ក្រុមគ្រួសារសកម្មជនបក្សប្រឆាំងដែលកំពុងជាប់ឃុំ បានផ្អាកការតវ៉ា និងដាក់ញត្តិ នៅថ្ងៃសុក្រ ទី ១៨មិថុនានេះ ដោយសារតែចំថ្ងៃបុណ្យចម្រើនព្រះជន្មសម្តេចម៉ែ ដែលជាពិធីបុណ្យជាតិ។ ពួកគាត់គ្រោងបន្តសកម្មភាពទាមទាររកយុត្តិធម៌ជូនក្រុមគ្រួសារបន្តទៀតនៅថ្ងៃសុក្រ សប្តាហ៍ក្រោយ។
ប្រពន្ធមន្ត្រីបក្សប្រឆាំងដែលកំពុងជាប់ឃុំ លោក កាក់ កុម្ភារ គឺលោកស្រី ព្រុំ ចាន់ថា ឱ្យដឹងថា ពួកលោកស្រីមិនទាន់សម្រេចថា នឹងដាក់ញត្តិទៅស្ថានទូតមួយណាទៀតនៅឡើយទេ ដោយរង់ចាំជជែកគ្នាជាមុនសិន។ ប៉ុន្តែលោកស្រីបញ្ជាក់ថា ពួកលោកស្រីនឹងបន្តតវ៉ាដោយសន្តិវិធី និងដាក់ញត្តិទៅស្ថានទូតប្រទេសប្រជាធិបតេយ្យ ដើម្បីជួយរកយុត្តិធម៌ជូនក្រុមគ្រួសារបន្តទៀត ទោះជាកន្លងមកមានការតាមយាយីពីសំណាក់អាជ្ញាធរយ៉ាងណាក្តី៖ « យើងត្រូវ ស៊ូទៅមុខ ដើរទៅមុខទៀត។ បើពួកខ្ញុំមិនងើប គ្មានអ្នកណាមកជួយងើបខ្ញុំទេ អ៊ីចឹងខ្ញុំត្រូវតែងើបដើម្បីឱ្យប្រជាពលរដ្ឋដឹងថា របបមួយហ្នឹងគឺរបបផ្តាច់ការ ហើយជិះជាន់ ទៅលើ ប្រជាពលរដ្ឋ ហើយជាពិសេសគឺ អ្នកនយោបាយ សកម្មជននយោបាយសង្គ្រោះជាតិតែម្តង និយាយរួមទៅបក្សសង្គ្រោះជាតិតែម្ដង។ រំលាយគេហើយ ចាប់ប្ដីគេដាក់ពន្ធនាគារដោយឥតកំហុសទៀត » ។
ក្រុមស្ត្រីថ្ងៃសុក្របានចាប់ផ្តើមសកម្មភាពតវ៉ាដាក់ញត្តិជាថ្មីឡើងវិញ កាលពីចុងខែឧសភា ដើម្បីទាមទារឱ្យអាជ្ញាធរដោះលែងគ្រួសារពួកគាត់ដែលកំពុងជាប់ឃុំដោយអយុត្តិធម៌។ មកដល់ពេលនេះ ពួកគាត់បានដាក់ញត្តិជូនស្ថានទូត និងស្ថាប័នអន្តរជាតិបានចំនួន ៣កន្លែងហើយ រួមមាន ស្ថានទូតសហរដ្ឋអាមេរិក ការិយាល័យឧត្តមស្នងការសិទ្ធិមនុស្សអង្គការសហប្រជាជាតិ និតស្ថានប្រតិភូសហភាពអឺរ៉ុបប្រចាំកម្ពុជា។
ញត្តិដែលពួកគាត់ដាក់ជូនស្ថាប័នទាំងនោះមានខ្លឹមសារដូចគ្នា គឺពួកគាត់បង្ហាញពីក្តីបារម្ភអំពីសុខភាពប្តី ប្រពន្ធ ឪពុកម្ដាយ និងបងប្អូនញាតិមិត្ត ដែលកំពុងជាប់ឃុំក្នុងពន្ធនាគារ បន្ទាប់ពីជំងឺកូវីដ-១៩ បានឆ្លងចូលដល់ក្នុងពន្ធនាគារ ហើយពួកគាត់បានដាច់ការទាក់ទងគ្នាជាង ៣ខែមកហើយ។ ពួកគាត់អំពាវនាវដល់ស្ថានទូត និងស្ថាប័នអន្តរជាតិទាំងនោះ ជួយធ្វើយ៉ាងណាឱ្យសកម្មជននយោបាយ សកម្មជនសង្គម និងសកម្មជនបរិស្ថាន បាននៅក្រៅឃុំបណ្ដោះអាសន្ន ដោយពួកគាត់សន្យាថា នឹងគោរពតាមនីតិវិធីរបស់តុលាការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។