សហព័ន្ធខ្មែរកម្ពុជាក្រោមបដិសេធការលើកឡើងរបស់វៀតណាមនៅអ.ស.បករណីឃាត់ខ្លួនយុវជនខ្មែរក្រោម
2021.10.14
លោក យឿង ខាយ យុវជនខ្មែរក្រោម។
តំណាងប្រទេសវៀតណាមបានប្រាប់ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សថា អាជ្ញាធរវៀតណាមបានឃាត់ខ្លួនយុវជនខ្មែរក្រោមម្នាក់ដោយសារតែយុវជននោះ បានញុះញង់ និងបំបែកបំបាក់សាមគ្គីភាពវៀតណាម។ ប៉ុន្តែ សហព័ន្ធខ្មែរកម្ពុជាក្រោមថា វៀតណាមឃាត់ខ្លួនយុវជនខ្មែរក្រោម ដោយសារតែយុវជននោះ បានប្រើប្រាស់សិទ្ធិសេរីភាពបោះពុម្ព និងផ្សព្វផ្សាយសៀវភៅស្ដីពីសិទ្ធិជនជាតិដើម។
សហព័ន្ធខ្មែរកម្ពុជាក្រោមដែលមានមូលដ្ឋាននៅសហរដ្ឋអាមេរិក បានច្រានចោលសេចក្តីថ្លែងការណ៍របស់ស្ថានបេសកកម្មអចិន្ត្រៃយ៍វៀតណាមនៅទីក្រុងហ្សឺណែវ (Geneva) ស្ដីពីការ ឃាត់ខ្លួនយុវជនខ្មែរក្រោម លោក យឿង ខាយ កាលពីខែមេសា។
ស្ថានបេសកកម្មអចិន្ត្រៃយ៍វៀតណាមកាលពីថ្ងៃទី២០ កញ្ញាអះអាងថា អាជ្ញាធរខេត្តដុងណៃ បានឃាត់ខ្លួនលោក យឿង ខាយ ដោយសារតែលោក បានប្រើប្រាស់អ៊ីនធឺណិតផ្សព្វផ្សាយព័ត៌មានមិនពិតពីប្រវត្តិសាស្ត្រ ជនជាតិដើមខ្មែរក្រោម ហើយមានទំនាក់ទំនងនឹងអង្គការក្រៅរដ្ឋាភិបាលនៅបរទេសចង់បង្កើតតំបន់ស្វយ័ត ដែលជាការគំរាមកំហែងដល់សន្តិសុខវៀតណាម។
ទោះបីជាយ៉ាងណាប្រធាននាយកដ្ឋានព័ត៌មាន សហព័ន្ធខ្មែរកម្ពុជាក្រោម ព្រះភិក្ខុ ស៊ឺង យ៉ឹងរតនា មានថេរដីកាថា សេចក្តីថ្លែងការណ៍របស់វៀតណាម បានបំភ្លៃការពិត។ ព្រះអង្គបន្តថា វៀតណាមឃាត់ខ្លួនយុវជនខ្មែរក្រោមនិងរឹបអូសសៀវភៅសេចក្ដីប្រកាស របស់អង្គការសហប្រជាជាតិ ស្តីពី «សិទ្ធិជនជាតិដើម» ជាចេតនារឹតត្បិតសិទ្ធិសេរីភាពរបស់ពលរដ្ឋខ្មែរក្រោម៖ «រដ្ឋាភិបាលវៀតណាមហ្នឹងនៅតែបន្តរឹតត្បិត សិទ្ធិសេរីភាពពលរដ្ឋខ្មែរក្រោម ជាពិសេសការផ្សព្វផ្សាយរឿងជនជាតិដើម ដើម្បីឲ្យជនជាតិដើមខ្មែរក្រោមហ្នឹងបានយល់បន្ថែមពីច្បាប់អន្តរជាតិហ្នឹង។ សហព័ន្ធខ្មែរក្រោមនៅតែទទូចឲ្យរដ្ឋាភិបាលវៀតណាមគោរពសិទ្ធិជាជាតិដើម»។
កាលពីថ្ងៃទី១៣ មេសា នគរបាលសន្តិសុខផ្ទៃក្នុងផ្នែកសេដ្ឋកិច្ច និងនគរបាលសន្តិសុខផ្នែកនយោបាយជិត ១០០នាក់ បានឆែកឆេរផ្ទះលោក យឿង ខាយ និងចាប់ខ្លួនលោកទៅឃុំដោយគ្មានលិខិតស្នាមត្រឹមត្រូវ។ កាលនោះ លោក យឿង ខាយ ថា ប៉ូលិសបានរឹបអូសយកទូរស័ព្ទ កុំព្យូទ័រ និងសៀវភៅសេចក្ដីប្រកាសរបស់អង្គការសហប្រជាជាតិ ស្ដីពីជនជាតិដើមជាង ១០០ក្បាល។យុវជនខ្មែរក្រោម លោក យឿង ខាយ ធ្លាប់បានស្ម័គ្រចិត្តធ្វើការងារលើកស្ទួយសិទ្ធិមនុស្សការងារ និងសិទ្ធិបញ្ចេញមតិរបស់កម្មករ និងពលរដ្ឋខ្មែរក្រោមនៅលើទឹកដីកំណើត។ លោកបានបង្កើតទំព័រហ្វេសប៊ុក ឈ្មោះថា សិទ្ធិការងារខ្មែរក្រោម ដើម្បីផ្ដល់ចំណេះដឹងពីច្បាប់ការងារ។ ទំព័រហ្វេសប៊ុកនោះ ក៏បានផ្ដល់លេខទូរស័ព្ទ សម្រាប់ឱ្យកម្មករខ្មែរក្រោម ដែលរងការរំលោភបំពានផ្សេងៗ ទាក់ទង ដើម្បីពិគ្រោះយោបល់ស្វែងរកមធ្យោបាយដោះស្រាយបញ្ហាទាំងនោះ។ លោកក៏បានបង្កើតទំព័រហ្វេសប៊ុក (Facebook) មួយឈ្មោះ (ប្រទេស ខ្មែរក្រោម) និងបន្ថែមពាក្យថា អង្គការអង្កេតសិទ្ធិខ្មែរជនជាតិដើមនៅកម្ពុជាក្រោម។
លោក យឿង ខាយ ប្រាប់វិទ្យុអាស៊ីសេរី កាលពីថ្ងៃទី១០ តុលា ថា លោកមិនបានញុះញង់ខ្មែរក្រោមឲ្យស្អប់វៀតណាមនោះទេ ប៉ុន្តែលោកបានផ្សព្វផ្សាយឯកសារ និងបទដ្ឋានច្បាប់អន្តរជាតិផ្សេងៗដើម្បីឲ្យពលរដ្ឋខ្មែរក្រោម ស្វែងយល់ដឹងពីសិទ្ធិជាជនជាតិដើម ដើម្បីអាចឈានទៅ ស្វែងរកសិទ្ធិស្វ័យសម្រេចដោយខ្លួនឯងទៅថ្ងៃអនាគត៖ «យើងយល់ឃើញថា ច្បាប់ជនជាតិដើមយើងវាមានតម្លៃបង ពីព្រោះជនជាតិដើមពីមុនមកមិនសូវចេះច្បាប់។ ប្អូនសិក្សាហើយបានបោះពុម្ពចែកចំលងតាមភូមិសាស្ត្រនីមួយៗឲ្យគាត់យល់ពីច្បាប់មានតម្លៃពីព្រោះយើងជាម្ចាស់ដី ដូច្នោះយើងត្រូវតែយល់ពីសិទ្ធិនេះ»។
បច្ចុប្បន្នលោក យឿង ខាយ កំពុងបន្តជួយផ្សព្វផ្សាយ និងបោះពុម្ពសៀវភៅនិងឯកសារផ្សេងៗសំដៅឲ្យពលរដ្ឋខ្មែរក្រោមយល់ដឹងពីសិទ្ធិរបស់ពួកគេ។ យុវជនរូបនេះ ក៏ជួយស្វែងរកជំនួយ ដើម្បីជួយខ្មែរក្រោមណាដែលខ្វះខាតជីវភាព ក្នុងពេលនៃការរាតត្បាតជំងឺកូវីដ (Covid-19) ផងដែរ។ លោក យឿង ខាយ ថា ទោះបីវៀតណាមគំរាមកំហែងលោកយ៉ាងណាក៏ដោយ ក៏លោកនៅតែបន្តការងាររបស់លោកដោយគ្មានការភ័យខ្លាចនោះទេ៖ «ការងារយើង យើងធ្វើធម្មតាពីមុនមកឥឡូវយើងធ្វើដូចមុនបង។ យើងនៅតែបន្តបោះពុម្ពសៀវភៅរបស់អង្គការសហប្រជាជាតិស្ដីពីសិទ្ធិជនជាតិដើម ហើយបន្តចែកចាយ»។
ជុំវិញការចោទប្រកាន់របស់វៀតណាមថា សហព័ន្ធខ្មែរកម្ពុជាក្រោម មានចេតនាបង្កើតបញ្ហាសន្តិសុខជាតិ និងបំបែកបំបាក់ជាតិវៀតណាមនោះ ព្រះភិក្ខុ ស៊ឺង យ៉ឹងរតនា មានថេរដីកា សហព័ន្ធខ្មែរកម្ពុជាក្រោម ជាអង្គការធ្វើការងារលើកស្ទួយសិទ្ធិសេរីភាពពលរដ្ឋខ្មែរក្រោម ជាជនជាតិដើម ស្របច្បាប់៖ «អត់មានខុសច្បាប់អ្វីទេ។ នោះជាសិទ្ធិសេរីភាពចំពោះពលរដ្ឋខ្មែរក្រោមជាម្ចាស់ស្រុកជនជាតិដើម ហើយរដ្ឋាភិបាលវៀតណាមតែងតែចោទពលរដ្ឋខ្មែរក្រោមក្តី និងសហព័ន្ធខ្មែរកម្ពុជាក្រោមដែលទាមទារសិទ្ធិសេរីភាពនៅលើឆាកអន្តរជាតិហ្នឹង តែងតែចោទថា បំបែកបំបាក់សិទ្ធិប្រទេសវៀតណាមជាដើម»។
សហព័ន្ធខ្មែរកម្ពុជាក្រោម ជាអង្គការមិនរកប្រាក់កម្រៃ និងធ្វើការងារដោយអហិង្សាតំណាងឲ្យពលរដ្ឋខ្មែរក្រោមរាប់លាននាក់ រស់នៅលើទឹកដីកំណើត កំពុងឋិតក្រោមការគ្រប់គ្រងរបស់វៀតណាម។ សហព័ន្ធត្រូវបានគេបង្កើតឡើងកាលពីឆ្នាំ ១៩៨៥ ដោយមានបេសកកម្ម ប្រើប្រាស់មធ្យោបាយអហិង្សានិងច្បាប់អន្តរជាតិ តស៊ូមតិ ដើម្បីផ្តល់សិទ្ធិសេរី និងសិទ្ធិស្វ័យសម្រេចដោយខ្លួនឯង ដល់ពលរដ្ឋខ្មែរក្រោម។ របាយការណ៍សហព័ន្ធខ្មែរក្រោមប្រចាំឆ្នាំឲ្យដឹងថា កាលពីឆ្នាំ២០២០ និងដើមឆ្នាំ២០២១ អាជ្ញាធរវៀតណាម បានបន្តរឹតត្បិតសិទ្ធិសេរីភាពពលរដ្ឋ និងយុវជនខ្មែរក្រោម មិនឲ្យផ្សព្វផ្សាយប្រវត្តិសាស្ត្រពិតនៃការបាត់បង់ទឹកដី និងសិទ្ធិចែកចាយព័ត៌មានតាមបណ្ដាញសង្គម។ យុវជនខ្មែរក្រោមមួយចំនួន ត្រូវបានអាជ្ញាធរវៀតណាមចាប់ផាកពិន័យរាប់រយដុល្លារ និងបានរឹបអូសសៀវភៅ ស្ដីពីសិទ្ធិជនជាតិដើមជាដើម។ ចំណែកកសិករខ្មែរក្រោមដែលត្រូវអាជ្ញាធររឹបអូសយកដីស្រែកេរ្តិ៍ដូនតា ក៏ត្រូវតុលាការវៀតណាមកាត់ទោសឲ្យជាប់ពន្ធនាគាររាប់ឆ្នាំទាំងអយុត្តិធម៌ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- លោក ហ៊ុន ម៉ាណែត ប្រតិកម្មអ្នករិះគន់ព្រឹត្តិការណ៍ Gumball 3000
- លោក ហ៊ុន សែន បង្កើនការគំរាមកំហែងឆ្លងដែនលើអ្នករិះគន់
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
អត្ថបទពេញនិយម
សិទ្ធិមនុស្ស
- អ្នកឃ្លាំមើលថា រដ្ឋមន្ត្រីការបរទេសកម្ពុជា និយាយភូតកុហកពិភពលោកថាកម្ពុជាគោរពសិទ្ធិមនុស្ស និងនីតិរដ្ឋ
- សមត្ថកិច្ចចាប់ខ្លួនអ្នកសារព័ត៌មានឯករាជ្យ ដែលធ្លាប់បានពានពីសហរដ្ឋអាមេរិក គឺលោក ម៉ិច ដារ៉ា
- សមត្ថកិច្ចម៉ាឡេស៊ីបញ្ជូនពលករខ្មែរម្នាក់ដែលរិះគន់រដ្ឋាភិបាលលោក ហ៊ុន ម៉ាណែត មកកម្ពុជា
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
- សកម្មជននិងសង្គមស៊ីវិលទទូចឱ្យរដ្ឋាភិបាលស្ដារទំនាក់ទំនងកម្ពុជា និងស៊ុយអែតឡើងវិញ