ពលរដ្ឋ​ព្យាបាល​ជំងឺ​ប្រចាំ​កាយ​នៅ​ក្រៅ​ប្រទេស​មិន​អាច​ចេញ​ទៅ​តាមដាន​សុខភាព​អំឡុង​កូវីដ-១៩

ដោយ ខែ សុណង
2020-05-21
អ៊ីម៉ែល
មតិ
Share
បោះពុម្ព
ម៉ាស៊ីន​ស្គែនកម្ដៅ​អ្នក​ដំណើរ​ឆ្លង​កាត់​វាល​យន្តហោះ​ ដែល​ក្រសួង​សុខាភិបាល​ដាក់​ដើម្បី​តាម​ដាន​ការ​ឆ្លង​មេរោគ​ កូរ៉ូណា​វីរុស។
ម៉ាស៊ីន​ស្គែនកម្ដៅ​អ្នក​ដំណើរ​ឆ្លង​កាត់​វាល​យន្តហោះ​ ដែល​ក្រសួង​សុខាភិបាល​ដាក់​ដើម្បី​តាម​ដាន​ការ​ឆ្លង​មេរោគ​ កូរ៉ូណា​វីរុស។
រូប៖ ហ្វេសប៊ុក​នាយកដ្ឋាន​ប្រយុទ្ធ​នឹង​ជំងឺ​ឆ្លង

ប្រជាពលរដ្ឋ​ដែល​តែង​ចេញ​ទៅ​ពិនិត្យ និង​ព្យាបាល​ជំងឺ​ប្រចាំ​កាយ​នៅ​ក្រៅ​ប្រទេស កំពុង​ព្រួយបារម្ភ​ពី​ការ​ដាច់​ថ្នាំ​សង្កូវ​ប្រើប្រាស់ និង​មិន​អាច​ចេញទៅ​តាមដាន​សុខភាព ព្រោះតែ​រដ្ឋាភិបាល​បាន​បិទ​ច្រក​ព្រំដែន​មិន​ឱ្យ​ធ្វើដំណើរ អំឡុង​វិបត្តិ​ជំងឺ​កូវីដ-១៩​។ ក្ដី​បារម្ភ​នេះ ក្នុង​គ្រា​ដែល​សមាជិក​ក្នុង​ក្រុម​គ្រួសារ​របស់​ពួកគេ​ជួបប្រទះ​នឹង​បញ្ហា​សុខភាព​ធ្ងន់ធ្ងរ និង​ដល់​ពេលវេលា​កំណត់​ជួប​គ្រូពេទ្យ។

ប្រជាពលរដ្ឋ​មួយ​ចំនួន​ត្អូញត្អែរ​ថា ពួកគេ​កំពុង​ដេក​រង់​ចាំ​មើល​វិធានការ​រដ្ឋាភិបាល​បើក​ច្រក​ព្រំដែន​ឡើងវិញ នឹង​អាល​បញ្ជូន​សមាជិក​គ្រួសា​រ​របស់​ពួកគេ​ទៅ​មន្ទីរពេទ្យ​ប្រទេសជិតខាង​ដែល​តែង​បាន​ព្យាបាល​ជំងឺ​ពួកគេ​ជាប្រចាំ​នោះ។

ពលរដ្ឋ​នៅ​ខេត្ត​បន្ទាយមានជ័យ លោកស្រី គឹម នី ដែល​កំពុង​ថែទាំ​ជំងឺ​ប្ដី​នៅផ្ទះ ថ្លែង​ទាំង​ក្ដី​បារម្ភ​ថា លោកស្រី​សង្ឃឹម​តិច​ណាស់​ចំពោះ​វិធានការ​បើក​ច្រក​ព្រំដែន​ឡើងវិញ​នោះ​។ លោកស្រី​ថា ប្ដី​លោកស្រី​បាន​រស់​មកដល់​សព្វថ្ងៃ​គឺ​ដោយសារតែ​បាន​ទៅ​ព្យាបាល​ជំងឺ​នៅ​ប្រទេស​ថៃ​ជាច្រើន​ឆ្នាំ​មក​ហើយ ថ្វីបើ​ត្រូវ​ចំណាយ​ប្រាក់​ច្រើន​ជា​រៀងរាល់​ខែ​ក្ដី​៖ «ដល់ពេល​គេ​បិទ​ព្រំដែន​យើង​ដឹង​តែ​ពី​លេប​ថ្នាំ​ទេ យើង​អាច​ផ្ញើ​គេ​ទិញ​បាន​មែន​តែ​យើង​ដឹង​តែ​ពី​លេប​ដល់ពេល​ធ្វើទុក្ខ យើង​អត់​ដឹង​ក្នុង​ខ្លួន​គាត់​ហ្នឹង​វា​មានអី​វិវឌ្ឍន៍​ទៀត បើ​សិនណា​ជា​បើក​យើង​ទៅ​យើង​អាច​ទុកចិត្ត​១០០%។ យើង​កក់ក្ដៅ​។ ប្អូន​ខ្ញុំ​គាត់​ឈឺ​គាត់​ពិបាក​ដែរ​ឥឡូវ កំពុង​ឈឺ​ដែរ ព្រួយបារម្ភ​មិនបាន​ទៅ​មិនបាន​ទៅ​គឺ​យ៉ាប់ អ្នក​ដែល​មិនបាន​ទៅ​ហ្នឹង​គឺ​ស្លាប់​អស់​ពីរ បី​នាក់​ហើយ អ្នក​បកប្រែ​ប្រាប់»

ស្រដៀង​គ្នា​នេះ​ដែរ បុគ្គលិក​ក្រុមហ៊ុន​មួយ​នៅ​ខេត្ត​សៀមរាប អ្នកស្រី អ៊ុង សារ៉ាមី ត្អូញត្អែរ​ថា បើ​ទោះ​ជា​មាន​ដំណោះស្រាយ​ពី​មន្ទីរពេទ្យ​ប្រទេស​ថៃ ដែល​អាច​ទិញ​ថ្នាំ​ផ្ញើ​មក​ដល់​ផ្ទះ​ក្ដី ប៉ុន្តែ​អ្នកស្រី​នៅតែ​ព្រួយចិត្ត ត្បិត​អី​មិនបាន​យក​ម្ដាយ​ទៅ​ជួប​តាមដាន​ជំងឺ​ដោយ​ផ្ទាល់​ជាមួយ​គ្រូពេទ្យ​។ អ្នកស្រី​ពិតជា​ចង់​ឱ្យ​រដ្ឋាភិបាល​ឬ​ក្រសួង​សុខាភិបាល​ផ្ដល់​ដំណោះស្រាយ ឬ​មាន​លក្ខខណ្ឌ​ណាមួយ ដែល​អាច​ឱ្យ​ពលរដ្ឋ​ចេញទៅ​បន្ត​ព្យាបាល​ជំងឺ​ដែល​ចាំបាច់​នៅ​ក្រៅ​ប្រទេស​បាន​៖ «ដំបូង​ខ្ញុំ​បារម្ភ​ខ្លាំង​ណាស់ ពេល​ទំនាក់ទំនង​ទៅ​បាន​ដឹង​តាមពិត គេ​មាន​មធ្យោបាយ​តែ​នៅតែ​បារម្ភ​អ៊ីចឹង​ខ្លាច​តែ​វីរុស​ហ្នឹង​វា​កាន់តែ​កើន​ឡើង​ខ្លាច​តែ​គេ​រឹត​បន្តឹង​ជាង​ហ្នឹង​ណា​បង។ មុនដំបូង​ខ្ញុំ​បាន​ទៅ​រក​ថ្នាំ​ម៉ាក់​ខ្ញុំ​នៅ​មន្ទីរពេទ្យ​ថៃ​មួយ​ក្នុង​ខេត្ត​ដែរ ប៉ុន្តែ​ដោយសារ​តម្លៃ​ថ្លៃ​ដែរ ហើយ​វា​អត់​មាន​ថ្នាំ​ដែល​ម៉ាក់​ខ្ញុំ​ប្រើ និយាយ​រួម​នៅ​ហ្វា​ម៉ា​ស៊ី អត់​មាន​ថ្នាំ​ដែល​យើង​ប្រើ​ហ្នឹង​ទេ ធ្លាប់​រក​ហើយ​តែ​រក​អត់​បាន​។ ម៉ាក់​ខ្ញុំ​គាត់​ប្រើ​ថ្នាំ​រាល់​ខែ​គាត់​អត់​មិន​បាន​ទេ បើ​អត់​ញាំ​ទេ ពោះ​គាត់​ហើម​ដោយ​សារជាតិ​ទឹក​។ ទោះជា​អស់​មេរោគ ប៉ុន្តែ​ថ្លើម​នៅតែ​ក្រិន ខ្លាច​ហើម​ពោះ​ហើម​អី​មកវិញ ខ្ញុំ​ចេះតែ​បារម្ភ​ខ្លាច​គាត់​ក្អួត​ឈាម​ក្អួត​អី​។ រឿង​ថ្នាំ​យើង​ទិញ​បានតែ​បើ​គេ​បិទ​ច្រក​រហូត​បើ​ករណី​គាត់​អត់​ស្រួល​ខ្លាំង​អី​ទៅ ពីមុន​ជម្រើស​ទី​១ យើង​ទៅ​ណោះ​ហើយ​យើង​អត់​ដឹង​ទៅ​ណា​ទៀត​ទេ»

ក្ដី​បារម្ភ​របស់​ពលរដ្ឋ​នេះ បន្ទាប់​ពី​អាជ្ញាធរ​រដ្ឋាភិបាល​បាន​បន្ត​បិទ​ច្រក​ព្រំដែន ដើម្បី​ទប់ស្កាត់​ការ​ឆ្លង​រាលដាល​នៃ​ជំងឺ​កូវីដ-១៩។

អាស៊ីសេរី​បាន​ព្យាយាម​ទាក់ទង​អ្នកនាំពាក្យ​ក្រសួងសុខាភិបាល អ្នកស្រី ឱ វណ្ណឌីន ជាច្រើន​ដង​តែ​ជំនួយការ​របស់​អ្នកស្រី​ថា រវល់​ប្រជុំ​។ ប៉ុន្តែ​អ្នកស្រី​ឆ្លើយតប​សារ​សំណួរ​ជុំវិញ​រឿង ​នេះ​ដោយ​ខ្លី​ថា អ្នកស្រី​មិន​ទទួល​បាន​ព័ត៌មាន​នេះ​ទេ ហើយ​យើង​មាន​ពេទ្យ​ក្នុងស្រុក​ដែល​អាច​មាន​ជម្រើស​បាន។

យ៉ាងណាក៏ដោយ ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា (ANSA) លោក សន ជ័យ មាន​មតិ​ថា ក្រសួង​សុខាភិបាល​កម្ពុជា​គួរតែ​មាន​ការ​អន្តរាគមន៍​ទៅ​រដ្ឋាភិបាល​ប្រទេស​ផ្ដល់​សេវា​សុខភាព ដើម្បី​រក​ដំណោះស្រាយ​កណ្ដាល​មួយ ឱ្យ​ពលរដ្ឋ​មានលទ្ធភាព ឬ​អាទិភាព​ទទួល​ការ​​ព្យាបាល​សម្រាប់​អ្នកជំងឺ​ដែល​មាន​តារាង​កាលវិភាគ​ចាំបាច់​ត្រូវ​ណាត់​ជួប​គ្រូពេទ្យ​៖ «ខ្ញុំ​យល់ថា​យន្តការ​ដើម្បី​ជួយ​ដល់​អ្នកជំងឺ​នេះ គឺជា​ការ​រួម​ចំណែក​មួ​យ​ដើម្បី​បំពេញ​បន្ថែម​ទៅ​ទិសដៅ​អភិវឌ្ឍន៍​ប្រកបដោយ​ចិរភាព​ដែល​គេ​ហៅ​ថា មិន​ទុក​នរណា​ម្នាក់​ចោល​បាន​ន័យ​ថា គ្រប់គ្នា​ត្រូវ​បាន​គេ​ដាក់បញ្ចូល​ក្នុង​ការ​យកចិត្តទុកដាក់ និង​ការសម្រេចចិត្ត​ផ្សេងៗ​របស់​រដ្ឋាភិបាល​ដើម្បី​ឱ្យ​ក្រុម​ងាយ​រងគ្រោះ​ទទួល​បាន​នូវ​ផលប្រយោជន៍​ពី​សេវា​សង្គម​និង​ការ​យកចិត្តទុក​ដាក់​ពី​រដ្ឋាភិបាល»

ពលរដ្ឋ​ដែល​តែង​ចេញទៅ​ព្យាបាល​ជំងឺ​នៅ​ក្រៅ​ប្រទេស​មាន​ហេតុផល​មួយ​ចំនួន ដោយ​ព្រោះ​ពួកគាត់​គ្មាន​ជំនឿ និង​គ្មាន​ទំនុក​ចិត្ត​ព្យាបាល​ក្នុងស្រុក រួម​ទាំង​បញ្ហា​កង្វះ​ឧបករណ៍ បច្ចេកទេស ការប្រើប្រាស់​ពាក្យសំដី និង​ការ​មិន​យកចិត្តទុកដាក់​អ្នកជំងឺ​ពី​ក្រុម​គ្រូពេទ្យ​ជាដើម។

អតីត​គ្រូពេទ្យ​ទាហាន​អាមេរិក លោក ស៊ីម យាង ដែល​បាន​ឆ្លងកាត់​ការសិក្សា​ផ្នែក​ឱសថការី​មធ្យម​សម័យ​សាធារណរដ្ឋ​ខ្មែរ​ក្នុង​របប លន់ នល់ និង​ជា​ម្ចាស់​ឱសថស្ថាន​សង្គម​ពាណិជ្ជ​ខេត្ត​ព្រៃវែង​។ លោក​ថ្លែង​ថា លោក​ធ្លាប់​ទៅ​វះកាត់​ក្បាលជង្គង់​នៅ​ក្រៅ​ប្រទេស ដោយសារតែ​លោក​និង​ក្រុម​គ្រួសារ​មាន​ទំនុក​ចិត្ត​លើ​បច្ចេកទេស​និង​ជំនាញ​ព្យាបាល​របស់​គេ​៖ «យើង​មិន​ដឹង​សាវតារ​គេ​របៀប​ម៉េច​? ជួនកាល​គេ​ថា យើង​អញ្ចេះ អញ្ចុះ​ទៅ​ជួនកាល​យើង​មិន​ត្រូវ​វះកាត់ ក៏​គេ​ធ្វើ​ឱ្យ​យើង ជួនកាល​ម៉ាស៊ីន​គេ​មិន​ទំនើប​យើង​ក៏​ពិបាក​ខ្លួន​យើង​ដែរ ព្រោះ​ជីវិត​យើង​រស់​តែម្ដង​ស្លាប់​តែម្ដង​កុំ​ឱ្យ​មាន​បញ្ហា​ថ្ងៃក្រោយ អ៊ីចឹង​បាន​ខ្ញុំ​ស្ម័គ្រ​ចិត្ត​ទៅ​ប្រទេស​ថៃ»

កន្លង​មក​រដ្ឋមន្ត្រី​ក្រសួង​សុខាភិបាល បាន​អំពាវនាវ​ដល់​ពលរដ្ឋ​ដែល​តែង​ទៅ​ព្យាបាល​នៅ​ក្រៅ​ប្រទេស ឱ្យ​ងាក​មក​ព្យាបាល​ជំងឺ​នៅ​មន្ទីរពេទ្យ​ក្នុងស្រុក​វិញ​។ ប៉ុន្តែ​ប្រជាពលរដ្ឋ និង​មន្ត្រី​សង្គម​ស៊ីវិល​មួយ​ចំនួន ស្នើសុំ​ថ្នាក់ដឹកនាំ និង​មន្ត្រី​ធំៗ ឱ្យ​ធ្វើ​ជា​គំរូ​ពលរដ្ឋ​វិញ ដោយ​ឈប់​នាំគ្នា​ទៅ​ពេទ្យ​ក្រៅ​ប្រទេស​ទៀត​ដែរ។ ក្រុម​គ្រួសារ​មន្ត្រី​ធំៗ និង​គ្រួសារ​លោក ហ៊ុន សែន ព្រមទាំង​មាន​ក្រុម​គ្រួសារ​របស់​មន្ត្រី​ក្រសួង​សុខាភិបាល​ផង បាន​ចេញ​ទៅ​ពិនិត្យ និង​ព្យាបាល​ជំងឺ​នៅ​បរទេស​យ៉ាង​សាមញ្ញ​ទៅ​ហើយ​។ ពេលខ្លះ​ក្រុម​គ្រួសារ​មន្ត្រី​គ្រាក់ៗ របស់​របប​ក្រុងភ្នំពេញ មិនមែន​ចេញទៅ​ព្យាបាល​ជំងឺ​ធ្ងន់ធ្ងរ​អ្វី​នោះ​ទេ ពោល​គឺ​ត្រឹម​សម្រាលកូន ក៏​ពួកគេ​នាំគ្នា​ទៅ​មន្ទីរ​ពេទ្យ​នៅ​ឯ​បរទេស​ដែរ​។ សូម្បីតែ​លោក ហ៊ុន សែន ក៏​បាន​ទៅ​ព្យាបាល​បញ្ហា​គ្រេច​ស្មា​នៅ​ប្រទេស​សិង្ហបុរី ៤​ថ្ងៃ ដែល​នាំ​មានការ​រិះគន់​នៅ​ពេល​នោះ​ថា លោក ហ៊ុន សែន មិន​បាន​ឱ្យ​តម្លៃ​គ្រូពេទ្យ​ស្រុក​ខ្មែរ។

គ្រាន់តែ​អតិថិជន​ជា​ពលរដ្ឋ​ខ្មែរ​ទៅ​ទទួល​សេវា​ពិនិត្យ និង​ព្យាបាល​សុខភាព​នៅ​ប្រទេស​ថៃ ក្នុង​ឆ្នាំ​២០១៧ មាន​ចំនួន​ប្រមាណ​ជាង​២២​ម៉ឺន​នាក់​។ ក្រសួងសុខាភិបាល​ប្រទេស​នេះ ធ្លាប់​បាន​បង្ហាញ​របាយ​ការណ៍​ថា ចំនួន​នេះ​បាន​ធ្វើ​ឱ្យ​កម្ពុជា​នាំ​មុខ​គេ​ក្នុងចំណោម​ប្រទេស​ចំនួន ៤ ដែល​ជា​សមាជិក ប្រទេស CLMV រួមមាន កម្ពុជា ឡាវ ភូមា និង​វៀតណាម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល