ក្រុមគ្រួសារបញ្ជាក់ថា ពលការិនី ជ្រុន សុខគា កំពុងស្ថិតក្នុងស្ថានភាពលំបាក នៅប្រទេសអារ៉ាប៊ី សាអ៊ូឌីត មិនមែនមានសុវត្ថិភាពដូចក្រសួងការងារអះអាងនោះឡើយ
2024.08.07
លោកស្រី ជ្រុន សុខគា ពលការិនីម្នាក់កំពុងបម្រើការងារនៅប្រទេសអារ៉ាប៊ី សាអ៊ូឌីត (Saudi Arabia) ដែលគ្រួសារអះអាងថា បានដាច់ការទាក់ទងគ្នាជិត ២ខែ។
រូប៖ ពីពលរដ្ឋ
ក្រុមគ្រួសារពលការិនីម្នាក់កំពុងបម្រើការងារនៅប្រទេសអារ៉ាប៊ី សាអ៊ូឌីត (Saudi Arabia) គឺលោកស្រី ជ្រុន សុខគា ឱ្យដឹងថា លោកស្រីកំពុងស្ថិតក្នុងស្ថានភាពលំបាក រងការរឹតត្បិតពីសំណាក់ថៅកែ និងមិនអាចទាក់ទងសាច់ញាតិបងប្អូនជាប្រចាំដូចក្រុមហ៊ុន ហ្វាទីណា មែនផៅវ័រ (Fatina Manpower) និងក្រសួងការងារប្រកាសនោះទេ។
ប្តីពលការិនីលោកស្រី ជ្រុន សុខគា គឺលោក នេត សុផល ប្រាប់វិទ្យុអាស៊ីសេរីនៅថ្ងៃទី៧ ខែសីហា ថា លោក និងម្ដាយលោកស្រី ជ្រុន សុខគា ដែលមានវ័យចំណាស់ ពិបាកចិត្តព្រោះទន្ទឹងរង់ចាំផ្លូវលោកស្រី ជ្រុន សុខគា ពីមួយថ្ងៃទៅមួយថ្ងៃ។
លោក នេត សុផល បញ្ជាក់ទៀតថា កាលមួយរយៈមុន ទោះបីលោកស្រី ជ្រុន សុខគា អាចទាក់ទងមកក្រុមគ្រួសារបាន ប៉ុន្តែមិនអាចនិយាយតាមទូរស័ព្ទបានយូរនោះទេ ដោយសារតែថៅកែគំរាម និងដកហូតទូរស័ព្ទវិញ។ លោកឱ្យដឹងថា ប្រពន្ធរបស់លោកបានរៀបរាប់ពីទុក្ខលំបាកត្រូវថៅកែបង្ខំឱ្យធ្វើការងារ និងស្នើឱ្យជួយបញ្ជូនចេញពីផ្ទះថៅកែ ប៉ុន្តែមកទល់ពេលនេះ លោកថា មន្ត្រីស្ថានទូត និងមន្ត្រីក្រសួងការងារ មិនទាន់បានផ្ដល់ចម្លើយជាក់លាក់ក្នុងការជួយសង្គ្រោះលោកស្រី ជ្រុន សុខគា ចេញពីផ្ទះថៅកែនៅឡើយទេ។
លោក នេត សុផល៖ «តាមបាត់ដំណឹងគាត់បាត់យូរដែរហើយ ដូចនិយាយអ៊ីចឹង គឺទូរស័ព្ទត្រូវថៅកែដកអត់ឱ្យតេ (Call) មកផ្ទះ តាំងពីទៅម្ល៉េះទូរស័ព្ទ ១ខែ ឬ ១ខែជាងបានគាត់បានទាក់ទងមកអ៊ីចឹង។ ខ្ញុំបានសួរឱ្យក្មួយទៅសួរក្រសួងការងារ គាត់ថា បានដោះស្រាយឱ្យមកវិញហើយ។ ខ្ញុំចេះតែចាំមើលៗ រហូតអ៊ីចឹង។ ណាមួយគាត់ធ្វើការនៅទីនោះវាពិបាក។ និយាយរួមទៅ គាត់តេមកម្ដងៗ យំរហូត ហើយគាត់ប្រាប់ថា ការងារគាត់ពិបាកខ្លាំងណាស់។ ទូរស័ព្ទគេអត់មានឱ្យតេមកផ្ទះទេ សូម្បីតែរូបចង់ថតផ្ញើមក ក៏គេលុបបាត់ដែរ។ គេអត់ឱ្យបានទាក់ទងមកអ៊ីចឹង»។
ប្រតិកម្មរបស់ក្រុមគ្រួសារពលករដែលកំពុងជាប់ក្នុងប្រទេសអារ៉ាប៊ី សាអ៊ូឌីត បែបនេះ កើតឡើងបន្ទាប់ពីក្រុមហ៊ុន ហ្វាទីណា មែនផៅវ័រ និងមន្ត្រីក្រសួងការងារអះអាងថា ពលការិនី ជ្រុន សុខគា តែងតែទាក់ទងសាច់ញាតិក្រុមគ្រួសារជាប្រចាំ និងពុំមានការបាត់ដំណឹងនោះទេ។
ក្រុមហ៊ុន ហ្វាទីណា មែនផៅវ័រ កាលពីថ្ងៃទី៦ ខែសីហា ប្រកាសតាមរយៈទំព័រហ្វេកប៊ុក (Facebook) របស់ខ្លួនថា ពលការិនី ជ្រុន សុខគា បានទៅបម្រើការងារនៅប្រទេសអារ៉ាប៊ី សាអ៊ូឌីត កាលពីថ្ងៃទី៨ ខែមករា ប៉ុន្តែបន្ទាប់មកក៏បានស្នើវិលត្រឡប់មកកម្ពុជា។ ក្រុមហ៊ុនដែលនាំពលករទៅធ្វើការនៅប្រទេសអារ៉ាប៊ីសាអ៊ូឌីតនេះ ក៏បានបញ្ជាក់ទៀតថា បច្ចុប្បន្ន ក្នុងពេលរង់ចាំនីតិវិធីត្រឡប់មកកម្ពុជា លោកស្រី ជ្រុន សុខគា កំពុងស្នាក់នៅតំបន់អាប់ហា (Ahba) ក្រោមការទទួលខុសត្រូវដោយក្រុមហ៊ុន ប៊ីអេប៊ី (BAB) និងតែងតែទាក់ទងក្រុមគ្រួសារ និងភាគីដែលជាអ្នកសម្របសម្រួលជាប្រចាំផងដែរ។
ចំណែកឯ អ្នកនាំពាក្យក្រសួងការងារ លោក កត្តា អ៊ន អះអាងដែរថា ពលការិនី ជ្រុន សុខគា កំពុងធ្វើការនៅខេត្តអាប់ហា ហើយកាលពីសប្ដាហ៍មុន ពលការិនីរូបនេះក៏បានទាក់ទងមន្ត្រីពាក់ព័ន្ធសួរនាំពីការវិលត្រឡប់មកកម្ពុជាវិញដែរ។
ផ្ទុយពីការអះអាងនេះ ប្តីពលការិនីលោកស្រី ជ្រុន សុខគា គឺលោក នេត សុផល បញ្ជាក់ថា មកទល់ពេលនេះ អស់រយៈពេលជិត ២ខែមកហើយ ដែលក្រុមគ្រួសារនៅមិនទាន់អាចទាក់ទងសួរសុខទុក្ខលោកស្រី ជ្រុន សុខគា បាននៅឡើយ។
លោក នេត សុផល៖ «ជិត ២ខែហើយ អត់បានទាក់ទងគាត់ទេ។ ចេះតែនៅដល់សព្វថ្ងៃហ្នឹងទៅ ហើយណាមួយគាត់មានបញ្ហាជាមួយថៅកែផង គាត់ជជែកគ្នា ឈ្លោះគ្នាជាមួយថៅកែ កាលហ្នឹងខាងក្រសួងការងារ គាត់ប្តូរមកនៅក្រុមហ៊ុនហើយ យកចេញពីផ្ទះថៅកែហ្នឹងហើយ យកអ្នកទៅប្ដូរ តែអ្នកទៅប្ដូរឱ្យគាត់មកហ្នឹងថៅកែផ្ទះហ្នឹងមិនព្រម ឱ្យអ្នកមកប្ដូរទៅវិញ ថៅកែគាត់ទុក។ ខ្ញុំចេះតែព្រួយគាត់ និងស្នើទៅក្រសួង ឬលោកពូស្ថានទូតជួយដោះស្រាយជួយឱ្យគាត់បានវិលមកផ្ទះ។ ឥឡូវ ក៏ទាក់ទងគាត់អត់បានដដែលហ្នឹង ខ្ញុំក៏មិនដឹងធ្វើម៉េច ហើយខាងក្រុមហ៊ុន ខាងក្រសួងការងារគាត់ថា ដោះស្រាយឱ្យហើយតែឱ្យចាំតិចៗ អ៊ីចឹងទៅចេះតែបន្លាយមករហូតដល់សព្វថ្ងៃហ្នឹង»។
វិទ្យុអាស៊ីសេរីនៅមិនទាន់អាចទាក់ទងអ្នកនាំពាក្យក្រសួងការងារ លោក កត្តា អ៊ន និងអគ្គនាយកក្រុមហ៊ុន ហ្វាទីណា ម៉ាន តើរ៉មីហ្សី (Man Teramizy) ដើម្បីបញ្ជាក់បន្ថែមជុំវិញរឿងនេះបាននោះទេនៅថ្ងៃទី៧ ខែសីហា។
ទោះជាយ៉ាងណា ក្នុងពេលកន្លងទៅ ឯកអគ្គរាជទូតកម្ពុជាប្រចាំប្រទេសអេហ្ស៉ីប (Arab Republic of Egypt) និងប្រទេសអារ៉ាប៊ី សាអ៊ូឌីត លោក អ៊ុក សារុន បានស្នើដល់ក្រសួងការងារ ឱ្យរឹតបន្តឹង និងចាត់វិធានតាមផ្លូវច្បាប់លើពលករណាដែលបន្តហ៊ាននិយាយជុំវិញរឿងរ៉ាវពលករខ្មែរដែលជួបការលំបាកក្នុងប្រទេសអារ៉ាប៊ីសាអ៊ូឌីត។
ជុំវិញរឿងនេះ នាយកទទួលបន្ទុកកិច្ចទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា សុវត្ថិភាពពលករនៅក្រៅប្រទេសគឺជារឿងសំខាន់ ហើយនៅពេលពលករជួបបញ្ហាដែលអាចប៉ះពាល់ដល់សុវត្ថិភាព មន្ត្រីស្ថានទូតត្រូវមានកាតព្វកិច្ច និងការទទួលខុសត្រូវក្នុងការជួយសង្គ្រោះពលករ។
លោក អំ សំអាត៖ «នេះគឺជារឿងសំខាន់ និងជាការទទួលខុសត្រូវ ពីព្រោះយើងដឹងហើយថា ពលករខ្មែរដែលធ្វើការនៅក្រៅប្រទេស មិនថាប្រទេស អារ៉ាប៊ី សាអ៊ូឌីត ឬប្រទេសណាផ្សេងទៀតទេ គឺពឹងផ្អែកលើស្ថានទូត ឬស្ថានកុងស៊ុល ដើម្បីជួយដល់ពួកគាត់ដល់ឱ្យទាន់ពេលវេលាក្នុងការការពារសុវត្ថិភាពពួកគាត់។ អ៊ីចឹងប្រសិនមានព័ត៌មានពលករណាដែលគាត់រងគ្រោះ ឬជួបបញ្ហាទាក់ទងដល់សុវត្ថិភាព អាហ្នឹងត្រូវតែខ្នះខ្នែង និងស្វះស្វែង ដើម្បីមកជួយដល់ពួកគាត់ យើងមិនអាចអូសបន្លាយ ឬព្រងើយកន្តើយទាក់ទងសន្តិសុខ សុវត្ថិភាពរបស់ពលករបានទេ»។
ម្ចាស់ក្រុមហ៊ុន ហ្វាទីណា មែនផៅវ័រ គឺជាមន្ត្រីជាន់ខ្ពស់ក្នុងក្រសួងការងារ និងបាននាំពលករភាគច្រើនជាស្ត្រីចំនួនប្រមាណ ១៣៣នាក់ ទៅបម្រើការងារនៅប្រទេសអារ៉ាប៊ី សាអ៊ូឌីត កាលពីដើមឆ្នាំ២០២៤។ ប៉ុន្តែ ពេលក្រុមពលករទៅដល់ និងបានបម្រើការងារក្នុងប្រទេសនេះភាគច្រើនជួបការលំបាកដោយពួកគេអះអាងថា ត្រូវបានថៅកែកេងប្រវ័ញ្ចកម្លាំងពលកម្មបង្ខំឱ្យធ្វើការច្រើនម៉ោងពុំផ្ដល់អាហារឱ្យហូបចុកគ្រប់គ្រាន់ និងដកទូរស័ព្ទជាដើម ទើបពួកគាត់តវ៉ាវិលត្រឡប់មកកម្ពុជាវិញ។
ក្រសួងការងារ និងបណ្ដុះបណ្ដាលវិជ្ជាជីវៈ ឱ្យដឹងថា កាលពីថ្ងៃទី១ និងថ្ងៃទី៥ ខែសីហា មានពលករចំនួន ២៦នាក់បន្ថែមទៀត បានវិលត្រឡប់ដល់កម្ពុជាវិញ ក្រោមការជួយអន្តរាគមន៍របស់ក្រសួងការបរទេសកម្ពុជា មន្ត្រីស្ថានទូត និងភាគីពាក់ព័ន្ធ។ ក្រសួងការងារបញ្ជាក់ថា មកទល់ពេលនេះ មានពលករចំនួន ១០៤នាក់ហើយត្រូវបានសម្របសម្រួលជួយសង្គ្រោះបានវិលត្រឡប់មកកម្ពុជាវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សង្គមស៊ីវិលបារម្ភថា កសាងស្តូបមិត្តភាព-កម្ពុជាវៀតណាមជាង ២០ខេត្ត/ក្រុង ជានិមិត្តរូបបំបែកបំបាក់សាមគ្គីខ្មែរ
- ស្តូបមិត្តភាពកម្ពុជាវៀតណាមនៅខេត្តសៀមរាបរងការបំផ្លាញដោយគ្រាប់បែក ក្នុងពេលពលរដ្ឋបារម្ភបាត់បង់ដីទៅវៀតណាម ដោយសារគម្រោង CLV
- លោក ហ៊ុន សែន ស្នើតែងតាំងលោក គុយ សុផល ភ្លាមៗ «ខ្លាចព្រះមហាក្សត្រយកមនុស្សក្រៅពីបក្ខពួកខ្លួន»
- ពលរដ្ឋខ្មែរនៅកូរ៉េត្រៀមចេញធ្វើបាតុកម្មទ្រង់ទ្រាយធំប្រឆាំងគម្រោង CLV ជាលើកទី២
- ពលរដ្ឋខ្មែរនៅកូរ៉េខាងត្បូងប្រមាណ៣ពាន់ ធ្វើមហាបាតុកម្មប្រឆាំង CLV ម្តងទៀត
