កម្មករ​រាប់​ម៉ឺន​នាក់​ចុះ​ឈ្មោះ​ស្ម័គ្រចិត្ត​ចាក់វ៉ាក់សាំង​បង្ការ​ជំងឺកូវីដ-១៩

ដោយ ទីន ហ្សាការីយ៉ា
2021-03-30
Share
កម្មករ​រាប់​ម៉ឺន​នាក់​ចុះ​ឈ្មោះ​ស្ម័គ្រចិត្ត​ចាក់វ៉ាក់សាំង​បង្ការ​ជំងឺកូវីដ-១៩ វ៉ាក់សាំងចិនឈ្មោះ Sinopharm ដែលនឹងត្រូវចាក់លើកម្មករកម្ពុជារាប់ម៉ឺននាក់ ដើម្បីបង្ការឆ្លងពីជំងឺកូវីដ១៩។
រូប៖ គេ​ផ្ដល់​ឱ្យ

ក្រសួង​ការងារ​ឲ្យ​ដឹង​ថា កម្មករ​​និយោជិត​រាប់​ម៉ឺន​​នាក់​​​ក្នុង​ចំណោម​​កម្មករ​​វិស័យកាត់ដេរ​​​ប្រមាណ​​ជិត​​ ២ លាន​នាក់​ បាន​ចុះឈ្មោះ​ដោយ​​ស្ម័គ្រចិត្ត​​ទទួល​​យក​ការ​ចាក់​​វ៉ាក់សាំង​​បង្ការ​ជំងឺឆ្លង​​កូវីដ​១៩។ មន្ត្រី​ក្រសួង​ការងារ​មិនទាន់​កំណត់​ពេលវេលា​ច្បាស់លាស់​ដើម្បី​ចាប់ផ្តើម​ការចាក់​វ៉ាក់សាំង​ជាទ្រង់ទ្រាយធំនេះ​ដល់​កម្មករ​នៅ​ឡើយ​ទេ។

ទោះជាយ៉ាងណា ​ប្រធាន​​នាយកដ្ឋាន​​អធិការ​កិច្ច​​​នៃ​​ក្រសួង​​ការងារ​លោក​ អ៊ុក ចាន់ធូ ​ប្រាប់កាសែត​ភ្នំពេញ​ប៉ុស្តិ៍​ថា ការ​ចាក់​វ៉ាក់សាំង​កូវីដ១៩​​ នេះអាច​​នឹង​​ចាប់ផ្តើម​​មុន​​ចូល​ឆ្នាំ​​ឬ​​ក្រោយ​​ពិធី​បុណ្យ​ចូលឆ្នាំ​ ពី​ព្រោះ​​​កំពុង​សហការ​ជាមួយ​​ម្ចាស់​រោងចក្រ​​សហគ្រាស ដើម្បី​ផ្ញើ​​ឈ្មោះ​​កម្មករ​ស្ម័គ្រចិត្ត​​​​បន្ថែ​ម​ទៀត។

ទាក់ទង​នឹង​ការ​ចាក់វ៉ាក់សាំង​ដល់​កម្មករ​នេះ អគ្គលេខាធិការ​នៃ​​សមាគម​​រោងចក្រ​​កាត់ដេរ​​នៅ​​កម្ពុជា (GMAC) លោក ខេន លូ មាន​ប្រសាសន៍​ប្រាប់​អាស៊ីសេរី​​មុន​ការ​ផ្សាយ​នេះ​បន្តិច​ថា​ សមាគម​លោក​ចង់​ឲ្យ​កម្មករ​ច្រើន​ស្ម័គ្រចិត្ត​ទៅ​ចាក់វ៉ាក់សាំង​បង្ការកូវីដ១៩នេះ ​ដើម្បី​ទប់ស្កាត់​ការ​ឆ្លង​រាលដាល​ទ្រង់ទ្រាយ​ធំ​ក្នុង​រោងចក្រ​ និង​សំរាប់​ផលប្រយោជន៍​ផ្ទាល់​របស់​កម្មករ​និង​ក្រុម​គ្រួសារ​របស់​ពួកគេ៖ «អត់មានទៅបង្ខំកម្មករថា ត្រូវតែចាក់ទេ។ យើងបានអប់រំណែនាំកម្មករដើម្បីឲ្យយល់ថា តើចាក់វ៉ាក់សាំងហើយមានផលប្រយោជន៍អ្វីខ្លះ។ ការពិតក្នុងនាមសមាគម យើងចង់បានកម្មករច្រើនទៅចាក់វ៉ាក់សាំង​ ពីព្រោះហ្នឹងអាចការពារកម្មករខ្លួនឯងផង ការពារសមាជិកយើងផង និងការពារវិស័យផង។ ប្រសិនបើមានកម្មករណាឆ្លងកូវីដ អាចប៉ះពាល់ទៅក្រុមគ្រួសារ ប៉ះពាល់រោងចក្រគាត់ធ្វើការ អ៊ីចឹងពេលមានឱកាសចាក់វ៉ាក់សាំងហ្នឹងគឺជាឱកាសល្អ»។

កាលពី​សប្តាហ៍​មុន រដ្ឋមន្ត្រី​ក្រសួង​ការងារ​លោក​ អ៊ិត សំហេង បាន​ផ្ញើលិខិត​ស្នើឱ្យ​សមាគមរោងចក្រ​កាត់ដេរ​នៅ​កម្ពុជា​ជួយ​​សម្របសម្រួល​ជាមួយ​ម្ចាស់​​ឬ​​នាយក​​រោងចក្រ​​សម្រាប់​​រៀបចំ​​បញ្ជី​ឈ្មោះ​​គ្រូពេទ្យ​​ប្រចាំ​រោងចក្រ​ ដើម្បី​ចូលរួម​ក្នុង​យុទ្ធនាការ​ចាក់​វ៉ាក់សាំង​វីដ​១៩​។

ក្រសួង​ការងារ និង​សមាគម​រោងចក្រ​កាត់ដេរ ​បាន​សហការ​ជាមួយក្រសួងសុខាភិបាល ដើម្បីបង្រៀននិងហ្វឹកហាត់ដល់​​គិលានុបដ្ឋាក-គិលានុបដ្ឋាយិកា និង​វេជ្ជបណ្ឌិតសរុប​ប្រមាណ​ជាង​ ៥៣០​នាក់ ​ហើយ សំរាប់​ត្រៀម​ចាក់​វ៉ាក់សាំង​ជូន​កម្មករនិយោជិត​ទាំងនោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល