អ្នកកាសែត​មួយ​ក្រុម​នៅ​ខេត្ត​ត្បូងឃ្មុំ​ទាមទារ​យុត្តិធម៌ ក្រោយ​រង​អំពើ​ហិង្សា

ដោយ សុជីវី
2020-10-02
Share
ឡានអ្នកកាសែត ឡាន​របស់​អ្នកកាសែត ដែល​រងការ​វាយ​ប្រហារ​ដោយ​ក្រុម​ជនមិន​ស្គាល់ នៅ​ខេត្ត​ត្បូង​ឃ្មុំ ​កាល​ពី​ថ្ងៃ​ទី២៨ ខែកញ្ញា ឆ្នាំ២០២០។
រូបលើ​ទំព័រព័ត៌មាន CamboJA

ក្រុម​អ្នកសារព័ត៌មាន ៤រូប នៅ​ខេត្ត​ត្បូងឃ្មុំ ដែល​រង​ការប៉ុនប៉ង​វាយ​សម្លាប់ ទាមទារ​ឱ្យ​អាជ្ញាធរ​មាន​សមត្ថកិច្ច​រក​យុត្តិធម៌ ក្នុង​ករណី​ដែល​ជនល្មើស​មួយ​ក្រុម បាន​ប្រើ​ហិង្សា​លើ​ពួកគេ កាលពីដើម​សប្ដាហ៍​នេះ។ ការ​ទាមទារ​នេះ ក្រោយពី​សមត្ថកិច្ច​នៅ​មិនទាន់​ចាប់ខ្លួន​ជន​ដៃដល់​មក​ផ្ដន្ទាទោស​តាម​ច្បាប់​នៅ​ឡើយ​ទេ។

អ្នកកាសែត ៤​នាក់ ដែល​សកម្ម​ក្នុង​ការ​តាមដាន​ពី​បទ​ល្មើស​ព្រៃឈើ អំពាវនាវ​ឱ្យ​សមត្ថកិច្ច​ខេត្ត​ត្បូងឃ្មុំ វែកមុខ​ជន​ដៃដល់ ៧​នាក់ ដែល​ព្រួត​គ្នា​វាយប្រហារ ពួកគេ​នៅ​យប់​កណ្តាល​អធ្រាត្រ​នៅ​ថ្ងៃ​ទី​២៨ ខែ​កញ្ញា ឋិត​ក្នុងស្រុក​មេមត់។ ក្រុម​អ្នកកាសែត​ទាំងនោះ​បារម្ភ​ថា បើ​ករណី​នេះ​សមត្ថកិច្ច​មិន​អាច​ចាប់ខ្លួន​ជន​ដៃដល់ មក​ផ្ដន្ទាទោស​បាន​ទេ ក្រុម​ជនល្មើស​នឹង​មិន​រាងចាល ហើយ​សេរីភាព​សារព័ត៌មាន​នឹង​កាន់តែ​ផុយ​ស្រួយ ប៉ះពាល់​សិទ្ធិ​ទទួល​បាន​ព័ត៌មាន​របស់​ពលរដ្ឋ។

កាលពី​យប់​អធ្រាត្រ ឈាន​ចូល ថ្ងៃ​ទី​២៨ កញ្ញា ជន​មិន​ស្គាល់​មុខ​មាន​គ្នា ​៧នាក់ ជិះ​រថយន្ត​សាំង​យ៉ុង ១​គ្រឿង កាន់ដំបង ពូថៅ និង​កាំបិត ប្រើ​ហិង្សា​លើ​ក្រុម​អ្នក​សែត ៤​នាក់ ដែល​កំពុង​ដេក​ក្នុង​រថយន្ត​កាម៉ារី​សេរី​ចាស់ ២​គ្រឿង តាម​ផ្លូវ​ជាតិ​លេខ ៧ចំណុច​ផ្លូវបំបែក​ច្រក​ទ្វារ​ព្រំដែន​បឹង​ជ្រោង ក្នុង​ស្រុក​មេមត់ ខេត្ត​ត្បូងឃ្មុំ​។ ព្រឹត្តិការណ៍​នេះ បណ្ដាល​ឱ្យ​អ្នកកាសែត ១ ក្នុងចំណោម ៤​នាក់ រង​របួស​ឆ្អឹងជំនីរ ។ រីឯ​រថយន្ត​ពីរ​គ្រឿង របស់​អ្នកកាសែត​ទាំងនោះ ត្រូវ​គេ​វាយ​បំបែក​កញ្ចក់​ជុំវិញ​។​

អ្នកកាសែត​អនឡាញ មកពី​ស្ថាប័ន​សារព័ត៌មាន ភ្នែកម្នាស់ (PNM) គឺលោក រេន សំណាង ប្រាប់​អាស៊ីសេរី​ថា លោក​ត្រូវ​គេ​វាយ​រង​របួស​ឆ្អឹងជំនីរ ហើយ​បច្ចុប្បន្ន​លោក​កំពុង​សម្រាក​ព្យាបាល​នៅផ្ទះ​។ លោក​​ថា ក្រោយពី​កើតហេតុ លោក​បាន​ដាក់​ពាក្យ​ប្ដឹង ទៅ​អធិការ​ស្រុក​មេមេត់ ដើម្បី​រក​យុត្តិធម៌​ករណី​នេះ ក៏ប៉ុន្តែ​រហូតដល់​រសៀល​ថ្ងៃ​ទី១ ខែ​តុលា​នេះ សមត្ថកិច្ច​មិនទាន់​ចាប់ខ្លួន​ជន​ដៃដល់​បាន​នៅឡើយ​ទេ​។ លោក​ចាត់​ទុក​ការវាយប្រហារ​នេះ គឺជា​ការ​គំរាមកំហែង ដល់​ភារកិច្ច​របស់​លោក ដែល​តែងតែ​ចុះ​ស៊ើបអង្កេត និង​រាយការណ៍​ពី​បទ​ល្មើស​ព្រៃឈើ​នៅ​ខេត្ត​ត្បូងឃ្មុំ និង​ខេត្ត​ក្រចេះ៖ «ខ្ញុំ​ត្រូវរបួស​ចំ​ឆ្អឹងជំនីរ​ខាងឆ្វេង ឆៀង​ខាងក្រោយ។ ខ្ញុំ​ទទូច​អង្វរ​សូម​ឱ្យ​សមត្ថកិច្ច​វែង​មុខ​ជនល្មើស ឱ្យ​ឆាប់រហ័ស ដើម្បី​បាន​ដាក់​ទោស​តាមច្បាប់»

អ្នកកាសែត​ក្នុងស្រុក​រូប​នេះ បន្ថែម​ថា ស្ថាប័ន​របស់​លោក ផ្សាយ​តាម​អនឡាញ ឬ​គេហទំព័រ សរសេរ​អំពី​បទល្មើស​ព្រៃឈើ កសិកម្ម និង​សេដ្ឋកិច្ច​ពលរដ្ឋ​ជាដើម ហើយ​បេសកកម្ម​ការងារ​របស់​លោក មិន​បាន​ជំរិត​ទារ​ប្រាក់ ពី​អ្នក​ដឹក​ឈើ និង​អ្នក​រកស៊ី​ឈើ​ខុសច្បាប់​នោះ​ទេ។

អ្នកកាសែត​ម្នាក់ទៀត ដែល​ត្រូវ​គេ​វាយ​កញ្ចក់​រថយន្ត គឺ​លោក មួក សារ៉ែន សង្ស័យ​ថា ក្រុម​ជន​ដៃដល់​គឺជា​អ្នក​ដឹកឈើ និង​រកស៊ី​ឈើ​ខុសច្បាប់ ធ្វើ​សកម្មភាព​ដឹក​ឈើ​តាម​រថយន្ត​ឆ្លងកាត់​ខេត្ត​នីមួយៗ​នៅ​ពេល​យប់​។ លោក​ថា ក្រុម​អ្នក​ដឹកឈើ មិន​ចូលចិត្ត​អ្នកកាសែត​នោះ​ទេ ព្រោះ​ប៉ះពាល់​ដល់​មុខរបរ​រកស៊ី​ខុសច្បាប់​របស់​ពួកគេ ខណៈ​ដែល​ពួក​លោក​តែងតែ​តាមដាន​ពី​បទ​ល្មើស​ព្រៃឈើ​។ លោក​បន្ថែម​ថា បើទោះ​បី​ជា​រង​ការវាយប្រហារ​បែបនេះ​ក្តី លោក​នៅតែ​បន្ត​ធ្វើ​ការងារ​ជា​អ្នក​សារព័ត៌មាន​ដដែល៖ «នៅតែ​ធ្វើ​បន្ត​ទៀត កុំ​ឱ្យ​បាក់​ទឹកចិត្ត ព្រោះ​ការ​គំរាមកំហែង​យើង​ប៉ុណ្ណឹង ក៏​យើង​មិន​នៅ មិន​ខ្លាច​ពួក​បទល្មើស​ហ្នឹង​ដែរ​។ បើ​យើង​ខ្លាច​បាន​ន័យថា ថ្ងៃក្រោយ​យើង​អត់​បាន​ដើរ​យក​ព័ត៌មាន​បាន​ទៀត យើង​នៅតែ​ខ្លាច​អ៊ីចឹង»

ឆ្លើយតប​រឿង​នេះ អធិការ​នគរបាល​ស្រុក​មេមត់ លោក ហុង គឹមហឿន និយាយ​​ថា ពិតជា​មាន​ករណី​ហិង្សា​នេះ​មែន ហើយ​លោក​បាន​ទទួល​ពាក្យ​បណ្ដឹង​ពី​ជនរងគ្រោះ​ម្នាក់ ក្នុង​ចំណោម ៤​នាក់​នោះ​។ លោក​ថា សមត្ថកិច្ច​កំពុង​ស៊ើបអង្កេត​សំណុំ​រឿង​នេះ ហើយ​មិន​ទាន់​ចាប់ខ្លួន​ជនសង្ស័យ​បាន​នៅ​ឡើយ​ទេ៖ «ចាំ​មើល​ខ្ញុំ​បញ្ជូន​រឿង​ទៅ​ថ្នាក់លើ​បន្តបន្ទាប់​ទៀត​បង។ ខ្ញុំ​មិនទាន់​រាយការណ៍​ជូន​បង​បាន​ទេ ខ្ញុំ​នៅតែ​បន្ត​ការងារ​នីតិវិធី​របស់​នគរបាល»

ទាក់ទង​ករណី​នេះ សម្ព័ន្ធ​អ្នកសារព័ត៌មាន​កម្ពុជា ហៅ​កាត់​ថា ខេមបូចា (CamboJA)​ ថ្មីៗ​ នេះ បាន​ចេញ​សេចក្ដីថ្លែងការណ៍ ២​ទំព័រ ថ្កោលទោស​ចំពោះ​ជនល្មើស ដែល​វាយប្រហារ​មក​លើ​ក្រុម​អ្នកសារព័ត៌មាន ៤​រូប បំពាន​ច្បាប់។ ខេមបូចា ចាត់ទុក​ករណី​នេះ មិនមែន​ជា​លើក​ទី​១​ ទេ ដែល​អ្នក​សារព័ត៌មាន មាន​តួនាទី​សំខាន់ រាយការណ៍​ពី​បទ​ល្មើស​ព្រៃឈើ រង​ការ​គំរាមកំហែង និង​វាយដំ​។​

នាយក​ប្រតិបត្តិ​អ្នក​សម្ព័ន្ធ​សារព័ត៌មាន​កម្ពុជា ហៅ​កាត់​ថា ខេមបូចា លោក ណុប វី យល់ថា សមត្ថកិច្ច​ខេត្ត​ត្បូងឃ្មុំ​មិនទាន់​ផ្ដល់​យុត្តិធម៌​ជូន​ជនរងគ្រោះ គឺ​ជា​ទង្វើ​រារាំង​ដល់​ការ​បំពេញ​ភារកិច្ច​របស់​អ្នកសារព័ត៌មាន​ផ្សេងៗ ​ទៀត ដែល​តែងតែ​ឃ្លាំមើល និង​ស៊ើបអង្កេត​បទល្មើស​ព្រៃឈើ​។ លោក​ជំរុញ​ឱ្យ​សមត្ថកិច្ច​ត្រូវ​ពន្លឿន​ការ​ស៊ើបអង្កេត​សំណុំ​រឿង​នេះ ដើម្បី​ស្វែងរក​ជន​ដៃដល់​មក​ផ្ដន្ទាទោស​តាមច្បាប់៖ «ខេមបូចា ជំរុញ​ឱ្យ​សមត្ថកិច្ច​លោក​ផ្ដល់​នូវ​យុត្តិធម៌​ជូន​ជនរងគ្រោះ ហើយ​ធ្វើ​យ៉ាងណា​ធានា​នូវ​សន្តិសុខ សុវត្ថិភាព សម្រាប់​បងប្អូន​អ្នកសារព័ត៌មាន ដែល​កំពុងតែ​ធ្វើ​កិច្ច​ការងារ​នៅ​ក្នុង​ប្រទេស​​កម្ពុជា​យើង​។ ធ្វើ​យ៉ាងណា​ឱ្យ​គាត់​អាច​បំពេញ​ការងារ​របស់​ពួកគាត់​បាន ទាក់ទង​ការ​ឃ្លាំមើល​នូវ​បទឧក្រិដ្ឋ​ព្រៃឈើ»

របាយការណ៍​របស់​អង្គការ​លីកាដូ ចេញផ្សាយ​នៅ​ខែ​ឧសភា បង្ហាញ​ថា ស្ថានភាព​អ្នកសារព័ត៌មាន​នៅ​កម្ពុជា នៅតែ​ប្រឈម​នឹង​ការ​ចាប់ចង ការចោទប្រកាន់​តាម​ផ្លូវ​ច្បាប់ និង​ប្រព័ន្ធ​តុលាការ ​ដែល​រំលោភ​ធ្ងន់ធ្ងរ​ទៅលើ​សិទ្ធិ​ពលរដ្ឋ​ក្នុង​ការ​ទទួល​បាន​ព័ត៌មាន​។ អង្គការ​សិទ្ធិមនុស្ស​មួយ​នេះ រកឃើញ​ទៀត គិត​ចាប់​តាំង​ពី​ឆ្នាំ​១៩៩៣ មក អ្នកសារព័ត៌មាន​ចំនួន ១៣​នាក់​យ៉ាងតិច ត្រូវ​បាន​គេ​ធ្វើឃាត ក្នុង​នោះ​ករណី​ភាគច្រើន អាជ្ញាធរ​មិនបាន​ចាប់ខ្លួន​ជន​ដៃដល់​ណា​ម្នាក់​យក​មក​ផ្ដន្ទាទោស​នោះ​ឡើយ ដែល​នេះ គឺជា​ការ​បង្កើត​ឱ្យ​មាន​វប្បធម៌​និទ្ទណ្ឌភាព​ដ៏​រ៉ាំរ៉ៃ​នៅ​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។