ក្នុងសេចក្តីប្រកាសកម្រាស់ ៦ ទំព័រ ដែលមាន ១១ប្រការ ចុះហត្ថលេខាដោយលោកនាយករដ្ឋមន្រ្តី ហ៊ុន សែន និងចាប់អនុវត្តយ៉ាងប្រញាប់ប្រញាល់់នោះ ធ្វើឡើងក្រោយសារបែកធ្លាយរបស់លោក ហ៊ុន សែន ប៉ុន្មានម៉ោងមុននោះ ដែលលោកនិយាយទៅកាន់គណៈកម្មាធិការអចិន្រ្តៃយ៍របស់រដ្ឋាភិបាល ថាស្ថានភាពរីករាលដាលនៃជំងឺកូវីដ-១៩ ឆ្លងគ្រប់ទិសទីនៅក្នុងទីក្រុងភ្នំពេញ និងតាខ្មៅទៅហើយ៖ «សភាពការណ៍យើងទ្រាំទ្រលែងបានហើយ ដូច្នេះខ្ញុំសម្រេចថា នឹងបិទរាជធានីក្នុងរយៈពេលពីរអាទិត្យ បើមិនដូច្នេះទេ គឺវារាលដាលទាំងអស់ហើយ មិនមានខ័ណ្ឌណាមួយដែលមិនប៉ះពាល់នោះទេ។ ដូច្នេះសូមបានជ្រាប ព្រោះខ្ញុំត្រូវយកការសម្រេចមួយ ដែលមានការទទួលខុសត្រូវ សម្រាប់ការបិទរាជធានីភ្នំពេញនេះ»។
ក្រោយសារនោះត្រូវបានចែកចាយព្រោងព្រាតតាមបណ្ដាញសង្គមហ្វេសប៊ុក អ្នកក្រុងភ្នំពេញជាច្រើនបានពពាក់ពពូនគ្នាទៅប្រជ្រៀតទិញស្បៀងអាហារ ដើម្បីស្ដុកទុកប្រើប្រាស់ក្នុងគ្រាអាសន្ននេះ។ រូបភាពនៃមនុស្សប្រមូលផ្តុំគ្នា កកកុញតាមហាងលក់ទំនិញ និងទីផ្សារ ដែលមិនអាចរក្សាគម្លាតបាននោះ ត្រូវបានចែកចាយពេញបណ្តាញសង្គម។
ភ្លាមៗនោះ មន្រ្តីសុខាភិបាល អំពាវនាវដល់ប្រជាពលរដ្ឋទាំងអស់ឲ្យរក្សាភាពស្ងប់ស្ងៀម ជាជាងសម្រុកទៅផ្សារ ដែលបង្កើតបានជាភាពកកកុញមនុស្សច្រើន ជម្រុញនូវហានិភ័យកាន់តែខ្ពស់ឡើងថែមទៀតក្នុងការឆ្លងជំងឺកូវីដ-១៩នេះ។
បើតាមខ្លឹមសារនៃសេចក្តីប្រកាសរបស់រដ្ឋាភិបាល ភូមិសាស្រ្តក្រុងភ្នំពេញ និងក្រុងតាខ្មៅ ត្រូវចាត់ទុកថា ជាភូមិសាស្រ្តដែលត្រូវបិទខ្ទប់ទាំងស្រុង។ ការធ្វើដំណើរចេញពីផ្ទះ ឬទីសំណាក់បច្ចុប្បន្នរបស់ពលរដ្ឋ ក្នុងអំឡុងពេលនេះ ត្រូវបានហាមឃាត់ទាំងស្រុងដែរ លើកលែងតែមានការចាំបាច់។
ក្នុងពេលនេះដែរ រាល់សកម្មភាពការងារ មុខរបរ ឬអាជីវកម្មទាំងអស់ ដែលមិនមែនជាតម្រូវការប្រចាំថ្ងៃ ត្រូវហាមឃាត់ទាំងអស់ដែរ។ ប៉ុន្តែមិនហាមឃាត់ផ្សារ និងហាងលក់ទំនិញផ្គត់ផ្គង់ និងចំណីអាហារដែលជាតម្រូវការប្រចាំថ្ងៃនោះទេ គ្រាន់តែកម្រិតចំនួនមនុស្ស ដែលត្រូវចេញទៅទិញរបស់ចាំបាច់ដូចជាគ្រឿងហូបចុក ដោយមួយគ្រួសារឲ្យចេញបានតែម្នាក់ ឬ ពីរនាក់យ៉ាងច្រើន និងអាចចេញពីផ្ទះទៅទិញរបស់ទាំងនេះ បានតែ ៣ ដងក្នុងមួយសប្តាហ៍ ដោយត្រូវបង្ហាញឯកសារបញ្ជាក់ពីអាជ្ញាធរដែនដីផង។
កន្លងមករដ្ឋាភិបាលលោក ហ៊ុន សែន រងការរិះគន់ ថាចេញវិធានការដោយឥតបានជូនដំណឹងប្រជាពលរដ្ឋក្នុងពេលវេលាសមស្របដើម្បីឲ្យពួកគាត់អាចត្រៀមខ្លួនមុន ដូចជាវិធានការបិទការធ្វើដំណើរតាមខេត្តជាដើម។ ប្រកាសភ្លាមអនុវត្តភ្លាម ដែលបង្ករការលំបាកជាច្រើនដល់ពលរដ្ឋទូទៅ។
អ្នកប្រើប្រាស់បណ្តាញសង្គមហ្វេសប៊ុកម្នាក់ឈ្មោះ ឈុន សុភា សរសេរសារតាមហ្វេសប៊ុករបស់ខ្លួនថា តាមពិតប្រជាពលរដ្ឋមិនចង់ចេញពីផ្ទះដើម្បីប្រជ្រៀតគ្នាតាមផ្សារប៉ុន្មានទេ តែមកពីពួកគាត់ភ័យខ្លាចរដ្ឋាភិបាលបិទទីក្រុងលឿនពេក។
រីឯអ្នកប្រើប្រាស់បណ្តាញហ្វេសប៊ុកម្នាក់ទៀតឈ្មោះ រដ្ឋា រិទ្ធ លោកថា តាមពិតការនេះដោយសារតែការប្រកាសឲ្យឈប់សម្រាកចូលឆ្នាំខ្មែរក៏ជាផ្នែកមួយដែលធ្វើឲ្យប្រជាពលរដ្ឋធ្វើដំណើរទៅលេងស្រុក ទោះបីមានការបិទខ្ទប់ការធ្វើដំណើរឆ្លងខេត្តក៏ដោយ។ ម្យ៉ាងទៀតលោកបន្ថែមថា ករណីឆ្លងច្រើនក៏អាចមកពីមនុស្សម្នា នៅតែប្រមូលផ្តុំគ្នាអ៊ូអរច្រើននៅកន្លែងផ្សារបន្ថែ និងត្រីសាច់ ដែលគ្មានចំណាត់ការ រហូតយឺតពេល។
ទោះបីជាសេចក្តីប្រកាសនេះឲ្យបិទទីក្រុងក៏ដោយ ក៏ការធ្វើដំណើរទៅធ្វើការរបស់កម្មកររោងចក្រក្នុងអំឡុងពេលបិទខ្ទប់នេះ គឺនៅតែប្រព្រឹត្តទៅតាមធម្មតាដដែល ដោយគ្រាន់តែមានលិខិតបញ្ជាក់ពីអាជ្ញាធរដែនដី ទោះករណីចម្លងជំងឺនេះបានរាលដាលដល់ ១៥ រោងចក្រ និងមានកម្មកររាប់រយនាក់ឆ្លងជំងឺនេះ និងមានកម្មកររាប់ពាន់នាក់កំពុងត្រូវធ្វើចត្តាឡីស័កក៏ដោយ។
ក្នុងពេលជាមួយគ្នានេះប្រជាពលរដ្ឋជាច្រើនបានត្អូញត្អែរអំពីការខ្វះស្បៀង។ អ្នកវិភាគ និងឃ្លាំមើលសង្គមរិះគន់រដ្ឋាភិបាលលោក ហ៊ុន សែន ថាចេះត្រឹមតែបញ្ជាបិទការធ្វើដំណើរពលរដ្ឋ ហើយបែរជាមិនចែកស្បៀងជូនពួកគាត់នោះទេ។ លោក គឹម សុខ ដែលហ៊ានរិះគន់លោក ហ៊ុន សែន ឥតសំចៃមាត់ សរសេរសារតាមគណនីហ្វេសប៊ុករបស់លោក ភ្លាមៗក្រោយរដ្ឋាភិបាលចេញប្រកាសនេះថា ប្រជាពលរដ្ឋគឺជាម្ចាស់ មិនមែនជាសត្វចិញ្ចឹមដែលលោក ហ៊ុន សែន បញ្ជាឲ្យបិទខ្ទប់នៅក្នុងផ្ទះស្រេចតែចិត្ត ហើយលោកចង់ទទួលខុសត្រូវឧបត្ថម្ភស្បៀងប្រចាំថ្ងៃ ឬក៏អត់តាមតែលោកនឹកឃើញធ្វើនោះទេ។
លោកថា នេះគឺជាកំហុសធំណាស់ដែលបិទខ្ទប់ប្រជាពលរដ្ឋឲ្យនៅក្នុងផ្ទះ ប៉ុន្តែគ្មានគម្រោងឧបត្ថម្ភស្បៀងអាហារជូនពួកគាត់។ លោកថ្លែងសារបែបឌឺដងថា ឡានទាហានថ្មីៗ ជិត ៣០០ គ្រឿង ដែលលោក ហ៊ុន សែន បានទិញពីប្រទេសចិនកាលពីអំឡុងពាក់កណ្ដាលឆ្នាំ ២០២០ នោះ ពេលនេះ គឺជាវេលាសមរម្យបំផុត ដែលត្រូវប្រើដឹកស្បៀងអាហារចែកជូនពលរដ្ឋនៅភ្នំពេញ និងតាខ្មៅនោះ។ លោកថា ផែនការចែកស្បៀងដល់ពលរដ្ឋក្រីក្រខ្វះលទ្ធភាពនេះ ឃើញមានគេធ្វើនៅថៃ វៀតណាម និងប្រទេសឯទៀត។
អាស៊ីសេរី មិនទាន់អាចសុំការបំភ្លឺជុំវិញរឿងនេះពីអ្នកនាំពាក្យរដ្ឋាភិបាលលោក ផៃ ស៊ីផាន បានទេ មកត្រឹមម៉ោងផ្សាយនេះ។
កន្លងទៅ លោក ហ៊ុន សែន ធ្លាប់ប្រកាសថា រដ្ឋាភិបាលនឹងផ្តល់ការឧបត្ថម្ភជាស្បៀងអាហារ ប្រាក់កាស និងការបន្ធូរបន្ថយថ្លៃទឹកភ្លើងខ្លះដល់គ្រួសារអ្នកស្លាប់ដោយសារជំងឺកូវីដ-១៩ អ្នកធ្វើកំពុងតែធ្វើចត្តាឡីស័ក និងអ្នកជាប់គាំងក្នុងតំបន់ដែលត្រូវបិទខ្ទប់ព្រមទាំងអះអាងថា មិនទុកឲ្យពលរដ្ឋណាម្នាក់ស្លាប់ដោយអត់អាហារនោះឡើយ។
គិតត្រឹមថ្ងៃទី១៤ ខែមេសា ម្សិលមិញនេះ ក្រសួងសុខាភិបាលរកឃើញករណីចម្លងថ្មី ១៧៨ នាក់ទៀត ក្នុងនោះ ១៧៧ នាក់ឆ្លងក្នុងសហគមន៍ និងមួយករណីទៀត កើតលើពលករខ្មែរត្រឡប់មកពីប្រទេសថៃ។ អ្នកស្លាប់ដោយសារជំងឺនេះ បានកើនឡើងដល់ ៣៦ នាក់។ អ្នកជំងឺនេះ ដែលកំពុងសម្រាកព្យាបាលនៅមន្ទីរពេទ្យ មានចំនួនជាង ២,៥០០ នាក់ (២,៥៤៤)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។