ពលរដ្ឋរស់នៅក្រុងប៉ោយប៉ែតមួយចំនួន កើតរមាស់ និងរាករូស បន្ទាប់ពីប្រើទឹករបស់ក្រុមហ៊ុនអានកូ ដែលមានក្លិនស្អុយ និងកខ្វក់
2024.07.16
ប្រជាពលរដ្ឋមួយចំនួន នៅក្រុងប៉ោយប៉ែត ត្អូញត្អែរថា ក្រុមហ៊ុនទឹកស្អាត អានកូ (ANCO) បានចែកចាយទឹកមានក្លិនស្អុយ កខ្វក់ ដុះស្លែ និងមានកូនដង្កូវឱ្យពលរដ្ឋប្រើប្រាស់។ ពួកគាត់អះអាងថា បន្ទាប់ប្រើទឹករបស់ក្រុមហ៊ុន អានកូ នេះរួច ពួកគាត់បានកើតរមាស់ ឈឺបំពង់ក និងរាករូសជាដើម។
ពលរដ្ឋមួយចំនួន នៅក្នុងក្រុងប៉ោយប៉ែត បាននាំគ្នាចេញមកត្រងទឹកភ្លៀង ទុកប្រើដោយសារបញ្ហាទឹកស្អាតរបស់ក្រុមហ៊ុនអានកូ កខ្វក់ មានក្លិនស្អុយ។
ពលរដ្ឋនៅក្រុងប៉ោយប៉ែត លោក ដេន ដឿត ប្រាប់វិទ្យុអាស៊ីសេរី នៅថ្ងៃទី១៦ ខែកក្កដាថា ទឹកស្អាតរបស់ក្រុមហ៊ុនអានកូ មានក្លិនស្អុយ និងល្អក់ អស់រយៈពេលជាង ២ខែមកហើយ។ លោករៀបរាប់ថា ជាទូទៅគ្រួសាររបស់លោក បានប្រើប្រាស់ទឹករបស់ក្រុមហ៊ុនអានកូ សម្រាប់ងូត បោកខោអាវ និងយកទៅចម្អិនអាហារ ក៏ប៉ុន្តែ នៅរយៈពេលចុងក្រោយនេះ ទឹកស្អាតរបស់ក្រុមហ៊ុនអានកូ កាន់តែមានក្លិនស្អុយ និងកខ្វក់ខ្លាំងជាងមុន ដែលធ្វើឱ្យគ្រួសាររបស់លោក កើតកន្ទួលរមាស់ពេញខ្លួន និងរាករូស ស្លេកស្លាំងអស់កម្លាំង។
លោក ដេន ដឿត៖ «ទឹកនៅតែកខ្វក់ដដែល ប្រើអត់កើតទេ។ ងូតក៏រមាស់ស្អុយ ហើយយកទៅដាំបាយធ្វើម្ហូប ក៏មិនកើត អស់ជម្រើសហើយ។ ដូចខ្ញុំប្រាប់ខាមដើមអ៊ីចឹង អ្នកខ្លះយកស្រោមជើង និងស្បៃមកត្រងក្បាលរ៉ូប៊ីណេ (Robinet) ទឹក យ៉ាងណាក៏នៅតែប្រើមិនកើត។ ទឹកវាអត់ដោយកាកលំអងមកមែន ប៉ុន្តែវាស្អុយ ហើយពណ៌ក្រហម។ ប្រើអត់កើតទេ»។
លោក ដេន ដឿត ប្រាប់ថា លោកបានយកស្បៃមកត្រងទឹកស្អាត និងយកទៅដាំយ៉ាងណា ក៏មិនបាត់ក្លិនឡើយ។ ក្នុងនោះ លោកសង្កេតឃើញមានដង្កូវតូចៗ ពណ៌ក្រហម និងស្លែជាច្រើន ជាប់នឹងស្បៃតម្រង។
ចំពោះបញ្ហានេះ ប្រធានសមាគមគ្រូពេទ្យគុណធម៌កម្ពុជាលោកវេជ្ជបណ្ឌិត អ៊ូច វុឌ្ឍី ពន្យល់ថា ការបរិភោគទឹកមិនស្អាត ឬទឹកដែលមានលាយឡំទឹកកាកសំណល់ក្នុងលូ នឹងបង្កឱ្យមានជំងឺរលាកផ្លូវរំលាយអាហារ ជាពិសេស ជំងឺរលាកថ្លើមប្រភេទ A និង ប្រភេទ E។
លោក អ៊ួច វុឌ្ឍី៖ «វីរុស អេប៉ាទីត (hepatite) B និងអេប៉ាទីត C វានៅក្នុងទឹកហ្នឹង រាប់រយឆ្នាំ វាអត់បាត់ទៅណាទេ វីរុសហ្នឹង ពូកែទំណាស់។ អ៊ីចឹងទេ ទឹកមិនស្អាតនេះ មានផលប៉ះពាល់ខ្លាំង ទៅដល់បងប្អូនប្រជាពលរដ្ឋយើង ដូចជាជំងឺថ្លើម ជំងឺសើស្បែក រលាកផ្លូវរំលាយអាហារ»។
វិទ្យុអាស៊ីសេរី មិនអាចទាក់ទង អភិបាលក្រុងប៉ោយប៉ែត លោក គាត ហ៊ុល ដើម្បីបកស្រាយរឿងនេះបានទេ នៅថ្ងៃទី១៦ ខែកក្កដា។
មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តបន្ទាយមានជ័យ បានសរសេរនៅលើបណ្ដាញសង្គមហ្វេសប៊ុក នៅថ្ងៃទី១៦ ខែកក្កដាថា បញ្ហាទឹកមានក្លិនស្អុយ និងល្អក់នេះ កើតមានឡើងតិចតួចប៉ុណ្ណោះ។ ចំណែកមូលហេតុ ដែលធ្វើឱ្យទឹកកខ្វក់នោះ គឺដោយសារការជីកកាយកប់ប្រព័ន្ធលូបង្ហូរទឹក តាមដងផ្លូវធ្វើអោយបែកធ្លាយបំពង់បណ្ដាញទឹកស្អាតជាញឹកញាប់ ដែលនាំឱ្យជ្រាបភក់ ហូរចូលក្នុងបណ្ដាញចែកចាយ។
ផ្ទុយពីការលើកឡើងនេះ ពលរដ្ឋនៅក្រុងប៉ោយប៉ែត អះអាងថា បញ្ហាទឹកកខ្វក់នេះ បានកើតឡើងដដែលៗ សឹងរាល់ឆ្នាំ និងមានការដាច់ទឹកជាញឹកញាប់។ ពួកគាត់រិះគន់ថា បញ្ហានេះ គឺបណ្ដាលមកពីអាជ្ញាធរ និងក្រុមហ៊ុនទឹកស្អាត ធ្វើការខ្ជីខ្ជា ខ្វះបច្ចេកទេស និងខ្វះការទទួលខុសត្រូវ។
ជុំវិញរឿងនេះ ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា (CIREA) លោក ឌិន ពុទ្ធី លើកឡើងថា អាជ្ញាធរក្រុងប៉ោយប៉ែត គួរតែចុះត្រួតពិនិត្យមើលកន្លែងប្រព្រឹត្តកម្មទឹកដោយផ្ទាល់ និងកែលម្អប្រព័ន្ធទឹកស្អាតឡើងវិញ ដើម្បីធានាសុវត្ថិភាពដល់អ្នកប្រើប្រាស់ ព្រោះនៅក្នុងក្រុងប៉ោយប៉ែត មិនមានប្រភពទឹកនៅតាមទន្លេ ស្ទឹង បឹងបួ សម្រាប់ឱ្យពលរដ្ឋប្រើប្រាស់ឡើយ។
លោក ឌិន ពុទ្ធី៖ «អ្នកដែលទទួលខុសត្រូវមុនគេហ្នឹង គឺរដ្ឋាភិបាល ពាក់ព័ន្ធនឹងបញ្ហានេះ។ ទីពីរ គឺក្រុមហ៊ុនហ្នឹង ព្រោះដោយសារក្រុមហ៊ុនហ្នឹង ជាអ្នករកប្រាក់ចំណេញបានច្រើនណាស់ ពីប្រជាពលរដ្ឋ ពាក់ព័ន្ធនឹងទឹកស្អាត ឬក៏អគ្គិសនីហ្នឹង។ នៅប៉ោយប៉ែត មានតែក្រុមហ៊ុនអានកូ ហ្នឹងឯង»។
ក្រុមហ៊ុនអានកូ (ANCO GROUP) ផ្គត់ផ្គង់ទឹកស្អាតក្នុងក្រុងប៉ោយប៉ែត គឺជាកម្មសិទ្ធិរបស់ឧកញ៉ា កុក អាន ដែលជាអនុប្រធានសមាគមឧកញ៉ាកម្ពុជា។ ក្រុមហ៊ុននេះ បានទទួលសិទ្ធិពីរដ្ឋាភិបាល ក្នុងការផ្គត់ផ្គង់ទឹកស្អាត អគ្គិសនី និងរីសត នៅតាមក្រុងក្នុងខេត្តជាប់ព្រំដែនមួយចំនួន ដូចជា ក្រុងបាវិត ខេត្តស្វាយរៀង និងក្រុងប៉ោយប៉ែត ខេត្តបន្ទាយមានជ័យ។ តែយ៉ាងណាក្ដី ជាញឹកញាប់ ក្រុមហ៊ុនមួយនេះ តែងតែទទួលរងការរិះគន់ពីប្រជាពលរដ្ឋថា ផ្គត់ផ្គង់ទឹក និងអគ្គីសនីមិនបានល្អ ជាដើម។
ប្រជាពលរដ្ឋនៅក្រុងប៉ោយប៉ែត ស្នើឱ្យអាជ្ញាធរ និងក្រុមហ៊ុន ផ្គត់ផ្គង់ទឹកដល់ពួកគាត់ឱ្យមានស្ថិរភាព និងជូនដំណឹងដល់ប្រជាពលរដ្ឋ នៅពេលការផ្គត់ផ្គង់ ឬគុណភាពទឹកមានបញ្ហា ឱ្យសមនឹងតម្លៃ ដែលពួកគាត់បានចំណាយបង់ទៅឱ្យក្រុមហ៊ុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ