ស្ត្រីរងគ្រោះទៅប្រទេសចិនរៀបរាប់ពីការបង្ខំឱ្យរៀបការប្តីជាមនុស្សគ និងក្រុមគ្រួសារចិនធ្វើបាប
2024.11.03
ស្ត្រីរងគ្រោះទៅប្រទេសចិនរៀបរាប់ពីការបង្ខំឱ្យរៀបការប្តីជាមនុស្សគ និងក្រុមគ្រួសារចិនធ្វើបាប។
RFA
ស្ត្រីខ្មែរម្នាក់ដែលរងគ្រោះដោយអំពើជួញដូរនៅប្រទេសចិន បង្ហាញការឈឺចាប់ អស់សង្ឃឹម និងបាក់ទឹកចិត្តខ្លាំង បន្ទាប់ពីបាននាងត្រូវបានគេជួយសង្គ្រោះផុតពីការធ្វើទុក្ខបុកម្នេញធ្ងន់ធ្ងរ ហើយត្រឡប់មកជួបជុំគ្រួសារនៅស្រុកកំណើតវិញ។
ស្ត្រីរងគ្រោះថា នាងរងការធ្វើបាបទាំងរាងកាយ និងផ្លូវចិត្ត បើទោះបីជា នាងបានបង្កើតកូនឱ្យគ្រួសារចិនក៏ដោយ។
នាង សុខ សួស្ដី គឺជាឈ្មោះ ដែលអ្នកនិពន្ធដាក់ឱ្យស្ត្រីខ្មែរម្នាក់ ធ្លាប់រងគ្រោះក្នុងអំពើជួញដូរមនុស្សនៅប្រទេសចិន ហើយទើបតែវិលមកជួបជុំគ្រួសារនៅកម្ពុជាវិញ កាលពីជិត ៣ខែមុន។
នាង សុខ សួស្ដី អាយុ៣៥ឆ្នាំ កំពុងរស់នៅខេត្តឧត្តរមានជ័យ ជាប់និងព្រំដែននៃប្រទេសថៃ បានប្រាប់ថា ជីវិតរបស់នាងកាលពីរស់នៅក្នុងប្រទេសចិន គឺប្រៀបបាននិងទាសករ ដែលទទួលរងតែការជេរប្រមាថ និងការមើលងាយពីក្រុមគ្រួសារចិន។
កាលពីឆ្នាំ២០១៦ ក្នុងពេលដែលស្ថានភាពគ្រួសារក្រីក្រខ្លាំង និងជំពាក់បំណុលធនាគារផង រូបនាងត្រូវបានស្ត្រីម្នាក់ដែលនៅផ្ទះជិតគ្នា បោកបញ្ឆោតនាំទៅប្រទេសចិន ដើម្បីធ្វើការបានប្រាក់ខែច្រើន។ ក៏ប៉ុន្តែពេលទៅដល់ទីក្រុងសៀងហៃ (Shanghai) បាន ១ខែ គឺស្ត្រីដែលនាំទៅ បានបង្ខំឱ្យនាងរៀបការជាមួយបុរសចិនម្នាក់ ដែលជាមនុស្សគ។ គេគំរាមថា ប្រសិនបើនាងមិនព្រមរៀបការទេ គឺគេនឹងឱ្យនាងសងប្រាក់ថ្លៃរត់ការឯកសារមកប្រទេសចិនទាំងអស់។
បន្ទាប់ពីរៀបការរួច សុខ សួស្ដី បានក្លាយជាទាសករនៅក្នុងគ្រួសាររបស់ប្ដី។
នាងនិយាយថា ជារៀងរាល់ថ្ងៃម្ដាយក្មេក តែងបង្ខំឱ្យនាងចេញទៅធ្វើការខាងក្រៅ ហើយពេលចូលមកដល់ផ្ទះ ក៏ត្រូវធ្វើការងារជាច្រើនទៀតគ្មានពេលសម្រាក។
នាង សុខ សួស្ដី៖ «ថ្ងៃណាក៏ម្ដាយក្មេកដេញឱ្យទៅធ្វើការម៉ោង១០-១១យប់ ពេលខ្លះធ្វើការរហូតដល់ម៉ោង២រំលងអធ្រាត្រ ទើបបានមកដល់ផ្ទះ។ ក្នុង១ថ្ងៃគឺខ្ញុំដេកបានតែ ៣ម៉ោងទេ ក្រៅពីនោះគឺខំប្រឹងធ្វើការ។ ពេលនៅផ្ទះក៏ធ្វើការជួនកាលខ្ញុំដេរខោអាវ ជួនកាលស៊ីឈ្នួលដាក់រឺស័រកាំភ្លើងបាញ់ទឹករបស់ក្មេងៗ។ បើខោអាវចង់បានថ្មីទាល់តែរកលុយទិញខ្លួនឯង បើរកមិនបានទេគឺអត់។ ចំណែកបញ្ហាមិត្តភក្តិវិញគឺម្ដាយក្មេកមិនឱ្យទាក់ទងជាមួយជនជាតិខ្មែរទេ គឺខ្លាចខ្ញុំរត់ចេញពីផ្ទះ។ ម្ដាយក្មេកជនជាតិចិន ជេរតិះដៀលខ្ញុំ ធ្វើឱ្យខ្ញុំឆ្អែតនិងឈឺចាប់ខ្លាំងណាស់»។
រយៈពេលជាង ៧ឆ្នាំ នាងបង្កើតបានកូនប្រុស១ ជាមួយប្តីចិនដែលជាមនុស្សគ។ បើទោះបីជានាងបង្កើតកូនឱ្យគ្រួសារចិនក្តី ក៏ម្ដាយក្មេកជនជាតិចិន មិនឱ្យតម្លៃលើនាងទេ គឺតែងជេរប្រមាថ មិនឱ្យនាងទាក់ទងមកគ្រួសារនៅកម្ពុជា ព្រមទាំងមិនអនុញ្ញាតឱ្យនាងមើលថែ និងប៉ះពាល់កូន ព្រមទាំងប្តីផង។
នាង សុខ សួស្ដី៖ «ការឈឺចាប់បំផុតគឺបន្ទាប់ពីខ្ញុំបង្កើតបានកូនប្រុស១ ហើយ ប៉ុន្តែម្ដាយក្មេកមិនឱ្យខ្ញុំទទួលស្គាល់កូនរបស់ខ្លួនឯង។ ម្ដាយក្មេកមិនឱ្យខ្ញុំទៅស្និទ្ធស្នាលជាមួយប្តី និងមិនឱ្យប្តីមកស្និទ្ធស្នាលជាមួយខ្ញុំ។ សូម្បីតែខ្ញុំកើតកូនប្រុសមក ក៏ម្ដាយក្មេកមិនឱ្យខ្ញុំមើលមុខកូន គាត់មិនឱ្យមើលថែកូននិងជូនកូនទៅសាលារៀនទេ។ ពេលខ្ញុំជូនកូនប្រុសទៅសាលារៀនម្ដងៗ ម្ដាយក្មេកតែងប្រាប់ប៉ូលិស ឱ្យឃាត់ខ្ញុំ មិនឱ្យចូលទៅក្នុងសាលាទេ។ សូម្បីតែឌុបកូនមកផ្ទះ ក៏គាត់មិនឱ្យខ្ញុំឌុបដែរ»។
របាយការណ៍របស់សមាគមការពារសិទ្ធិមនុស្សអាដហុក ឱ្យដឹងថា រយៈពេល៩ខែឆ្នាំ២០២៤នេះ មានស្ត្រីខ្មែរចំនួន ២៩នាក់ ដែលគេជួញដូរនៅក្នុងប្រទេសចិន។ ក្នុងចំណោមស្រ្តីខ្មែរ ដែលគេជួញដូរនោះ គឺចំនួន២៨នាក់ ត្រូវគេបង្ខំឱ្យរៀបការជាមួយបុរសចិន ដោយមិនស្ម័គ្រចិត្ត។
សមាគមការពារសិទ្ធិមនុស្សអាដហុក ឱ្យដឹងថា កាលពីឆ្នាំ២០២៣ គេបានទទួលនិងជួយសង្គ្រោះស្ត្រីខ្មែរ ពីអំពើជួញដូរមនុស្សនៅប្រទេសចិនចំនួន ២៨នាក់។
អង្គការក្រៅរដ្ឋាភិបាលអះអាងថា តាមរបាយការណ៍ដែលគេទទួលបាន គឺមានស្ត្រីខ្មែរខ្លះ ដែលទៅរៀបការជាមួយបុរសចិន ត្រូវប្តីនិងក្រុមគ្រួសារវាយធ្វើបាប ជេរប្រមាថ និងបង្ខំឱ្យធ្វើការធ្ងន់ធ្ងរប្រៀបបាននិងទាសករ។ ចំណែកស្ត្រីខ្មែរខ្លះ ទៀតក្រៅតែពីទទួលរងការវាយធ្វើបាបលើរាងកាយនិងផ្លូវចិត្ត ក៏ត្រូវគ្រួសារខាងប្តីយកធ្វើជាអ្នកបំរើផ្លូវភេទរួមគ្នា ធ្វើឱ្យអ្នកខ្លះ ពេលវិលត្រឡប់មកប្រទេសវិញ មានវិបត្តិផ្លូវចិត្តធ្ងន់ធ្ងរ មានសតិមិនប្រក្រតី ព្រមទាំងបាត់បង់ការចងចាំផង។
ងាកមកនាង សុខ សួស្ដី វិញដោយសារតែទ្រាំនិងការធ្វើបាបលើរាងកាយនិងផ្លូវចិត្តមិនបាន ក៏ចាប់ផ្ដើមសន្សំលុយទិញទូរស័ព្ទដៃ១គ្រឿង ក្នុងតម្លៃប្រមាណ ៦០ម៉ឺនរៀលលុយខ្មែរ ឬ១៥០ដុល្លារ ហើយចាប់ផ្ដើមស្វែងរកអន្តរាគមន៍ជួយសង្គ្រោះ តាមរយៈបណ្ដាញសង្គម (Facebook) ហើយនាងត្រូវបានជួយសង្គ្រោះមកកម្ពុជាវិញ កាលពីអំឡុងខែកក្កដា ឆ្នាំ២០២៤។
ប្រធានផ្នែកការងារស្ត្រីនៃសមាគមការពារសិទ្ធិមនុស្សអាដហុក (ADHOC) អ្នកស្រី ស៊ុន ម៉ាលី ឱ្យដឹងថា បច្ចុប្បន្នស្ថានភាពគ្រួសាររបស់នាង សុខ សួស្ដី កំពុងប្រឈមនិងបញ្ហាជាច្រើន ដោយរស់នៅជាមួយម្ដាយចាស់ជរា ឪពុកជាជនពិការភ្នែកដោយសារសង្គ្រាម និងប្អូនប្រុសម្នាក់ ក៏មានសតិមិនល្អ។
បន្ទាប់ពីមានការជួយជ្រោមជ្រែងឱ្យស្នាក់នៅក្នុងមណ្ឌលរបស់ក្រសួងសង្គមកិច្ច អតីតយុទ្ធជននិងយុវនីតិសម្បទា ដើម្បីជួយស្ដារផ្នែកសុខភាព វិបត្តិផ្លូវចិត្ត និងអារម្មណ៍មួយរយៈរួចមក អង្គការក្រៅរដ្ឋាភិបាលក៏កំពុងជួយស្ដារនីតិសម្បទាបន្ថែមទៀត ព្រមទាំងជួយលើកស្ទួយផ្នែកជីវភាពប្រចាំថ្ងៃ ដល់ស្ត្រីរងគ្រោះនោះ តាមរយៈការផ្ដល់ម៉ាស៊ីនឱ្យនាងប្រកបមុខរបរកាត់ដេរនៅផ្ទះ។
អ្នកស្រី ស៊ុន ម៉ាលី៖ «វាជាអំណោយផលមួយដែល Case Manager ខាងខ្ញុំបានធ្វើការប៉ាន់ប្រមាណទៅរកឃើញជំនាញដែលជាអំណោយផលសម្រាប់ស្ត្រីរងគ្រោះនោះ គឺមុខរបរកាត់ដេរ។ ពីព្រោះកាលពីមុននៅក្នុងភូមិនោះ មានជាងកាត់ដេរម្នាក់នៅក្នុងភូមិនោះ ប៉ុន្តែបច្ចុប្បន្នជាងកាត់ដេរនោះ បានជរាទៅហើយ ដូច្នេះស្ត្រីរងគ្រោះក៏ចេះជំនាញកាត់ដេរដែរ ធ្វើឱ្យនាងអាចចាប់មុខរបរកាត់ដេរនៅក្នុងភូមិនោះបាន ដើម្បីទទួលប្រយោជន៍ពីតម្រូវការរបស់អ្នកភូមិ»។
បើទោះបីជាមានការអះអាងពីស្ត្រីខ្មែរខ្លះបែបនេះក្តី ក៏មន្ត្រីរដ្ឋាភិបាល បដិសេធថា គេនៅមិនទាន់បានទទួលព័ត៌មានទាំងនោះនៅឡើយទេ។
អនុប្រធានអចិន្ត្រៃយ៍គណៈកម្មាធិការ ប្រយុទ្ធប្រឆាំងការជួញដូរមនុស្ស នៃក្រសួងមហាផ្ទៃ អ្នកស្រី ជូ ប៊ុនអេង ធ្លាប់ប្រាប់វិទ្យុអាស៊ីសេរី កាលពីថ្ងៃទី៣០ ខែតុលាថា កន្លងទៅអ្នកស្រី ក៏ធ្លាប់ជួបពិភាក្សាជាមួយសមត្ថកិច្ចចិនជុំវិញបញ្ហានេះ ។ ក៏ប៉ុន្តែសមត្ថកិច្ចចិនបដិសេធថា មិនមានករណីជួញដូរស្ត្រីខ្មែរ បង្ខំឱ្យរៀបការនៅប្រទេសចិនទេ គឺមានតែស្ត្រីខ្មែរ ស្ម័គ្រចិត្តទៅរៀបការនិងព្រមធ្វើលិខិតអាពាហ៍ពិពាហ៍ជាមួយបុរសជនជាតិចិនដោយខ្លួនឯង។ ចំណែកឯអំពើហិង្សាវិញគឺគ្រាន់តែជាជម្លោះនៅក្នុងគ្រួសារ។
អ្នកស្រី ជូ ប៊ុនអេង៖ «ខ្ញុំមិននិយាយថាអត់មានទាំងអស់នោះទេ។ មួយចំនួនក៏អាចមានគេនាំស្រ្តីខ្មែរទៅប្រទេសចិនតាមរយៈការជួលជាលុយដែរ។ ក៏ប៉ុន្តែក្នុងករណីជាទូទៅគឺស្ត្រីខ្មែរដែលទៅប្រទេសចិន ភាគច្រើនតែងមានគ្នា សាច់ញាតិឬក៏បងប្អូននៅឯប្រទេសចិនស្រាប់ បានហៅឱ្យទៅដោយគេបានសន្យាថា នឹងជួយរកប្ដីក្នុងគ្រួសារណាល្អឱ្យជាដើម។ បន្ទាប់ពីរៀបការនិងចុះលិខិតអាពាហ៍ពិពាហ៍ជាមួយគ្រួសារចិនរួចហើយ ដល់តែពេលមានអំពើហិង្សាក្នុងគ្រួសារ គឺសមត្ថកិច្ចចិន គេប្រើពាក្យថា គឺជាបញ្ហាជម្លោះគ្រួសារប៉ុណ្ណោះ»។
ក្រសួងការបរទេសអាមេរិក បានដាក់ចំណាត់ថ្នាក់លេខ៣ ឱ្យកម្ពុជាដែលជាចំណាត់ថ្នាក់ទាប ក្នុងការប្រយុទ្ធប្រឆាំងនិងអំពើជួញដូរមនុស្ស ពីរឆ្នាំជាប់គ្នា ក្នុងឆ្នាំ២០២៣ និងឆ្នាំ២០២៤។
កាលពីពាក់កណ្ដាលខែកក្កដា ឆ្នាំ២០២៤កន្លងទៅ ក្រសួងការបរទេសអាមេរិកបានចេញរបាយការណ៍ដោយចាត់ទុកថា រដ្ឋាភិបាលកម្ពុជាមិនបានបំពេញតាមស្តង់ដារ នៃកិច្ចខិតខំប្រឹងប្រែងលើការលុបបំបាត់អំពើជួញដូរមនុស្សទេ ដោយសារតែអំពើពុករលួយរបស់មន្ត្រីជាន់ខ្ពស់ក្នុងជួររដ្ឋាភិបាលមួយចំនួន បានបង្កើតឱ្យមានភាពស្មុគស្មាញក្នុងការបង្ក្រាបអំពើជួញដូរមនុស្ស ដែលនៅតែផ្ដល់ឱកាសឱ្យអំពើឧក្រិដ្ឋកម្ម ជួញដូរមនុស្សនៅតែរីករាលដាលនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
អត្ថបទពេញនិយម
សិទ្ធិមនុស្ស
