ព្រះ​សង្ឃ​ខ្មែរ​ក្រោម​ស្នើ​ឱ្យ​ស្ថាប័ន​អប់រំ​ព្រះ​ពុទ្ធសាសនា​នៅ​កម្ពុជា​ទទួល​ស្គាល់​សញ្ញាប័ត្រ​ពី​កម្ពុជា​ក្រោម

ដោយ យន់ សាមៀន
2020-07-29
អ៊ីម៉ែល
មតិ
Share
បោះពុម្ព
វិញ្ញាបនបត្រ​នៃ​ពុទ្ធិកសិក្សា នៅ​ឯ​ទឹកដី​កម្ពុជា​ក្រោម
វិញ្ញាបនបត្រ​នៃ​ពុទ្ធិកសិក្សា នៅ​ឯ​ទឹកដី​កម្ពុជា​ក្រោម
រូប៖ ពលរដ្ឋ

ព្រះសង្ឃ​ខ្មែរ​កម្ពុជា​ក្រោម​ដែល​កំពុង​ស្នាក់នៅ​រៀន​សូត្រ​នៅ​ក្នុង​ប្រទេស​កម្ពុជា និង​ថៃ អំពាវនាវ​ដល់​រដ្ឋាភិបាល​កម្ពុជា ឲ្យ​ទទួល​ស្គាល់​សញ្ញាប័ត្រ​គ្រប់​កម្រិត​របស់​ព្រះសង្ឃ​ខ្មែរ​កម្ពុជា​ក្រោម​ដែល​បាន​ខិតខំ​សិក្សា​នៅ​ដែន​ដី​កម្ពុជា​ក្រោម ដើម្បី​ផ្តល់​ឱកាស​ឱ្យ​សមណ​សិស្ស​និស្សិត​ខ្មែរ​ក្រោម​បាន​ចូល​រៀន​បន្ត​ដោយ​ស្រប​ច្បាប់​នៅ​តាម​សាលា​ពុទ្ធិក​នានា ដូច​ព្រះ​សង្ឃ​នៅ​កម្ពុជា​ដែរ។

ការ​អំពាវនាវ​របស់​ព្រះសង្ឃ​ខ្មែរ​កម្ពុជា​ក្រោម ដូច្នេះ​ដោយសារ​ជាង ៣០ឆ្នាំ​កន្លង​ទៅ​នេះ វិស័យ​ពុទ្ធិក​សិក្សា​កម្ពុជា​មិន​បាន​ទទួលស្គាល់​សញ្ញាប័ត្រ​របស់​ព្រះសង្ឃ​ខ្មែរ​កម្ពុជា​ក្រោម​នោះ​ឡើយ ដែល​ធ្វើឲ្យ​ព្រះសង្ឃ​ខ្មែរ​កម្ពុជា​ក្រោម​ភាគច្រើន ជួប​ការ​លំបាក​ក្នុង​ការ​បន្ត​សិក្សា។ សមណ​និស្សិត ព្រះតេជព្រះគុណ យឿង វិជ័យ ដែល​និមន្ត​មក​ពី​កម្ពុជា​ក្រោម មាន​ថេរ​ដីកា​ថា ព្រះអង្គ​និង​ព្រះសង្ឃ​ខ្មែរ​ក្រោម​ផ្សេង​ទៀត កំពុង​ជួប​ប្រទះ​បញ្ហា ស្វែងរក​សាលារៀន។ ព្រះតេជព្រះគុណ​បញ្ជាក់​ថា បច្ចុប្បន្ន​ព្រះអង្គ​ដែល​បាន​ចូល​រៀន​នៅ​សកលវិទ្យាល័យ​ឯកជន​មួយ​បាន ដោយសារ​ការ​អនុគ្រោះ​ពី​ថ្នាក់​ដឹក​នាំ​សាលា មិនមែន​ដោយសារ​សញ្ញាប័ត្រ​ដែល​ព្រះអង្គ​នាំមក​ពី​កម្ពុជា​ក្រោម​ឡើយ។ ព្រះអង្គ​ស្នើសុំ​ឲ្យ​ថ្នាក់​ដឹក​នាំ​វិស័យ​ពុទ្ធិក​សិក្សា​ឲ្យ​ទទួល​ស្គាល់​សញ្ញាប័ត្រ​របស់​ព្រះសង្ឃ ខ្មែរ​ក្រោម និង​អនុញ្ញាត​ឲ្យ​ព្រះសង្ឃ​ខ្មែរ​កម្ពុជា​ក្រោម បាន​បន្ត​ការ​សិក្សា​តាម​ក្ដី​ប្រាថ្នា​របស់​ខ្លួន៖ «ខ្ញុំ​ព្រះករុណា​អាត្មាភាព ស្នើ​ឲ្យ​ក្រសួង​ធម្មការ និង​កិច្ចការ​សាសនា អនុញ្ញាត​ឲ្យ​ព្រះសង្ឃ​ខ្មែរ​កម្ពុជា​ក្រោម​ដែល​លោក​មាន​សញ្ញាប័ត្រ​គរុកោសល្យ សូម​ក្រសួង​ធម្មការ និង​សាសនា អនុញ្ញាត​ឲ្យ​លោក បាន​ចូល​រៀន​នៅ​សាកល​វិទ្យាល័យ​ផង ពីព្រោះ​សញ្ញាប័ត្រ​គរុកោសល្យ បើ​យើង​វាយ​តម្លៃ​ស្មើ​នឹង​ថ្នាក់​ទី១២ ដែរ»

ចំណែក​សមណ​និស្សិត​ខ្មែរ​ក្រោម​មួយ​អង្គ​ទៀត ដែល​កំពុង​សិក្សា​ថ្នាក់​អនុបណ្ឌិត​សង្គមសាស្ត្រ នៅ​សកលវិទ្យាល័យ​ថៃ ព្រះភិក្ខុ ថាច់ រក្សា មាន​ថេរ​ដីកា​ថា ដំបូង​ឡើយ​ព្រះអង្គ​មាន​គោលបំណង​ចង់​បន្ត​ការ​សិក្សា​នៅ​កម្ពុជា ប៉ុន្តែ​ដោយសារ​តែ​កម្ពុជា​មិន​ទទួល​ស្គាល់​សញ្ញាប័ត្រ​របស់​ព្រះអង្គ ទើប​ព្រះអង្គ សម្រេច​បន្ត​ដំណើរ​ទៅ​រៀន​ដល់​ប្រទេស​ថៃ ដែល​មាន​ការ​ទទួល​ស្គាល់​សញ្ញាប័ត្រ​របស់​ព្រះសង្ឃ​ខ្មែរ​ក្រោម៖ «បើ​សម្រាប់​យើង​ប្រៀបធៀប​សញ្ញាប័ត្រ​នៅ​កម្ពុជា​ក្រោម​យើង យើង​មិន​និយាយ​អី​នៅ​ខ្មែរ​ទេ ដោយឡែក​នៅ​កម្ពុជា​ក្រោម​យើង យើង​អាច​យក​មក​ប្រៀបធៀប​នៅ​ប្រទេស​ថៃ គេ​អាច​ទទួល​យក​ជា​ផ្លូវការ​បាន។ ព្រោះអី​នៅ​ប្រទេស​ថៃ គឺជា​ប្រទេស​មួយ​ផ្ដល់​ឱកាស ឬ​មួយ​ជា​ប្រទេស​មួយ​លើក​តម្កើង លើក​ស្ទួយ​ព្រះពុទ្ធ​សាសនា ឲ្យ​កាន់តែ​ល្អ​ប្រសើរ ឲ្យ​កាន់តែ​រុងរឿង​ខ្លាំង​ណាស់»

ព្រះភិក្ខុ ថាច់ រក្សា បាន​អំពាវនាវ​ដល់​ក្រសួង​ធម្មការ និង​សាសនា ព្រម​ទាំង​ស្ថាប័ន​ពាក់ព័ន្ធ ពិចារណា​ឡើង​វិញ ហើយ​គួរ​ទទួលស្គាល់​នូវ​សញ្ញាប័ត្រ​របស់​ព្រះសង្ឃ​ខ្មែរ​កម្ពុជា​ក្រោម ព្រោះ​ប្រទេស​ថៃ​ដែល​ជឿនលឿន​ជាង​កម្ពុជា​ផង​នោះ ប្រទេស​នេះ បាន​ទទួល​ស្គាល់​កម្រិត​សិក្សា​របស់​ព្រះសង្ឃ​នៅ​កម្ពុជា​ក្រោម​ថា មាន​លក្ខណៈ​គ្រប់គ្រាន់​ហើយ៖ «ប្រទេស​ថៃ​រៀន​មាន​ការ​បែងចែក​ការ​សិក្សា មាន​ពីរ​កម្រិត​ដូចគ្នា មួយ​បរិយត្តិ ដូច​នៅ​ខ្មែរ ដូច​នៅ​កម្ពុជា​ក្រោម​យើង ប៉ុន្តែ​មុខវិជ្ជា​ដែល​ប្រទេស​ថៃ​រៀន គឺ​តិច​ជាង​មុខវិជ្ជា​ដែល​យើង​សិក្សា​នៅ​កម្ពុជា​ក្រោម ដូចជា ធ្លាប់​ដឹង​ហើយ នៅ​កម្ពុជា​ក្រោម​យើង រៀន​មួយ​ថ្នាក់​អ៊ីចឹង​មិន​មែន​តិច​ឯ​ណា យ៉ាង​តិច​បំផុត ១២មុខ​វិជ្ជា​ដែរ ហើយ​រៀន​ធ្ងន់​មែន​ទែន រៀន​ធ្ងន់ជាង​នៅ​ថៃ​នេះ​ផង»

ទាក់ទងនឹងរឿងនេះ អ្នកនាំពាក្យ​ក្រសួងធម្មការ និង​សាសនា លោក សេង សុមុនី បដិសេធ​មិន​ឆ្លើយ​តប​សំណួរ​អាស៊ី​សេរី​នោះ​ទេ ហើយ​បាន​បង្វែរ​សំណួរ​ទៅ​សួរ សកលវិទ្យាធិការ​រង​នៃ​ពុទ្ធិក​សាកល​វិទ្យាល័យ​ព្រះសីហនុ​រាជ ព្រះ​តេជគុណ ឃី សុវណ្ណរតនា ដែល​ទទួល​បន្ទុក​ការងារ​នេះ ប៉ុន្តែ​ព្រះអង្គ​បដិសេធ​មិន​ឆ្លើយ​នឹង​សំណួរ​អាស៊ី​សេរី។

រី​ឯ​អតីត​ប្រធាន​សម្ព័ន្ធ​សមណ​និស្សិត​ខ្មែរ​កម្ពុជា​ក្រោម ដែល​មាន​មូលដ្ឋាន​នៅ​កម្ពុជា ព្រះ​តេជគុណ សឺន សុផារិន្ទ ឲ្យ​ដឹង​ថា វិស័យ​ពុទ្ធិក​សិក្សា​នៅ​កម្ពុជា មិន​ទទួល​ស្គាល់​សញ្ញាប័ត្រ​របស់​ព្រះសង្ឃ​កម្ពុជា​ក្រោម​នោះ ដោយ​លើក​ហេតុផល​ថា សមាគម​ព្រះសង្ឃ​ខ្មែរ​ក្រោម​តាម​ខេត្ត​និមួយៗ បើក​សាលា​ដោយ​ខ្លួន​ឯង ដែល​មិន​នៅ​ក្រោម​ការ​គ្រប់គ្រង​របស់​អាជ្ញាធរ​វៀតណាម ហើយ​មិន​ទាន់​គ្រប់​លក្ខណៈ ដែល​កម្ពុជា​អាច​ទទួល​យក​បាន។

ព្រះ​តេជគុណ សឺន សុផារិន្ទ បន្ត​ថា ទោះ​យ៉ាង​ណា កម្ពុជា​ទទួល​ស្គាល់​សញ្ញាប័ត្រ​របស់​ព្រះសង្ឃ​ខ្មែរ​កម្ពុជា​ក្រោម ចេញ​ដោយ​គ្រឹះស្ថាន​សិក្សា​ចំនួន​ពីរ ដែល​គ្រប់​គង់​ដោយ​អាជ្ញាធរ​វៀតណាម គឺ​ពុទ្ធិក​សាកល​វិទ្យាល័យ​នៅ​ខេត្ត​ឃ្លាំង និង​វិទ្យាស្ថាន​ពុទ្ធសាសនា​ខ្មែរ​ក្រោម ដែល​វៀតណាម​ហៅ​ថា​ខ្មែរ ណាមបូ (Nam Bo) នៅ​ទីក្រុង​ព្រែក​ឫស្សី។ ប៉ុន្តែ​ព្រះសង្ឃ​ខ្មែរ​មិន​សូវ​ចង់​សិក្សា​នៅ​សាលា​ទាំង​ពីរ​នេះ​ទេ ព្រោះ​បង្រៀន​តែ​ទ្រឹស្ដី​កុម្មុយនិស្ត​របស់​មេ​ដឹក​នាំ​វៀតណាម និង​មាន​ភាសាខ្មែរ​តិច​តូច​ប៉ុណ្ណោះ។

ព្រះតេជព្រះគុណ សឺន សុផារិន្ទ មាន​ថេរ​ដីកា​បន្ត​ទៀត​ថា អង្គការ​សមាគម​ខ្មែរ​កម្ពុជា​ក្រោម តែងតែ​សុំ​ការ​អនុគ្រោះ​ពី​វិស័យ​ពុទ្ធិក​សិក្សា​កម្ពុជា ព្រោះ​ព្រះសង្ឃ​កម្ពុជា​ក្រោម​យល់​ថា ការ​សិក្សា​របស់​ខ្លួន​គ្រប់​លក្ខណៈ​គ្រប់គ្រាន់ និង​ត្រឹមត្រូវ​តាម​ស្តង់ដារ៖ «មានការ​ស្នើ​ទាំង​ពី​សម័យ​ព្រះ​តេជគុណ ត្រឹង យន់​លោក​ធ្វើ​ជា​មេគុណ​ខេត្ត​ត្រា​វិញ​ម្ល៉េះ កាល​ហ្នុង​សម័យ​គ្រូ ចៅ សាង អី​ម្ល៉េះ ហើយ​ខាង​យើង​ឯ​ណោះ​ទទួល​យក​លក្ខខណ្ឌ​របស់​គេ​អត់​បាន ហើយ​ដល់​ទទួល​យក​អត់​បាន​អីចឹង​យើង​មិន​អាច​ទៅ​សុំ​អន្តរាគមន៍ ឲ្យ​គេ​ទទួលស្គាល់​នូវ​សញ្ញាប័ត្រ​របស់​យើង​បាន​ទេ ។ លក្ខខណ្ឌ​ហ្នឹង​គេ​ចង់​តម្រូវ​ឲ្យ​យើង​រៀន​ចំណេះ​ដឹង​ទូទៅ​ឲ្យបាន​ដូច​ថ្នាក់​ទី១០ ទី១១ ទី១២ អីចឹង​ដែរ»

គណៈកម្មការ​អន្តរ​សាសនា​សហព័ន្ធ​ខ្មែរ​កម្ពុជាក្រោម ឲ្យដឹង​ថា សព្វ​ថ្ងៃ​មាន​មាន​សមណ​និស្សិត​ខ្មែរ​កម្ពុជា​ក្រោម​ជាង ១០០អង្គ កំពុង​សិក្សា​នៅ​កម្ពុជា និង​ប្រមាណ​ជាង ២០០អង្គ​ទៀត កំពុង​សិក្សា​នៅ​ប្រទេស​ថៃ។ ប្រទេស​ថៃ ទទួល​ស្គាល់​ការសិក្សា​អប់រំ​របស់​ព្រះសង្ឃ​នៅ​ដែនដី​កម្ពុជា​ក្រោម​ថា មាន​លក្ខណៈ​គ្រប់គ្រាន់​អាច​ទទួល​យក​បាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល