អ្នកឃ្លាំមើល​សង្គម ថា​ជោគជ័យ​នៃការ​ចាក់​វ៉ាក់សាំង​ចិន អាច​មក​ពី​ការ​បង្ខិត​បង្ខំ និង​ភាព​គ្មាន​ជម្រើស​

ដោយ​លោក មួង ណារ៉េត
2021-10-06
Share
អ្នកឃ្លាំមើល​សង្គម ថា​ជោគជ័យ​នៃការ​ចាក់​វ៉ាក់សាំង​ចិន អាច​មក​ពី​ការ​បង្ខិត​បង្ខំ និង​ភាព​គ្មាន​ជម្រើស​ (រូបឆ្វេង) អ្នកចាក់វ៉ាក់សាំងដូសជំរុញកាលពីថ្ងៃទី ២០ ខែ សីហា ឆ្នាំ ២០២១ នៅភ្នំពេញ និង (រូបខាងស្ដាំ) វ៉ាក់សាំងចិនស៊ីណូវ៉ាក់បន្ថែម មកដល់កម្ពុជា កាលពីចុងខែ កញ្ញា ឆ្នាំ ២០២១។
អនុគណៈកម្មការស្រាវជ្រាវជំងឺកូវីដ-១៩

ប្រទេស​កម្ពុជា​ឈាន​មុខ​គេ​ទាំង​ក្នុង​តំបន់​ ​និង​នៅ​លើ​ពិភពលោក​ ​ក្នុង​ការ​សម្រុក​ចាក់​វ៉ាក់សាំង​បង្ការ​ជំងឺ​កូវីដ-១៩​ ​ជូន​ប្រជាពលរដ្ឋ​របស់​ខ្លួន​។​ ​គិត​មក​ត្រឹម​ថ្ងៃ​ទី​ ​០៥​ ​ខែ​ ​តុលា​ ​បើ​តាម​សេចក្តីជូនដំណឹង​របស់​​​ក្រសួងសុខាភិបាល​ ​ពលរដ្ឋ​ជាង​ ​៩៤​% ​ដែល​គ្រប់​អាយុ​ចាក់​វ៉ាក់សាំង​ ​អាយុ​ចាប់ពី​ ​៦​ ​ឆ្នាំ​ឡើង​ទៅ​ ​បាន​ចាក់​វ៉ាក់សាំង​ពីរ​ដូស​ ​និង​ជិត​ ​១​ ​លាន​នាក់​ ​បាន​ចាក់​ដូស​ទីបី​ ​ដែល​ជា​ដូស​ជំរុញ​ទៅទៀត​។​ ​ភាគច្រើន​លើសលុប​ ​នៃ​វ៉ាក់សាំង​ទាំងនេះ​ ​គឺជា​វ៉ាក់សាំង​ចិន​ ​ដែល​រង​ការរិះគន់​ថា​មានគុណ​ភាព​ទាប​។​ 

តើជោគជ័យនៃការចាក់វ៉ាក់សាំងចិន​ ​បានមកដោយសុទ្ធចិត្ត​ ​ដោយបង្ខិតបង្ខំ​ ​ដោយកត្តានយោបាយ​?

យុទ្ធនាការ​ចាក់​វ៉ាក់សាំង​ជូន​ប្រជាពលរដ្ឋ​ខ្មែរ​ ​ដែល​សម្រុក​ធ្វើ​អស់​រយៈពេល​ ​៨​ ​ខែ​ ​គិត​ពីដើម​ខែ​ ​កុម្ភៈ​មក​នោះ​ ​ធ្វើឲ្យ​ពលរដ្ឋ​ជាង​ ​១​៣​,​៤​ ​លាន​នាក់​ ​ក្នុងចំណោម​ពលរដ្ឋ​ជិត​ ​១​៤​ ​លាន​នាក់​ ​ដែល​តម្រូវ​ឲ្យ​ចាក់​វ៉ាក់សាំង​ ​បាន​ចាក់​វ៉ាក់សាំង​រួច​។​ ​ចំនួន​នេះ​ ​គឺ​វ៉ា​ដាច់​ប្រទេស​ទាំងអស់​នៅ​លើ​ពិភពលោក​។​

​តួលេខ​ដ៏​ច្រើន​សន្ធឹក​នៃ​អ្នក​បាន​ចាក់​វ៉ាក់សាំង​រួច​នេះ​ ​ធ្វើឲ្យ​ស្ថាប័ន​អន្តរជាតិ​ធំៗ​ពីរ​ ​គឺ​អង្គការសុខភាព​ពិភពលោក​ (​WHO​) ​និង​អង្គការសហប្រជាជាតិ​(UN)​ផង​ ​សាទរ​ ​និង​កោតសរសើរ​។​ ​ទោះ​ជា​យ៉ាងនេះ​ក្ដី​ ​អង្គការ​ទាំងនេះ​ ​សាទរ​និង​កោតសរសើរ​តែ​បរិមាណ​ប៉ុណ្ណោះ​។​ ​ប៉ុន្តែ​មិនបាន​លើក​និយាយ​អំពី​គុណភាព​ ​និង​មធ្យោបាយ​ ​ក្នុង​ការ​ចាក់​វ៉ាក់សាំង​ទាំងនេះ​ ​នោះ​ឡើយ​។​

កន្លងមក​មាន​សេចក្តីរាយការណ៍​ជាច្រើន​របស់​សារ​ព័ត៌មាន​អន្តរជាតិ​ ​ដែល​ចុះផ្សាយ​អំពី​ប្រជាពលរដ្ឋ​នៅ​ប្រទេស​ជាច្រើន​ ​ដែល​អល់អែក​ ​ឬ​ជំទាស់​ទៅ​នឹង​ការ​ចាក់​វ៉ាក់សាំង​ចិន​ ​ដែល​មានគុណ​ភាព​ទាប​។​ ​ពួកគាត់​ ​ចង់​ចាក់​វ៉ាក់សាំង​អង់គ្លេស​ ​និង​អាមេរិក​។​

នៅក្នុងចំណោម​វ៉ាក់សាំង​ជាង​ ​៣៥​,​៥​ ​លាន​ដូស​ ​ដែល​កម្ពុជា​ទិញ​ ​និង​ទទួល​បាន​ជាអំណោយ​ ​ភាគច្រើន​លើ​សលុប​ជា​វ៉ាក់សាំង​ចិន​។​ ​ក្នុង​នោះ​កម្ពុជា​ចំណាយ​ប្រាក់​ជិត​ ​៣០០​ ​លាន​ដុល្លារ​ ​ទិញ​វ៉ាក់សាំង​ចិន​ទាំងនោះ​។​ ​កម្ពុជា​ចាក់​វ៉ាក់សាំង​ចិន​ជូន​ពលរដ្ឋ​ខ្លួនឯង​ ​តាំងពី​អង្គការសុខភាព​ពិភពលោក​ ​មិនទាន់​ទទួលស្គាល់​គុណភាព​ជា​ផ្លូវការ​មក​ម្ល៉េះ​។​ ​ជាង​នេះ​ទៅទៀត​ ​ថ្មីៗ​នេះ​ ​កម្ពុជា​ឈាន​មុខ​គេ​ក្នុង​ការ​យក​វ៉ាក់សាំង​ចិន​ ​មក​ចាក់​ជូន​យុវជន​អាយុ​ក្រោម​ ​១​៧​ ​ឆ្នាំ​ ​និង​កុមារ​អាយុ​ពី​ ​៦​ឆ្នាំ​ដល់​ ​១​២​ឆ្នាំ​ ​ក្នុងពេលដែល​អង្គការសុខភាព​ពិភពលោក​ ​មិនទាន់​ប្រកាស​ថា​ ​មាន​សុវត្ថិភាព​សម្រាប់​ក្មេង​វ័យ​នេះ​ ​នៅឡើយ​។

​តើ​កត្តា​អ្វីខ្លះ​ ​ដែល​ធ្វើឲ្យ​រដ្ឋាភិបាល​កម្ពុជា​ ​នៅតែ​អាច​ជំរុញ​ការ​ចាក់​វ៉ាក់សាំង​ចិន​ ​បាន​ច្រើន​សន្ធឹកសន្ធាប់​បែប​នេះ​? ​តើ​នេះ​អាចមក​ពី​ការ​យកចិត្តទុកដាក់​ខ្ពស់​បំផុត​របស់​លោក​ ​ហ៊ុន​ ​សែន​ ​ទៅលើ​សុខុមាលភាព​របស់​ប្រជាពលរដ្ឋ​ខ្មែរ​ឬក៏​យ៉ាងណា​?

បើ​យើងងាកទៅក្រោយបន្តិច​ ​នៅពេលដែលជំងឺកូវីដ-១៩​ ​ទើបចាប់ផ្តើមផ្ទុះរីករាលដាលនៅកម្ពុជា​ ​កាលពីដើមឆ្នាំ​ ​២០២០នោះ​ ​លោកនាយករដ្ឋមន្រ្តី ​ហ៊ុន​ ​សែន​ ​មិនត្រឹមតែមើលស្រាលជំងឺនេះទេ​ ​គឺលោកមើលស្រាល​ ​និងប្រមាថជីវិតប្រជាពលរដ្ឋមួយនគរថែមទៀតផង​ ​ព្រោះលោកនៅតែបើកចំហជើងមេឃជាមួយប្រទេសចិន​ ​ជាពិសេសការបន្តបើកឲ្យពលរដ្ឋចិន​ ​ធ្វើដំណើរតាមយន្តហោះពីទីក្រុងវូហាន​ (​Wuhan) ​នៃខេត្តហ៊ូបេ​ (​Hubei) ​មកប្រទេសកម្ពុជា

ជាង​នេះទៅទៀត​ ​លោកបានគម្រាមដេញអ្នកកាសែត​ ​ដែលហ៊ានពាក់ម៉ាស់ចូលសាលសន្និសីទ​ ​«​នៅក្នុងហ្នឹង​ ​បើសិនមាននរណាមួយពាក់ម៉ាស់​ ​ខ្ញុំដេញចេញ​! ​មាននរណាពាក់ម៉ាស់ឬទេ​? ​បើពាក់ម៉ាស់ដេញចេញ​! ​នាយករដ្ឋ​​មន្រ្តីអត់ទាំងពាក់ម៉ាស់ផង​ ​រួចមកពាក់ម៉ាស់ស្អី​ ​នៅក្នុងកន្លែងហ្នឹង​? ​នេះអត់មានអ្នកណាពាក់ម៉ាស់ទេ​ ​បើសិនជាពាក់ម៉ាស់ខ្ញុំដេញចេញ​ ​អត់ឲ្យនៅហ្នឹងទេ​! ​អ្ហែងទៅស៊ីជាមួយម៉ាស់​! ​ទៅនៅជាមួយម៉ាស់ទៅ​! ​ខ្លាមិនខ្លាចទៅខ្លាចអាចម៍ខ្លា​! ​វាឆ្ងល់រឿងកន្លែងហ្នឹង​! ​អត់ទាន់ងាប់ម្នាក់ផង​»​

មិនតែប៉ុណ្ណោះ​ ​លោកបញ្ចេញព័ត៌មានឲ្យមានការភាន់ច្រឡំ​ ​ដោយប្រាប់ពលរដ្ឋថា​ ​ទាល់តែសេះដុះស្នែង​ ​ទើបមានជំងឺកូវីដ-១៩​ ​នៅកម្ពុជា​ <<​ប្រហែលទាល់តែដល់ថ្ងៃ​ ​៣១​ ​ខែ​ ​ពីរឯណោះ​ ​ទើបមានជំងឺហ្នឹងកើតឡើង​>>​

រួចហើយ​លោកបានស្វាគមន៍ភ្ញៀវទេសចរណ៍បរទេសមួយកប៉ាល់ ​the Westerdamដែលមានភ្ញៀវខ្លះផ្ទុកជំងឺកូវីដ-១៩ ​ឲ្យចូលចតនៅកំពង់ផែខេត្តព្រះសីហនុ ​ទោះបីប្រទេសចំនួន​ ​​ ​នៅក្នុងតំបន់​ ​មិនហ៊ានឲ្យកាប៉ាល់នេះចូលចតនៅក្នុងប្រទេសគេ​ ​ព្រោះគេខ្លាចឆ្លងជំងឺនេះដល់ពលរដ្ឋរបស់គេ

ដោយសារ​ការបើកចំហជើងមេឃពីតំបន់ផ្ទុះជំងឺកូវីដ-១៩ ​នៅប្រទេសចិន​ ​មកកាន់កម្ពុជា​ ​នៅចុងខែ​ ​មករា​ ​ឆ្នាំ​ ​២០២០​ ​អ្នកដំណើរម្នាក់ជាជនជាតិចិន​ ​ធ្វើដំណើរដោយត្រង់ពីទីក្រុងវូហាន​ ​មកក្រុងព្រះសីហនុនោះ​ ​ត្រូវក្រសួងសុខាភិបាលរកឃើញផ្ទុកជំងឺកូវីដ-១៩​ ​ជាលើកដំបូង​ ​នៅកម្ពុជា

ក្រោយៗ​មកទៀត​ ​ការរីករាលដាលនៃជំងឺកូវីដ-១៩នេះ​ ​ចាប់ផ្តើមរីកធំជាលំដាប់​ ​រហូតដល់ផ្ទុះករណីចម្លងក្នុងសហគមន៍​ ​ដោយសារជនជាតិចិនចំនួនបួននាក់​ ​បានលួចចេញពីមណ្ឌលចត្តាឡីស័ក​ ​ទៅលេងក្លិបកំសាន្តនៅក្រុងភ្នំពេញ​ ​រហូតចម្លងជំងឺនេះពាសវាលពាសកាល

ស្រប​ពេលជាមួយគ្នានោះ​ ​ប្រទេសចិនក៏កំពុងសាកល្បង​ ​និងពិសោធន៍វ៉ាក់សាំងបង្ការជំងឺកូវីដ-១៩​ ​របស់ខ្លួននៅប្រទេសជាច្រើន​ ​ប្រទេសកម្ពុជាស្ថិតក្នុងចំណោមប្រទេសមួយ​ ​ដែលទទួលបានវ៉ាក់សាំងពិសោធន៍នេះ​ ​ព្រោះអង្គការសុខភាពពិភពលោក​ ​មិនទាន់ទទួលស្គាល់នៅឡើយ

យុទ្ធនាការ​ចាក់វ៉ាក់សាំងចិននេះ​ ​បានចាប់ផ្តើមពីដើមខែ​ ​កុម្ភៈ​ ​ពលរដ្ឋច្រើនណាស់បង្ហាញជំហរមិនចង់ចាក់វ៉ាក់សាំងចិន​ ​សូម្បីតែលោក​ ​ហ៊ុន​ ​សែន​ ​ផ្ទាល់ក៏មិនព្រមចាក់វ៉ាក់សាំងចិននេះដែរ​ ​ដោយលោកយកលេសថាលោកលើសអាយុ​ ​តែតាមការពិតវ៉ាក់សាំងចិនអាចចាក់ពលរដ្ឋក្នុងវ័យលោកបាន

សន្ទុះ​នៃការចាក់វ៉ាក់សាំងចិននេះ​ ​ប្រព្រឹត្តទៅគើមៗយឺតដូចខ្យង​ ​ព្រោះមិនសូវមានការគាំទ្រពីរប្រជាពលរដ្ឋទូទៅ​ ​ក្នុងពេលជាមួយគ្នានោះ​ ​ការរីករាលដាលនៃជំងឺនេះ​ ​ចេះតែកើនឡើងជាលំដាប់

ស្ថានភាព​នេះ​ ​ធ្វើឲ្យលោក​ ​ហ៊ុន​ ​សែន​ ​ចាប់ផ្តើមផ្លាស់ប្តូរឥរិយាបទ​ ​ដោយប្តូរពីការប្រមាថជំងឺកូវីដ-១៩​ ​មកជាការសម្រុកយុទ្ធនាការជំរុញការចាក់វ៉ាក់សាំងចិននេះ​ ​ឲ្យបានច្រើនតាមដែលអាចធ្វើទៅបាន​ ​ប៉ុន្តែខុសពីប្រទេសដទៃ​ ​រដ្ឋាភិបាលកម្ពុជាបង្ខំប្រជាពលរដ្ឋឲ្យចាក់វ៉ាក់សាំង​ ​ដោយចេញអនុក្រឹត្យកំណត់កាតព្វកិច្ចចាក់វ៉ាក់សាំងនេះ​ ​និងធ្វើច្បាប់ផាកពិន័យ​ ​និងដាក់ទោសទណ្ឌប្រជាពលរដ្ឋ​ ​ដែលល្មើសវិធានការបង្ការជំងឺកូវីដ-១៩​ ​ដែលរួមមានការគេចវេសមិនព្រមចាក់វ៉ាក់សាំងនេះផង​ ​«​អាជ្ញាធរថ្នាក់ក្រោមជាតិ​ ​ជាពិសេសអភិបាលខេត្ត​ ​អភិបាលស្រុក​ ​ត្រូវតែពិនិត្យចំពោះមន្ត្រីក្រោមឱវាទ​ ​គ្រប់បណ្ដាមន្ទីរជុំវិញខេត្ត​ ​ត្រូវតែត្រួតពិនិត្យថាតើមន្រ្តីណាខ្លះមិនបានចាក់​ ​ដើម្បីចៀសវាងការគេចវេសណាមួយចំពោះវ៉ាក់សាំង​ ​ក្នុងករណីដែលមានការខកខាន​ ​ដោយចេតនាមិនបានចាក់វ៉ាក់សាំង​ ​គឺយើងមិនគួរគប្បីអញ្ជើញពួកគាត់​ ​ឲ្យមកធ្វើការនោះទេ​ ​យើងសុខចិត្តឲ្យពួកគាត់នៅផ្ទះ​ ​យើងសុខចិត្តឲ្យពួកគាត់ចាកចេញពីការងារ​ ​ហើយយើងសុខចិត្តជ្រើសរើសមន្រ្តីថ្មីចូលធ្វើការជំនួសវិញ​»​

អ្នកវិភាគ​នយោបាយ​ ​លោក​ ​គឹម​ ​សុខ​ ​ថាការបង្ខំក្នុងរូបភាពកាតព្វកិច្ច​ ​និងការដាក់ទោសទណ្ឌនេះឯង​ ​ដែលធ្វើឲ្យពលរដ្ឋគ្មានជម្រើសអ្វី​ ​ក្រៅពី​បង្ខំ​ចិត្តធ្វើតាមរដ្ឋាភិបាល​ ​លោកថាបើពលរដ្ឋមិនចាក់វ៉ាក់សាំង​ ​គឺមិនអាចធ្វើកិច្ចការផ្សេងៗ​ ​ក្នុងទំនាក់ទំនងសង្គម​ ​ដូចជាការបំពេញការងារ​ ​និងប្រកបមុខរបរចិញ្ចឹមជីវិតបានឡើយ​<<​បើសិស្សវិញមិនអាចទៅចូលសាលារៀន​ ​ដូច្នេះហើយទើបពួកគាត់​ ​គឺប្រជាពលរដ្ឋត្រូវបង្ខំចិត្តចាក់វ៉ាក់សាំង​ ​តាមដែលគេប្រាប់​>>

ម្យ៉ាង​វិញទៀតលោក​ ​គឹម​ ​សុខ​ ​យល់ថាវិធីបង្ខំប្រជាពលរដ្ឋឲ្យចាក់វ៉ាក់សាំងនេះ​ ​គឺជាមធ្យោបាយក្នុងការព្យាយាមលុបលាងកំហុសពីដើមទីរបស់លោក​ ​ហ៊ុន​ ​សែន​​ដែលប្រកាសថាមិនខ្លាចជំងឺកូវីដ-១៩នោះ​ ​លោកថា​ ​ដល់ពេលជំងឺនេះឆ្លងរាលដាលធ្ងន់ធ្ងរ​ ​ជួបវិនាសកម្មជីវិតរបស់ប្រជាពលរដ្ឋកាន់តែច្រើន​ ​លោក​ ​ហ៊ុន​ ​សែន​ ​ត្រូវបង្ខំចិត្តចាក់វ៉ាក់សាំងចិននេះ​ ​បើទោះបីជាជួយប្រជាពលរដ្ឋបានតិចក៏ដោយ

លោក​ ​គឹម​ ​សុខ​ ​ថាការធ្វើដូច្នេះ​ ​លោក​ ​ហ៊ុន​ ​សែន​ ​មានហេតុផលប្រាប់ពលរដ្ឋថា​ ​គាត់បានប្រឹងប្រែងឲ្យមានវ៉ាក់សាំងដើម្បីបង្ការជំងឺកូវីដ-១៩​ ​ដែលនេះគឺជានយោបាយរបស់លោក​ ​ហ៊ុន​ ​សែន​ ​ជាជាងការគិតគូដល់សុខុមាលភាពរបស់ប្រជាពលរដ្ឋ​ <<​ចំណាត់ការរបស់លោក​ ​ហ៊ុន​ ​សែន​ ​លាយឡំនឹងនយោបាយ​ ​មិនមែនពាក់ព័ន្ធនឹងសុខភាព​ ​១០០​% ​ទេ​ ​យើងដឹងស្រាប់តាំងពីដំបូង​ ​ថាចិនមាននយោបាយសាកល្បងគុណភាពវ៉ាក់សាំងរបស់គេ​ ​ដូច្នេះហើយមានតែប្រទេសសម្ព័ន្ធមិត្តរបស់ចិនជិតស្និត​ ​រដ្ឋាភិបាលដែលនៅជាមួយចិន​ ​១០០​% ​ដូចលោក​ ​ហ៊ុន​ ​សែនទេ​ ​ដែលអាច​​​យកវ៉ាក់សាំងចិនមកសាកល្បងលើប្រជាពលរដ្ឋប្រទេសទាំងអស់ហ្នឹង​ ​ដូច្នេះហើយវាជានយោបាយសាកល្បងគុណភាពវ៉ាក់សាំងចិន​ ​ដោយប្រើប្រជាពលរដ្ឋខ្មែរដែរ​>>​

អ្នកឯកទេស​ផ្នែកវេជ្ជសាស្រ្ត ​យល់ថាការចាក់វ៉ាក់សាំងចិនបានច្រើនភ្លូកទឹកភ្លូកដីនេះ​ ​អាចមពីកត្តានៃការខ្វះព័ត៌មានពិត​ ​និងឯករាជ្យពីអ្នកជំនាញផ្នែកវេជ្ជសាស្រ្ត ​សម្រាប់ប្រជាពលរដ្ឋធ្វើការសម្រេចចិត្ត​ ​និងការធ្វើតាមគ្នា

ប្រធាន​សមាគមគ្រូពេទ្យគុណធម៌កម្ពុជា​ ​លោក​ ​អ៊ូច​ ​វុទ្ធី​ ​ការធ្វើតាមគ្នានេះ​ ​ធ្វើឲ្យអ្នកខ្លះអួតសម្ញែញបណ្ណចាក់វ៉ាក់សាំង​ ​ទាំងមិនដឹងថាវ៉ាក់សាំងនោះមានគុណភាពយ៉ាងណានោះផង​ <<​យើងគិតមើលចាក់ដំបូងជួរទីមួយ​ ​យើងគិតហើយសុទ្ធតែទាហានប៉ូលិស​ ​និងពេទ្យមួយចំនួនទៅចាក់​ ​ក្រោយមកឈឺគ្រប់គ្នា​ ​ជួនកាលអ្នកខ្លះរហូតដល់ស្លាប់​ ​មានទាំងដុកទ័រ​ ​គេហៅជោរតាមគ្នា​ ​ទៅចាក់ទៅអីតាមគ្នា​ ​មិនគិតថាយើងចេះដឹងប៉ុណ្ណឹងដែរ​ ​យើងត្រូវសិក្សាខ្លួនយើង​ ​តើខ្លួនយើងវាមានអ្វីខ្លះនៅក្នុងខ្លួន​ ​មានជំងឺអ្វីខ្លះ​? ​គេហៅប្រព័ន្ធការពារខ្លួនយើងវាមានកម្រិតប៉ុនណា​ ​ហើយទៅចាក់វ៉ាក់សាំងហ្នឹង​>>​

អ្នកឯកទេស​ផ្នែកវេជ្ជសាស្រ្តរូបនេះ​ ​អំពាវនាវឲ្យ​មន្រ្តីឯកទេសនិងជំនាញផ្សេងៗ​ ​ហ៊ាននិយាយការពិត​ ​ដើម្បីឲ្យប្រជាពលរដ្ឋដឹងអំពីវ៉ាក់សាំង​ ​និងផលប៉ះពាល់របស់វា​ ​ដើម្បីជួយដល់ការសម្រេចចិត្តត្រឹមត្រូវរបស់ប្រជាពលរដ្ឋ

អ្នក​សិក្សា​ ​និងឃ្លាំមើលការអភិវឌ្ឍសង្គមវិញ​ ​លោកយល់ថា​ ​ពលរដ្ឋអាចគ្មានជម្រើសដែរ​ ​ក្នុងការទទួលយកវ៉ាក់សាំងចិននេះ​ ​ព្រោះពួកគាត់ឆាប់ភ័យខ្លាច​ ​ក្រោយមានអ្នកស្លាប់ដោយសារជំងឺកូវីដ-១៩​ ​កាន់តែកើនឡើង

លោក​បណ្ឌិត​ ​មាស​ ​នី​ ​សម្ពាធច្បាប់​ ​និងអនុក្រឹត្យដែលកំណត់កាតព្វកិច្ចចាក់វ៉ាក់សាំង​ ​និងភាពភ័យខ្លាចឆ្លងជំងឺ​ ​និងខ្លាចស្លាប់ផងនោះ​ ​ទើបប្រជាពលរដ្ឋនាំគ្នាទៅចាក់វ៉ាក់សាំងច្រើនយ៉ាងនេះ​ <<​ដោយសារតែយើងអាចថាមកពីមិនមានជម្រើសផង​ ​និងដោយសារតែឃើញស្លាប់ជាក់ស្តែងពេក​ ​ដូច្នេះក៏នាំគ្នាមកចាក់ថ្នាំទៅ​ ​ហើយក្រោយមកក៏ក្លាយទៅជារឿងធម្មតាដាស់តឿនគ្នាទៅចាក់ថ្នាំ​ ​ប៉ុន្តែ​ ​មែនទែនទៅខ្ញុំនិយាយដោយយុត្តិធម៌ទៅ​ ​គឺការចាក់វ៉ាក់សាំងនេះ​ ​មិនឃើញមានការបង្ខំអ្វីឲ្យថាអ្នកឯងត្រូវតែទៅចាក់​ ​តាមដឹកតាមអី​ ​ដូចអត់មានទេ​>>​

ក្រៅពី​ច្បាប់​ ​និងអនុក្រឹត្យស្តីពីកាតព្វកិច្ចចាក់វ៉ាក់សាំង​ ​ឥឡូវនេះរដ្ឋបាលក្រុងភ្នំពេញ​ ​ចាប់ផ្តើមឈានមួយជំហានទៀត​ ​ដើម្បីដាក់សម្ពាធឲ្យប្រជាពលរដ្ឋដែលមិនទាន់ចាក់វ៉ាក់សាំង​ ​នាំគ្នាទៅចាក់វ៉ាក់សាំងឲ្យបានគ្រប់គ្នា​ ​តាមដែលអាចធ្វើទៅបាន

ចាប់ពី​ថ្ងៃទី​ ​០៥​ ​ខែ​ ​តុលា​ ​តទៅ​ ​នៅក្រុងភ្នំពេញ​ ​ប្រជាពលរដ្ឋណាដែលគ្មានបណ្ណចាក់វ៉ាក់សាំង​ ​នឹងមិនអាចចូលសាលារៀន​ ​ទីផ្សារ​ ​និងទីតាំងអាជីវកម្មនានាក្នុងក្រុងភ្នំពេញបានទៀតឡើយ​ ​សេចក្តីណែនាំរបស់រដ្ឋបាលក្រុងភ្នំពេញ​ ​កាលពីថ្ងៃទី​ ​០៥​ ​ខែ​ ​តុលា​ ​បុគ្គលដែលមានអាយុចាប់ពី​ ​១៨​ ​ឆ្នាំឡើងទៅ​ ​ត្រូវមានកាតព្វកិច្ចបង្ហាញ​​បណ្ណចាក់វ៉ាក់សាំងបង្ការជំងឺកូវីដ-១៩​ ​រាល់ពេលចេញចូលទីតាំង​ ​ទីកន្លែងដូចជា​ ​គ្រឹះស្ថានសិក្សា​ ​ផ្សាររដ្ឋ​ ​ផ្សារឯកជន​ ​ផ្សារម៉ា​ ​ភោជនីយដ្ឋាន​ ​អាហារដ្ឋាន​ ​ហាងកាហ្វេ​ ​និងទីតាំងផ្សេងទៀត​ ​ដែលត្រូវបានអនុញ្ញាតឲ្យបើកដំណើរការ​ ​ចំពោះក្មេងអាយុក្រោម​ ​១៨​ ​ឆ្នាំ​ ​រហូតដល់​ ​​ ​ឆ្នាំ​ ​គឺតម្រូវឲ្យអាណាព្យាបាល​ ​បង្ហាញបណ្ណចាក់វ៉ាក់សាំងជំនួសពួកគេ​ ​បើចង់ចូលទីកន្លែងទាំងនោះ

នេះអាចជាកត្តាបង្ខំមួយទៀត​ ​ដែលធ្វើឲ្យពលរដ្ឋដែលអល់អែករឿងវ៉ាក់សាំងចិន​ ​គ្មានជម្រើសអ្វីក្រៅពីនាំគ្នាទៅចាក់វ៉ាក់សាំងនេះ​ ​ដើម្បីសម្រួលបញ្ហាជីវភាពប្រចាំថ្ងៃ នាយកប្រតិបត្តិសម្ព័ន្ធគណនេយ្យភាពសង្គមកម្ពុជា​ ​លោក​ ​សន​ ​ជ័យ​ ​យល់ស្របថា​ ​លក្ខខណ្ឌ​ ​កាតព្វកិច្ច​ ​និងច្បាប់កូវីដ-១៩​ ​មានភាពតឹងរឹង​ ​និងជាកត្តាជំរុញឲ្យប្រជាពលរដ្ឋ​ ​មិនអាចប្រកែករឿងវ៉ាក់សាំងនេះបាន​ ​ប៉ុន្តែ​ ​លោកថាកត្តានៃការផ្ទុះរីករាលដាលលឿននៃមេរោគបំប្លែងថ្មីប្រភេទ​ ឌែលតា (Delta) ​ក៏ធ្វើឲ្យពលរដ្ឋភ័យខ្លាច​ ​និងប្រញាប់រកអ្វីដើម្បីការពារខ្លួនដែរ

វិទ្យុ​អាស៊ីសេរី​ ​មិនអាចសុំការបំភ្លឺពីប្រធានអង្គភាពអ្នកនាំពាក្យរដ្ឋាភិបាល​ ​គឺលោក​ ​ផៃ​ ​ស៊ីផា​ ​ជុំវិញរឿងនេះបាននៅឡើយទេ​ ​ប៉ុន្តែមន្រ្តីនាំពាក្យក្រសួងយុត្តិធម៌លោក​ ​ជិន​ ​ម៉ាលីន​ ​ធ្លាប់ការពារជំហររបស់រដ្ឋាភិបាល​ ​ក្នុងការកំណត់កាតព្វកិច្ចចាក់វ៉ាក់សាំងនេះ​ ​ដោយលោកអះអាង​ ​ថាការយកចិត្តទុកដាក់លើអាយុជីវិតរបស់ប្រជាពលរដ្ឋ​ ​គឺវាសំខាន់ជាងសិទ្ធិសេរីភាពក្នុងការជ្រើសរើសថាចាក់វ៉ាក់សាំង​ ​មិនចាក់វ៉ាក់សាំង

បើ​ទោះបីជាកម្ពុជាបានចាក់វ៉ាក់សាំងជូនពលរដ្ឋស្ទើរ​ ​១០០​% ​យ៉ាងណាក្ដី​ ​ក៏អត្រានៃអ្នកស្លាប់​ ​និងឆ្លងជំងឺនេះ​ ​នៅតែមានអត្រាខ្ពស់​ ​គឺជាមធ្យម​ ​២៥​ ​នាក់ក្នុងមួយថ្ងៃ​ ​និងឆ្លងប្រមាណ​ ​៨០០​ ​នាក់ក្នុងមួយថ្ងៃ​ ​តួលេខអ្នកឆ្លងទើបតែថយចុះ​ ​ក្នុងរយៈពេលបួនថ្ងៃដើមខែ​ ​តុលានេះ​ ​ក្រោយលោក​ ​ហ៊ុន​ ​សែន​ ​ប្រកាសឲ្យឈប់ធ្វើតេស្តរហ័ស​ ​រកអ្នកផ្ទុកជំងឺកូវីដ-១៩​ ​តែប៉ុណ្ណោះ​ ​ជាងនេះទៅទៀត​ ​លោក​ ​ហ៊ុន​ ​សែន​ ​ថាក្នុងចំណោមអ្នកស្លាប់ដោយសារជំងឺកូវីដ-១៩​ ​មានជាង​ ​៣០​% ​ជាអ្នកបានចាក់វ៉ាក់សាំងរួច

ក្នុងស្ថានភាពបែបនេះ​ ​អង្គការសុខភាពពិភពលោក​ ​លើកទឹកចិត្តឲ្យពលរដ្ឋនៅតែបន្តអនុវត្តវិធានការបង្ការសំខាន់​ ​ដូចជាពាក់ម៉ាស់​ ​លាងដៃឲ្យបានញឹកញាប់​ ​រក្សាគម្លាតបុគ្គល​ ​និងចៀសវាងកន្លែងដែលបិទជិតគ្មានខ្យល់ចេញចូលជាដើម

ជាមួយគ្នា​ដែរអង្គការអន្តរជាតិនេះ​ ​ធ្លាប់បានបញ្ជាក់ថាវ៉ាក់សាំងទាំងអស់​ ​ដែលអង្គការនេះទទួលស្គាល់​ ​រួមទាំងវ៉ាក់សាំងចិនផង​ ​ទោះមានគុណភាពទាប​ ​ក៏នៅតែអាចជួយបានច្រើន​ ​កុំឲ្យប្រជាប្រជាពលរដ្ឋ​ ​ធ្លាក់ខ្លួនឈឺធ្ងន់​ ​ចូលសម្រាកនៅមន្ទីរពេទ្យ​ ​ពេលឆ្លងជំងឺ កូវីដ-១៩នេះ

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល