាលខ្លាំងសាជាថ្មី គឺដោយសារតែការមិនពាក់ម៉ាស់ មិនរក្សាគម្លាតសង្គម ពពាក់ពពូនគ្នាក្នុងកន្លែងដែលមិនសូវមានខ្យល់ចេញចូល និងមិនបានលាងសម្អាតដៃជាប្រចាំ។ មន្ត្រីជំនាញសុខាភិបាលរូបនេះ ស្នើឲ្យពលរដ្ឋទាំងអស់ កុំធុញទ្រាន់នឹងវិធានការណ៍ទាំងនេះ ព្រោះមេរោគមិនចេះធុញទ្រាន់ក្នុងការចម្លង ពីមនុស្សម្នាក់ទៅមនុស្សម្នាក់ទៀតនោះទេ។
ស្របពេលដែលជំងឺនេះ វាយលុកសន្ធាប់បន្ថែមទៀត ការស្រាវជ្រាវរកវ៉ាក់សាំងឯណោះ ក៏កំពុងជួបឧបសគ្គដែរ ដោយសារតែក្រុមហ៊ុនស្រាវជ្រាវវ៉ាក់សាំងធំៗយ៉ាងហោចណាស់បី ទាំងនៅអាមេរិក និងអង់គ្លេស រួមមានក្រុមហ៊ុន Johnson & Johnson, Eli Lilly និងក្រុមហ៊ុន AstraZeneca បានផ្អាកការសាកល្បងដំណាក់កាលទីបី ដោយសារបញ្ហាសុវត្ថិភាព ព្រោះអ្នកស្ម័គ្រចិត្តឲ្យគេចាក់វ៉ាក់សាំងធ្វើតេស្តចុងក្រោយនោះ បានធ្លាក់ខ្លួនឈឺជាបន្តបន្ទាប់។
ដោយសារតែបញ្ហាសុវត្ថិភាពនេះ លោក ហ្វ្រង់ស៊ីស ខូលីន (Francis Collins) ថាយ៉ាងហោចណាស់ គេត្រូវរង់ចាំរហូតដល់ចុងខែ វិច្ឆិកា ទើបអាចមានតម្រុយថ្មីខ្លះ អំពីថា តើនឹងមានវ៉ាក់សាំងបណ្ដោះអាសន្ន សម្រាប់សេចក្តីត្រូវការបន្ទាន់ខ្លាំង ឬយ៉ាងណា។ ចំណែកឯដំណឹងអំពីវ៉ាក់សាំង សម្រាប់មនុស្សទូទៅ គឺត្រូវរង់ចាំរហូតដល់ដើមឆ្នាំ ២០២១ ឯណោះ។
ក្នុងពេលអន្តរកាលនេះ មន្ត្រីសុខាភិបាលអាមេរិក រម្លឹកឲ្យពលរដ្ឋទាំងអស់ មិនចំពោះតែពលរដ្ឋអាមេរិកនោះទេ គឺត្រូវចៀសវាងកន្លែងមានមនុស្សច្រើនកុះករ ត្រូវរក្សាគម្លាតបុគ្គល និងត្រូវពាក់ម៉ាស់ ហើយហាមយកដៃញីភ្នែក ប៉ះច្រមុះ និងមាត់ លាងដៃឲ្យបានញឹកញាប់ និងជាប្រចាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។