សង្គម​ស៊ីវិល​ស្នើ​​ក្រសួង​ស្ថាប័ន​រដ្ឋ​ទទួល​មតិ និង​ដំណោះស្រាយ​ជូន​ពលរដ្ឋ​តាម​អ៊ីនធឺណិត

ដោយ ទីន ហ្សាការីយ៉ា
2023.11.05
សង្គម​ស៊ីវិល​ស្នើ​​ក្រសួង​ស្ថាប័ន​រដ្ឋ​ទទួល​មតិ និង​ដំណោះស្រាយ​ជូន​ពលរដ្ឋ​តាម​អ៊ីនធឺណិត រដ្ឋមន្ត្រី​ក្រសួង​មហាផ្ទៃ លោក ស សុខា ពេលទស្សនកិច្ច​នៅច្រកព្រំដែនអន្តរជាតិ​ប៉ោយប៉ែត កាលពីថ្ងៃទី១ វិច្ឆិកា ២០២៣។
រូប៖ ហ្វេសប៊ុកលោក ស សុខា

ក្រសួង​មហាផ្ទៃ​ដោះស្រាយ ឆ្លើយ​តប​មតិ​-​យោបល់ និង​សំណូមពរ​ពលរដ្ឋ​ជាង​២​រយ​សំណើ ក្នុង​រយៈពេល​៩​ខែ ឆ្នាំ​២០២៣។ មន្ត្រី​អង្គការ​សង្គម​ស៊ីវិល​ថា ការ​ទទួល​មតិ​-​យោបល់ និង​សំណូមពរ​តាម​ទំព័រ​ហ្វេសប៊ុក​នេះ គឺជា​រឿង​ល្អ​ប្រសើរ និង​ជំរុញ​ដល់​ក្រសួង​ស្ថាប័នរដ្ឋ​ផ្សេង​ទៀត យក​គំរូ​តាម​ក្រសួង​មហាផ្ទៃ។

ក្រសួង​មហាផ្ទៃ នៅ​ថ្ងៃទី​៣១ តុលា បង្ហាញ​ពី​របាយការណ៍ ៩​ខែ​ដំបូង ឆ្នាំ​២០២៣ របស់​ក្រុមការងារ​ហ្វេសប៊ុក របស់​រដ្ឋមន្ត្រី​ក្រសួង​មហាផ្ទៃ ដែល​បាន​ទទួល​មតិ​-​យោបល់ ឬ​សំណូមពរ​ពី​ពលរដ្ឋ​ជិត​៦​រយ​(៥៩៦)​បណ្ដឹង តាមរយៈ​ការខមិន​(Comment) និង ផ្ញើ​សារ​ទៅ​កាន់ ទំព័រ​ហ្វេសប៊ុក​របស់​រដ្ឋមន្ត្រីក្រសួង​មហាផ្ទៃ​លោក ស សុខា និង​អតីតរដ្ឋមន្ត្រី​ក្រសួង​មហាផ្ទៃ​លោក ស ខេង ។

ប្រភព​ដដែល​ឲ្យ​ដឹង​ថា ក្នុង​ចំណោម​បណ្ដឹង​ជិត ៦​រយ​នោះ ក្រសួង​មហាផ្ទៃ បាន​ដោះស្រាយ​ចំនួន​ជាង​២​រយ​(២០៤)​បណ្ដឹង​រួច​មក​ហើយ ។ ក្រសួង​មហាផ្ទៃ​មិន​បាន​បញ្ជាក់​ពី​បណ្ដឹង​របស់​ពលរដ្ឋ​ទាំងនោះ​ប្ដឹង ទៅលើ​រឿង​អ្វីខ្លះ​នោះ​ទេ ដោយ​គ្រាន់តែ​បញ្ជាក់​ពី​អង្គភាព​ទទួល​ដោះស្រាយ​ប៉ុណ្ណោះ​។ ក្នុង​នោះ អគ្គស្នងការដ្ឋាន​នគរបាល​ជាតិ​ទទួល​បាន​បណ្ដឹង​ជាង​២​រយ​(២២៩) អគ្គនាយកដ្ឋាន​រដ្ឋបាល​ទទួល​បាន​បណ្ដឹង​ជាង​១​រយ​(១៤១) និង​អធិការដ្ឋាន​ទទួល​បាន​៤៣ បណ្ដឹង និង​អគ្គនាយកដ្ឋាន​ផ្សេងៗ​មួយ​ចំនួន​ទៀត។

វិទ្យុ​អាស៊ីសេរី នៅ​ពុំ​ទាន់​អាច​ទាក់ទង​អ្នកនាំពាក្យ​ក្រសួង​មហាផ្ទៃ​លោក ខៀវ សុភ័គ ដើម្បី​សុំ​ការ​បកស្រាយ​បន្ថែម អំពី​បណ្ដឹង​របស់​ពលរដ្ឋ​នេះ​បាន​នៅឡើយ​ទេ នៅ​ថ្ងៃទី​៣១ តុលា។

នៅ​ក្រោម​ការ​បង្ហោះ​នៅ​លើ​ទំព័រ​ហ្វេសប៊ុក (Facebook) ផ្លូវការ​របស់​រដ្ឋមន្ត្រី​ក្រសួង​មហាផ្ទៃ​លោក ស សុខា អតីតរដ្ឋមន្ត្រី​ក្រសួង​មហាផ្ទៃ​លោក ស ខេង និង​ក្រសួង​មហាផ្ទៃ ពលរដ្ឋ​ភាគច្រើន​បាន​ខមិន (Comment) ឬ​ផ្ដល់​មតិ​-​យោបល់ ពាក់ព័ន្ធ​នឹង​បញ្ហា​ដីធ្លី និង​អសន្តិសុខ​សង្គម​ជាដើម។

ទាក់ទង​នឹង​បញ្ហា​នេះ នាយក​ផ្នែក​តស៊ូ​មតិ​នៃ​មជ្ឈមណ្ឌល​សិទ្ធិមនុស្ស​កម្ពុជា​លោក សួន យុធ្យា មាន​ប្រសាសន៍​ថា ជា​រឿង​ល្អ​ប្រសើរ ដែល​ក្រសួងមហាផ្ទៃ​ទទួល​មតិ​-​យោបល់​ពី​ពលរដ្ឋ តាម​បណ្ដាញ​សង្គម​ហ្វេសប៊ុក ហើយ​លោក​ស្នើ​ដល់​ក្រសួង​ដទៃទៀត យក​គំរូ​តាម​ក្រសួង​មហាផ្ទៃ ដើម្បី​ពន្លឿន​ការ​ដោះស្រាយ​បញ្ហា​របស់​ពលរដ្ឋ​ឲ្យ​បាន​ឆាប់។ ប៉ុន្តែ​លោក​បន្ថែម​ថា ការ​ធ្វើ​បែបនេះ មិន​ធានា​ការ​ដោះស្រាយ​បញ្ហា​ពលរដ្ឋ​បានជា​និរន្ត​នោះ​ទេ ក្នុង​នោះ មាន​បញ្ហា​ខ្លះ​អាច​ដោះស្រាយ​បាន និង​ខ្លះទៀត ដោះស្រាយ​មិនបាន ហើយ​លោក​ចង់​ឃើញ​តុលាការ​បង្កើន​ការ​ដោះស្រាយ​បណ្ដឹង​ពលរដ្ឋ​ប្រកបដោយ​តម្លាភាព។

លោក សួន យុធ្យា៖ «ប្រសិនជា​ក្រសួង​មាន​ហ្វេសប៊ុក ឬក៏​ក្រុមការងារ ដែល​ទទួល​ពាក្យបណ្ដឹង​ហ្នឹង ហើយ​ចូល​ទៅ​ដោះស្រាយ​ឲ្យ​បាន​លឿន គឺ​ល្អ​មែនទែន​។ ហើយ​ក្រសួង​ដទៃ​ទៀត​អាច​យក​គំរូ​តាម ក៏ប៉ុន្តែ​អាហ្នឹង​វា​មិនមែន​ជា​ដំណោះស្រាយ​មួយ​ល្អ​ទេ ពីព្រោះ​បើ​យើង​មើល​នៅក្នុង​រដ្ឋធម្មនុញ្ញ​យើង គឺ​ស្ថាប័ន​តុលាការ​ជា​អ្នក​ដោះស្រាយ​នូវ​បញ្ហា​ទាំងនោះ​ដោយ​ជូន​យុត្តិធម៌​សមស្រប​ទៅតាម​ច្បាប់ មិនមែន​អនុវត្តន៍​ទៅតាម​អ្វី​ផ្សេង​ទេ គឺ​ទៅតាម​ច្បាប់»

ក្រសួង​មហាផ្ទៃ អះអាង​ទៀត​ថា កាល​ពី​ឆ្នាំ​២០២០-២០២២ ក្រសួង​បាន​ទទួល​មតិ​-​យោបល់​តាម​ហ្វេសប៊ុក ចំនួន​៣៥៤ បណ្ដឹង ហើយ​បាន​ដោះស្រាយ​២៣១ បណ្ដឹង។

បើ​ទោះ​ជា​ក្រសួងមហាផ្ទៃ​បាន​ប្រកាស​អំពី​ការ​ដោះស្រាយ​បញ្ហា​ជូន​ពលរដ្ឋ ដែល​ផ្ញើ​ទៅ​កាន់​ក្រសួង​តាមរយៈ​បណ្ដាញ​សង្គម​ក៏​ដោយ​ចុះ ក៏​រហូត​មក​ដល់​ពេល​នេះ ក្រសួង​មិន​ទាន់​បាន​ឆ្លើយតប​ចំពោះ​បណ្ដឹង​មួយ​របស់​អតីត​គរុសិស្ស នៃ​វិទ្យាស្ថាន​ជាតិ អប់រំ​កាយ និង​កីឡា លោក កែវ សុវណ្ណឫទ្ធិ ដែល​កាលពី​ថ្ងៃទី​១២ តុលា បាន​ដាក់​ពាក្យបណ្ដឹង​ទៅកាន់​ក្រសួងមហាផ្ទៃ ដែល​លោក បាន​រង​អំពើ​ហិង្សា​ពី​អាជ្ញាធរ​ខណ្ឌដូនពេញ ក្នុង​ពេល​លោក​កំពុង​ឈរ​ស្រែក​តវ៉ា​នៅមុខ​ក្រសួង​អប់រំ យុវជន និង​កីឡា ដើម្បី​ទាមទារ​ឱ្យ​ក្រសួង​ផ្ដល់​ក្របខណ្ឌ​គរុ​សិស្ស​ឱ្យ​លោក​វិញ។ ពេលនោះ​អាជ្ញាធរ​ខណ្ឌដូនពេញ​ក៏បាន​ទះ​លោក កែវ សុវណ្ណឫទ្ធិ ចំ​គុម្ពត្រចៀក​បណ្ដាល​ឱ្យ​លោក​ដួលសន្លប់​ទៅលើ​ដី​ផង​ដែរ។ ហើយ​ថ្មីៗ​នេះ​ករណី​អ្នកជំនាញ​កសិកម្ម លោក នី ណាក់ ត្រូវ​បាន​ជនបិទមុខ​មួយ​ក្រុម​ព្រួត​វាយ​នឹង​ដំបង​ដែក​ស្ទើរ​ស្លាប់ ជាដើម ដែល​អាជ្ញាធរ​ក្រសួង​មហាផ្ទៃ​មិនអាច​ចាប់​ជនល្មើស​ច្បាប់​ទាំងនោះ។

ករណី​ទាំងពីរ​នេះ​មិនមែន​ជា​រឿង​ថ្មី​នោះ​ទេ ដែល​ក្រសួង​មហាផ្ទៃ​បរាជ័យ​ក្នុង​ការ​បំពេញ​តួនាទី​របស់​ខ្លួន​នោះ ពោល​គឺ​នៅ​សំណុំរឿង​អំពើ​ហិង្សា​រាប់​សិប​ករណី​ទៀត ដែល​បាន​កើត​ឡើង​លើ​អ្នក​នយោបាយ និង​សកម្មជន​បក្ស​ប្រឆាំង ដែល​ស្ថាប័ន​ទទួលខុសត្រូវ​មួយ​នេះ​បរាជ័យ។ តាំងពី​ជំនាន់​លោក ស ខេង ជា​រដ្ឋមន្ត្រី​ក្រសួង​មហាផ្ទៃ មក​ទល់​ពេល​នេះ សកម្មជន​នយោបាយ​បក្ស​ប្រឆាំង និង​សកម្មជន​សង្គម ដែល​ជា​ជនរងគ្រោះ នៃ​អំពើ​វាយប្រហារ​ពី​ជន​មិន​ស្គាល់​មុខ​បាន​កើន​ឡើង​ដល់​ចំនួន​មាន ៥០​នាក់​ហើយ​។ ប៉ុន្តែ​ករណី​វាយប្រហារ​ទាំងអស់​នេះ ក្រសួង​មហាផ្ទៃ​មិនបាន​ចាប់ខ្លួន​ជន​ដៃដល់​យក​មក​ផ្ដន្ទាទោស​នោះ​ទេ សូម្បី​តែមួយ​ករណី ។ មន្ត្រី​សង្គម​ស៊ីវិល​ទទូច​ឱ្យ​ក្រសួងមហាផ្ទៃ​បំពេញ​តួនាទី និង​កាតព្វកិច្ច​របស់​ខ្លួន​ឱ្យ​បាន​ពេញលេញ ប្រកប​ដោយ​តម្លាភាព ដើម្បី​យុត្តិធម៌​សង្គម ដែល​ពលរដ្ឋ​ខ្មែរ​គ្រប់​និន្នាការ​នយោបាយ​អាច​រស់នៅ​ជាមួយគ្នា​បាន​ដោយ​គ្មាន​ការ​ភ័យខ្លាច៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។