សង្គម​ស៊ីវិល​ស្នើសុំ​ឱ្យ​ក្រសួង​សុខាភិបាល​ទទួល​ខុស​ត្រូវ​ខ្ពស់​លើ​វ៉ាក់សាំង​ជំងឺ​ឆ្កែ​ឆ្កួត​ខុស​ស្តង់ដារ​នាំ​ចូល​ពី​ប្រទេស​ចិន

2018-09-04
អ៊ីម៉ែល
មតិ
Share
បោះពុម្ព
រូបសញ្ញា​ក្រសួង​សុខាភិបាល
រូបសញ្ញា​ក្រសួង​សុខាភិបាល
រូប៖ គេហទំព័រ​ក្រសួង​សុខាភិបាល

អង្គការ​សង្គម​ស៊ីវិល​ស្នើ​សុំ​ឱ្យ​ក្រសួង​សុខា​ភិបាល​ទទួល​ខុស​ត្រូវ​ខ្ពស់​លើ​ប្រភេទ​វ៉ាក់សាំង​បង្ការ​ជំងឺ​ឆ្កែ​ឆ្កួត​​​នាំ​ចូល​ពី​ប្រទេស​ចិន ដែល​ត្រូវ​បាន​រក​ឃើញ​ថា ខុស​ស្តង់ដារ ហើយ​ដែល​កំពុង​ចរាចរណ៍​នៅ​លើ​ទីផ្សារ​កម្ពុជា។ វ៉ាក់សាំង​នោះ​មាន​ឈ្មោះ រែប៊ីស វែកស៊ីន (Rabies Vaccine) និង​ត្រូវ​បាន​អាជ្ញាធរ​ចិន​រក​ឃើញ​ថា ផលិតឡើង​ដោយ​គ្មាន​ស្តង់ដារ​ត្រឹម​ត្រូវ​ ហើយ​អាជ្ញាធរ​ចិន​បាន​​ផ្អាក​សកម្មភាព​ក្រុមហ៊ុន​ផលិត​ឱសថ​នោះ​​ តាំង​តែ​ពី​ចុង​ខែ​កក្កដា​មក​ម៉្លេះ​ ក៏​ប៉ុន្តែ​ក្រសួង​សុខាភិបាល​កម្ពុជា​ ទើប​នឹង​បាន​ប្រកាស​ហាម​ឃាត់​ឱសថ​នេះ​​ កាល​ពី​ចុង​សប្តាហ៍​មុន​ប៉ុណ្ណោះ។

ប្រធាន​អង្គការ​សម្ពន្ធគណនេយ្យ​ភាព​សង្គម​កម្ពុជា​ លោក សន ជ័យ ថ្លែង​ថា ចំណាត់​ការ​របស់​ក្រសួង​សុខាភិបាលកម្ពុជា​រឿង​វ៉ាក់​សាំងបង្ការ​​ជំងឺ​ឆ្កែ​ឆ្កួត​នាំ​ចូល​ពី​ប្រទេស​ចិន​នោះ ជា​រឿង​យឺត​ពេល​ ខណៈ​ឱសថ​ប្រភេទ​នេះ​ទំនង​ជា​ត្រូវ​បាន​ចែក​ចាយ​ពេញ​ប្រទេស​រួច​ទៅ​ហើយ។ ម្យ៉ាង​វិញ​ទៀត លោក​ថា ក្រសួង​មិន​បាន​បញ្ជាក់​ឱ្យ​ច្បាស់​ទេ​ថា តើ​ឱសថ​​ប្រភេទ​នេះ​មាន​ផល​ប៉ះពាល់​ដូច​ម្តេច​ចំពោះ​សុខ​ភាព​របស់​អ្នក​ប្រើប្រាស់​ ជា​ហេតុ​ធ្វើ​ឱ្យ​ការ​ហាម​ឃាត់​ការ​ប្រើប្រាស់​ឱសថ​​នោះ អាច​នឹង​គ្មាន​ប្រសិទ្ធភាព។ ក្រៅ​ពី​នេះ កង្វះ​យន្តការ​នៃ​ការ​ប្រមូល​ និង​ទូទាត់​សំណង​ ក៏​ជា​មូលហេតុ​ដែល​ធ្វើ​ឱ្យ​ឱសថ​ប្រភេទ​នេះ​អាច​នឹង​ត្រូវ​បាន​ប្រើប្រាស់​បន្ត​ទៅ​ទៀត​នៅ​កម្ពុជា​ផង​ដែរ៖ «ការងារ​របស់​ក្រសួង​សុខាភិបាល​ហាក់​កំពុង​តែ​មាន​បញ្ហា​ ជាពិសេស​គឺ​យឺតយ៉ាវ​នៅ​ក្នុង​ការ​ឆ្លើយ​តប​ទៅនឹង​បញ្ហា​ដែល​បាន​កើត​ឡើង​។ ការ​យឺត​យ៉ាវ​បែប​ប​នេះ នាំ​ឱ្យ​អ្នក​ដែល​រង​គ្រោះ​ គឺ​អ្នក​ដែល​ខ្វះ​ចំណេះ​ដឹង​ អ្នកដែល​មាន​ការ​យល់​ដឹង​ទាប ឬ​មួយ​អ្នក​ដែល​មាន​ចំណេះ​ដឹង​ដែរ​ ប៉ុន្តែ​ពួក​គេ​មិន​មាន​ជំនាញ​ផ្នែក​វេជ្ជសាស្ត្រ​ ឬក៏​ផ្នែក​ឱសថ​សាស្ត្រ​ អ៊ីចឹងការ​ប្រើប្រាស់​ហ្នឹង​វា​អាច​ផ្តល់ផល​អវិជ្ជមាន​ដល់​អ្នក​ប្រើប្រាស់​ដោយ​មិន​ដឹង​ខ្លួន»

ក្រសួង​សុខាភិបាល​បាន​ជូន​ដំណឹង​​កាល​ពី​ថ្ងៃ​ទី៣១ សីហាថា​ ​ប្រភេទ​វ៉ាក់សាំង​បង្ការ​​ជំងឺ​ឆ្កែ​ឆ្កួត​ឈ្មោះ រែប៊ីស វែកស៊ីន (Rabies Vaccine) នេះ​ ត្រូវ​បាន​ផលិត​ និង​ចែក​ចាយ​ដោយ​ខុស​លក្ខណៈ​ស្តង់ដារ​ ហើយ​ឱសថ​ប្រភេទ​នេះ​កំពុង​ចរាចរ​នៅ​លើ​ទីផ្សារ​កម្ពុជា។ ក្រសួង​បញ្ជាក់​ថា វ៉ាក់សាំង​បង្ការ​​ជំងឺ​ឆ្កែ​ឆ្កួត​នេះ​ ផលិត​ដោយ​រោងចក្រ​ ឆាងឈុន ឆាងសឹង ឡាយហ្វ សាយអ៊ិន (Changchun Changsheng Life Sciences Ltd.) របស់​ចិន​ និង​ត្រូ​វបាន​នាំ​ចូល​មក​កម្ពុជា​ដោយ​ក្រុម​ហ៊ុន ខេ-មេន (K-Man Co. Ltd.)។ ក្រសួង​បាន​បញ្ជា​ឱ្យគ្រឹះស្ថាន​លក់​ឱសថ​ទាំង​អស់​​បញ្ឈប់​ការ​លក់​វ៉ាក់សាំង​នេះ​តទៅ​ទៀត និងត្រូវ​​ប្រមូល​វ៉ាក់​សាំង​ប្រភេទ​នេះត្រឡប់​​មក​វិញ។ លើ​សពី​នេះ ក្រសួង​ក៏​បាន​ហាម​គ្រប់​មន្ទីរពេទ្យ​រដ្ឋ ឯកជន​ គ្លីនិក បន្ទប់​ពិគ្រោះ​ជំងឺ បន្ទប់​ព្យាបាល​ជំងឺ និង​សេវា​សុខាភិបាល​ផ្សេងៗ ទៀត មិន​ឱ្យ​ប្រើប្រាស់​វ៉ាក់សាំង​ប្រភេទ​នេះ​ត​ទៅ​​ទៀត​ឡើយ។ ក្រសួង​សុខាភិបាល​អះអាង​ថា ខ្លួន​នឹង​មាន​វិធានការ​តឹងរ៉ឹង​តាម​ផ្លូវ​ច្បាប់ ចំពោះ​ក្រុមហ៊ុន​ និង​កន្លែង​លក់​ថ្នាំពេទ្យ​ណា ដែល​នៅ​តែ​បន្ត​លក់​ថ្នាំ​វ៉ាក់​សាំង​ប្រភេទ​នេះ​តទៅ​ទៀត។

ទោះជាយ៉ាង​ណា ក្រសួង​សុខាភិបាល​មិនបាន​បញ្ជាក់​ទេ​ថា តើ​ឱសថ​នេះ​​​មាន​ផល​ប៉ះពាល់​អ្វី​ខ្លះ​ទៅ​លើ​អ្នក​ប្រើប្រាស់? ហើយ​ថា​តើ​មក​ទល់​នឹង​ពេល​នេះ ឱសថ​នេះ​ត្រូវ​បាន​ប្រើប្រាស់​ច្រើន​ដល់​កម្រិត​ណា​ហើយ​នៅ​កម្ពុជា? ហើយ​ថា តើ​​​ក្រសួង​​នឹង​មាន​ចំណាត់​ការ​បែប​ណា​ទៅលើ​ក្រុមហ៊ុន​នាំចូល​ និង​មន្ត្រី​ជំនាញ ដែល​ទទួល​ខុស​ត្រូវ​ពិនិត្យ​គុណភាព​ឱសថ​មុន​នាំ​ចូល​នោះ?

អាស៊ី​សេរី​បាន​ព្យាយាម​ទាក់ទង​អ្នក​នាំពាក្យ​ក្រសួង​សុខាភិបាល​ លោក លី សុវណ្ណ ជា​ច្រើន​ដង​នៅ​ថ្ងៃ​ទី៣ កញ្ញា ដើម្បី​សុំ​ការ​បំភ្លឺ​ជុំវិញ​រឿង​នេះ ក៏​ប៉ុន្តែលោក​មិន​លើក​ទូរស័ព្ទ។

ករណី​វ៉ាក់សាំង​បង្ការ​ជំងឺ​ឆ្កែ​ឆ្កួត​នេះ មិន​មែន​ជា​រឿង​តូច​តាច​ឡើយ​ ផ្ទុយ​ទៅ​វិញ​នេះ​ជា​រឿង​ដ៏​កក្រើ​ក​ពេញ​ប្រទេស​ចិន​ទាំង​មូល ហើយ​សូម្បី​តែ​អង្គការ​សុខភាព​ពិភព​លោក (WHO) ក៏​បាន​សម្តែង​ការ​សោក​ស្តាយ​ចំពោះ​បញ្ហា​នេះ​ដែរ។

អាជ្ញាធរ​ចិន​បាន​​​រក​ឃើញ​ថា វ៉ាក់​សាំង​បង្ការ​ជំងឺ​ឆ្កែ​ឆ្កួត​នេះ ឈ្មោះ រែប៊ី វែកស៊ីន (Rabies Vaccine) នេះ ត្រូវ​បាន​ផលិតឡើយ​ដោយ​គ្មាន​ស្តង់​ដារ​ត្រឹម​ត្រូវ ហើយ​ករណី​នេះ​បាន​ផ្ទុះ​ឡើង​កក្រើក​ប្រទេស​ចិន​ តាំង​តែ​ពី​ចុង​ខែ​កក្កដា​មក​ម្ល៉េះ​ រហូត​ឈាន​ដល់​ការ​ចាប់​ខ្លួន​នាយក​ប្រតិបត្តិ និង​ថ្នាក់​ដឹក​នាំ​​ក្រុមហ៊ុន ឆាងឈុន ឆាងសឹង ឡាយហ្វ សាយអ៊ិន (Changchun Changsheng Life Sciences Ltd.) ចំនួន​ ១៥នាក់​ដាក់​ពន្ធនាគារ​ផង​ដែរ។ ប្រធានាធិបតី​ចិន​ លោក​ ស៊ី ជិនពីង (Xi Jinping) និង​នាយក​រដ្ឋមន្ត្រីចិន​លោក លី ខឺឈាង (Li Keqiang) បាន​ទាម​ទារ​ឱ្យ​មាន​ការ​យក​ចិត្ត​ទុក​ដាក់​ខ្ពស់​ចំពោះ​បញ្ហា​នេះ ដែល​ជា​ការ​ឆ្លើយ​តប​នឹង​កំហឹង​របស់​មហាជន​ជុំវិញ​រឿង​អាស្រូវ​ស្តីពី​បញ្ហា​សុខភាព​សាធារណៈ ដែល​កើត​ឡើង​ជា​បន្ត​បន្ទាប់។ អាជ្ញាធរ​ចិន​បាន​ប្រមូល​យក​វ៉ាក់​សាំង​ទាំង​នោះ​មក​វិញ និង​បាន​ផ្អាក​ផលិតកម្ម​របស់​ក្រុមហ៊ុន​ជា​បណ្តោះអាសន្ន។

អង្គការ​​​​សុខភាព​ពិភព​លោក​ (WHO) សម្តែង​ការ​សោក​ស្តាយ​ចំពោះ​ហេតុការណ៍​នេះ និង​បាន​ប្រកាស​គាំទ្រ​​​ចំណាត់​ការ​របស់​អាជ្ញាធរ​ចិន​ ដែល​បាន​ធានា​ថា នឹង​គ្មាន​ឱសថ​ប្រភេទ​នេះ​ដាក់​លក់​នៅលើ​ទីផ្សារ​ឡើយ។ អង្គការ​នេះ​ចាត់​ទុក​ការ​អនុវត្ត​ច្បាប់​ទៅ​លើ​ករណី​វ៉ាក់សាំង ដែល​គ្មាន​ស្តង់ដារ​នេះ​ ជា​រឿង​ដ៏​ចាំបាច់​ ហើយ​ថា រដ្ឋាភិបាល​ចិន​ត្រូវ​ធានា​ឱ្យ​បាន​ថា វ៉ាក់សាំង​ដែល​ត្រូវ​បាន​ផលិត​ និង​ប្រើប្រាស់​នៅក្នុង​ប្រទេស​ចិន​ ត្រូវតែ​មាន​សុវត្ថិភាព គុណភាព និង​ប្រសិទ្ធភាព។ អង្គការ​អន្តរជាតិ​មួយ​នេះ អះអាង​ថា នឹង​​តាម​ដាន​ករណី​នេះ​បន្ត​ទៅ​ទៀត និង​ត្រៀម​ខ្លួន​រួច​ជា​ស្រេច​ដើម្បី​ជួយ​អាជ្ញាធរ​សុខាភិបាល​ចិន។

លោក​ សន​ ជ័យ​ សង្កត់​ធ្ងន់​ថា ក្រសួង​សុខាភិបាលកម្ពុជា ត្រូវ​តែ​មាន​ចំណាត់​ការ​ឱ្យ​បាន​ច្បាស់​លាស់​ចំពោះ​រឿង​នេះ​ ព្រោះ​​វាជា​រឿង​សុខភាព​របស់​ប្រជា​ពលរដ្ឋ មិន​មែន​ត្រឹម​តែ​ចេញ​សេចក្តី​ជូន​ដំណឹង​តែ​មួយ​មុខ​នោះ​ទេ។ លោក​បន្តថា ក្រសួង​បាន​ស្គាល់​ឈ្មោះ​​​ឱសថ ក្រុមហ៊ុន​នាំ​ចូល​ និង​រោងចក្រ​ផលិត​ទៀត​ផង។ ដូច្នេះ​ករណី​​នេះ​ត្រូវ​តែ​មាន​ការ​ទទួល​ខុស​ត្រូវ​ចំពោះ​មុខ​ច្បាប់​ មិន​អាច​ឱ្យ​អ្នក​ពាក់ព័ន្ធ​រួច​ខ្លួន​ឡើយ ដើម្បី​ជា​ការ​ព្រមាន​កុំ​ឱ្យ​ក្រុមហ៊ុន​ដទៃ​ទៀត​ នាំចូល​ឱសថ​គ្មាន​គុណភាព​ ឬ​ឱសថ​​ក្លែង​ក្លាយ​បែប​នេះ​ទៀត។ លោក​បន្ថែម​ថា ក្រសួង​សុខាភិបាល​​ក៏​ត្រូវ​ពង្រឹង​ប្រសិទ្ធភាព​ការងារ​របស់​ខ្លួន​ដែរ មិន​អាច​ចេះ​តែ​បណ្តោយ​ឱ្យ​មាន​ការ​នាំ​ឱសថ​ខុស​ស្តង់ដារ​​ចូល​ក្នុង​ប្រទេស​​ឡើយ៖ «បើ​ពួក​គេ​ចែក​ចាយ​វ៉ាក់​សាំង​ប្រភេទនេះ​ ថាតើ​វា​នឹង​មាន​ផល​ប៉ះពាល់​អ្វី​ធ្ងន់​ធ្ងរ​ដល់​សុខភាពរបស់​មនុស្ស អ៊ីចឹង​បើរក​ឃើញ​ថា ករណី​បែប​នេះ​ជា​បទល្មើស ពួក​គេ​ត្រូវ​តែ​ទទួល​ខុសផ្នែក​​​ព្រហ្មទណ្ឌ​ ហើយ​ពួក​គេ​ត្រូវ​តែ​ទទួល​ខុស​ត្រូវ​ផ្នែក​សំណង​រដ្ឋប្បវេណី​ផង​ដែរ គឺ​ត្រូវ​តែ​សង​លុយ​ទៅដល់​ភ្នាក់ងារ​ចែក​ចាយ​ ឬ​ក៏​គ្លីនិក​ ឬ​ក៏​ភ្នាក់ងារ​ផ្តល់​សេវា​សុខភាព​ទាំង​ឡាយ​ជា​ដើម​ ត្រូវ​តែ​សង​លុយ​ទៅគេ​វិញ ពេល​គេ​ប្រគល់​វ៉ាក់​សាំង​នោះ​ឱ្យ​។ ធ្វើ​បែបនេះ​ វា​អាច​ធ្វើ​ឱ្យ​មាន​ការ​ប្រុង​ប្រយ័ត្ន​ពី​ក្រុមហ៊ុន​ដែល​នាំ​ឱសថ​ចូល​ គេ​មាន​ការ​ប្រុង​ប្រយ័ត្ន​ជាង​មុន​ថា នេះ​ជា​វិធានការណ៍​មួយ​ដែល​អាច​នឹង​ជួប​ប្រទះ​ ប្រសិន​បើ​ពួក​គេ​រកស៊ី​ទៅ​ប៉ះពាល់​ដល់​សុខភាព​របស់​មនុស្ស​»។

អតីតនិស្សិត​ផ្នែក​សុខាភិបាល និង​ជា​ចៅសង្កាត់​ជាប់​ឆ្នោត​របស់​គណបក្ស​សង្គ្រោះជាតិ​នៅ​ខេត្ត​សៀមរាប លោក ជិន សុងង៉េង ថ្លែង​ថា លោក​មាន​ការ​សោកស្តាយ ចំពោះ​ការ​ចរាចរ​វ៉ាក់សាំង​បង្ការ​​ជំងឺ​ឆ្កែ​ឆ្កួត​ខុស​ស្តង់ដារ​ពី​ប្រទេស​ចិន​ចូល​មក​កម្ពុជា​នេះ។ លោក​ថា នេះ​ជា​កំហុស​របស់​ក្រសួង​សុខាភិបាល ដែល​មិ​ន​បាន​ត្រួត​ពិនិត្យ​ឱ្យ​បាន​ត្រឹម​ត្រូវ មុន​នឹង​អនុញ្ញាត​ឱ្យ​នាំ​ចូល​ឱសថ​ប្រភេទ​នេះ​ធ្វើ​ឱ្យ​ពលរដ្ឋ​របស់​ខ្លួន​ត្រូវ​ក្លាយ​ជាជន​រងគ្រោះ​នៃ​ការ​ប្រើ​ប្រាស់​ឱសថ​ក្លែង​ក្លាយ។ លោក​​ថ្លែ​ង​ទៀត​ថា ឱសថ​ជា​តម្រូវ​ការ​ចាំ​បាច់​សម្រាប់​ពលរដ្ឋ​គ្រប់​រូប​ដើម្បី​ព្យាបាល​ជំងឺ ហើយ​ពល​រដ្ឋ​​មិន​អាច​ដឹង​បាន​ឡើយ​ថា តើ​ឱសថ​ណា​ខ្លះ ឬ​ប្រភេទ​ណា​មួយ ដែល​ជា​ឱសថ​ក្លែង​ក្លាយ​ ឬ​មិន​ត្រូវ​តាម​ស្តង់ដារ​នោះ​ទេ។ ដូច្នេះ ក្រសួង​សុខាភិបាល​ត្រូវ​មាន​ការ​ទទួល​ខុស​ត្រូវ​ខ្ពស់ ចំពោះ​សុខភាព​របស់​ពលរដ្ឋ​ខ្លួន​ឯង មិន​មែន​ធ្វើ​ដូច​សព្វថ្ងៃ​នេះ​ឡើយ៖ «សូម​ឱ្យ​ក្រសួង​សុខាភិបាល​ចាត់​វិធាន​ការណ៍​លើ​ករណី​នេះ​ឱ្យ​បាន​ខ្លាំង​ក្លា ដោយ​មាន​អ្នក​បច្ចេក​ទេស​សិក្សា​ថា តើឱសថ​ដែល​ប្រើប្រាស់​ដោយ​អត់​មាន​ស្តង់ដារ​ហ្នឹង បាន​ប្រើប្រាស់​ទៅលើ​បុគ្គល​​ ឬ​តំបន់​ណា​ហើយ​ ហើយ​វា​ធ្វើ​ឱ្យ​មាន​ផល​ប៉ះពាល់​ដល់​ប្រជា​ពលរដ្ឋ​អ្នក​ប្រើប្រាស់​ហ្នឹងដល់​កម្រិត​ណា​? យើង​សង្ឃឹម​ និង​ជឿជាក់​ថា ក្រសួង​សុខាភិបាល​នឹង​ចាត់វិធាន​ការណ៍​ និង​មាន​របាយការណ៍​ជាក់​លាក់​ណា​មួយ​ដើម្បី​បង្ហាញ​ជូនសាធារណជន​ឱ្យ​បាន​ដឹង​ច្បាស់ ព្រោះដោយ​សារ​រឿង​ទាំងអស់​នេះ​ហើយ​ដែល​ធ្វើឱ្យ​ពលរដ្ឋ​មិន​សូវ​មាន​ជំនឿ​ទុក​ចិត្ត​លើ​ប្រព័ន្ធសុខាភិបាល​»។

ជំងឺ​ឆ្កែឆ្កួត​បានឆក់​យក​អាយុ​ជីវិត​ប្រជា​ពលរដ្ឋ​ខ្មែរ​ប្រមាណ ៨០០នាក់​ជា​រៀង​រាល់​ឆ្នាំ ហើយ​ប្រហែល​ ៥០% នៃ​ជន​រងគ្រោះ គឺ​ជា​កុមារ​អាយុ​ក្រោម​ ១៥ឆ្នាំ។ កម្ពុជា​បាន​ធ្វើ​យុទ្ធនាការ​ប្រយុទ្ធ​ប្រឆាំង​ជំងឺ​នេះ និង​គ្រោង​ឈាន​ដល់​ការ​លុប​បំបាត់​ជំងឺនេះ​នៅ​ឆ្នាំ២០៣០ តាម​រយៈ​ការ​ផ្សព្វផ្សាយ​អំពី​គ្រោះ​ថ្នាក់ និង​វិធី​បង្ការ​​​ជំងឺ​ឆ្កែ​ឆ្កួត ព្រម​ទាំង​ការ​បង្កើត​មជ្ឈមណ្ឌល​បង្ការ​ជំងឺ​នេះ​​នៅ​តាម​បណ្តា​ខេត្ត​មួយ​ចំនួន​ផង។

កម្ពុជា​បាន​ក្លាយ​ជា​ទីកន្លែង​ចរាចរណ៍​ទំនិញ​ក្លែង​ក្លាយ​ ទំនិញ​ខូច​គុណភាព និង​ទំនិញ​ក្លែង​បន្លំ​ម៉ាក​យីហោរ​ជា​ច្រើន​ប្រភេទ ដែល​ក្នុង​នោះ​រាប់​ចាប់​តាំង​ពី​គ្រឿង​សម្អាង គ្រឿង​ឧបភោគ​បរិភោគ រហូត​ដល់​ថ្នាំ​ពេទ្យ​ជា​ច្រើន​មុខ​ច្រើន​ម៉ាក។ អ្នក​ឃ្លាំមើល​សង្គម​អះអាង​ថា ឫស​គល់​នៃ​បញ្ហា​នេះ គឺ​ដោយ​សារ​​អំពើ​ពុករលួយ និង​ការ​អនុវត្ត​ច្បាប់​នៅ​ទន់​ខ្សោយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល