ជនរងគ្រោះខ្មែរពីការជួញដូរមនុស្សនៅចិន មានតួលេខខ្ពស់ជាងគេក្នុងរយៈពេល៧ខែឆ្នាំ២០២៤
2024.08.30
ក្រុមគ្រួសាររបស់អ្នកនារីរងគ្រោះចាញ់បោករៀបការទៅប្រទេសចិន យំឱបគ្នានៅពេលដែលកូនស្រីរបស់គាត់ត្រូវជួយសង្គ្រោះឱ្យវិលត្រឡប់មកស្រុកកំណើតជួបជុំគ្រួសារវិញ។
រូប៖ សមាគមអាដហុក
ក្រុមអង្គការក្រៅរដ្ឋាភិបាល ដែលធ្វើការពាក់ព័ន្ធនឹងសិទ្ធិមនុស្ស នៅតែបង្ហាញការព្រួយបារម្ភ ទៅលើប្រជាពលរដ្ឋខ្មែរ ជាច្រើន ដែលរងគ្រោះដោយការជួញដូរមនុស្សទៅក្រៅប្រទេស។
ការបារម្ភនេះ ក្រោយពីអង្គការទាំងនោះរកឃើញថា ពលរដ្ឋខ្មែរជាជនរងគ្រោះដោយអំពើជួញដូរទៅក្រៅប្រទេស នៅតែកើតមានឡើងច្រើន ដូចជានៅប្រទេសម៉ាឡេស៊ី (Malaysia) អារ៉ាប៊ី សាអូឌីត(Saudi Arabia) និងជាពិសេសនៅប្រទេសចិន (China)។
សមាគមការពារសិទ្ធិមនុស្សអាដហុក(ADHOC) បានឱ្យដឹងថា ក្នុងរយៈពេល៧ខែឆ្នាំ២០២៤នេះ ចំនួនប្រជាពលរដ្ឋខ្មែរ ដែលរងគ្រោះ ដោយអំពើជួញដូរមនុស្សនៅប្រទេសចិន គឺមានតួលេខខ្ពស់ជាងគេ ក្នុងចំណោមប្រទេសខ្លះទៀត។
ប្រធានសមាគមការពារសិទ្ធិមនុស្ស អាដហុក លោក នី សុខា បានប្រាប់វិទ្យុអាស៊ីសេរី កាលពីថ្ងៃទី២៧ ខែសីហាថា ក្នុងរយៈពេល៧ខែ មានពលរដ្ឋខ្មែរ រងគ្រោះ ដោយអំពើជួញដូរមនុស្ស នៅប្រទេសចិន មានតួលេខខ្ពស់ជាងគេ បន្ទាប់មកគឺប្រទេសអារ៉ាប៊ី សាអូឌីត។
លោកថា ថ្វីត្បិតតែអង្គការរបស់លោក មិនមានទិន្នន័យនៃអំពើជួញដូរមនុស្ស ឱ្យបានច្បាស់លាស់ទាំងអស់ក្តី ក៏ប៉ុន្តែតាមរយៈ ការជួយសង្គ្រោះ ជនរងគ្រោះ គឺបង្ហាញថា ចំនួនពលរដ្ឋខ្មែរ ដែលរងគ្រោះដោយអំពើជួញដូរទៅប្រទេសចិន មានតួលេខនាំមុខគេ គួរឱ្យកត់សំគាល់។
លោក នី សុខា៖ «យើងទទួលព័ត៌មានពីជនរងគ្រោះដែលទៅប្រទេសចិន ហើយចាញ់បោកមេខ្យល់ ក៏ដូចជាតាមរយៈក្រុមហ៊ុន គឺមានចំនួនច្រើន ប៉ុន្តែយើងមិនបានស៊ីជម្រៅក្នុងរឿងហ្នឹងទេ។ ដូច្នេះយើងមិនដឹងច្បាស់ថា តើវាបណ្ដាលមកពីមូលហេតុអ្វីឱ្យច្បាស់លាស់ទេ ប៉ុន្តែយើងគ្រាន់តែកត់សំគាល់ថា ប្រហែលជាអាចមានក្រុមហ៊ុន ឬក៏មេខ្យល់មួយចំនួនយកប្រទេសចិនធ្វើជាមូលដ្ឋាន។ នៅប្រទេសចិនគឺមិនសូវគោរពសិទ្ធិមនុស្ស និងអនុវត្តគោលការណ៍ការពារជនរងគ្រោះ ឱ្យបានហ្មត់ចត់ទើប មានករណីជួញដូរមនុស្សច្រើន»។
របាយការណ៍ផ្នែកការងារស្ត្រី របស់សមាគមការពារសិទ្ធិមនុស្សអាដហុក ឱ្យដឹងថា រយៈពេល៧ខែឆ្នាំ២០២៤ អាដហុកបានជួយពលរដ្ឋខ្មែរ ពីអំពើជួញដូរមនុស្សចំនួន៤៤ករណី ដែលជនរងគ្រោះសរុបចំនួន ៧៧នាក់ ក្នុងនោះមានស្ត្រី៦៣នាក់។
ជនរងគ្រោះ ដោយអំពើជួញដូរមនុស្សនេះ គឺសង្គ្រោះពីប្រទេសចិនចំនួន៤៨ភាគរយ ពីប្រទេសអារ៉ាប៊ី សាអូឌីត ៤០ភាគរយ និងសង្គ្រោះពីប្រទេសម៉ាឡេស៊ីចំនួន១២ភាគរយ។
ចំណែក ប្រធានផ្នែកប្រឆាំងការជួញដូរមនុស្ស និងទេសន្តរប្រវេសន៍នៃអង្គការសង់ត្រាល់(CENTRAL) លោក ឌី ថេហូយ៉ា ឱ្យដឹងដែរថា រយៈពេល៧ខែឆ្នាំ២០២៤អង្គការរបស់លោក ក៏បានជួយសង្គ្រោះជនរងគ្រោះ ដោយអំពើជួញដូរមនុស្សពីកម្ពុជាទៅប្រទេសថៃ ម៉ាឡេស៊ី ចិន អារ៉ាប៊ី សាអូឌីត និងពីប្រទេសឥណ្ឌូណេស៊ី (Indonesia) ចូលមកកម្ពុជា បានចំនួន៣០ករណី ហើយមានជនរងគ្រោះចំនួនពី៥០-៦០នាក់។
លោកថា ពេលបច្ចុប្បន្ន រូបភាពនៃអំពើជួញដូរមនុស្ស ទៅប្រទេសចិន មានចំនួនពីរប្រភេទ គឺប្រភេទទី១ មានមេខ្យល់ដើរបោកបញ្ឆោតពលរដ្ឋខ្មែរ នៅតាមភូមិ ឱ្យទៅធ្វើការ ដោយសន្យាឱ្យប្រាក់ខែខ្ពស់។ ប្រភេទមួយទៀត គឺក្រុមមេខ្យល់ បានដើររកស្ត្រីណា ដែលចង់រៀបការជាមួយបុរសជនជាតិចិន រួចហើយនាំចាកចេញពីគ្រួសារទៅប្រទេសចិនតែម្ដង។
លោក ឌី ថេហូយ៉ា៖ «នៅប្រទេសចិនគឺថាគ្រួសារកូនប្រុស ដែលគ្មានលទ្ធភាព មិនមានលុយកាក់ច្រើន ក្រ គឺរកប្រពន្ធជនជាតិចិនមិនសូវបានទេ ។ ដូច្នេះហើយបានជាមានមេខ្យល់មកបោកបញ្ឆោតស្ត្រីខ្មែរខ្លះ ឱ្យទៅរៀបការជាមួយបុរសចិនដែលក្រីក្រ ហើយស្ត្រីខ្មែរខ្លះទៀតបានប្ដីជនជាតិចិន ជាមនុស្សមិនគ្រប់លក្ខណៈជាមនុស្សវិកលចរិតជាដើម។ ចំណែកឯស្ត្រីខ្លះទៀត ក៏ចាញ់បោកគេ ក្នុងន័យគេយកទៅលក់ ឱ្យបំរើផ្លូវភេទ នៅក្នុងបនពេស្យាជាដើម»។
ក្រុមអង្គការក្រៅរដ្ឋាភិបាល បានរកឃើញថា មូលហេតុដែលពលរដ្ឋកម្ពុជានៅតែរងគ្រោះ ដោយអំពើជួញដូរមនុស្ស នៅក្រៅប្រទេស ដោយសារតែពលរដ្ឋខ្លះចង់បានប្រាក់ខែខ្ពស់នៅក្រៅប្រទេស ពលរដ្ឋខ្លះក្រីក្រជំពាក់បំណុលធនាគារ ពលរដ្ឋខ្លះ អត់មានការងារធ្វើក្នុងស្រុក និងបញ្ហាគ្មានដីធ្វើកសិកម្មគ្រប់គ្រាន់ ដើម្បីចិញ្ចឹមជីវិតជាដើម។
អនុប្រធានអចិន្ត្រៃយ៍ គណៈកម្មាធិការប្រយុទ្ធប្រឆាំង ការជួញដូរមនុស្ស នៃក្រសួងមហាផ្ទៃ លោកស្រី ជូ ប៊ុនអេង ទទួលស្គាល់ថា បច្ចុប្បន្នកម្ពុជា ពិតជាមានអំពើជួញដូរមនុស្ស ទៅក្រៅប្រទេសនិងជួញដូរពីប្រទេសផ្សេង ចូលមកកម្ពុជាមែន។
លោក ស្រី ជូ ប៊ុនអេង បញ្ជាក់ទៀតថា បើទោះបីជារដ្ឋាភិបាលកម្ពុជា បានរៀបចំយុទ្ធសាស្ត្រជាច្រើន ដើម្បីប្រយុទ្ធប្រឆាំងនិងអំពើជួញដូរមនុស្សយ៉ាងណាក្តី ក៏មិនអាចលុបបំបាត់បានទាំងស្រុងទេ ខណៈដែលប្រទេសជាច្រើន កំពុងរីករាលដាលនៃសកម្មភាពជួញដូរមនុស្សដែរនោះ។
លោកស្រី ជូ ប៊ុនអេង៖ «បើសិនជារឿងជួញដូរមនុស្សកើតតែក្នុងប្រទេសកម្ពុជា គឺរដ្ឋាភិបាល អាចអះអាងថា នឹងធ្វើបានជោគជ័យ។ ប៉ុន្តែដរាបណាអំពើជួញដូរមនុស្ស មានការរាយបណ្ដាញចេញពីតាមបណ្ដាប្រទេសផ្សេងៗ ហើយបែបសព្វថ្ងៃនេះ មានតាមប្រព័ន្ធអនឡាញ(Online)ទៀតនោះ យើងកំពុងតែយល់ថា កម្ពុជាម្នាក់ឯង មិនអាចប្រយុទ្ធប្រឆាំងឱ្យជោគជ័យបានទេ។ ហើយប្រទេសណាក៏មិនអាចលុបបំបាត់អំពើជួញដូរមនុស្សបានដែរ ប្រសិនបើមិនមានកិច្ចសហប្រតិបត្តិការរួមគ្នាឱ្យល្អជាមួយនឹងប្រទេសផ្សេងៗទៀត»។
រយៈពេលបីឆ្នាំចុងក្រោយ រហូតមកដល់ឆ្នាំ២០២៤ សហរដ្ឋអាមេរិក បានវាយតម្លៃឱ្យប្រទេសកម្ពុជា ស្ថិតនៅក្នុងចំណាត់ថ្នាក់លេខ៣ ដែលជាចំណាត់ថ្នាក់ទាបបំផុត ក្នុងការងារប្រយុទ្ធប្រឆាំងនឹងអំពើជួញដូរមនុស្ស។
សហរដ្ឋអាមេរិក បានចោទប្រកាន់ថា ដោយសារតែមន្ត្រីរដ្ឋាភិបាលកម្ពុជាខ្លះ បានឃុបឃិត នៅក្នុងបទល្មើស និងអំពើពុករលួយ ជាហេតុនាំឱ្យអំពើជួញដូរមនុស្សនៅតែរីករាលដាល។
តាមរបាយការណ៍ របស់គណៈកម្មាធិការប្រយុទ្ធប្រឆាំង ការជួញដូរមនុស្ស នៃក្រសួងមហាផ្ទៃ ឱ្យដឹងថា រយៈពេល ៦ខែឆ្នាំ២០២៤ សមត្ថកិច្ចបានបង្ក្រាបអំពើជួញដូរមនុស្ស និងការធ្វើអាជីវកម្មផ្លូវភេទ សរុបចំនួន ១០៤ករណី។
សមត្ថកិច្ចបានឃាត់ខ្លួនជនល្មើសចំនួន១៣៤នាក់ បញ្ជូនទៅតុលាការ និងសង្គ្រោះជនរងគ្រោះ បានចំនួន២៩០នាក់។ សកម្មភាពជួញដូរមនុស្ស មានការកើនឡើងចំនួន១៧ករណី បើប្រៀបធៀបនិងឆ្នាំ២០២៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
អត្ថបទពេញនិយម
សិទ្ធិមនុស្ស
- អ្នកសារព័ត៌មានក្នុងស្រុក និងក្រៅប្រទេសអំពាវនាវឱ្យតុលាការទម្លាក់បទចោទប្រកាន់ និងដោះលែងលោក ម៉ិច ដារ៉ា ឱ្យមានសេរីភាព
- អ្នកឃ្លាំមើលថា ការចាប់ខ្លួនលោក ម៉ិច ដារ៉ា នឹងកាន់តែធ្វើឱ្យរដ្ឋាភិបាលមានកេរ្តិ៍ឈ្មោះមិនល្អ និងប្រឈមទណ្ឌកម្ម
- មន្ត្រីពន្ធនាគារខេត្តពោធិ៍សាត់ មិនអនុញ្ញាតឲ្យមិត្តភក្ដិសួរសុខទុក្ខកញ្ញា ភួន កែវរស្មី
- ស្ថានទូតបារាំងព្រួយបារម្ភអំពីការចាប់ខ្លួន និងចំណាត់ការផ្លូវច្បាប់លើអ្នកសារព័ត៌មាន លោក ម៉ិច ដារ៉ា