ប្រជាពលរដ្ឋនៅបឹងកក់ និងគ្រួសាររបស់អ្នកស្រី ទេព វន្នី នៅថ្ងៃទី១១ ខែមេសា នាំគ្នាដាក់ញត្តិ ជូនខុទ្ទកាល័យលោកនាយករដ្ឋមន្ត្រី ហ៊ុន សែន ដើម្បីស្នើសុំឱ្យជួយអន្តរាគមន៍ដោះលែងអ្នកស្រី ទេព វន្នី ឱ្យមានសេរីភាពវិញ ក្នុងឱកាសបុណ្យចូលឆ្នាំខ្មែរ។ ប៉ុន្តែត្រូវបានខុទ្ទកាល័យលោកនាយករដ្ឋមន្ត្រី បដិសេធទទួលយកញត្តិ និងថែមទាំងស្ដីបន្ទោសដល់ពួកគាត់ទៀតផង។
ក្រុមប្រជាពលរដ្ឋនៅសហគមន៍បឹងកក់ និងគ្រួសាររបស់អ្នកស្រី ទេព វន្នី សម្ដែងការខកចិត្តចំពោះមន្ត្រីប្រចាំការនៅខុទ្ទកាល័យលោកនាយករដ្ឋមន្ត្រី នៅក្រោមដើមពោធិ៍ មុខវត្តបទុមវតី ដែលមិនទទួលយកញត្តិរបស់ពួកគាត់ និងថែមទាំងស្ដីបន្ទោសខ្លាំងៗ ហើយបណ្ដេញពួកគាត់ចេញថែមទៀត បើ ទោះបីជាពួកគាត់លុតជង្គង់សុំអង្វរយ៉ាងណាក្ដី។
សកម្មជនដីធ្លីតំបន់បឹងកក់ អ្នកស្រី បូ ឆវី រៀបរាប់ថា មូលហេតុដែលពួកគាត់និងម្ដាយអ្នកស្រី ទេព វន្នី នាំគ្នាទៅដាក់ញត្តិនៅខុទ្ទកាល័យលោកនាយករដ្ឋមន្ត្រី ហ៊ុន សែន នោះ ព្រោះពួកគាត់ចង់ស្នើសុំ ឲ្យលោកហ៊ុន សែន ផ្ដល់ក្ដីមេត្តាជួយអន្តរាគមន៍ដោះលែងអ្នកស្រី ទេព វន្នី ឲ្យបានជួបជុំក្រុមគ្រួសារ ក្នុង ឱកាសបុណ្យចូលឆ្នាំខ្មែរឡើងវិញ។
អ្នកស្រី បូ ឆវី បន្តថា គ្រួសារអ្នកស្រី ទេព វន្នី ពិតជាមានអារម្មណ៍ឈឺចាប់ ដែលមិនបានជួបជុំគ្នា ក្នុងឱកាសបុណ្យចូលឆ្នាំ ដូចគ្រួសារខ្មែរដទៃទៀត។ អ្នកស្រីបន្ថែមថា មានរយៈពេលជិត២ឆ្នាំហើយ ដែលអ្នកស្រី ទេព វន្នី ត្រូវបានតុលាការនៃរបបលោក ហ៊ុន សែន កាត់ទោសឲ្យជាប់ពន្ធនាគារព្រាត់ ប្រាស់ម្ដាយចាស់ជរា និងកូនៗទាំងពីរនាក់របស់គាត់ ដែលកំពុងជួបទុក្ខលំបាកទាំងផ្លូវកាយ និងផ្លូវចិត្តយ៉ាងធ្ងន់ធ្ងរដោយសារមិនមានអ្នកថែទាំបានដិតដល់។ «»
អ្នកនាំពាក្យក្រសួងយុត្តិធម៌ លោក គឹម សន្តិភាព បានបញ្ជាក់ប្រាប់ក្រុមអ្នកព័ត៌មានក្នុងបណ្ដាញ សង្គមថា គណៈកម្មការជាតិបានពិនិត្យ និងសម្រេចស្នើសុំការអនុគ្រោះទោសដល់ទណ្ឌិតសរុប ៥០រូប (ស្ត្រី ៦រូប) ក្នុងនោះបន្ធូរបន្ថយទោសដល់ទណ្ឌិតចំនួន ៤២រូប និងលើកលែងទោសដល់ ទណ្ឌិតចំនួន៨រូប សម្រាប់ឱកាសបុណ្យចូលឆ្នាំថ្មីប្រពៃណីជាតិខាងមុខនេះ ក្នុងចំណោមបញ្ជីដែលបាន ស្នើសុំពីគណៈកម្មការក្រសួងមហាផ្ទៃ និងគណៈកម្មការរាជធានីខេត្តចំនួន ៣២១រូប។ ក្នុងតារាងបញ្ជីឈ្មោះអ្នកទោសទាំងនេះ មិនមានបញ្ជាក់ថា អ្នកណាមានតួនាទីអ្វីនោះទេ ប៉ុន្តែមិនឃើញមានឈ្មោះអ្នកទោសមនសិការដូចជាអ្នកស្រី ទេព វន្នី ឡើយ។
មន្ត្រីស៊ើបអង្កេតជាន់ខ្ពស់សមាគមអាដហុក (ADHOC) លោក សឹង សែនករុណា ថ្លែងថា សំណុំ រឿងអ្នកស្រី ទេព វន្នី ត្រូវបញ្ចប់រួចហើយ តាមអំណាចសាលដីការបស់តុលាការកំពូល ដូច្នេះ អ្នកស្រី ទេព វន្នី មានលក្ខខណ្ឌសាកសមដែលគួរទទួលបានការលើកលែងទោស។ លើសពីនេះ លោកជឿថា លោកនាយករដ្ឋមន្ត្រីអាចធ្វើសំណើសុំទៅព្រះមហាក្សត្រដើម្បីប្រោសព្រះរាជទានការលើកលែងទោសដល់សកម្មជនដីធ្លីរូបនេះ។ «»
កាលពីដើមខែកុម្ភៈ កន្លងទៅ តុលាការកំពូលបានសម្រេចតម្កល់សាលក្រមតុលាការក្រុងភ្នំពេញទុកជាបានការដដែល ចំពោះការផ្ដន្ទាទោសអ្នកស្រី ទេព វន្នី ឱ្យជាប់ពន្ធនាគារ ២ឆ្នាំកន្លះ ពាក់ព័ន្ធនឹងសំណុំរឿងហិង្សាលើសន្តិសុខសាលាខណ្ឌដូនពេញ ក្បែរផ្ទះនាយករដ្ឋមន្ត្រី កាលពីឆ្នាំ ២០១៣ កន្លងទៅ។
ដោយឡែកសាក្សីជាច្រើននាក់ និងអ្នកស្រី ទេព វន្នី បានប្រាប់តុលាការម្ដងហើយម្ដងទៀតថា គាត់មិនបានប្រព្រឹត្តដូចការចោទប្រកាន់ទេ។ ពួកគាត់ជាស្ត្រីទៅទាមទារតវ៉ាមានគ្នាប្រមាណ ៣០នាក់ និងមានត្រឹមតែបដា និងផ្កាឈូកប៉ុណ្ណោះ គ្មានដុំថ្ម ហើយក៏មិនបានប្រើហិង្សាលើក្រុមសន្តិសុខឡើយ មានតែក្រុមសន្តិសុខទេដែលប្រព្រឹត្តហិង្សាលើពួកគេរហូតធ្វើឲ្យបាតុករបាក់ដៃ បាក់ធ្មេញ និងរបួសជាដើម នៅក្នុងហេតុការណ៍នោះ។
អ្នកស្រី ទេព វន្នី ត្រូវបានអាជ្ញាធរចាប់ខ្លួន កាលពីខែសីហា ឆ្នាំ២០១៦ ខណៈដែលអ្នកស្ត្រីធ្វើយុទ្ធនាការថ្ងៃចន្ទពណ៌ខ្មៅ ទាមទារឲ្យដោះលែងមន្ត្រីអាដហុក ៤រូប និងមន្ត្រី គ.ជ.ប ១រូប រួមទាំងជំរុញឲ្យរដ្ឋាភិបាលវែកមុខរកអ្នកនៅពីក្រោយការបាញ់សម្លាប់ លោក កែម ឡី។ គិតត្រឹមខែមីនា ឆ្នាំ ២០១៨ នេះ អ្នកស្រីបានជាប់ពន្ធនាគារអស់រយៈពេលប្រមាណ ១ ឆ្នាំ ៨ខែហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។