ព្រះសង្ឃខ្មែរក្រោមកសាងរូបសំណាកឧកញ៉ា សឺន គុយ ដើម្បីឲ្យកូនខ្មែរស្គាល់ និងគោរពបូជា
2024.08.20
(ឆ្វេង) រូបសំណាកឧកញ៉ា សឺន គុយ ដែលខ្មែរកម្ពុជាក្រោមចាត់ទុកជាវីរបុរស និងព្រះភិក្ខុ គឹម សំរិន្ទ ជាអ្នកដឹកនាំកសាងរូបសំណាកនេះ។
រូប៖ ពីព្រះសង្ឃ
ខ្មែរកម្ពុជាក្រោមចាត់ទុកឧកញ៉ា សឺន គុយ ជាវីរបុរស ដែលបានបូជាជីវិត ដើម្បីឲ្យពូជពង្សខ្មែរកម្ពុជាក្រោមគង់វង្សរហូតមកដល់សព្វថ្ងៃនេះ។
តើសព្វថ្ងៃនេះ ខ្មែរក្រោមបានធ្វើអ្វីខ្លះ ដើម្បីជាការដឹងគុណដល់ឧកញ៉ា សឺន គុយ?
ព្រះសង្ឃខ្មែរកម្ពុជាក្រោមមួយអង្គបានដឹកនាំកសាងរូបសំណាកវីរបុរសខ្មែរកម្ពុជាក្រោម គឺឧកញ៉ា សឺន គុយ ដើម្បីឲ្យក្មេងជំនាន់ក្រោយបានស្គាល់ពីគុណតម្លៃរបស់លោក ដែលបានបូជាជីវិត ដើម្បី សាសនា វប្បធម៌ និងអក្សរសាស្ត្រខ្មែរឲ្យនៅគង់វង្សនៅលើទឹកដីកំណើត។ ព្រះតេជព្រះគុណ គឹម សំរិន្ទ ប្ដេជ្ញាថែរក្សារូបសំណាកលោកឧកញ៉ា សឺន គុយ ទោះបីអាជ្ញាធរវៀតណាមបានធ្វើទុក្ខបុកម្នេញព្រះអង្គរហូតបណ្ដេញព្រះអង្គចេញពីវត្តក្ដី។ វៀតណាម ក៏តម្រូវឲ្យព្រះអង្គយករូបសំណាកឧកញ៉ា សឺន គុយ ចេញពីវត្តផងដែរ។
ព្រះតេជព្រះគុណ គឹម សំរិន្ទ៖ «អាត្មានឹកឃើញថា គាត់ពលីទុកវត្តអារាមសាសនាទំនៀមទម្លាប់ និងសាសនា ប៉ុន្តែ យើងដឹងតែប្រវត្តិ តែគ្មានអ្វីជានិមិត្ត ដើម្បីឲ្យកូនចៅដឹងថា គាត់រូបរាងអ៊ីចឹង ភូមិកំណើតគាត់ ហើយគាត់នៅកន្លែងហ្នឹង។»
គណៈសង្ឃព្រះពុទ្ធសាសនាវៀតណាម ខេត្តព្រះត្រពាំង កាលពីថ្ងៃទី២៥ ខែមីនា បានសម្រេចមិនទទួលស្គាល់ព្រះតេជព្រះគុណ គឹម សំរិន្ទ ជាព្រះភិក្ខុសង្ឃក្នុងព្រះពុទ្ធសាសនាថេរវាទ និងបណ្ដេញព្រះអង្គចេញពីវត្ត និងមិនអនុញ្ញាតឱ្យវត្តទាំង១៤៣ ក្នុងខេត្តនេះទទួលព្រះអង្គឱ្យគង់នៅ។ អាជ្ញាធរវៀតណាមចោទព្រះអង្គថា បានបង្ហោះ និងចែកចាយរូបភាព និងវីដេអូមិនពិតនៅលើបណ្ដាញសង្គមហ្វេសប៊ុក (Facebook) ជាមួយនឹងខ្លឹមសារ ដែលបង្កអសន្តិសុខ និងសណ្ដាប់ធ្នាប់សង្គម។
ទោះបីវៀតណាមអះអាងដូច្នោះក្ដី ប៉ុន្តែធាតុពិត ព្រះភិក្ខុ គឹម សំរិន្ទ មានថេរដីកាថា វៀតណាមបណ្តេញព្រះអង្គចេញពីវត្តដោយសារតែព្រះអង្គបានប្រមូលពុទ្ធបរិស័ទ ដើម្បីចូលបច្ច័យធ្វើរូបសំណាក បុរសខ្មែរកម្ពុជាក្រោម ឧកញ៉ា សឺន គុយ ដើម្បីឲ្យខ្មែរជំនាន់ក្រោយស្វែងយល់ និងគោរពបូជា។
ព្រះភិក្ខុ គឹម សំរិន្ទ៖ «ធម្មតាខ្មែរក្រោមយើងទូទៅគាត់ដឹងច្រើនហើយ។ ពេលយើងលើកដូនតាយើងឲ្យដឹងប្រវត្តិសាស្ត្រ ឲ្យកូនចៅយើងដឹង មិនពេញបំណងគេទេ។»
បច្ចុប្បន្ន រូបសំណាកឧកញ៉ា សឺន គុយ ត្រូវបានព្រះអង្គ គឹម សំរិន្ទ យកទៅតម្កល់នៅក្នុងផ្ទះញោមរបស់ព្រះអង្គ ក្រោយពេលអាជ្ញាធរវៀតណាមបណ្តេញព្រះអង្គចេញពីវត្ត។ រូបសំណាក់នេះ ធ្វើអំពីខ្លឹមដើមអំពិលបារាំង និងចំណាយថវិកាប្រមាណមួយពាន់ដុល្លារ។ឧកញ៉ាសេនាបតី សឺន គុយ ជាអភិបាលខេត្តព្រះត្រពាំង។ លោកសុខចិត្តឲ្យវៀតណាមសម្លាប់ដោយកាត់ក ដើម្បីឲ្យជាតិខ្មែរបានរស់។
ចំពោះការតស៊ូរបស់ព្រះភិក្ខុ គឹម សំរិន្ទ ប្រធាននាយកដ្ឋានព័ត៌មានសហព័ន្ធខ្មែរកម្ពុជាក្រោម ព្រះភិក្ខុ សឺង យ៉ឹងរតនា មានថេរដីកាថា ខ្មែរក្រោមដឹងគុណ ចំពោះវីរភាពព្រះភិក្ខុ គឹម សំរិន្ទ ដែលហ៊ានតស៊ូធ្វើរូបសំណាក វីរបុរសខ្មែរក្រោម ដោយមិនភ័យខ្លាច ចំពោះគំរាមកំហែងរបស់វៀតណាម។
ព្រះភិក្ខុ សឺង យ៉ឹងរតនា៖ «ព្រះអង្គមានទស្សនវិស័យ និងមនសិការស្នេហាជាតិ ចំពោះវីរបុរសឧកញ៉ា សឺន គុយ ក៏បានកៀរគរពុទ្ធបរិស័ទ ដើម្បីនឹងកសាងរូបសំណាកជាស្មារតីគោរពវីរភាពរបស់លោកឧកញ៉ា សឺន គុយ»។
ព្រះភិក្ខុ សើង យ៉ឹងរតនា មានថេរដីកាបន្ថែមទៀតថា កូនខ្មែរក្រោមត្រូវតែរៀនសូត្រ និងស្វែងយល់ពីប្រវត្តិរបស់លោកឧកញ៉ា សឺន គុយ។
ព្រះភិក្ខុ សើង យ៉ឹងរតនា៖ «វីរបុរស សឺន គុយ ហ្នឹង មានសារៈសំខាន់ណាស់សម្រាប់ខ្មែរក្រោម នៅកម្ពុជាក្រោមធ្វើឲ្យខ្មែរក្រោមភ្ញាក់រលឹកការតស៊ូ ដើម្បីទាមទារនូវសិទ្ធិសេរីភាព ដូចជាគំរូរបស់បុរស សឺន គុយ។»
ទៅថ្ងៃអនាគតព្រះភិក្ខុ គឹម សំរិន្ទ គ្រោងនឹងសាងសង់អគារគុយ ដើម្បីតម្កល់រូបសំណាកលោក ឧកញ៉ា សឺន គុយ ដើម្បីឲ្យមនុស្សជំនាន់ក្រោយពីបានទៅគោរព និងបូជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- តុលាការចោទប្រកាន់ជំនួយការផ្ទាល់លោក ហ៊ុន សែន គឺលោក ដួង តារា ពីបទ «ឆបោក»
- អ្នកឃ្លាំមើល ស្នើអាជ្ញាធរឱ្យបង្ហាញការស៊ើបអង្កេតលើទីប្រឹក្សាលោក ហ៊ុន សែន ពាក់ព័ន្ធករណីទទួលលុយរត់ការឡើងតំណែង
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
អត្ថបទពេញនិយម
សិទ្ធិមនុស្ស
- ស្ថានទូតអូស្ត្រាលី លើកអំពីបញ្ហាចាប់ខ្លួនអ្នកសារព័ត៌មាន និងសកម្មជនបរិស្ថាន ជាមួយគណៈកម្មាធិការសិទ្ធិមនុស្សកម្ពុជា
- ស្ថានទូតបារាំងព្រួយបារម្ភអំពីការចាប់ខ្លួន និងចំណាត់ការផ្លូវច្បាប់លើអ្នកសារព័ត៌មាន លោក ម៉ិច ដារ៉ា
- ពលរដ្ឋចាមជំរុញឱ្យចាត់វិធានការច្បាប់ចំពោះកូនឧកញ៉ាម្នាក់ ដែលរងការចោទថា បានបៀតបៀនផ្លូវភេទលើកុមារីចាម១៨នាក់