អ្នក​វិទ្យាសាស្ត្រ​អាមេរិក​និង​អឺរ៉ុប ប្រតិកម្ម​ទៅ​នឹង​រដ្ឋាភិបាល​រុស្សី យល់ព្រម​ការផលិត​វ៉ាក់សាំង ប្រឆាំង​ជំងឺ​កូវិត១៩

ដោយ ម៉ៅ សុធានី
2020-08-13
អ៊ីម៉ែល
មតិ
Share
បោះពុម្ព
រូប​តំណាង​មេរោគ ​កូរ៉ូណាវីរុស (Coronavirus) ឬ​ហៅ​ម្យ៉ាង​ទៀត​ថា វីរុស សារស៊ីអូវី-២ (SARS-Cov-2)
រូប​តំណាង​មេរោគ ​កូរ៉ូណាវីរុស (Coronavirus) ឬ​ហៅ​ម្យ៉ាង​ទៀត​ថា វីរុស សារស៊ីអូវី-២ (SARS-Cov-2)
AFP

ប្រទេស​ជាច្រើន​ក្នុង​ពិភពលោក រួម​ទាំង​អ្នក​វិទ្យាសាស្ត្រ​នៅ​សហរដ្ឋអាមេរិក និង​នៅ​សហភាព​អឺរ៉ុប ប្រតិកម្ម​ទៅ​នឹង​រដ្ឋាភិបាល​រុស្សី ដែល​យល់ព្រម​ឲ្យ​ផលិត​វ៉ាក់សាំង​ប្រឆាំង​ជំងឺ​កូ​វិត១៩ (Covid​-19​) ក្រោយពី​បាន​ធ្វើតេស្ត​សាកល្បង ទៅលើ​មនុស្ស​មិន​ដល់ ២ខែ​នោះ​មក។

ទីភ្នាក់ងារ​ពត៌មាន​ប៊ី​ប៊ី​ស៊ី (BBC​) ចេញផ្សាយ​កាលពី​ថ្ងៃទី ១២ ខែសីហា​នេះ ឲ្យដឹង​ថា ក្រុម​អ្នក​វិទ្យាសាស្ត្រ​សុខភាព​នៅ​អាមេរិក បារាំង អាល្លឺម៉ង់ និង​អេ​ស្បាញ សំដែង​ក្តី​បារម្ភ​ពី​សុវត្ថិភាព និង​ប្រសិទ្ធភាព​នៃ​វ៉ាក់សាំង​ប្រឆាំង​នឹង​ជំងឺ​កូ​វិត១៩នេះ ដោយ​អះអាង​ថា គេ​គ្មាន​ទិន្នន័យ​ច្បាស់លាស់​ពី​លទ្ធផល​ការ​ធ្វើតេស្ត​ទ្រង់ទ្រាយ​ធំ​ទៅលើ​មនុស្ស។ រដ្ឋមន្ត្រី​ក្រសួងសុខាភិបាល​អាល្លឺម៉ង់ បាន​ចោទ​ថា គោលបំណង​របស់​រុស្សី ដែល​ប្រកាស​ថា វ៉ាក់សាំង​នេះ​នឹង​អនុញ្ញាត​ឲ្យ​ប្រើប្រាស់​នៅ២សប្តាហ៍​ខាងមុខ គឺ​គ្រាន់តែ​ចង់​បង្ហាញ​ពិភពលោក​ថា ប្រទេស​ខ្លួន គឺជា​ប្រទេស​ដំបូងបង្អស់ ដែល​ផលិត​វ៉ាក់សាំង​បាន​មុនគេ ជាជាង​គិតគូរ​អំពី​សុវត្ថិភាព​និង​ប្រសិទ្ធភាព​នៃ​វ៉ាក់សាំង។

ទាក់ទង​នឹង​ការ​លើកឡើង​នេះ ប្រធានាធិបតី​រុស្សី លោ​កវ្លា​ឌីមៀរ ពូ​ទីន (Vladimir Putin​) បដិសេធ​ចំពោះ​ការ​ព្រួយបារម្ភ​របស់​ពិភពលោក​ពី​សុវត្ថិភាព​វ៉ាក់សាំង​នេះ ដោយ​អះអាង​ថា កូនស្រី​របស់​លោក​បាន​ចាក់​សាកល្បង​វ៉ាក់សាំង​នេះ​រួច​ទៅ​ហើយ ដោយ​គ្មាន​បញ្ហា​អ្វី​ទេ។ ទោះជា​យ៉ាងនេះ​ក៏ដោយ តំណាង​អង្គការសុខភាព​ពិភពលោក (WHO​) គ្រោង​ជួប​ជាមួយ​អាជ្ញាធរ​រុស្សី ដើម្បី​ជជែក​និង​ត្រួតពិនិត្យ​វ៉ាក់សាំង​នេះ ថា​តើមាន​កម្រិត​ស្តង់​ដា របស់​អង្គការសុខភាព​ពិភពលោក​ដែរ​ឬទេ។

នៅ​ទន្ទឹម​នេះ​ដែរ សមាគម​អង្គការ​សាកល្បង​ការ​ធ្វើតេស្ត (Association of Clinical Trials Organization (Acto) ដែល​តំណាង​ឲ្យ​ក្រុមហ៊ុន​ផលិត​ឱសថ​ធំជាង​គេ​បង្អស់ មាន​មូលដ្ឋាន​នៅ​ទី​ក្រុង​ម៉ូ​ស៊្គូ ប្រទេស​រុស្សី អំពាវនាវ​ឲ្យ​ក្រសួងសុខាភិបាល​រុស្សី ពន្យារ​ពេល​ការផលិត​វ៉ាក់សាំង​ដ៏​ច្រើន​នេះ ដោយ​រង់ចាំ​លទ្ធផល​សាកល្បង​វ៉ាក់សាំង​ជា​ទ្រង់ទ្រាយ​ធំ​លើក​ទី៣ ទៅ​លើ​មនុស្សជា​មុន​សិន។

ប៉ុន្តែ​នៅ​ទន្ទឹម​នេះ ក៏​មាន​ប្រទេស​មួយ​ចំនួន​អបអរ និង​ត្រៀម​ទិញ​វ៉ាក់សាំង​នេះ ពី​ប្រទេស​រុស្ស៊ី។ រដ្ឋមន្ត្រី​ក្រសួងសុខាភិបាល​អ៊ីស្រាអែល (Israel​) ថា នឹង​ពិនិត្យ​ពី​គុណភាព​វ៉ាក់សាំង​នេះ​ជាមុន​សិន មុននឹង​ចរចា​ទិញ​ពី​រុស្ស៊ី។ កាលពី​ថ្ងៃពុធ​ម្សិលមិញ អ្នក​វិទ្យាសាស្ត្រ​ហ្វីលីពីន (Philippines​) បាន​ជួប​ជាមួយ​តំណាង​មន្ទីរ​ពិសោធន៍​ផលិត​វ៉ាក់សាំង​នេះ ដើម្បី​ពិភាក្សា​ពី​ការសាកល្បង​ធ្វើតេស្ត និង​ទិន្នន័យ​នៃ​ការស្រាវជ្រាវ​នេះ។ ដោយឡែក​តំណាង​រដ្ឋាភិបាល​ប្រេស៊ីល (Brazil​) ក៏បាន​ជួបពិភាក្សា​ជាមួយ​ឯក​អគ្គ​រដ្ឋទូត​រុស្សី​កាលពី​ថ្ងៃពុធ​ម្សិលមិញ​នេះ​ដែរ ដើម្បី​ជជែក​ពី​លក្ខខណ្ឌ​នៃ​កិច្ច​ព្រមព្រៀង​ផលិត​វ៉ាក់សាំង​ប្រឆាំង​កូ​វិដ១៩ នេះ ប៉ុន្តែ​នៅ​មិនទាន់​ដឹង​ថា​តើ​មាន​ការ​យល់​ព្រម​ពី​វិទ្យាស្ថាន​ស្រាវជ្រាវ​ប្រេស៊ីល នៅឡើយ​ទេ។ រី​ឯ​រដ្ឋាភិបាល​កាហ្សាក់ស្ថាន (Kazakhstan) ក៏​នឹង​បញ្ជូន​មន្ត្រី​របស់​ខ្លួន​ទៅ​ក្រុង​មូស្គូ ដើម្បី​ជជែក​ពី​ការទិញ​វ៉ាក់សាំង​នេះ នៅ​ចុងខែ​សីហា​ខាងមុខ។

បច្ចុប្បន្ន​មានការ​ផលិត​វ៉ាក់សាំង​ជាង ១០០ប្រភេទ ក្នុង​ពិភពលោក ក៏ប៉ុន្តែ​អង្គការសុខភាព​ពិភពលោក ទទួលស្គាល់​តែ​វ៉ាក់សាំង ៦ក្រុមហ៊ុន​ប៉ុណ្ណោះ ក្នុង​នោះ​មាន​សហរដ្ឋអាមេរិក​ផង​ដែរ ហើយ វ៉ាក់សាំង ដែល​រុស្ស៊ី​ផលិត​នេះ មិនបាន​ស្ថិត​ក្នុងចំណោម​ប្រភេទ​វ៉ាក់សាំង​ទាំង៦ នោះ​ទេ។ ប្រទេស​រុស្សី​រង​ការចោទប្រកាន់ ពី​ប្រទេស​អង់គ្លេស សហរដ្ឋអាមេរិក​និង​កាណាដា ថា បាន​ចូល​ទៅ​លួច​យក​ទិន្នន័យ​និង​ការស្រាវជ្រាវ​ពាក់ព័ន្ធ​នឹង​ជំងឺ​កូ​វិត១៩ នេះ ពី​បណ្ដា​ប្រទេស​ទាំង​នោះ ប៉ុន្តែ​រុស្ស៊ី​បាន​បដិសេធ៕

ព័ត៌មាន (0)
Share
គេហទំព័រ​ទាំងមូល