អាជ្ញាធរ​​ថា ស្ថានភាព​​​កូវីដ១៩ក្នុង​ពន្ធនាគារ​ខេត្ត​កំពង់​ស្ពឺ​បាន​ធូរ​ស្រាល ក្រោយ​​បំបែក​អ្នក​ឈឺដាក់​នៅ​ដាច់​ដោយ​ឡែកពីគ្នា

ដោយ ទីន ហ្សាការីយ៉ា
2021-06-02
Share
អាជ្ញាធរ​​ថា ស្ថានភាព​​​កូវីដ១៩ក្នុង​ពន្ធនាគារ​ខេត្ត​កំពង់​ស្ពឺ​បាន​ធូរ​ស្រាល ក្រោយ​​បំបែក​អ្នក​ឈឺដាក់​នៅ​ដាច់​ដោយ​ឡែកពីគ្នា ពន្ធនាគារខេត្តកំពង់ស្ពឺដែលមានទណ្ឌិត ១១៧ នាក់ក្នុងចំណោម ១៨០២ នាក់បានឆ្លងជំងឺកូវីដ១៩ ក្រោយការធ្វើតេស្តកាលពីថ្ងៃទី២៩ ខែឧសភា ឆ្នាំ២០២១។
រូប៖ គេ​ផ្ដល់​ឱ្យ

អាជ្ញាធរ​ខេត្ត​កំពង់ស្ពឺបញ្ជាក់​ថា​ ​​​អ្នក​ជាប់​ឃុំ ក្នុង​ពន្ធនាគារ​ខេត្ត​នេះ មិន​មាន​ការ​​​ឆ្លង​ជំងឺ​កូវីដ​១៩ ​ទៀត​ទេ នៅ​ថ្ងៃ​ទី​០២ ខែមិថុនា​។

អភិបាល​ខេត្តកំពង់​ស្ពឺ លោក វ៉ី សំណាង ប្រាប់​អាស៊ី​សេរី​ថា​ តួលេខ​អ្នក​ឆ្លង​ ទាំង​មន្ត្រី និង​អ្នក​ជាប់​ឃុំ គឺ​ចំនួន១១៧នាក់ ដដែល​ ព្រោះ​គ្មាន​ការ​ឆ្លង​​បន្ថែម​ទៀត​ទេ នៅ​ក្នុង​ពន្ធនាគារ​​។ លោកបន្ត​ថា ក្រោយ​ការ​បំបែក​អ្នក​​ជំងឺ​កូវីដ​១៩​ចេញ ​​គ្រូ​ពេទ្យ​​​ពន្ធនាគារ​ កំពុង​យក​ចិត្ត​ទុក​ដាក់​ព្យាបាល​​​អ្នក​ជំងឺ​ទាំង​អស់ នៅ​ខាង​ក្នុង​ពន្ធនាគារ។ លោក បញ្ជាក់​ជាថ្មី​ទៀត​ថា អាជ្ញាធរ​ នឹង​មិន​ប្រថុយ​គ្រោះថ្នាក់ ​ដឹក​ជញ្ជូន​អ្នក​​ជាប់​ឃុំ​​ យក​ទៅ​ព្យាបាល​នៅ​ក្រៅ​ពន្ធនាគារ​ទេ ព្រោះ លោក​​​​ថា ការ​ធ្វើ​បែប​នេះ នឹង​បណ្ដាល​ឲ្យ​មាន​គ្រោះថ្នាក់​ទាំង​ពលរដ្ឋ និង​កង​កម្លាំង ដែល​ទទួល​បន្ទុក​ថែរក្សា​ជន​ជាប់​ឃុំ៖ «អត់​អ្វី​ទេ ក្នុង​ពន្ធនាគារ យើង​មាន​ពេទ្យ​ស្រាប់​ ហើយ​យើង​គ្រាន់​តែ​ពង្រឹង​អា ​សមត្ថភាព​ ចំណេះ ជំនាញ​​​គាត់​ស្រាប់ ​ដើម្បី​បង្កើន​ការ​​​ព្យាបាល​ទៅ​ ហើយ​យើង​ប្រើប្រាស់​ថ្នាំ​ទៅបាន​ហើយ»។

កាល​ពី​ថ្ងៃ​ទី​០១ ខែមិថុនា អាជ្ញាធរ​ខេត្ត​កំពង់ស្ពឺ បាន​​ធ្វើតេស្ត​រក​ឃើញ​អ្នក​ជាប់​ឃុំជាង​មួយ​រយ​នាក់ ឆ្លង​ជំងឺ​កូវីដ​១៩ ក្រោយ​ពេល​​មាន​ស្ត្រី​ជាប់ឃុំ​វ័យ​ចំណាស់​ម្នាក់ ស្លាប់​ ​ដោយសារ​ជំងឺ​នេះ នៅ​ក្នុង​ពន្ធនាគារ។ អាជ្ញាធរ​​ខេត្តសង្ស័យ​ថា ការ​ចម្លង​ជំងឺ​ចូល​ក្នុង​ពន្ធនាគារ​​នេះ គឺ​តាម​រយៈ​គ្រូពេទ្យ ខណៈ​​អាជ្ញាធរ បាន​បិទ​ការ​ចេញ​ចូល​ពន្ធនាគារ​នេះ​ទាំង​ស្រុង ​ប្រហែល​មួយ​ខែ​មក​ហើយ​។

ចំណែក​ស្ថានភាព​​ជំងឺកូវីដ-១៩ នៅ​ក្នុង​ពន្ធនាគារ​ខេត្ត​កណ្ដាល​វិញ មិន​ទាន់​មាន​​ព័ត៌មាន​ស្ដីពី​ការ​ថមថយ​ការ​ឆ្លងនោះ​ទេ ហើយ​អាជ្ញាធរ​ខេត្ត​នេះ ហាក់​លាក់បាំង​ព័ត៌មាន​ច្រើន។

ប្រព័ន្ធ​ឃោសនា​ស្និទ្ធ​រដ្ឋាភិបាល​(Fresh News) បាន​​ចុះ​ផ្សាយ​កាល​ពី​ថ្ងៃ​ទី​៣១ ខែឧសភា​ ថា​មន្ត្រី​ និង​អ្នក​ជាប់​ឃុំ​​ក្នុង​ពន្ធនាគារ​ខេត្ត​កណ្ដាលបានឆ្លង​ជំងឺ​កូវីដ​១៩ កើន​ឡើង​ដល់​​ជិត​បួន​រយ​ (៣៦៩) ​នាក់។ ​ប៉ុន្តែ​ អភិបាល​ខេត្ត​​លោក គង់ សោភ័ណ្ឌ បាន​ច្រាន​ចោល និង​ចោទ​​ការផ្សាយ​នោះ​ថា ​ជា​ព័ត៌មាន​ចចាមអារ៉ាម​ ក្រោម​ហេតុផល​ថា លោក​មិន​ដែល​បាន​ផ្តល់​ព័ត៌មាន​នេះទេ។ លោក​​ប្រាប់កាសែតភ្នំពេញប៉ុស្តិ៍ថា ការ​មិ​នផ្តល់​ព័ត៌មាន​ទាក់ទង​នឹង​ការ​ឆ្លង​ជំងឺកូវីដ-១៩ ចូលក្នុងពន្ធនាគារនេះ គឺលោក​យក​សុវត្ថិភាពជាធំ។

អាស៊ី​សេរី មិន​អាច​សុំ​ការ​បញ្ជាក់​បន្ថែម​រឿងនេះ ​ពីលោក​ គង់ សោភ័ណ្ឌ និង​អ្នក​នាំ​ពាក្យ​អគ្គ​នាយកដ្ឋាន​ពន្ធនាគារលោក​ នុត សវនា​ បាន​ទេ នៅ​ថ្ងៃ​ទី​០២ ខែមិថុនា។ ទោះ​យ៉ាង​ណាលោក នុត សវនា ប្រាប់​​ប្រព័ន្ធ​ផ្សព្វផ្សាយ​ក្នុង​ស្រុក​ (VOD) ថា គិត​ត្រឹម​ថ្ងៃ​ទី​១ ​ខែមិថុនា ​អាជ្ញាធរបាន​ចាក់​វ៉ាក់សាំង​បង្ការជំងឺ​កូវីដ-១៩​ដល់​អ្នក​ជាប់ឃុំ​​ បាន​ជាង​មួយ​ម៉ឺន (១១.០០០) នាក់​ ស្មើ​​៣០​ភាគរយ​ នៃ​អ្នក​ជាប់​ឃុំ​ទាំង​អស់​ នៅ​​​ទូទាំង​ប្រទេស​ ដែល​មាន​សរុប​ជិត​បួន​ម៉ឺន (៤០.០០០) នាក់។

ពាក់ព័ន្ធ​នឹង​ស្ថានភាព​ការ​ឆ្លង​ជំងឺ​កូវីដ​១៩​ ក្នុង​ពន្ធនាគារ​នេះ​ដែរ អ្នក​ឃ្លាំមើល​សិទ្ធិ​មនុស្ស នៅ​តែ​បង្ហាញក្តី​ព្រួយ​បារម្ភ និង​ជំរុញ​ឲ្យ​អាជ្ញាធរ ​ធានា​ឲ្យ​បាន​នូវ​ការ​កាត់​បន្ថយ​​ស្ថានភាព​ចង្អៀត​ណែន​ក្នុង​ពន្ធនាគារឲ្យ​មាន​ប្រសិទ្ធភាព។

អ្នក​នាំ​ពាក្យ​សមាគម​អាដហុក​ (Adhoc)​ លោក ស៊ឹង សែន​ករុណា ស្នើសុំ​ឲ្យ​អាជ្ញាធរ​ពាក់ព័ន្ធ​បង្ហាញ​តួលេខ​អ្នក​ឆ្លង​កូវីដ​១៩ ក្នុង​ពន្ធនាគារ​ជា​ប្រចាំ និង​ឲ្យ​បាន​ជាក់​លាក់។ លោកមិន​ជំទាស់​ នឹង​ការ​ញែក អ្នក​ជាប់​ឃុំ​ ដែល​ឆ្លង​កូវីដ​១៩ ដាក់​​ដាច់​ដោយ​​​ឡែក​ទេ​។ ប៉ុន្តែមន្ត្រី​សង្គម​ស៊ីវិល​រូប​នេះ នៅ​តែ​ទទូច​ឲ្យ​អាជ្ញាធរ​ រក​វិធី​បន្ថយ​ស្ថានភាព​ចង្អៀត​ណែន​ នៅ​ក្នុង​ពន្ធនាគារ​ ឲ្យ​បានឆាប់រហ័ស​។

លោកផ្ដល់​យោបល់ឲ្យ​អាជ្ញាធរ​ពាក់ព័ន្ធ​​ដោះលែង​អ្នក​ជាប់​ឃុំ ដែល​មាន​ទោស​ស្រាល​ៗ ឬ​​​ ការ​អនុវត្ត​ទោស​សហគមន៍ ឬ អាជ្ញាធរគួរ​តែ​​យក​អ្នក​ជាប់​ឃុំ​ខ្លះទៅ​ដាក់​ឃុំ​តាម​ផ្ទះ​​របស់​ពួកគេ​រៀង​ខ្លួន​៖ «អ្នក​ដែល​គាត់​មាន​ជំងឺ​រ៉ាំរ៉ៃ ក្នុង​ពន្ធនាគារ ដែល​​មាន​ហានិភ័យ​ប្រឈម​ដល់​អាយុ​ជីវិត​​អ្វី​ទាំង​អស់​ហ្នឹង ក៏​គប្បី​ឲ្យ​គាត់​​បាន​មក​ថែរក្សា​សុខភាព​ នៅ​ខាង​ក្រៅ​ ព្យាបាល​នៅ​ខាង​ក្រៅ​អ្វី ជាដើម។ អា​ហ្នឹង​ គឺ​ជា​រឿង​ចាំបាច់​ ដែល​គួរ​តែ​ពិនិត្យ​មើល​។ ចំណុច​ទាំង​អស់​​នេះ វា​គឺជា​រឿង​សំខាន់​ណាស់ ព្រោះ​ដើម្បី​កាត់​បន្ថយ​នូវ​ភាព​ចង្អៀត​ណែន​ផង ហើយ​អាច​បង្ការ​​នូវ​ការ​រាតត្បាត​នៃ​​ជំងឺ​កូវីដ​នេះ បន្ត​ទៀត នៅ​ក្នុង​ពន្ធនាគារ​ផង​ដែរ»។

មក​ដល់​ពេល​នេះ ​អាជ្ញាធរ​ពន្ធនាគារ​ ហាក់មិន​ទាន់​មាន​គម្រោង​ស្នើសុំ​ការ​បន្ធូរ​បន្ថយ​ទោស និង​​មិន​ទាន់​​​​មាន​ផែនការ​ច្បាស់​លាស់ ​ក្នុង​ការ​ទប់​ស្កាត់ ការ​ឆ្លង​រាល​ដាល​ខ្លាំង នៃ​ជំងឺ​​កូវីដ​១៩ តាម​ពន្ធនាគារ​ទេ ក្រៅ​ពី​​ការ​ប្រមូល​អ្នក​ជាប់​ឃុំ ដែល​ឆ្លង​ជំងឺ​ ដាក់​នៅ​អគារ​ផ្សេង។ សង្គម​ស៊ីវិល និង​អ្នក​ជំនាញ​វេជ្ជសាស្ត្រ ព្រួយ​បារម្ភ​ថា ប្រសិន​បើ​ការ​ព្យាបាល​ នៅ​ខាង​ក្នុង​ពន្ធនាគារ​មិន​បាន​ដិតដល់​ទេ ​​​​អ្នក​​​​​ជំងឺ​នឹង​ធ្លាក់​ខ្លួន​ឈឺ​កាន់​តែ​ធ្ងន់។

ជាមួយ​គ្នា​នេះ សាច់​ញាតិ​របស់​អ្នក​នយោបាយ និង​សកម្មជន​សង្គម ដែល​កំពុង​ជាប់​ឃុំ បានបន្ត​បង្ហោះ​សារ​តាម​ហ្វេសប៊ុក (facebook) និង​ គ្រោង​​ជួបជុំ​គ្នា អុជ​ធូប​ធ្វើ​ពិធី​សែនព្រេន ​​ទាមទារ​ឲ្យ​អាជ្ញាធរ​ដោះលែង​សាច់​ញាតិ​របស់​ពួកគេ​​ជា​បន្ទាន់​។ ពួកគាត់​ ព្រួយ​បារម្ភ​ថា សាច់​ញាតិ​កំពុង​ជាប់​ឃុំ​ទាំង​នោះ នឹង​ធ្លាក់​ខ្លួន​ឈឺ​ ឬ​ស្លាប់ ក្នុង​ពន្ធនាគារ ​ព្រោះ​តែ​អាជ្ញាធរ​មាន​សមត្ថកិច្ច​ បិទបាំង​ព័ត៌មាន និង​​​​មិន​ព្រម​ដោះលែង​ពួកគាត់៕​ ​​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល