ក្រុមហ៊ុន​DKSH​ប្រមូល​យក​ទឹក​ដោះ​គោ​Dumex​វិញ​សង្ស័យ​មាន​មេរោគ

ដោយ សុ ជីវី
2013-08-06
Share

ក្រុមហ៊ុន​ផលិត​ទឹក​ដោះ​គោ​ដ៏​ធំ​មួយ​របស់​ប្រទេស ណូវែលហ្សេឡង់ដ៏ (New Zealand) ឈ្មោះ ហ្វុនតេរ៉ា (Fonterra Cooperative Group Ltd.) បាន​ប្រកាស​ជា​សាធារណៈ​ថា គ្រឿង​ផ្សំ​សម្រាប់​ផលិត​ទឹក​ដោះ​គោ​ដែល​ផលិត​ដោយ​ក្រុមហ៊ុន​នេះ មាន​បញ្ហា ដែល​អាច​អោយ​ប៉ះពាល់​ដល់​សុខភាព​អ្នក​ប្រើ​ប្រាស់។ ភ្លាមៗ​នេះ មាន​ក្រុមហ៊ុន​នៅ​ក្នុង​ប្រទេស​មួយ​ចំនួន​ក្នុង​តំបន់​អាស៊ី រួម​នឹង​កម្ពុជា ផង ដែល​មាន​ផលិត​ផល​ទឹក​ដោះ​គោ​ប្រើប្រាស់​គ្រឿង​ផ្សំ​របស់​ក្រុមហ៊ុន ហ្វុនតេរ៉ា បាន​ប្រកាស​ប្រមូល​ផលិត​ផល​របស់​ខ្លួន​អោយ​ត្រឡប់​ចូល​ក្រុមហ៊ុន​វិញ។

ក្រុមហ៊ុន ឌី.ខេ.អេស.អេច (DKSH Cambodia Ltd) ប្រចាំ​នៅ​កម្ពុជា ប្រកាស​ប្រមូល​ផលិត​ផល​ទឹក​ដោះ​គោ​សម្រាប់​ទារក ម៉ាក ឌុយម៉ិច (Dumex) ចំនួន ៣​ប្រភេទ​ធំៗ ដែល​កំពុង​ចរាចរ​នៅ​លើ​ទីផ្សារ​នៅ​កម្ពុជា អោយ​ប្រគល់​ត្រឡប់​ចូល​ក្រុមហ៊ុន​វិញ ដើម្បី​ចៀសវាង​បញ្ហា​ដែល​អាច​ធ្វើ​អោយ​ប៉ះពាល់​ដល់​សុខភាព។

សេចក្ដី​ប្រកាស​ព័ត៌មាន​របស់​ក្រុមហ៊ុន ឌី.ខេ.អេស.អេច ដែល​ផ្សព្វផ្សាយ​ជា​សាធារណៈ​កាល​ពី​ថ្ងៃ​ទី៥ ខែ​សីហា បាន​អោយ​ដឹង​ថា បន្ទាប់​ពី​បាន​ទទួល​ព័ត៌មាន​ពី​ក្រុមហ៊ុន​ហ្វុនតេរ៉ា ដែល​ថា គ្រឿង​ផ្សំ​ដែល​ផ្គត់ផ្គង់​ដោយ​ក្រុមហ៊ុន​នេះ​អាច​នឹង​បង្ក​លទ្ធភាព​ឆ្លង​រោគ។ លើស​ពី​នេះ គ្រឿង​ផ្សំ សារធាតុ​ផ្សំ​មួយ​ចំនួន ដែល​ផ្គត់ផ្គង់​ដល់​ក្រុមហ៊ុន ឌី.ខេ.អេស.អេច ការិយាល័យ ឌុយម៉ិច អាច​មាន​លទ្ធភាព​ចម្លង​រោគ​ផង​ដែរ។

សេចក្តី​ថ្លែងការណ៍​ដដែល​បញ្ជាក់​ទៀត​ថា មក​ដល់​ពេល​នេះ ការ​ពិសោធ​ផលិត​ផល ឌុយម៉ិច ដែល​កំពុង​ចរាចរ​នៅ​លើ​ទីផ្សារ​របស់​ក្រុមហ៊ុន​នេះ គឺ​ពុំ​មាន​ចំណុច​សង្ស័យ​នៃ​លទ្ធភាព​ដែល​អាច​ចម្លង​រោគ​ណា​មួយ​ឡើយ។ ប៉ុន្តែ ដោយ​គិត​ដល់​សុខភាព​អ្នក​ប្រើប្រាស់​ជា​ចម្បង ទើប​ក្រុមហ៊ុន​សម្រេច​ប្រមូល​ផលិត​ផល​របស់​ខ្លួន​ចេញ​ពី​ទីផ្សារ។

ប្រធាន​ផ្នែក​ទីផ្សារ​នៃ​ក្រុមហ៊ុន ឌី.ខេ.អេស.អេច លោក ចាន់ បញ្ញារិទ្ធ បាន​អោយ​ដឹង​ថា លទ្ធភាព​នៃ​ការ​ឆ្លង​រោគ​នៃ​គ្រឿង​ផ្សំ​ផលិត​ផល​ទឹក​ដោះ​គោ នឹង​អាច​អោយ​កុមារ​មាន​ជំងឺ​រាករូស ក្អួត ឬ​ទល់​លាមក។ យ៉ាង​ណា លោក​នៅ​តែ​បញ្ជាក់​ថា មក​ដល់​ពេល​នេះ​នៅ​មិន​ទាន់​មាន​ករណី​នៃ​រោគ​សញ្ញា​ជំងឺ​ទាំង​នេះ​កើត​ឡើង​ចំពោះ​កុមារ ដែល​ប្រើ​ប្រាស់​ទឹក​ដោះ​គោ​ម៉ាក ឌុយម៉ិច នៅ​ឡើយ។

ក្រុមហ៊ុន ឌី.ខេ.អេស.អេច អះអាង​ថា ផលិត​ផល​ទឹក​ដោះ​គោ​ម៉ាក ឌុយម៉ិច ជា​ផលិត​ផល​លក់​ដាច់​គួរសម គឺ​ស្មើ ៤៥% នៃ​ផលិត​ផល​លើ​ទីផ្សារ​នៅ​កម្ពុជា។

ផលិត​ផល​ទឹក​ដោះ​គោ ឌុយម៉ិច ទាំង ៣​ប្រភេទ ដែល​ត្រូវ​ប្រមូល​ចេញ​ពី​ទីផ្សារ​ទៅ​វិញ​នោះ រួម​មាន ឌុយម៉ិច​ឌុយ​ប្រូ ពណ៌​បៃតង​ជំហាន​ទី២ (DumexDupro-Step 2-Green) សម្រាប់​ទារក​អាយុ​ពី ៦ ដល់ ២៤​ខែ ដោយ​មាន​កាល​បរិច្ឆេទ​ផលិត​ចំនួន​ប្រាំ​ខុសៗ​គ្នា គឺ​ចាប់​ពី​ថ្ងៃ​ទី៣០ ខែ​មេសា ដល់​ថ្ងៃ​ទី៣០ ខែ​ឧសភា ឌុយម៉ិចឌុយ​ឡាក់ ពណ៌​មាស​ជំហាន​ទី១ (DumexDulac-Step 1-Gold) និង ឌុយម៉ិច​ឌុយ​ប្រូ ពណ៌​មាស​ជំហាន​ទី១ (DumexDupro-Step 1-Gold) សម្រាប់​ទារក​ចាប់​ពី​ពេល​កើត​ដល់ ១២​ខែ ដោយ​មាន​កាល​បរិច្ឆេទ​ផលិត​ចំនួន ៣​ខុសៗ​គ្នា គឺ​ចាប់​ពី​ថ្ងៃ​ទី​៣១ ខែ​ឧសភា ដល់​ថ្ងៃ​ទី១៩ ខែ​មិថុនា។

វិទ្យុ​អាស៊ីសេរី នៅ​មិន​ទាន់​អាច​សុំ​ការ​អធិប្បាយ​ពី​មន្ត្រី​សុខាភិបាល​ទទួល​បន្ទុក​សុខុមាលភាព​ទារក និង​កុមារ​តូច បាន​នៅ​ឡើយ​ទេ​នៅ​រសៀល​ថ្ងៃ​ទី​៦ ខែ​សីហា។

យ៉ាង​ណា​ជា​គោលការណ៍ កម្ពុជា គាំទ្រ​អោយ​ម្ដាយ​គ្រប់​រូប​បំបៅ​ដោះ​កូន​ដោយ​ទឹក​ដោះ​ម្ដាយ​តែ​មួយ​មុខ ចំពោះ​ទារក​អាយុ​តិច​ជាង ៦​ខែ។

មន្ត្រី​ផ្នែក​សុខភាព​របស់​អង្គការ​ការពារ​សិទ្ធិ​មនុស្ស​លីកាដូ (Licadho) លោក​វេជ្ជបណ្ឌិត ម៉ាន់ សុធារ៉ា មាន​ប្រសាសន៍​ថា នេះ​ជា​លើក​ទី​មួយ​ហើយ​ដែល​មាន​ក្រុមហ៊ុន​ហ៊ាន​ចេញ​មុខ​ប្រមូល​ផលិត​ផល​របស់​ខ្លួន។

នៅ​ក្នុង​គេហទំព័រ​របស់​ក្រុមហ៊ុន ហ្វុនតេរ៉ា បាន​អោយ​ដឹង​ថា ក្រុមហ៊ុន​នេះ​បាន​ថ្លែងការណ៍​សុំ​ទោស​ចំពោះ​បញ្ហា​ដែល​មាន​នៅ​ក្នុង​ធាតុ​ផ្សំ​របស់​ក្រុមហ៊ុន​នេះ។ កាល​ពី​ខែ​មិថុនា ឆ្នាំ​២០១២ ហ្វុនតេរ៉ា បាន​រក​ឃើញ​លទ្ធភាព​បង្ក​បាក់តេរី​នៅ​ក្នុង​គ្រឿង​ផ្សំ​របស់​ខ្លួន តែ​គេ​នៅ​តែ​មិន​អាច​ដោះស្រាយ​បាន។ ការ​ប្រមូល​ផលិត​ផល​ទឹក​ដោះ​គោ​ដែល​ប្រើ​គ្រឿង​ផ្សំ​របស់​ហ្វុនតេរ៉ា បាន​ធ្វើ​ឡើង​នៅ​ក្នុង​ប្រទេស​មួយ​ចំនួន​ទៀត ដោយ​ចាប់​ផ្ដើម​ពី​ប្រទេស​ចិន និង​នៅ​ប្រទេស​ម៉ាឡេស៊ី៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល