របាយការណ៍៖ សេរីភាព​ប្រព័ន្ធ​ផ្សព្វផ្សាយ​នៅ​កម្ពុជា​ធ្លាក់​ចុះ​ខ្លាំង

ដោយ ស្ងួន អមរា
2018-02-21
អ៊ីម៉ែល
មតិ
Share
បោះពុម្ព
ផែនទី​បង្ហាញ​ទីតាំង​ស្ថានីយ​វិទ្យុ​ដែល​ត្រូវ​បាន​បិទ រៀបចំ​ដោយ​អង្គការ​លីកាដូ (LICADHO)។
ផែនទី​បង្ហាញ​ទីតាំង​ស្ថានីយ​វិទ្យុ​ដែល​ត្រូវ​បាន​បិទ រៀបចំ​ដោយ​អង្គការ​លីកាដូ (LICADHO)។
LICADHO

មជ្ឈមណ្ឌល​កម្ពុជា ដើម្បី​ប្រព័ន្ធ​ផ្សព្វផ្សាយ​ឯករាជ្យ (CCIM) បាន​ចេញ​ផ្សាយ​របាយការណ៍​មួយ​ថា សេរីភាព​ប្រព័ន្ធ​ផ្សព្វផ្សាយ ឬ​សេរីភាព​សារព័ត៌មាន​នៅ​កម្ពុជា បាន​ធ្លាក់​ចុះ​យ៉ាង​ខ្លាំង ចាប់​តាំង​ពី​ឆ្នាំ​២០១៧។ ការ​ធ្លាក់​ចុះ​នេះ គឺ​បន្ទាប់​ពី​ស្ថានីយ​វិទ្យុ និង​កាសែត​ឯករាជ្យ​មួយ​ចំនួន ត្រូវ​បាន​បង្ខំ​ឲ្យ​ឈប់​ផ្សាយ និង​បិទ​ទ្វារ​ជា​បន្តបន្ទាប់។

​របាយការណ៍​របស់​មជ្ឈមណ្ឌល​កម្ពុជា ដើម្បី​ប្រព័ន្ធ​ផ្សព្វផ្សាយ​ឯករាជ្យ មាន​ចំណងជើង​ថា 'ការ​ប្រឈម​របស់​ប្រព័ន្ធ​ផ្សព្វផ្សាយ​ឯករាជ្យ ឆ្នាំ​២០១៧'' បាន​ស្ទង់​មតិ​លើ​អ្នក​ធ្វើការ​លើ​ប្រព័ន្ធ​ផ្សព្វផ្សាយ​នៅ​កម្ពុជា ចំនួន ៧៥​នាក់ ចាប់​ពី​ចុង​ឆ្នាំ​២០១៧ មក។ ក្នុង​របាយការណ៍​នោះ អ្នក​សារព័ត៌មាន ៨៣​ភាគរយ លើក​ឡើង​ថា សេរីភាព​សារព័ត៌មាន​បាន​ធ្លាក់​ចុះ ខណៈ ១១​ភាគរយ​ទៀត​ថា ប្រព័ន្ធ​ផ្សព្វផ្សាយ​នៅ​កម្ពុជា ដើរ​តាម​ផ្លូវ​ត្រូវ។ ក្នុង​របាយការណ៍​នោះ ក៏​បាន​រក​ឃើញ​ថា អ្នក​សារព័ត៌មាន ៦៧​ភាគរយ មាន​អារម្មណ៍​ថា ពួកគេ​គ្មាន​សេរីភាព​ពេញលេញ​ក្នុង​ការ​រាយការណ៍​ព័ត៌មាន​នោះ​ទេ។

នាយក​មជ្ឈមណ្ឌល​កម្ពុជា ដើម្បី​ប្រព័ន្ធ​ផ្សព្វផ្សាយ​ឯករាជ្យ លោក ណុប វី បាន​បញ្ចេញ​យោបល់​ថា មូលហេតុ​ដែល​ធ្វើ​ឲ្យ​មាន​ការ​វាយតម្លៃ​ពី​សេរីភាព​សារព័ត៌មាន​ធ្លាក់​ចុះ​បែប​នេះ គឺ​ពាក់ព័ន្ធ​នឹង​ការ​បិទ​ស្ថានីយ​វិទ្យុ​ចំនួន ៣២ ដោយ​មិន​មាន​ការ​ស៊ើប​អង្កេត និង​ពិនិត្យ​ផ្ទៀងផ្ទាត់​ឲ្យ​បាន​ច្បាស់លាស់ ឬ​មាន​តម្លាភាព​នោះ​ទេ ពោល​គឺ​រដ្ឋាភិបាល​គ្រាន់​តែ​បញ្ជាក់​ថា ស្ថាប័ន​ទាំង​អស់​នេះ​មិន​បាន​គោរព​ទៅ​តាម​កិច្ច​សន្យា​ជាមួយ​ក្រសួង​ព័ត៌មាន ឬ​ចោទ​ថា មិន​បាន​បង់​ពន្ធ​ជាដើម។ លើស​ពី​នេះ ក៏​មាន​ការ​គំរាមកំហែង និង​ចាប់​អ្នក​កាសែត​អាស៊ីសេរី ពីរ​រូប គឺ​លោក អ៊ួន ឈិន និង​លោក យាង សុធារិន្ទ (យាង សុជាមេត្តា) ដោយ​ចោទ​ពី​បទ​ញុះញង់ និង​ការ​ផ្ដល់​ជូន​ឲ្យ​រដ្ឋ​បរទេស​នូវ​ព័ត៌មាន​ដែល​បង្ក​ភាព​អន្តរាយ​ដល់​សន្តិសុខ​ជាតិ​ជាដើម៖ «»។

លោក ណុប វី ស្នើ​ឲ្យ​រដ្ឋាភិបាល​បញ្ឈប់​ការ​ធ្វើ​ទុក្ខបុកម្នេញ​ទៅ​លើ​អ្នក​សារព័ត៌មាន ហើយ​ផ្ដល់​អាជ្ញាប័ណ្ណ​ដល់​ស្ថាប័ន​ព័ត៌មាន ដែល​បាន​បិទ​កន្លង​មក និង​ស្នើ​ឲ្យ​ដោះលែង​អ្នក​សារព័ត៌មាន​អាស៊ីសេរី ពីរ​រូប​នោះ​វិញ​ដើម្បី​ស្តារ​ស្ថានភាព​ឡើង​វិញ៖ «»។

​កាល​ពី​សប្ដាហ៍​មុន អង្គការ​អ្នក​រាយការណ៍​គ្មាន​ព្រំដែន (Reporters Without Borders) ក៏​បាន​ចេញ​របាយការណ៍​ស៊ើប​អង្កេត​មួយ​កម្រាស់ ២៧​ទំព័រ ស្ដីពី​កម្ពុជា ដែល​មាន​ចំណងជើង​ថា “សារព័ត៌មាន​ឯករាជ្យ​កំពុង​ស្ថិត​នៅ​ក្នុង​ភាព​មហន្តរាយ”។ របាយការណ៍​នោះ ទទូច​ឱ្យ​អាជ្ញាធរ​កម្ពុជា ដោះលែង​អតីត​អ្នក​យក​ព័ត៌មាន​អាស៊ីសេរី ២​រូប គឺ​លោក អ៊ួន ឈិន និង​លោក យាង សុធារិន្ទ ឱ្យ​មាន​សេរីភាព​ឡើង​វិញ ព្រមទាំង​បញ្ឈប់​ការ​ធ្វើ​ទុក្ខបុកម្នេញ​លើ​ប្រព័ន្ធ​ផ្សព្វផ្សាយ​ឯករាជ្យ និង​សិទ្ធិ​បញ្ចេញ​មតិ​លើ​ប្រព័ន្ធ​អ៊ីនធឺណិត (Internet)។  អង្គការ​អ្នករាយការណ៍​គ្មាន​ព្រំដែន អះអាង​ថា រដ្ឋាភិបាល​កម្ពុជា ដែល​ដឹកនាំ​ដោយ​គណបក្ស​ប្រជាជន​កម្ពុជា របស់​លោក ហ៊ុន សែន បាន​ប្រើប្រាស់​មធ្យោបាយ​គ្រប់​បែប​យ៉ាង ដូចជា​ការ​ប្រើ​អំពើ​ហិង្សា ការ​បំភិតបំភ័យ និង​ការ​បិទ​ស្ថាប័ន​ព័ត៌មាន​ក្នុង​គោលដៅ​បំបិទ​សំឡេង​រិះគន់ ដើម្បី​ធានា​ថា ខ្លួន​នឹង​ឈ្នះ​ការ​បោះឆ្នោត​ជាតិ នៅ​ឆ្នាំ​២០១៨ ខាង​មុខ។

​អង្គការ​អន្តរជាតិ​មួយ​នេះ ក៏​អំពាវនាវ​ដល់​ដៃគូ​អភិវឌ្ឍន៍​របស់​កម្ពុជា​ដែរ រួម​មាន​អង្គការ​សហប្រជាជាតិ សហភាព​អឺរ៉ុប សហរដ្ឋអាមេរិក ប្រទេស​ជប៉ុន និង​សមាគម​អាស៊ាន ជាដើម ឱ្យ​ដាក់​ចេញ​នូវ​វិធានការ​គ្រប់​បែប​យ៉ាង​លើ​រដ្ឋាភិបាល​ក្រុង​ភ្នំពេញ ដើម្បី​ធានា​ថា សេរីភាព​សារព័ត៌មាន​នឹង​ត្រូវ​បាន​អនុវត្ត​ដោយ​ពេញលេញ​នៅ​កម្ពុជា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល