ក្រុម​សមាជិកសភា​អាស៊ាន​ដើម្បី​សិទ្ធិមនុស្ស ថ្កោលទោស​របប​លោក ហ៊ុន សែន ចំពោះ​ដីកា​ចាប់​ខ្លួន​មេដឹកនាំ​បក្ស​ប្រឆាំង ៨រូប

ដោយ ទីន ហ្សាការីយ៉ា
2019-03-20
អ៊ីម៉ែល
មតិ
Share
បោះពុម្ព
កង្វល់​អំពី​បោះ​ឆ្នោត​នៅ​កម្ពុជា ត្រូវ​បាន​ក្រុម​សមាជិក​សភា​អាស៊ាន ដើម្បី​សិទ្ធិមនុស្ស ហៅ​កាត់​ថា APHR លើក​ឡើង​ចំពោះ​រដ្ឋមន្ត្រី​ការបរទេស​ម៉ាឡេស៊ី នៅ​ក្នុង​វេទិកា​សភា​ម៉ាឡេស៊ី នៅ​ថ្ងៃ​ទី​១៨ ខែ​កក្កដា ឆ្នាំ​២០១៨។
កង្វល់​អំពី​បោះ​ឆ្នោត​នៅ​កម្ពុជា ត្រូវ​បាន​ក្រុម​សមាជិក​សភា​អាស៊ាន ដើម្បី​សិទ្ធិមនុស្ស ហៅ​កាត់​ថា APHR លើក​ឡើង​ចំពោះ​រដ្ឋមន្ត្រី​ការបរទេស​ម៉ាឡេស៊ី នៅ​ក្នុង​វេទិកា​សភា​ម៉ាឡេស៊ី នៅ​ថ្ងៃ​ទី​១៨ ខែ​កក្កដា ឆ្នាំ​២០១៨។
រូប​ពី​គេហទំព័រ APHR

ក្រុម​សមាជិកសភា​អាស៊ាន​ ដើម្បី​សិទ្ធិមនុស្ស ហៅ​កាត់​ថា (APHR) ថ្កោលទោស​របប​ក្រុង​ភ្នំពេញ ចំពោះ​ដីកា​ចាប់​ខ្លួន​មេដឹកនាំ​ជាន់​ខ្ពស់​គណបក្ស សង្រ្គោះ​ជាតិ ទាំង ៨នាក់ ហើយ​ក្រុម​សមាជិក​សភា​អាស៊ាន​នេះ បាន​ទាមទារ​ឲ្យ​របប​ក្រុង​ភ្នំពេញ​ទម្លាក់​ចោល​ការ​ចោទ​ប្រកាន់​ព្រហ្មទណ្ឌ​ជា​បន្ទាន់​វិញ។

ទោះ​បី​យ៉ាង​ណា​អ្នក​នំា​ពាក្យ​ក្រសួង​យុត្តិធម៌​អះអាង​ថា តុលាការ​ចោទ​ប្រកាន់ និង​ចេញ​ដីកា​ចាប់​ខ្លួន​នេះ គឺ​ធ្វើ​ឡើង​ដោយ​ត្រឹមត្រូវ​តាម​ច្បាប់។

ក្រុម​សមាជិកសភា​អាស៊ាន​ដើម្បី​សិទ្ធិមនុស្ស ចាត់​ទុក​ដីកា​តុលាការ​ចាប់​ខ្លួន​អ្នកស្រី មូរ សុខហួរ ជា​សមាជិក​ក្រុមប្រឹក្សាភិបាល​របស់​ខ្លួន និង​មន្ត្រី​ជាន់​ខ្ពស់​គណបក្ស សង្រ្គោះ​ជាតិ ៧រូប​ផ្សេង​ទៀត ចោទ​ប្រកាន់​ពី​បទ​ក្បត់​ជាតិ​នោះ គឺ​ជា​ការ​ចោទ​ប្រកាន់​ព្រហ្មទណ្ឌ​មាន​ចរិត​នយោបាយ និង​គ្មាន​មូលដ្ឋាន។

សេចក្ដីថ្លែងការណ៍​ក្រុម​សមាជិកសភា​អាស៊ាននៅថ្ងៃទី១៩មីនា បញ្ជាក់​ថា គណបក្ស សង្គ្រោះ​ជាតិ គឺ​ជា​គណបក្ស​ប្រឆាំង​ដ៏​សំខាន់​នៅ​ក្នុង​ប្រទេស​កម្ពុជា ក៏​ប៉ុន្តែ​ត្រូវ​បាន​របប​ក្រុង​ភ្នំពេញ​បាន​ធ្វើ​ទុក្ខ​បុក​ម្នេញ និង​រំខាន​គណបក្ស​ប្រឆាំង​ម្ដង​ហើយ​ម្ដង​ទៀត តាម​រយៈ​ការ​រំលាយ​គណបក្ស​នេះ នៅ​ក្នុង​ខែ​វិច្ឆិកា ឆ្នាំ២០១៧ និង​ការ​ដក​ហូត​យក​អាសនៈ​សភា​ទាំង៥៥ រួម​ទាំង​ទាំង​អាសនៈ​ក្រុមប្រឹក្សា​ឃុំ សង្កាត់​ជាង ៥ពាន់​នាក់​ផ្សេង​ទៀត។ ក្រុម​សមាជិកសភា​អាស៊ាន​ដើម្បី​សិទ្ធិមនុស្ស​អំពាវនាវ​ឲ្យ​របប​ក្រុង​ភ្នំពេញ​ទម្លាក់​បទ​ចោទ​ប្រកាន់​ព្រហ្មទណ្ឌ​លើ​មនុស្ស​ទំាង ៨នាក់ ដែល​កំពុង​ភៀស​ខ្លួន​នៅ​ក្រៅ​ប្រទេស​ជា​បន្ទាន់។

សាលាដំបូងរាជធានីភ្នំពេញចេញដីកាបង្គាប់ឲ្យចាប់ខ្លួនមនុស្សទំាង៨នាក់ចោទប្រកាន់ ពី​បទ រួម​គំនិត​ក្បត់ និង​ញុះញង់​ឲ្យ​ប្រព្រឹត្តិ​បទឧក្រិដ្ឋ​ជា​អាទិ រួមមាន លោក សម រង្ស៊ី ប្រធាន​ស្ដីទី​គណបក្ស សង្គ្រោះ​ជាតិ អ្នកស្រី មួរ សុខហួរ  លោក អេង ឆៃអ៊ាង អនុប្រធាន​គណបក្ស លោក ហូ វ៉ាន់ លោក ឡុង រី លោក អ៊ួ ច័ន្ទរិទ្ធិ និង​លោក តុ វ៉ាន់ចាន់ ជា​តំណាង​រាស្រ្ត។

អ្នក​នាំ​ពាក្យ​ក្រសួង​យុត្តិធម៌ លោក ជិន ម៉ាលីន បាន​ឆ្លើយ​តប​ថា តុលាការ​ចេញ​ដីកា​នេះ គឺ​ជា​យន្តការ​អនុវត្តន៍​ច្បាប់ ដោយ​ផ្អែក​លើ​ការ​ស៊ើបអង្កេត​ច្បាស់លាស់​របស់​តុលាការ មុន​នឹង​សម្រេច​ចេញ​ដីកា​ចាប់​ខ្លួន​មន្ត្រី​បក្ស​ប្រឆាំង​នេះ៖ «ការ​ចេញ​ដីកា​នេះ គឺ​ជា​យន្តការ​អនុវត្ត​ច្បាប់​សុទ្ធសាធ​នៅ​ក្នុង​សង្គម​ប្រជាធិបតេយ្យ ព្រោះ​ផ្អែក​លើ​មូលដ្ឋាន​លើ​ការ​ស្រាវជ្រាវ និង​ការ​ស៊ើបអង្កេត​ច្បាស់លាស់ ហើយ​ការ​ចោទ​ប្រកាន់​ថា ជា​រឿង​នយោបាយ​នេះ ជា​រឿង​មិន​ត្រឹមត្រូវ​ទៀត ផ្ទុយ​ទៅ​វិញ​ទេ សមាជិក​សភា​អាស៊ាន​នេះ​ទេ ដែល​ចោទ​ប្រកាន់​ជា​លក្ខណៈ​នយោបាយ​នោះ ព្រោះ​ក្រុម​នេះ​ជា​ក្រុម​ប្រឆាំង​មួយ​ក្ដាប់​តូច»

ទោះ​ជា​យ៉ាង​នេះ​ក្ដី មន្រ្តី​ឃ្លាំមើល​ការ​បោះ​ឆ្នោត​នៃ​អង្គការ​ខុមហ្វ្រែល Comfrel លោក កន សាវាង្ស មានប្រសាសន៍ថា​ រដ្ឋាភិបាល​ចេញ​ដីកា​ចាប់​ខ្លួន​មេ​ដឹក​នាំ​គណបក្ស​ប្រឆាំង​បន្ថែម​ទៀត​នេះ គឺ​កាន់​តែ​ជំរុញ​ឲ្យ​ស្ថានការណ៍​នយោបាយ​កាន់​តែ​អាក្រក់ នៅ​ខណៈ​សហភាព​អឺរ៉ុប​បាន​ដាក់​លក្ខខណ្ឌ និង​ជំរុញ​ឲ្យ​ស្ដារ​លទ្ធិ​ប្រជាធិបតេយ្យ​វិញ ដើម្បី​ជៀស​ផុត​ពី​ការ​ផ្ដាច់​ប្រព័ន្ធ​អនុគ្រោះ​ពន្ធ​នោះ។ លោក​បញ្ជាក់​ថា នៅ​ក្នុង​ដំណើរ​ស៊ើបអង្កេត​របស់​ក្រុម​មន្ត្រី​សហភាព​អឺរ៉ុប​មក​ស្វែងរក​ការ​ពិត​នៅ​កម្ពុជា​នេះ រដ្ឋាភិបាល​គួរ​តែ​បន្ទន់​ឥរិយាបថ​នយោបាយ ដើម្បី​ស្ដារ​លទ្ធិ​ប្រជាធិបតេយ្យ​ឡើង​វិញ៖ «វា​ជា​ការ​អនុវត្ត​ច្បាប់​មួយ តែ​សម្រាប់​ខ្ញុំ​វិញ​រដ្ឋាភិបាល​គួរ​តែ​ពិចារណា ចំពោះ​ការ​ព្រួយ​បារម្ភ​របស់​សហភាព​អឺរ៉ុប ហើយ​រដ្ឋាភិបាល​ត្រូវ​ពិចារណា​ចំពោះ​សិទ្ធិ​គណបក្ស​នយោបាយ និង​សិទ្ធិ​មនុស្ស»

ក្រុម​សមាជិកសភា​អាស៊ាន​ដើម្បី​សិទ្ធិមនុស្ស ហៅ​កាត់​ថា APHR កាលពីថ្ងៃទី១១មីនា ក៏​ជំរុញ​គណៈកម្មការ​អឺរ៉ុប​នៅ​ក្នុង​ការ​ដំណើរ​ការ​ស្វែងរក​ការ​ពិត​នៅ​កម្ពុជា ត្រូវ​ប្រើប្រាស់​គ្រប់​មធ្យោបាយ​ទាំងអស់​ដែល​ខ្លួន​មាន រួម​ទាំង​ការ​ដកហូត​ប្រព័ន្ធ​អនុគ្រោះ​ពន្ធ EBA ដើម្បី​ដាក់​សម្ពាធ​មក​លើ​រដ្ឋាភិបាល​កម្ពុជា ធ្វើ​យ៉ាងណា​ឱ្យ​របប​នេះ​លុបចោល​រាល់​ការ​រឹតត្បិត​លើ​សិទ្ធិ​ពលរដ្ឋ និង​សិទ្ធិ​នយោបាយ។ សមាជិក​សភា​អាស៊ាន ​បញ្ជាក់​ថា ការ​ដាក់​សម្ពោធ​នេះ គឺ​ដើម្បី​ទាមទារ​ឱ្យ​គណបក្ស​សង្គ្រោះ​ជាតិ​រស់​ឡើងវិញ ការ​ផ្ដល់​សិទ្ធិ​ធ្វើ​នយោបាយ​ឡើងវិញ​ដល់​មន្ត្រី​គណបក្ស​នេះ អនុញ្ញាត​ឱ្យ​មានការ​បោះ​ឆ្នោត​ដោយ​សេរី ត្រឹមត្រូវ និង​យុត្តិធម៌ និង​ការ​ដោះលែង​ប្រធាន​គណបក្ស​សង្គ្រោះ​ជាតិ លោក កឹម សុខា ឱ្យ​មាន​សេរីភាព​ឡើងវិញ​ជាបន្ទាន់ និង​ដោយ​ឥត​លក្ខខណ្ឌ។

អ្នកវិភាគ​នយោបាយ លោក គឹម សុខ អះអាង​ថា របប​ក្រុង​ភ្នំពេញ​កំពុង​តែ​រង​សម្ពាធ​ខ្លាំង​ពី​សហគមន៍​អន្តរជាតិ ដូច្នេះ​ហើយ​ទើប​របប​នេះ ទ័ល​ច្រក ហើយ​ប្រើ​យុទ្ធសាស្ត្រ​បំបែក​បំបាក់​គណបក្ស​ប្រឆាំង ដោយ​មិន​ខ្វល់​អំពី​សិទ្ធិ​មនុស្ស និង​ប្រជាធិបតេយ្យ។ លោក បន្ថែម​ថា​របប​លោក ហ៊ុន សែន ប្រើ​យុទ្ធសាស្ត្រ​ជំរុញ​ឲ្យ​មន្ត្រី​បក្ស​ប្រឆាំង​មួយ​ចំនួន​សុំ​សិទ្ធិ​នយោបាយ​វិញ នៅ​ស្រប​ពេល​របប​នេះ បាន​ចេញ​ដីកា​ចាប់​ខ្លួន​មន្ត្រី​ជាន់ខ្ពស់​គណបក្ស​ប្រឆាំង ៨រួប​នេះ៖ «លោក ហ៊ុន សែន រៀប​យុទ្ធសាស្ត្រ​ថ្មី នឹង​ឲ្យ​លោក កឹម សុខា ចេញ​ពី​ពន្ធនាគារ​ឆាប់ៗ ខាង​មុខ ហើយ​រារាំង​តាម​ដីកា​របស់​តុលាការ​មិន​ឲ្យ​អ្នក​ទាំង ៨រូប រួម​ទាំង​លោក សម រង្ស៊ី វិល​ចូល​ស្រុក​បាន នៅ​ពេល​នោះ លោក កឹម សុខា ពិបាក​នឹង​ប្រកាស​ថា កឹម សុខា សម រង្ស៊ី និង​លោក កឹម សុខា ជា​មនុស្ស​តែ​មួយ ដោយសារ​តែ​មាន​ចំណង​ច្បាប់​មួយ​ដែល​ចែង​ថា អ្នក​មាន​ទោស ទណ្ឌ​គណបក្ស​នយោបាយ​មិន​អាច​ជាប់​ពាក់ព័ន្ធ​បាន តែ​ខ្ញុំ​មិន​ជឿ​ថា លោក កឹម សុខា នឹង​លេង​តាម​ល្បែង​លោក ហ៊ុន សែន នេះ​ទេ»

ក្រុម​សមាជិកសភា​អាស៊ាន​ដើម្បី​សិទ្ធិមនុស្ស​សម្ដែង​ការ​ព្រួយបារម្ភ​យ៉ាង​ខ្លាំង ចំពោះ​ការ​ដួល​រំលំ​ប្រជាធិបតេយ្យ​នៅ​កម្ពុជា និង​ការ​ខំ​ប្រឹងប្រែង​របស់​អាជ្ញាធរ​របប​ក្រុង​ភ្នំពេញ ដើម្បី​រំខាន និង​ការ​តាម​ចាប់​ខ្លួន​មន្ត្រី​បក្ស​ប្រឆាំង​នេះ។ ជា​ថ្មី​ម្ដង​ទៀត សមាជិក​សភា​អាស៊ាន ទទូច​ឲ្យ​របប​ក្រុង​ភ្នំពេញ ត្រូវ​តែ​ផ្ដល់​នីតិសម្បទា​ជូន​គណបក្ស​ សង្គ្រោះ​ជាតិ និង​ផ្ដល់​តំណែង​ដល់​សមាជិក​ជាប់​ឆ្នោត​របស់​គណបក្ស​ប្រឆាំង​វិញ​ទាំង​អស់​ជា​បន្ទាន់ រាប់​ចាប់​ពី​មន្ត្រី​ថ្នាក់​មូលដ្ឋាន ដល់​ថ្នាក់​ជាតិ និង​ត្រូវ​បើក​ឲ្យ​មាន​ការ​បោះ​ឆ្នោត​ឡើង​វិញ​ដោយ​សេរី យុត្តិធម៌ និង​គួរ​ឲ្យ​ទុក​ចិត្ត​បាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល