យុវជន​ខ្មែរ​ថាវរៈ​បដិសេធ​ការ​ចោទ​ប្រកាន់​របស់​អាជ្ញាធរ ពី​បទរំលោភ​សេពសន្ថវៈ

ដោយ យន់ សាមៀន
2022.11.13
Share on WhatsApp
Share on WhatsApp
យុវជន​ខ្មែរ​ថាវរៈ​បដិសេធ​ការ​ចោទ​ប្រកាន់​របស់​អាជ្ញាធរ ពី​បទរំលោភ​សេពសន្ថវៈ (រាប់ពីឆ្វេង) លោក ហ៊ុន វណ្ណៈ និងលោក ស្វាយ សំណាង (ទី៤រាប់ពីឆ្វេង) ជាក្រុមយុវជនខ្មែរថាវរៈដែលកំពុងរងការចោទប្រកាន់ពីអាជ្ញាធរពីបទល្មើស​រំលោភ​សេពសន្ថវៈ។​ ​
រូប៖ ហ្វេសប៊ុក​ ខ្មែរថាវរៈ

សមាជិក​យុវជន​ខ្មែរថាវរៈ​ ​បដិសេធ​ការចោទប្រកាន់​របស់​អាជ្ញាធរ​ ​ពី​បទ​រំលោភ​សេពសន្ថវៈ​ ​ថា​ជា​រឿង​មិន​ពិត។​ ​ពួកគេ​ចាត់​ទុក​ការចោទប្រកាន់​នេះ​ថា​ ​ជា​ចេតនា​គំរាមកំហែង​ ដោយសារ​តែ​ពួកគេ​ធ្វើ​កូដកម្ម​បង្អត់​អាហារ​ដើម្បី​ស្នើ​ឱ្យ​រដ្ឋាភិបាល​ដោះលែង​កញ្ញា​ ​សេង​ ​ធារី។​ ​មន្ត្រី​អង្គការសង្គម​ស៊ីវិល​ ​ស្នើ​ឱ្យ​រដ្ឋាភិបាល​ ​គួរបើ​ក​លំហ​សិទ្ធិ​សេរីភាព​ការ​បញ្ចេញមតិ​ ​ដោយ​ស្ដាប់​ហេតុ​ផល ​និង​គោលបំណង​របស់​ពលរដ្ឋ។​

សមាជិក​យុវជន​ខ្មែរថាវរៈ​២នាក់​ ​គឺ​លោក ហ៊ុន វណ្ណៈ​ ​និង​លោក ស្វាយ សំណាង​ ​បដិសេធ​ការចោទប្រកាន់​របស់​អាជ្ញាធរ ​ថា​ ​ពួក​លោក​បាន​ប្រព្រឹត្ត​បទល្មើស​រំលោភ​សេពសន្ថវៈ។​ ​ពួកគេ​ថា​ ​ការចោទប្រកាន់​នេះ​ ​ជា​ការ​មួលបង្កាច់​ ​និង​ប្រឌិត​អង្គ​ហេតុ​ដើម្បី​ធ្វើទុក្ខបុកម្នេញ​លើ​យុវជនខ្មែរថាវរៈ​ ​ដែល​ធ្វើ​យុទ្ធនាការ​ទាម​ទា​ឱ្យ​ដោះលែង​ ​កញ្ញា សេង ធារី។​ ការ​បដិសេធ​នេះ​ធ្វើឡើង​បន្ទាប់ពី​អាជ្ញាធរ​ស្លៀកពាក់​ ​ស៊ីវិល​ជាង១០នាក់ ​កាលពី​ថ្ងៃទី១៣ ​វិច្ឆិកា​បាន​ចុះ​មក​កន្លែង​ស្នាក់​នៅ​របស់​លោក ស្វាយ សំណាង​ ​និង​លោក ហ៊ុន វណ្ណៈ​ ​ដោយ​បាន​ចោទប្រកាន់​អ្នក​ទាំង២​ថា​ ​បាន​ប្រព្រឹត្ត​បទល្មើស​រំលោភ​សេពសន្ថវៈ។​

សមាជិក​យុវជនខ្មែរថាវរៈ​ ​លោក ស្វាយ សំណាង​ ឱ្យ​ដឹង​ថា​ ​លោក​ហួសចិត្ត​ចំពោះ​បទ​ចោទ​ដ៏​ថ្មីស្រឡាង​នេះ​ ​ដែល​អាជ្ញាធរ​ចោទប្រកាន់​មក​លើ​រូបលោក​ ​ដោយ​គ្មាន​ភស្តុតាង​ ​និង​សាក្សី។​ ​លោក​ ​ស្វាយ សំណាង​ ​បញ្ជាក់​ថា​ ​ក្នុងនាម​ជា​យុវជន​ធ្វើការងារ​ដើម្បី​សង្គមជាតិ​ ​លោក​តែង​ប្រកាន់​ខ្ចប់​នូវ​ក្រម​សីលធម៌​ ​និង​គោរពច្បាប់​ជាតិ​ជានិច្ច៖

«យើង​ដឹង​ហើយ​ថា​ ​យើង​ធ្វើ​កិច្ចការ​ងារ​សង្គម​នេះ​ ​តែ​កាលណា​យើង​មាន​បញ្ហា​មួយ​ ​ពីរ​ ​បី​ ​នេះ​គឺ​ងាយ​នឹង​មាន​គេ​យកមក​ចោទប្រកាន់​ពួកយើង​ណាស់។​ ​អ៊ីចឹង​ហើយ​បានជា​សព្វថ្ងៃ​ពួកយើង​ព្យា​យា​ចៀសវាង​បញ្ហា​ជាច្រើន​ ​នៅ​ក្នុង​សង្គម​ ​ដូចជា​ ​បញ្ហា​ផឹកស៊ី​ ​ឡូឡា​ ​ពួកយើង​តែងតែ​ជៀសវាង​ឱ្យផុត​ពី​បញ្ហា​ទាំង​អស់ហ្នឹង​»

កាលពី​ថ្ងៃទី១៣ ខែ​វិច្ឆិកា​ ​អាជ្ញាធរ​បាន​ចុះ​មក​កន្លែង​ស្នាក់​នៅ​របស់​លោក ស្វាយ សំណាង​ ​នៅ​ឯ​សង្កាត់​ទួលសង្កែ​ ​ប៉ុន្តែ​មិនបាន​ជួប​លោក ស្វាយ សំណាង​ ឡើយ។​ ​អាជ្ញាធរ​បាន​សាកសួរ​អ្នក​ស្នាក់​នៅ​ជិតខាង​លោក​​​និង​បាន​បង្ហាញ​រូបថត​នារី​ជាច្រើន​សន្លឹក​ ​ដោយ​បញ្ជាក់​ថា​ ​លោក ស្វាយ សំណាង​ ​និង​លោក ហ៊ុន វណ្ណៈ​ ​បាន​ប្រព្រឹត្ត​បទល្មើស​រំលោភ​សេពសន្ថវៈ​ ​រួច​គេច​ខ្លួន​ទៅ​ភ្នំពេញ។​ 

សមាជិក​យុវជនខ្មែរថាវរៈ​ដែល​រង​ការចោទប្រកាន់​ម្នាក់ទៀត​ ​គឺ​លោក ហ៊ុន វណ្ណៈ​ ​ក៏​បដិសេធ​ថា​ ​លោក​មិនបាន​ប្រព្រឹត្ត​បទល្មើស​ដូច​ការចោទប្រកាន់​របស់​អាជ្ញាធរ​ទេ​។​ ​លោក​ថា​ ​មកដល់ពេលនេះ​ ​សូម្បីតែ​ឈ្មោះ​ដើមចោទ​ ​ទីកន្លែង​ ​និង​ពេលវេលា​ ​ដែល​អាជ្ញាធរ​ចោទប្រកាន់​នោះ​ ​ក៏​លោក​មិនទាន់​ដឹង​នៅឡើយ​។​ ​ទោះជាយ៉ាងណា​ ​លោក​ស្នើ​ឱ្យ​រដ្ឋាភិបាល​ ​គួរ​ស្ដាប់​ពី​បញ្ហា​ដែល​ពលរដ្ឋ​លើកឡើង​ ​ដើម្បី​ដោះស្រាយ​ដោយ​ផ្អែកលើ​ក​ផល​ប្រយោជន៍ជាតិ​ជាធំ​ ​ប្រសើរ​ជាង​ការ​យក​ប្រព័ន្ធ​ច្បាប់​មក​ធ្វើបាប​ខ្មែរ​ដូចគ្នា៖

«មានការ​ឃ្លាំមើល​ពីសំណាក់​ជនស៊ីវិល​ ​យើង​ដឹង​ថា​ជនស៊ីវិល​ហ្នឹង​ ​គឺជា​អាជ្ញាធរ​ហ្នឹងឯង។​ ​យើង​ក៏​បារម្ភ​ពី​សុវត្ថិភាព​ដែរ​ ​ហើយ​យើង​ក៏បាន​ត្រៀម​ខ្លួន​រួចហើយ​ដែរ​ ​បើ​សិន​មានរឿង​អី​ក៏​យើង​មិន​អាច​ទៅណា​បានទេ។​ ​គេ​សម្រេច​ចិត្ត​ថា​ ​ចាប់ចង​ហើយ​ ​គឺ​អត់មាន​មធ្យោបាយ​ណា​គេច​ខ្លួន​រួច​ទេ។​ ​ទោះ​ចង់​គេច​ក៏​គេច​មិនបាន​ដែរ»។​

ក្រុម​យុវជនខ្មែរថាវរៈ​បាន​ធ្វើ​កូដកម្ម​បង្អត់​អាហារ​រយៈពេល​១ស​ប្តាហ៍ ​ដើម្បី​ទាមទារ​យុត្តិធម៌​ជូន​អ្នកទោស​មនសិការ​ ​និង​ដោះលែង​កញ្ញា សេង ធារី។​ ​ប៉ុន្តែ​កូដកម្ម​អហិង្សា​នេះ​ ​មិនបាន​ប្រព្រឹត្តទៅ​ដោយ​រលូន​ឡើង​ ​ព្រោះ​មាន​អាជ្ញាធរ​មក​តាម​រំខាន​ ​បំភិតបំភ័យ​ជា​ហូរហែ​ក្នុង​គោលបំណង​បញ្ឈប់​សកម្មភាព​របស់​យុវជន​តាំងពី​នៅ​ក្នុង​ព្រៃ​ខេត្ត​ព្រះវិហារ​ ​រហូតដល់​ទីលាន​ប្រជាធិបតេយ្យ។​ ​កូដកម្ម​បង្អត់​អាហារ​នេះ​ ​បណ្តាលឱ្យ​យុវជនខ្មែរថាវរៈ​ចំនួន៤នាក់​ធ្លាក់ខ្លួន​ឈឺ​ ​និង​ដួល​សន្លប់ ​និង​ដឹក​ទៅ​សង្គ្រោះ​បន្ទាន់​នៅ​មន្ទីរពេទ្យ​ ​ក្នុង​នោះ​លោក ស្វាយ សំណាង​ ផង​ដែរ។​ ​បច្ចុប្បន្ន​ ​យុវជន​ខ្មែរថាវរៈ​ម្នាក់​បន្ត​ធ្វើ​កូដកម្ម​អត់អាហារ​ ​នៅ​ទីលាន​ប្រជាធិបតេយ្យ​នៅឡើយ។​

វិទ្យុ​អាស៊ី​សេរី​មិន​អាច​ទាក់ទង​អធិការ​នគរបាល​ខណ្ឌឫស្សីកែវ ​លោក ហ៊ាង ថារ៉េត ​និង​អ្នកនាំពាក្យ​អគ្គស្នងការដ្ឋាននគរបាលជាតិ​ ​លោក ឆាយ គឹមខឿន​ ​ដើម្បី​សុំ​ការ​បកស្រាយ​ ​ជុំវិញ​បណ្ដឹង​ដើមចោទ​បានទេ​ ​នៅ​ថ្ងៃទី១៣ ​ខែវិច្ឆិកា។​ 

លោក ស្វាយ សំណាង​ ​និង​លោក ហ៊ុន វណ្ណៈ​អះអាង​ថា​ ​ពួកគេ​នឹង​មិនទៅ​ឆ្លើយ​បំភ្លឺ​នៅមុខ​សមត្ថកិច្ច​នោះ​ទេ​ ​ដោយសារតែ​ ​ការចោទប្រកាន់​នេះ​ ​ជា​ការ​ប្រឌិត​ឡើង។​

ជុំវិញ​រឿង​ដែរ​នេះ​ ​អ្នកនាំពាក្យ​សមាគម​ការពារ​សិទ្ធិមនុស្ស​អាដហុក​ ​លោក សឹង សែនករុណា ​មានប្រសាសន៍ថា​ ​រដ្ឋាភិបាល​ ​គួរ​បើក​លំហ​សិទ្ធិ​សេរីភាព​ការ​បញ្ចេញមតិ​ ​និង​ស្ដាប់​ពី​ក្ដី​កង្វល់​របស់​ប្រជាពលរដ្ឋ​ ​ដើម្បី​ដោះស្រាយបញ្ហា​ក្នុង​សង្គម​ឱ្យ​បាន​ល្អ​ប្រសើរ។ ​ទន្ទឹមគ្នា​នេះ​ ​អាជ្ញាធរ​ដែល​ជា​ស្ថាប័ន​អនុវត្ត​ច្បាប់​គួរ​ពិនិត្យ​សកម្មភាព​ការចោទប្រកាន់​នេះ​ឡើងវិញ​ ​ចៀសវាង​ការ​អនុវត្ត​ច្បាប់​ឃ្លាត​ឆ្ងាយ​ពី​យុត្តិធម៌​ ​ដែល​បង្ក​ការឈឺចាប់​ដល់​ពលរដ្ឋ​ ​និង​ធ្វើ​ឱ្យ​ខូចឈ្មោះ​ស្ថាប័ន​អនុវត្ត​ច្បាប់៖

«អ៊ីចឹង​ការចោទប្រកាន់​ណា​ ​ដែល​អាច​ធ្វើទៅ​បាន​លុះត្រាតែ​ ​ឆ្លងកាត់​ការ​បើកសវនាការ​ ​និង​នីតិវិធី​ផ្លូវច្បាប់​ឱ្យ​បាន​ត្រឹមត្រូវ​នៅ​ក្នុង​តុលាការ។​ ​ហើយ​តុលាការ​ចេញ​សាលក្រម​ស្ថាពរ​ប្រកាស​ថា​ ​ជន​នោះ​បាន​ប្រព្រឹត្ត​នូវ​អំពើ​ល្មើស​ណាមួយ​ ​ដែល​ត្រូវ​ផ្ដន្ទាទោស​តាមច្បាប់​ ​ទើប​ហៅថា​ ​ជា​យុត្តិធម៌​មួយ​ដែល​អនុវត្ត​ដោយ​ច្បាប់។​ ​មិនមែន​គ្រាន់តែ​សមត្ថកិច្ច​ប៉ុន្មាន​​​រូប​ ​ហើយ​យក​រូបថត​ទៅ​ចោទប្រកាន់​ ​លើកឡើង​ទាំងអស់​ន​វ​ ​វា​អត់​ទាន់​អាច​ធ្វើ​ទៅ​បានទេ»។​

ជុំវិញ​ ​កូដកម្ម​អត់អាហារ​នេះ​ដែរ​ ​ប្រធានាធិបតី​អាមេរិក​លោក (Joseph R. Biden) ​បាន​ស្នើ​ឲ្យ​លោកនាយករដ្ឋមន្រ្តី ហ៊ុន សែន​ ​បើក​ឡើងវិញ​នូវ​លំហ​រ​សេរីភាព​ពលរដ្ឋ​ ​និង​នយោបាយ​នៅមុន​ការបោះឆ្នោត​ឆ្នាំ២០២៣​ខាងមុខ។​ ​លោក​ក៏បាន​អំពាវនាវ​ឲ្យ​មានការ​ដោះលែង​សកម្មជន​ដែល​ត្រូវ​បាន​តុលាការ​ឃុំ​ខ្លួន​ពី​បទចោទប្រកាន់​នយោបាយ​រួម​ទាំង​ពលរដ្ឋ​ខ្មែរ​អាមេរិក​ ​កញ្ញា សេង ធារី​ ​ផង​ដែរ។​ ​មកទល់​ពេលនេះ​ ​កម្ពុជា​មិនទាន់​ឆ្លើយតបនឹង​សំណើ​របស់​ ​ប្រធានាធិបតី​អាមេរិក​នៅឡើយ​ទេ៕​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
លោក គា សុគន្ធ អ្នក​និពន្ធ​គំរូ​ក្នុង​ការ​ឆ្លុះ​បញ្ចាំង​ការ​ពិត និង​បណ្ដុះ​ស្មារតី​ស្នេហា​ជាតិ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។