ភេសជ្ជៈប៉ូវកម្លាំងច្រើនប្រភេទណាស់កំពុងចែកចាយតាមទីផ្សារនៅប្រទេសកម្ពុជាខណៈទាំងក្រុមហ៊ុនផលិតក្នុងស្រុក និងក្រុមហ៊ុននាំចូលបានប្រើប្រាស់វិធីសាស្ត្រផ្សព្វផ្សាយពាណិជ្ជកម្មគ្រប់ប្រភេទដើម្បីទាក់ទាញអតិថិជន។
តើភេសជ្ជៈប៉ូវកម្លាំងមានគុណសម្បត្តិ និងគុណវិបត្តិអ្វីខ្លះដល់អ្នកប្រើប្រាស់។
វាគ្មានអ្វីចម្លែកទេនៅពេលឃើញក្មេងៗ នៅតាមជនបទយកក្រវិលកំប៉ុងមកដូរភេសជ្ជៈប៉ូវកម្លាំងថ្មី ដោយគ្រាន់តែថែមថវិកាប្រមាណ ៥០០រៀលប៉ុណ្ណោះ។ មិនខុសគ្នានេះដែរនៅស្ទើរតែគ្រប់កម្មវិធីសាសនាទាំងអស់ ពុទ្ធបរិស័ទមិនភ្លេចទេ ក្នុងការប្រគេនភេសជ្ជៈប៉ូវកម្លាំងដល់ព្រះសង្ឃនៅក្នុងកម្មវិធីរបស់ខ្លួន។ ការបរិភោគយ៉ាងទូលំទូលាយនេះ វាគ្មានអ្វីគួរឲ្យភ្ញាក់ផ្អើលនោះទេ បើយើងប្រៀបធៀបទៅនឹងវិធីសាស្ត្រផ្សព្វផ្សាយពាណិជ្ជកម្មតាមគ្រប់រូបភាព ដោយបង្ហាញពីគុណសម្បត្តិនៃការហូបភេសជ្ជៈប៉ូវកម្លាំង ដូចជា បង្កើនថាមពល បន្សាបជាតិស្រវឹង ដាស់ស្មារតី បង្កើនការចងចាំក៏ដូចជាការផ្ដល់នូវរង្វាន់ផ្សេងៗ ជាច្រើន។
អ្នកឈ្នះរង្វាន់លើកម្មវិធីផ្សាយពាណិជ្ជកម្ម៖«ខ្ញុំបាទឈ្មោះហ៊្វីលីបមកពីខេត្តរតនគិរី បានឈ្នះរង្វាន់ប្រាំលានរៀល។ លើសពីភេសជ្ជៈប៉ូវកម្លាំង»។
បើពិនិត្យមើលពីការផ្សព្វផ្សាយពាណិជ្ជកម្មវិញ បណ្ដាក្រុមហ៊ុនភេសជ្ជៈប៉ូវកម្លាំងបានប្រើប្រាស់វិធីផ្សព្វផ្សាយច្រើនណាស់ ដូចជា ការប្រគំតន្ត្រីទ្រង់ទ្រាយធំ មានការចូលរួមសំដែងពីក្រុមតារាល្បីៗ ការឧបត្ថម្ភដល់ព្រឹត្តិការណ៍កីឡាធំៗ ដូចជា ការប្រកួតកីឡាអាស៊ីអាគ្នេយ៍ការប្រកួតកីឡាផ្សេងៗ ជាច្រើនប្រភេទ ការផ្សព្វផ្សាយតាមផ្ទាំងផ្សាយពាណិជ្ជកម្មតាមទីសាធារណៈការផ្សព្វផ្សាយតាមប្រព័ន្ធផ្សព្វផ្សាយផ្សេងៗ មានទាំងទូរទស្សន៍វិទ្យុ បណ្ដាញសង្គមជាដើម។ ក្រៅពីប្រើប្រាស់តារាល្បីៗ បណ្តាក្រុមហ៊ុនក៏បានប្រើប្រាស់កីឡាករល្បីៗដែលជាប់ចំណាត់ថ្នាក់ទទួលបានមេដាយក្នុងកម្មវិធីប្រកួតផ្សេងៗដើម្បីជួយផ្សព្វផ្សាយពាណិជ្ជកម្មដើម្បីទាក់ទាញអ្នកប្រើប្រាស់ផងដែរ។ ជាក់ស្ដែងកីឡាការិនីខ្មែរអាមេរិកដ៏ល្បីកញ្ញា ខាន់ ជេសា ព្រមទាំងកីឡាករប្រដាល់ ព្រំ សំណាង ក៏បានកំពុងជួយផ្សព្វផ្សាយដល់ក្រុមហ៊ុនភេសជ្ជៈប៉ូវកម្លាំងមួយចំនួននៅកម្ពុជាផងដែរ។
តើភេសជ្ជៈប៉ូវកម្លាំងជាអ្វី? តើការប្រើប្រាស់ភេសជ្ជៈប៉ូវកម្លាំងពិតជាផ្ដល់គុណសម្បត្តិដូចអ្វីដែលក្រុមហ៊ុនផ្សព្វផ្សាយដល់សាធារណៈជនប្រាកដមែនទេ បើសូម្បីតែលោក ហ៊ុន សែន នាយករដ្ឋមន្ត្រីកម្ពុជា ក៏បានបង្ហាញពីការព្រួយបារម្ភពេលលោកចូលរួមពិធីបិទសន្និបាតប្រចាំឆ្នាំរបស់ក្រសួងសុខាភិបាល កាលពីខែមីនាកន្លងទៅនេះ បើទោះបីជាការព្រួយបារម្ភនោះផ្ដោតតែទៅលើតារាចម្រៀង និងពិធីករដែលជួយផ្សព្វផ្សាយពាណិជ្ជកម្មឲ្យក្រុមហ៊ុនភេសជ្ជៈប៉ូវកម្លាំងនោះ?
លោក ហ៊ុន សែន៖«ខ្ញុំព្រួយបារម្ភទៅលើអ្នកចម្រៀង និងពិធីករ ពិធីការិនីរបស់យើងទឹកនោមផ្អែម។ ម៉េចបានទឹកនោមផ្អែម?!ឥឡូវអ្នកចម្រៀងដដែលហ្នឹង ថ្ងៃនេះច្រៀងឲ្យខារ៉ាបាវ ទៅភ្លក់ខារ៉ាបាវទៅ។ ស្អែកទៅអាបាកាស ទៅភ្លក់អាបាកាសទៅ។ ខានស្អែកច្រៀងទៅប៊ីស្កាសអ៊ីចឹងទៅ គ្រប់!អ៊ីចឹង ថ្ងៃក្រោយសុំផ្កាំទៅក្មួយៗ អ្នកចម្រៀង ក៏ដូចជា ពិធីករ ពិធីការិនីដែល...ពីព្រោះត្រូវតែភ្លក់ឲ្យគេ។ ប៉ុន្តែ គ្រាន់តែលើកអ៊ីចឹងបានហើយ កុំទៅលេបអី ពីព្រោះច្រើនមុខណាស់មិនដឹងថា ថ្ងៃក្រោយកើតអីទេ»។
គេហទំព័រសាលាវេជ្ជសាស្ត្រ នៃសាកលវិទ្យាល័យ ហាវើដ (Havard) សរសេរថា ភេសជ្ជៈប៉ូវកម្លាំង គឺជាភេសជ្ជៈបន្ថែមរស់ជាតិ ដែលក្នុងមួយកំប៉ុងភេសជ្ជៈផ្សំពីស្ករប្រមាណ ៤០ក្រាម កាហ្វេអ៊ីន (Caffeine) ប្រមាណ ១៦០មីលីក្រាម ឬច្រើនជាងនេះ អាស៊ីដអាមីណេផ្សេងៗ និងសារធាតុបន្ថែមផ្សេងៗ ទៀត ដូចជា វីតាមីន (Vitamins) និងយិនស៊ិន (Ginseng) ជាដើម។
មានការស្រាវជ្រាវច្រើនណាស់បង្ហាញទំនាក់ទំនងរវាងការប្រើប្រាស់ភេសជ្ជៈប៉ូវកម្លាំង និងពីគុណវិបត្តិដល់សុខភាព ដូចជា មានភាពតានតឹងក្នុងអារម្មណ៍ អាកប្បកិរិយាបែបហិង្សា សម្ពាធឈាមឡើងខ្ពស់ បង្កើនហានិភ័យកើតជំងឺទឹកនោមផ្អែមប្រភេទទីពីរ គុណភាពនៃការសម្រាន្តមិនល្អ ពុកធ្មេញ និងការខូចតម្រងនោមជាដើម។
គុណវិបត្តិដល់សុខភាពខាងលើនេះអាចបណ្ដាលមកពីបរិមាណស្ករដ៏ច្រើន ដែលភេសជ្ជៈមួយកំប៉ុងចំណុះ កន្លះលីត្រមានបរិមាណស្កររហូតដល់ ៥៤ក្រាម ដែលបរិមាណនេះ លើសពីបរិមាណស្ករអតិបរមាប្រចាំថ្ងៃ ដែលណែនាំដោយសមាគមបេះដូងសហរដ្ឋអាម៉េរិក ដែលណែនាំឲ្យបរិភោគច្រើនបំផុតត្រឹម ៣៦ក្រាមប៉ុណ្ណោះសម្រាប់បុរស និង ២៤ក្រាមសម្រាប់ស្ត្រី។ មិនខុសគ្នានេះដែរ សមាគមគ្រូពេទ្យកុមារសហរដ្ឋអាម៉េរិកផ្ដល់អនុសាសន៍ដល់ក្មេងជំទង់ ដែលមានអាយុចាប់ពី ១២ ទៅ ១៨ឆ្នាំ មិនត្រូវបរិភោគភេសជ្ជៈមានជាតិកាហ្វេអ៊ីនលើសពី ១០០មីលីក្រាមក្នុងមួយថ្ងៃនោះទេ។ ដូចនេះ បរិមាណកាហ្វេអ៊ីន ដែលមានវត្តមានក្នុងភេសជ្ជៈប៉ូវកម្លាំងមានច្រើនជាងរហូតដល់ពីរដងនៃអ្វីដែលសមាគមនេះបានផ្ដល់អនុសាសន៍។
អ្វីដែលមានហានិភ័យកាន់តែខ្លាំងជាងនេះទៅទៀត គឺការនិយមប្រើប្រាស់ភេសជ្ជៈប៉ូវកម្លាំងលាយជាមួយគ្រឿងស្រវឹង ដែលជានិន្នាការមួយមានការកើនឡើងក្នុងចំណោមយុវវ័យ។ ការប្រើប្រាស់គ្រឿងស្រវឹងលាយជាមួយភេសជ្ជៈប៉ូវកម្លាំងនេះ ធ្វើឲ្យការសេពគ្រឿងស្រវឹងកាន់តែមានបរិមាណច្រើន ជាជាងការសេពគ្រឿងស្រវឹងតែមួយមុខ។ បើតាមការស្រាវជ្រាវបង្ហាញថា ការសេពគ្រឿងស្រវឹងលាយជាមួយភេសជ្ជៈប៉ូវកម្លាំងក្នុងបរិមាណច្រើនបណ្ដាលឲ្យមានបញ្ហាដល់ប្រព័ន្ធប្រសាទ បញ្ហាបេះដូង ឬអាចឈានដល់ស្លាប់ក៏មាន។
ការកាត់បន្ថយការផ្សាយពាណិជ្ជកម្មអាចជាវិធីមួយ ដើម្បីកាត់បន្ថយការប្រើប្រាស់ភេសជ្ជៈប៉ូវកម្លាំង ដូចនឹងករណីការប្រើប្រាស់ផលិតផលថ្នាំជក់ដែរ។ មុនពេលដែលមានច្បាប់គ្រប់គ្រងថ្នាំជក់ចូលជាធរមាន ការផ្សាយពាណិជ្ជកម្មផលិតផលថ្នាំជក់មានការប្រើប្រាស់រូបភាពប្រហាក់ប្រហែលគ្នាទៅនឹងការផ្សាយពាណិជ្ជកម្មភេសជ្ជៈប៉ូវកម្លាំងដូចសព្វថ្ងៃនេះដែរ។
អង្គការសុខភាពពិភពលោកបញ្ជាក់ថា ការហាមឃាត់ការផ្សាយពាណិជ្ជកម្មបែបនេះ អាចទទួលបានជោគជ័យក្នុងការកាត់បន្ថយការប្រើប្រាស់ ហើយអង្គការនេះ ក៏បានជំរុញឲ្យរួមគ្នាជាសកលក្នុងការកាត់បន្ថយការប្រើប្រាស់ និងកាត់បន្ថយផលប៉ះពាល់ដល់សុខភាពពីភេសជ្ជៈទាំងនេះដែរ ជាពិសេស គឺការកើនឡើងនៃជំងឺមិនឆ្លងដូចបានរៀបរាប់ខាងលើនេះ។
តែទោះជាយ៉ាងណាក៏ដោយ ការមានច្បាប់តែឯង ក៏អាចគ្មានប្រសិទ្ធភាពនោះទេ ប្រសិនបើគ្មានយុទ្ធនាការផ្សព្វផ្សាយអប់រំអំពីហានិភ័យទាក់ទងនឹងផលិតផលភេសជ្ជៈប៉ូវកម្លាំងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។