កម្ពុជា និង​អាមេរិក​ប្ដេជ្ញា​ប្រយុទ្ធ​ប្រឆាំង​នឹង​ឧក្រិដ្ឋកម្ម​ជួញដូរ​មនុស្ស

ដោយ មាន ឫទ្ធិ
2022.11.13
Share on WhatsApp
Share on WhatsApp
កម្ពុជា និង​អាមេរិក​ប្ដេជ្ញា​ប្រយុទ្ធ​ប្រឆាំង​នឹង​ឧក្រិដ្ឋកម្ម​ជួញដូរ​មនុស្ស លោក ចូ បៃឌិន (Joe Biden) ប្រធានាធិបតីអាមេរិក និងលោកនាយករដ្ឋមន្ត្រី ហ៊ុន សែន ក្នុងពេលកិច្ចប្រជុំកំពូលអាស៊ាន-អាមេរិកនៅទីក្រុងភ្នំពេញ កាលពីថ្ងៃទី១២ ខែវិច្ឆិកា ឆ្នាំ២០២២។
រូប៖ Reuter

កម្ពុជា និង​សហរដ្ឋ​អាមេរិក បន្ត​ប្ដេជ្ញា​ចិត្ត​ពង្រឹង​កិច្ច​សហ​ប្រតិបត្តិ​ការ​អនុវត្ត​ច្បាប់​ប្រយុទ្ធ​ប្រឆាំង​នឹង​អំពើ​ជួញដូរ​មនុស្ស និង​ឧក្រិដ្ឋកម្ម​ឆ្លង​ដែន។ មន្ត្រី​សង្គម​ស៊ីវិល យល់ថា នេះ​ជា​សញ្ញា​ល្អ​បន្ថែម​ទៀត​ដែល​កម្ពុជា​នឹង​ទទួល​បាន​យុទ្ធ​សាស្ត្រ​បង្ក្រាប​ក្រុម​ឧក្រិដ្ឋ​ជន និង​អនុវត្ត​ច្បាប់​ឱ្យ​មាន​ប្រសិទ្ធិ​ភាព។

ក្នុង​ចំណោម​ប្រធាន​បទ​សំខាន់ៗ​ដែល​មេ​ដឹក​នាំ​ទាំង​ពីរ​បាន​លើក​ឡើង ជំនួប​ទ្វេ​ភាគី​រវាង​ប្រធានាធិបតី​អាមេរិក​លោក ចូ បៃឌិន (Joseph R. Biden) និង​លោក​នាយក​រដ្ឋ​មន្ត្រី ហ៊ុន សែន កាល​ពី​ថ្ងៃ​ទី១២ ខែ​វិច្ឆិកា បាន​ពិភាក្សា​អំពី​ការ​បន្ត​សកម្មភាព​នៃ​កិច្ច​សហប្រតិបត្តិ​ការ​លើ​ការ​អនុវត្ត​ច្បាប់ ដើម្បី​ប្រឆាំង​នឹង​ឧក្រិដ្ឋកម្ម​ឆ្លង​ដែន។ នេះ​បើ​យោង​តាម​សេចក្ដី​ប្រកាស​ព័ត៌មាន​របស់​ក្រសួង​ការ​បរទេស​កម្ពុជា កាល​ពី​ថ្ងៃ​ទី១២ ខែវិច្ឆិកា អំពី​លទ្ធផល​នៃ​ជំនួប​រវាង​លោក ហ៊ុន សែន និង​លោក ចូ បៃឌិន។

Biden and Hun Sen by AP-1.jpg
ប្រធានាធិបតីអាមេរិកលោក ចូ បៃឌិន (Joe Biden) ជួបទ្វេភាគីជាមួយលោក ហ៊ុន សែន កាលពីថ្ងៃទី១២ ខែវិច្ឆិកា ២០២២ នៅទីក្រុងភ្នំពេញ។ (រូប៖ AP)

ជំនួប​ធ្វើ​នេះ ធ្វើ​ស្រប​ពេល​ដែល​ប្រធានាធិបតី​អាមេរិក​លោក (Joseph R. Biden) បាន​មក​បំពេញ​ទស្សនកិច្ច និង​ចូល​រួម​កិច្ច​ប្រជុំ​កំពូល​អាស៊ាន​នៅ​កម្ពុជា ដែល​កម្ពុជា​ជា​ប្រធាន​អាស៊ាន​ប្ដូរ​វេន​សម្រាប់ ឆ្នាំ២០២២។

នៅ​មុន​ជំនួប​ទ្វេ​ភាគី​រវាង​ប្រធានាធិបតី​អាមេរិក និង​ឯក​អគ្គ​រដ្ឋ​ទូត​អាមេរិក​ប្រចាំ​កម្ពុជា លោក ផាទ្រិក ម័រហ្វី (Patrick Murphy) ធ្លាប់​បាន​បញ្ជាក់​ជា​មួយ​រដ្ឋ​មន្ត្រី​ក្រសួង​មហាផ្ទៃ លោក ស ខេង ថា សហរដ្ឋ​អាមេរិក​ក៏​ត្រៀម​ផ្ដល់​កិច្ច​សហការ​ក្នុង​ការ​ប្រយុទ្ធ​ប្រឆាំង​នឹង​ឧក្រិដ្ឋកម្ម​នេះ ក្នុង​ខណៈ​ដែល​សហរដ្ឋ​អាមេរិក ក៏​កំពុង​សហការ​ជា​មួយ​អន្តរ​ក្រសួង​ពាក់​ព័ន្ធ​នៅ​កម្ពុជា ព្រម​ទាំង​ជំរុញ​ឱ្យ​កម្ពុជា​ខិត​ខំ​ប្រឹង​ប្រែង​ក្នុង​ការ​ប្រយុទ្ធ​ប្រឆាំង​នឹង​ការ​ជួញដូរ​មនុស្ស និង​ដើម្បី​ពិភាក្សា​ការងារ​អនុវត្ត​ច្បាប់​នៃ សហរដ្ឋ​អាមេរិក និង​កម្ពុជា​ដោះស្រាយ​បញ្ហា​ឧក្រិដ្ឋកម្ម និង​ពង្រឹង​ស្តង់ដារ។

នៅ​មុន​ពេល​ចាប់​ផ្ដើម​ជា​ផ្លូវ​ការ​នៃ​កិច្ច​ប្រជុំ​កំពូល​អាស៊ាន​លោក ហ៊ុន សែន ហាក់​ផ្ដោត​សំខាន់​ក្នុង​ការ​ទទួល​ជំនួប​ទ្វេ​ភាគី​ជា​មួយ​សម្ព័ន្ធ​មិត្ត​ដែក​ថែប​ចិន និង​វៀតណាម។

ជំនួប​ទ្វេ​ភាគី​រវាង​លោក​នាយក​រដ្ឋ​មន្ត្រី ហ៊ុន សែន និង​លោក​នាយក​រដ្ឋ​មន្ត្រី​ចិន លី ខឺឈាង (Li Keqiang) កាល​ពី​ថ្ងៃ​ទី៨ វិច្ឆិកា ភាគី​ទាំង​ពីរ​ក៏​អះអាង​ថា នឹង​ពង្រឹង​កិច្ច​សហ​ប្រតិបត្តិ​ការ​អនុវត្ត​ច្បាប់​បន្ថែម​ទៀត ដោយ​ផ្ដោត​លើ​ការ​បង្រ្កាប​នៃ​ឧក្រិដ្ឋកម្ម​ជួញដូរ​មនុស្ស ល្បែង​អន​ឡាញ បទ​ល្មើស​ឆបោក​តាម​ប្រព័ន្ធ​អ៊ីធឺណែត និង​ឧក្រិដ្ឋកម្ម​នានា។

Hun Sen With Li Keqiang on 09-11-2022 by AP.jpg
នាយករដ្ឋមន្ត្រីចិនលោក លី ខឺឈាង (Li Keqiang) ក្នុងជំនួបទ្វេភាគីជាមួយលោក ហ៊ុន សែន នៅទីក្រុងភ្នំពេញ កាលពីថ្ងៃទី៨ ខែវិច្ឆិកា ឆ្នាំ២០២២។ (រូប៖ AP)

ទោះ​បី​ជា​ភាគី​ចិន និង​កម្ពុជា អះអាង​បែប​នេះ​ក្ដី ក៏​កន្លង​ទៅ​លំហូរ​នៃ​ឧក្រិដ្ឋកម្ម​នានា ពិសេស​អំពី​ជួញ​ដូរមនុស្ស និង​បង្ខាំង​មនុស្ស​នៅ​កម្ពុជា​ភាគ​ច្រើន​បង្ក​ឡើង​ដោយ​ជន​ជាតិ​ចិន។ មិន​តែ​ប៉ុណ្ណោះ សារព័ត៌មាន​អន្តរជាតិ​ធំៗ​មួយ​ចំនួន​បាន​លាត​ត្រដាង​ថា រដ្ឋាភិបាល​លោក ហ៊ុន សែន ផ្ទាល់​ព្រម​ទាំង​មន្ត្រី​គ្រាកៗ​ក្នុង​ជួរ​រដ្ឋាភិបាល​លោក​មាន​ទំនាក់​ទំនង​ជា​មួយ​ក្រុមហ៊ុន​ចិន​ដែល​ប្រតិបត្តិ​ការ​លើ​មុខ​ជំនួញ​បែប​ឧក្រិដ្ឋ​នៅ​កម្ពុជា។

ក្រសួង​មហា​ផ្ទៃ​ឲ្យ​ដឹង​ថា រយៈ​ពេល ៩ខែ ឆ្នាំ២០២២ សមត្ថកិច្ច​បង្ក្រាប​អំពើ​ជួញដូរ​មនុស្ស និង​អាជីវកម្ម​ផ្លូវ​ភេទ បាន​ចំនួន ១២២ករណី គឺ​ថយ​ចុះ​ជាង ៥០% បើ​ធៀប​រយៈ​ពេល​ដូច​គ្នា កាល​ពី​ឆ្នាំ២០២១ ដែល​មាន​ចំនួន ២៦៩ករណី។ គេហទំព័រ​ក្រសួង​មហា​ផ្ទៃ​ផ្សាយ​កាល​ពី​ថ្ងៃទី១ ខែ​វិច្ឆិកា ឲ្យ​ដឹង​ថា សមត្ថកិច្ច​បាន​ជួយ​សង្គ្រោះ​ជន​រង​គ្រោះ​ចំនួន ២៥៤នាក់ ក្នុង​នោះ​ស្រី ១៩០នាក់។ ក្នុង​ចំណោម​ជន​រង​គ្រោះ​ទាំង​នោះ មាន​ក្មេង​អាយុ​ក្រោម ១៥ឆ្នាំ ចំនួន ១០០នាក់ និង​ក្មេង​អាយុ​ចន្លោះ ពី ១៥ ទៅ១៧ឆ្នាំ ចំនួន ២៩នាក់។ សមត្ថកិច្ច​ក៏​បាន​ចាប់​ខ្លួន​ជន​សង្ស័យ​បញ្ជូន​ទៅ​តុលាការ​ចំនួន ១៤៧ករណី ក្នុង​នោះ ជន​សង្ស័យ​ជា​ជនបរទេស​ចំនួន ២២នាក់ មាន ៤សញ្ជាតិ រួម​មាន​ចិន ថៃ វៀតណាម និង​បង់​ក្លា​ដេស។

វិទ្យុ​អាស៊ី​សេរី​មិន​អាច​ទាក់​ទង​ប្រធាន​អង្គភាព​អ្នក​នាំ​ពាក្យ​រដ្ឋាភិបាល លោក ផៃ ស៊ីផាន និង​អ្នក​នាំ​ពាក្យ​ក្រសួង​ការ​បរទេស​កម្ពុជា លោក ជុំ សុន្ទរី ដើម្បី​សុំ​អត្ថាធិប្បាយ​ជុំ​វិញ​រឿង​នេះ​បាន​ទេ​នៅ​ថ្ងៃ​ទី១៣ ខែ​វិច្ឆិកា។

Biden and Hun Sen by AP.jpg
លោក ហ៊ុន សែន ពេលស្វាគមន៍ប្រធានាធិបតីអាមេរិកលោក ចូ បៃឌិន (Joe Biden) កាលពីថ្ងៃទី១២ ខែវិច្ឆិកា ឆ្នាំ២០២២ នៅទីក្រុងភ្នំពេញ។ (រូប៖ AP)

ជុំ​វិញ​រឿង​នេះ នាយក​ទទួល​បន្ទុក​ទូទៅ​នៃ​អង្គការ​ការ​ពារ​សិទ្ធិ​មនុស្ស​លី​កា​ដូ (LICADHO) លោក អំ សំអាត មាន​ប្រសាសន៍​ថា ឧក្រិដ្ឋកម្ម​ឆ្លង​ដែន ការ​ជួញដូរ​មនុស្ស និង​អំពើ​លាង​លុយ​កខ្វក់ គឺ​ជា​កង្វល់​សម្រាប់​ប្រទេស​ជុំវិញ​ពិភព​លោក។ លោក ជំរុញ​ដល់​រដ្ឋាភិបាល​កម្ពុជា​ត្រូវ​តែ​បង្កើន​កិច្ច​សហប្រតិបត្តិ​ជា​មួយ​បណ្ដា​ប្រទេស​ក្នុង​តំបន់ និង​អន្តរជាតិ ព្រម​ទាំង​បង្ហាញ​ឆន្ទៈ​ពិត​ប្រាកដ និង​ពង្រឹង​ការ​អនុវត្ត​ច្បាប់​ឱ្យ​បាន​ម៉ឺង​ម៉ាត ទើប​អាច​ទប់​ស្កាត់​ឧក្រិដ្ឋកម្ម​ជួញដូរ​មនុស្ស​នេះ​មាន​ប្រសិទ្ធ​ភាព៖ 

«ឧក្រិដ្ឋកម្ម​ឆ្លង​ដែន ការ​ជួញដូរ​មនុស្ស និង​ការ​លាង​លុយ​កខ្វក់​នេះ គឺ​អាច​ធ្វើ​ទៅ​បាន​ដោយ​កិច្ច​សហប្រតិបត្តិ​ការ​ល្អ​ជា​មួយ​បណ្ដា​ប្រទេស​នៅ​ក្នុង ពិភព​លោក ក៏​ដូចជា ក្នុង​តំបន់ និង​ប្រទេស​ជិត​ខាង ហើយ​នេះ​ជា​ឱកាស​ល្អ ដែល​មេ​ដឹក​នាំ​ប្រទេស​ធំៗ លើ​ពិភព​លោក​ដូចជា ក្នុង​អាស៊ាន បាន​ជួប​ជុំ​គ្នា​ក្នុង​ការ​ប្រជុំ​អាស៊ាន មាន​ការ​លើក​ឡើង និង​ការ​តាំង​ចិត្ត ក្នុង​ការ​ប្ដេជ្ញា​ទប់​ស្កាត់ ការ​បង្ក្រាប​ឧក្រិដ្ឋកម្ម​ឆ្លង​ដែន ការ​ជួញ​ដូរ​មនុស្ស និង​ការ​លាង​លុយ​កខ្វក់​នេះ»

របាយ​ការណ៍​ស្ដី​ពី​ការ​ជួញដូរ​មនុស្ស​ឆ្នាំ២០២២ របស់​ក្រសួង​ការ​បរទេស​អាមេរិក​ចេញ​ផ្សាយ​កាល​ពី​ខែ​កក្កដា បាន​ទម្លាក់​ចំណាត់​ថ្នាក់​កម្ពុជា​មក​កម្រិត​ទី៣ ដែល​មាន​ន័យ​ថា ស្ថាន​ភាព​នៃ​អំពើ​ជួញដូរ​មនុស្ស​នៅ​កម្ពុជា​មាន​លក្ខណៈ​អាក្រក់​បំផុត និង​ពុំ​ធ្លាប់​មាន​ចាប់​តាំង​ពី​ឆ្នាំ២០១៥ មក។ អាមេរិក​រក​ឃើញ​ថា កម្ពុជា​ដើរ​ថយ​ក្រោយ និង​គ្មាន​ឆន្ទៈ​ក្នុង​ការ​លុប​បំបាត់​ការ​ជួញដូរ​មនុស្ស​នេះ​ទេ ដោយសារ​បញ្ហា​អំពើ​ពុក​រលួយ​ជា​ប្រព័ន្ធ ដែល​បាន​រារាំង​ដល់​ការ​អនុវត្ត​ច្បាប់​លើ​ក្រុម​ឧក្រិដ្ឋជន​ដែល​ប្រព្រឹត្ត​នូវ​អំពើ​ជួញដូរ​មនុស្ស​នៅ​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។