អ្នកប្រើប្រាស់បណ្ដាញសង្គមហ្វេសប៊ុក (Facebook) មួយចំនួន រិះគន់អាជ្ញាធររដ្ឋាភិបាល ដែលបង្គាប់ឲ្យសង្គមស៊ីវិលលុបវីដេអូចម្រៀង«ឈាមបាតុករ» ចេញពីប្រព័ន្ធផ្សព្វផ្សាយរបស់ពួកគេ។
ក្រសួងវប្បធម៌អះអាងថា បទចម្រៀងនេះ មានចរិតញុះញង់ធ្វើឱ្យប៉ះពាល់ដល់សង្គម។
អ្នកប្រើប្រាស់បណ្ដាញសង្គម សួរថា បើឱ្យលុបបទចំរៀងហ្នឹងចេញ តើរឿងអយុត្តិធម៌នៅផ្លូវវេងស្រេងរយៈពេល៩ឆ្នាំកន្លងមកនោះ ពេលណាបានផ្តល់យុត្តិធម៌ដល់ជនរងគ្រោះ?
ម្ចាស់គណនីហ្វេសប៊ុក ឈ្មោះ ម៉ា ចិត្រា ( Ma Chettra) ដែលគេស្គាល់ថា ជាយុវជន សង្គម និងបរិស្ថាន បានបញ្ចេញទស្សនៈរបស់ខ្លួនជុំវិញរឿងនេះ នៅលើហ្វេសប៊ុករបស់លោកថា ការបង្ហោះបទចម្រៀង«ឈាមបាតុករ» ពុំមែនក្នុងគោលបំណងអាក្រក់ ដូចអ្វីដែលខាងក្រសួងវប្បធម៌ ចោទប្រកាន់នោះទេ។
លោកថា ការបង្ហោះបទចម្រៀងនោះ គឺក្នុងគោលបំណងបីយ៉ាង ក្នុងនោះរួមមានការគម្រប់ខួប ៩ឆ្នាំ នៃប្រើប្រាស់អំពើហិង្សានៅផ្លូវវេងស្រេង ស្នើសុំឲ្យមានការស៊ើបអង្កេតបន្តដើម្បីស្វែងរកយុត្តិធម៌ជូនជនរងគ្រោះ និងរួមគ្នាទប់ស្កាត់កុំឱ្យមានអំពើហិង្សាគ្រប់រូបភាព។
លោក ម៉ា ចិត្រា បញ្ជាក់ថា នេះជាការលើកឡើងរបស់ លោក អំ សំអាត ជាមន្ត្រីជាន់ខ្ពស់នៃអង្គការលីកាដូ ដែលបានប្រាប់ទៅខាងមន្ត្រីប៉ូលិសការិយាល័យសន្ដិសុខផ្ទៃក្នុងជាតិ នៃស្នងការដ្ឋាននគរបាលរាជធានីភ្នំពេញ កាលពីរសៀលថ្ងៃទី៩ ខែមករា។
ដោយឡែក ម្ចាស់គណនីហ្វេសប៊ុក ឈ្មោះ ភា រិន សរសេរបញ្ចេញទស្សនៈរបស់ខ្លួនថា នេះជារឿងពិតដែលបានកើតឡើងរួចហើយ ម្តេចក៏ទៅជាញុះញង់ទៅវិញ បើខ្លាចគេថា ខ្លួនអាក្រក់ សូមធ្វើល្អទៅ។
ចំណែក ម្ចាស់គណនីហ្វេសប៊ុក ឈ្មោះ ហេង សុខវេង (Heng Sok Veng) បញ្ចេញទស្សនៈ ឬ Comments ជុំវិញករណីនេះដែរថា បទចម្រៀងឈាមបាតុករនេះចាក់ចំដំបៅដែលឈឺមិនទាន់ជាសះស្បើយនៅឡើយ។
ចំណែក ម្ចាស់គណនីហ្វេសប៊ុក ឈ្មោះ លាង អូនចិត្រ (Leang Aun Chhit ) សំដែងការភ្ញាក់ផ្អើលចំពោះចំណាត់ការរបស់អាជ្ញាធរបែបនេះថា៖ អូ! ដល់ថ្នាក់ហ្នឹងផង ? អន់ម្ល៉េះ គ្រាន់តែចម្រៀងខ្លាចដល់ថ្នាក់ហ្នឹង...?
ចំណែក ម្ចាស់គណីនីហ្វេសប៊ុក ឈ្មោះ ខ្មែរ ម្ចាស់ប្រទេស បញ្ចេញទស្សនៈជុំវិញរឿងនេះ ដោយដាក់ជាសំណួរថា៖ តើហេតុអ្វីក៏អស់លោកខ្លាចស្រមោលខ្លួនឯងយ៉ាងដូច្នេះ! តើសកម្មភាពនិងរូបភាពទាំងនោះអ្នកណាជាអ្នកប្រព្រឹត្តិ? តើជាទង្វើរបស់ក្រុមណា ទើបបានជាលោកថាខូចសណ្ដាប់ធ្នាប់សង្គមទៅវិញ? តើអ្នកដែលប្រព្រឹត្តិនោះជាអ្នកបង្កអសន្តិសុខដែរឬទេ?
ដោយឡែកម្ចាស់គណនីហ្វេសប៊ុក ឈ្មោះ ប៉ែន ឡុងហៃ (Pen Longhai) បានសរសេរឆ្លើយតបនឹងករណីនេះដែរថា «អ៊ីចឹងវិញមើលឃើញលឿនណាស់ ចំពោះអ្នកមានអំណាចមួយចំនួនវិញ យកដី ធ្វើបាបប្រជាជន លុបបឹង សមុទ្រ កាប់ព្រៃឈើ នឹងអំពើពុករលួយជាច្រើនទៀត មើលមិនឃើញសោះ ...»?
ចំណែក ម្ចាស់គណនីហ្វេសប៊ុក ឈ្មោះ អាញ៉ា (Ah Nha ) បញ្ចេញទស្សនៈដោយដាក់ជាសំណួរថា ឱ្យគេលុបចំរៀងហ្នឹង ចុះរឿងអយុត្តិធម៌រយៈពេល៩ឆ្នាំកន្លងមកហ្នឹង ពេលណាបានផ្តល់ដល់ជនរងគ្រោះ..?
ជាមួយគ្នានេះ ម្ចាស់គណនីហ្វេសប៊ុក ឈ្មោះ ប្រុស សាមញ្ញ បានបន្ទរថា ជនផ្តាច់ការខ្លាចការពិត។
ចំណែក ម្ចាស់គណនីហ្វេសប៊ុក ឈ្មោះ សុភត្តិ កែវ បញ្ចេញទស្សនៈ យល់ឃើញដែរថា ប៉ះមិនបានទេ ពួកមនុស្សខ្លាចស្រមោលខ្លួនឯង។
ម្ចាស់គណនីហ្វេសប៊ុកមួយទៀត ឈ្មោះ វណ្ណ ធឿន (Vann Thoeurn) មានមតិយល់ឃើញដែរថា ស្អីក៏ចោទបាន ធ្វើអ្វីមិនពេញចិត្ត ដាក់ទោស បើច្រៀងលើកជើងវិញទើបល្អ។
លោក សុភត្តិ កែវ ដាក់ជាសំណួរថា អស់លោកថ្នាក់ដឹកនាំ ? បើខ្លួនធ្វើខុស រាស្ត្រច្រៀងរៀបរាប់ការពិត គឺបំពុលសង្គម បង្កអសន្តិសុខសង្គម បើច្រៀងលើកជើងលើកដៃវិញ ច្បាប់ថាល្អណាស់មិនខុស នេះឬប្រទេសប្រជាធិបតេយ្យ?
ដោយឡែក ម្ចាស់គណនីហ្វេសប៊ុកមួយទៀត ឈ្មោះ ពៅ ដារា (Pov Dana) ថា គ្រាន់តែគ្នាច្រៀងក៏ខុសដែរ នេះឬប្រទេសកាន់លទ្ធិប្រជាធិបតេយ្យ?
រីឯម្ចាស់គណនីហ្វេសប៊ុកមួយទៀត ឈ្មោះ ហេង ណាលីន (Heng Nalin) បន្ទរថា អ៊ីចឹងហើយ គោដំបៅខ្នង ក្អែកហើររំលង រំសាយកន្ទុយ..!
ចំណែកម្ចាស់គណនីហ្វេសប៊ុកផ្សេងទៀត បានផុសរូបគំនូរថ្លុក ហាក់ចង់បង្ហាញទិដ្ឋភាពពីររវាងអ្នកច្រៀងចម្រៀង ឈាមបាតុករ និងអ្នកវាយបំផ្លាញចេតិយបុរាណអាយុប្រមាណ ១រយឆ្នាំ(១២៣ឆ្នាំ)ក្នុងវត្តបទុមវតី រាជធានីភ្នំពេញកាលពីពេលថ្មីនេះ ថាអ្នកណាពិតប្រាកដ ជាអ្នកអុចអាល បំពុលសង្គម ដែលត្រូវចាប់ខ្លួននោះ?
ទស្សនៈចុងក្រោយ ដែលខ្ញុំបាទលើកយកមកបង្ហាញពេលនេះ គឺម្ចាស់គណនីហ្វេសប៊ុក ឈ្មោះ សាម៉េត ណយ (Samet Noy) បានបង្ហាញទស្សនៈរបស់ខ្លួនថា៖ សន្តិភាពក្នុងសង្គមខ្មែរក្នុងបច្ចុប្បន្ន ពលរដ្ឋខ្មែរគ្មានសិទ្ធនិយាយការពិត និងគ្មានសិទ្ធរិះគន់នូវទង្វើអាក្រក់ របស់ជនអាក្រក់ឡើយ។ ជាពិសេសទៅទៀត គឺជាសង្គមមួយដែលអមនុស្សធម៌ និងអយុត្តិធម៌ជាទីបំផុត ចំពោះ អ្នកហ៊ាននិយាយការពិតជាក់ស្ដែងក្នុងការរស់នៅក្នុងរបបសព្វថ្ងៃនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។