ប្រធានសមាគមសម្ពន្ធនិស្សិតបញ្ញវន្តខ្មែរ លោក កើត សារ៉ាយ ផ្ញើសារកុំឲ្យយុវជនបាក់ទឹកចិត្ត និងបន្តក្រោកឈរទាមទារយុត្តិធម៌
2024.08.07
រូប៖ ពីពលរដ្ឋ
ប្រធានសមាគមសម្ពន្ធនិស្សិតបញ្ញវន្តខ្មែរ លោក កើត សារ៉ាយ ផ្ញើសារអំពាវនាវដល់យុវជន កុំឲ្យបាក់ទឹកចិត្ត និងបន្តក្រោកឈរទាមទារយុត្តិធម៌។ ការផ្ញើសារអំពាវនាវបែបនេះ ធ្វើឡើងក្នុងពេលលោកត្រូវបានមន្ត្រីពន្ធនាគារនាំខ្លួនឲ្យចូលស្ដាប់សេចក្ដីសម្រេចរបស់តុលាការកំពូល ដែលបដិសេធមិនឲ្យលោកនៅក្រៅឃុំបណ្ដោះអាសន្ន នៅព្រឹកថ្ងៃទី៧ ខែសីហា។ យុវជន និងមន្ត្រីសិទ្ធិមនុស្ស ចាត់ទុកសេចក្ដីសម្រេចរបស់តុលាការកំពូល គឺជារឿងអយុត្តិធម៌។
ប្រធានសមាគមសម្ពន្ធនិស្សិតបញ្ញវន្តខ្មែរ លោក កើត សារ៉ាយ បានដឹងខ្លួនរួចជាមុនហើយថា លោក នឹងមិនទទួលបានយុត្តិធម៌ពីតុលាការគ្រប់ជាន់ថ្នាក់នៅកម្ពុជានោះទេ ព្រោះជាទូទៅបណ្ដឹងសុំនៅក្រៅឃុំរបស់សកម្មជននយោបាយ និងសកម្មជនសង្គមនោះ តុលាការកំពូលតែងតែសម្រេចបដិសេធដូចតុលាការជាន់ទាបដែរ។
គូដណ្ដឹងរបស់លោក កើត សារ៉ាយ គឺកញ្ញា នឿន ស្រីណែន ចាត់ទុកថា ការណ៍ ដែលតុលាការកំពូលតម្កល់សេចក្ដីសម្រេចរបស់សាលាដំបូង និងសាលាឧទ្ធរណ៍ភ្នំពេញទុកជាបានការ ដោយមិនព្រមដោះលែងលោក កើត សារ៉ាយ នេះថា ជារឿងអយុត្តិធម៌។
កញ្ញា នឿន ស្រីណែន៖ «បើគ្រាន់តែធ្វើការងារសង្គម គាត់បែរជាត្រូវជាប់ពន្ធនាគារ បាត់បង់សេរីភាពនៅខាងក្រៅ ត្រូវឃ្លាតចាកពីគ្រួសារ ដើម្បីជាប់ពន្ធនាគារ ខ្ញុំយល់ថា វាមិនមានយុត្តិធម៌ទាល់តែសោះសម្រាប់គាត់។ ខ្ញុំយល់ថា យុត្តិធម៌ប្រហែលនៅឯជើងមេឃ ខ្ញុំសង្កេតឃើញថា អ្នកធ្វើការងារសង្គមភាគច្រើនត្រូវបានជាប់ពន្ធនាគារ តែអ្នក ដែលប្រព្រឹត្តបទល្មើសជាក់ស្ដែង ប្រព្រឹត្តខុសច្បាប់ បែរជាមានសេរីភាពនៅខាងក្រៅដើរហើរបាន»។
តុលាការកំពូលកាលពីថ្ងៃទី៣១ ខែកក្កដា បានបើកសវនាការលើបណ្ដឹងសុំនៅក្រៅឃុំរបស់លោក កើត សារ៉ាយ ដោយមិនបានកោះហៅមេធាវីការពារក្ដីនោះទេ។លោក កើត សារ៉ាយ ត្រូវបានសមត្ថកិច្ចចាប់ខ្លួន កាលពីថ្ងៃទី៥ ខែមេសា និងត្រូវបានតុលាការ ចោទប្រកាន់បទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងមិនរាងចាលក្នុងបទមជ្ឈិម» ទាក់ទិនករណីលោក ចុះទៅជួបពលរដ្ឋរងគ្រោះដីធ្លីនៅខេត្តព្រះវិហារ ដែលរត់ពួនក្នុងព្រៃ ក្រោយពេលអាជ្ញាធរបំផ្លាញផ្ទះសម្បែង និងដេញតាមចាប់ខ្លួនពួកគាត់។
អគ្គលេខាធិការសមាគមសម្ពន្ធនិស្សិតបញ្ញវន្តខ្មែរ កញ្ញា រៀម ស្រីពេជ្ររតនា ដែលបានចូលស្ដាប់ការប្រកាសសាលដីកាតុលាការកំពូល ថ្លែងថា លោក កើត សារ៉ាយ នៅតែមានស្មារតីរឹងមាំដដែល ដោយមិនតក់ស្លុត ចំពោះការយាយីតាមប្រព័ន្ធតុលាការនោះទេ។ កញ្ញាបន្តថា លោក កើត សារ៉ាយ ក៏បានផ្ញើសារកុំឲ្យយុវជន បាក់ស្មារតី ហើយបន្តក្រោកឈរទាមទារយុត្តិធម៌សង្គមតទៅទៀត។
កញ្ញា រៀម ស្រីពេជ្ររតនា៖ «មិញនេះ បានជួបគាត់ដែរ គឺគាត់មានសុខភាពល្អប្រសើរ និងផ្លូវចិត្តគាត់ ក៏មិនអីដែរ គាត់អាចធ្វើចិត្តរឹងមាំបាន ព្រោះគាត់បានត្រៀមចិត្តរួចហើយ។ គាត់បានផ្ដាំផ្ញើមកថា មិនចង់ឲ្យពួកយើងទាំងអស់គ្នាបាក់ទឹកចិត្តទេ ព្រោះហេតុអីបានជាគាត់ធ្វើអ៊ីចឹង ដោយសារ គាត់ចង់ឲ្យថ្ងៃខាងមុខ យើងទាំងអស់គ្នាក្រោកឈរទាមទារយុត្តិធម៌ សម្ដែងនូវការមិនពេញចិត្ត នៃការអនុវត្តច្បាប់ខុសឆ្គងកន្លែងណាមួយ ដើម្បីឲ្យយើងទាំងអស់ គ្នាទទួលបាននូវយុត្តិធម៌មកវិញ»។
លោក កើត សារ៉ាយ គឺជាអ្នកការពារសិទ្ធិមនុស្សម្នាក់ និងជាអតីតព្រះសង្ឃ ដែលត្រូវបានសមត្ថកិច្ចក្រុងភ្នំពេញ ចាប់ផ្សឹកក្នុងឆ្នាំ២០២០ ហើយបញ្ជូនទៅឃុំខ្លួនរយៈពេល ១ឆ្នាំ ២ខែ ដោយសារតែលោក ទាមទារឱ្យមានការយុត្តិធម៌សង្គម និងដោះលែងអតីតថ្នាក់ដឹកនាំសហជីព លោក រ៉ុង ឈុន ដែលបច្ចុប្បន្ន ជាទីប្រឹក្សាគណបក្សកម្លាំងជាតិ។
នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត យល់ថា ផ្អែកតាមអង្គហេតុ និងអង្គច្បាប់ តុលាការកំពូល គួរតែដោះលែងលោក កើត សារ៉ាយ ឲ្យនៅក្រៅឃុំបណ្ដោះអាសន្ន។
លោក អំ សំអាត៖ «បើយើងលើកពីច្បាប់អន្តរជាតិស្ដីពីសិទ្ធិមនុស្ស គឺជនជាប់ចោទមានជម្រើសសេរីភាពជាគោល។ការឃុំខ្លួនបណ្ដោះអាសន្ន វាទាល់តែមានជម្រើសចាំបាច់។ នៅក្នុងក្រមនីតិវិធីព្រហ្មទណ្ឌមាត្រា២០៣ ក៏ដូចគ្នាដែរ និយាយអំពីគោលការណ៍សេរីភាព នៃជនជាប់ចោទ ហើយការឃុំខ្លួនបណ្ដោះអាសន្ន ទាល់តែមានលក្ខណៈចាំបាច់។ ខ្ញុំយល់ថា បើលោក កើត សារ៉ាយ មានលក្ខខណ្ឌគ្រប់គ្រាន់គួរតែអនុញ្ញាតឲ្យគាត់បាននៅក្រៅឃុំ ពីព្រោះដំណើរការនីតិវិធីនៅតែមានបន្តទេ។ បើយើងនិយាយអំពីលោកកើត សារ៉ាយ វាគ្រាន់តែជាសេរីភាព នៃការបញ្ចេញមតិ ដោយគាត់ស្វែងរកកិច្ចអន្តរាគមន៍ជួយដល់ជនរងគ្រោះ ដោយសាររឿងដីធ្លី នៅខេត្តព្រះវិហារតែប៉ុណ្ណឹង»។
មកទល់ពេលនេះ រដ្ឋាភិបាលរបស់លោក ហ៊ុន ម៉ាណែត នៅតែបន្តចាប់ និងឃុំខ្លួនអ្នកនយោបាយ អ្នកការពារសិទ្ធិមនុស្ស សកម្មជនបរិស្ថាន សកម្មជនដីធ្លី សហជីព អ្នកសារព័ត៌មាន និងអ្នកប្រើប្រាស់បណ្តាញសង្គមមួយចំនួន កើនឡើងដល់ជាង ៦០នាក់ ដោយចោទប្រកាន់អំពីបទល្មើសព្រហ្មទណ្ឌមួយចំនួន ដោយសារតែភាពសកម្មនិយម ឬការបញ្ចេញមតិ។ អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា លោក វិទិត ម៉ុនតាបន (Vitit Muntarbhorn) លើកឡើងថា សកម្មជនទាំងអស់នេះ មិនបានប្រព្រឹត្តកំហុសអ្វីទាល់តែសោះ ប៉ុន្តែ ពួកគាត់បែរជាត្រូវជាប់ពន្ធនាគារ ដោយសារតែប្រព័ន្ធតុលាការរងសម្ពាធពីអ្នកកាន់អំណាច។ លោក វិទិត មុនតាប៊ន ទាមទាររដ្ឋាភិបាលថ្មី ឱ្យផ្លាស់ប្ដូរគំនិត ដោយដោះលែងសកម្មជនកំពុងជាប់ឃុំទាំងនេះ ដើម្បីធានាការគោរពសិទ្ធិមនុស្សនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ
អត្ថបទពេញនិយម
សិទ្ធិមនុស្ស
