ក្រុមគ្រួសារលោក រ៉ាត់ រត្នមុនី តវ៉ាមុខស្ថានទូតរុស្ស៊ីជាលើកទី ៦ នៅថ្ងៃទី២០ កុម្ភៈ ដើម្បីសុំឱ្យរដ្ឋាភិបាលរុស្ស៊ីជួយអន្តរាគមន៍ឱ្យមានការដោះលែងសកម្មជនសិទ្ធិការងាររូបនេះ។ ដូចសព្វដង ស្ថានទូតរុស្ស៊ីមិនបានចេញមកជួបក្រុមគ្រួសារលោក រ៉ាត់ រត្នមុនី ឡើយ ខណៈការតវ៉ាធ្វើឡើងដោយស្ងៀមស្ងាត់ នៅម្ខាងផ្លូវមុខទូតរុស្ស៊ី។
ភរិយាលោក រ៉ាត់ រត្នមុនី គឺអ្នកស្រី ឡុង គីមហ៊ាង ថ្លែងប្រាប់អាស៊ីសេរីថា ទោះបីជាការតវ៉ាច្រើនលើកមកនេះ មិនទាន់ទទួលបានលទ្ធផលអ្វីក៏ដោយ ក៏អ្នកស្រីមិនបញ្ឈប់សកម្មភាពនេះដែរ ព្រោះអ្នកស្រីយល់ថា រដ្ឋាភិបាលរុស្ស៊ីត្រូវតែមានចំណែកទទួលខុសត្រូវលើរឿងនេះ ដោយសារក្រុងមូស្គូ (Moscow) ជាអ្នកបង្កើត និងគាំទ្រសារព័ត៌មាន RT (Russia Today)។ អ្នកស្រីបន្តថា ភាពយន្តឯកសារស្តីពីការជួញដូរផ្លូវភេទ ដែលស្វាមីអ្នកស្រីបានជួយផលិតឱ្យសារព័ត៌មាន RT នោះ គឺជារឿងពិត ហើយស្វាមីអ្នកស្រីមិនបានប្រព្រឹត្តកំហុសដូចការចោទប្រកាន់របស់អាជ្ញាធររបបក្រុងភ្នំពេញនោះឡើយ៖ «រឿងដែលគាត់បកប្រែសម្របសម្រួលឱ្យកាសែតរុស្ស៊ីហ្នឹង ជាខ្សែភាពយន្តឯកសារដែលបង្ហាញពីជីវិតរបស់ក្មេងស្រីក្រីក្រកម្ពុជា ដែលប្រឹងប្រែងដើម្បីរស់នៅក្នុងសម័យបច្ចុប្បន្ននេះតែប៉ុណ្ណោះ ហើយទាមទារឱ្យមានការដោះស្រាយ និងអន្តរាគមន៍។ បើនៅតែបន្តការឃុំឃាំងប្ដីខ្ញុំបែបនេះ វាបង្ហាញឱ្យឃើញថា រដ្ឋាភិបាលកម្ពុជាវាយប្រហារទៅលើកាសែតអន្តរជាតិ ជាពិសេស គឺកាសែត RT ហើយក៏បង្ហាញឱ្យឃើញថា រដ្ឋាភិបាលកម្ពុជាមិនបានឱ្យតម្លៃទៅរដ្ឋាភិបាលរុស្ស៊ីទេ ហើយជាការប្រមាថមើលងាយពីរដ្ឋាភិបាលកម្ពុជាទៅកាន់រដ្ឋាភិបាលរុស្ស៊ី ព្រោះ RT តំណាងឱ្យពលរដ្ឋរុស្ស៊ី ហើយក៏តំណាងឱ្យរដ្ឋាភិបាលរុស្ស៊ីដែរ»។
ប្រធានសហព័ន្ធសហជីពកម្មករសំណង់កម្ពុជា លោក រ៉ាត់ រត្នមុនី បានរងការចោទប្រកាន់ពីបទ “ញុះញង់ឱ្យមានការរើសអើង” ដែលប្រឈមនឹងការជាប់ពន្ធនាគាររហូតដល់ ៣ ឆ្នាំ ប្រសិនបើតុលាការសម្រេចឱ្យលោកមានទោស។ អាជ្ញាធររបបក្រុងភ្នំពេញបានចោទសកម្មជនសិទ្ធិការងាររូបនេះ ថាបានឱ្យលុយប្រភព ដើម្បីនិយាយប្រឌិតសាច់រឿងក្នុងភាពយន្តឯកសារជួញដូរផ្លូវភេទ ដែលមានចំណងជើងថា “ម្តាយខ្ញុំ លក់ខ្ញុំ” ដែលលោកបានជួយផលិតឱ្យសារព័ត៌មាន RT (Russia Today) របស់រុស្ស៊ី។
លោកបានជាប់ឃុំក្នុងពន្ធនាគារព្រៃសអស់រយៈពេលជាង ២ ខែមកហើយ ដោយតុលាការក្រុងភ្នំពេញ និងសាលាឧទ្ធរណ៍បានច្រានចោលបណ្ដឹងសុំនៅក្រៅឃុំរបស់មេធាវី ក្រោមហេតុផលថា ដើម្បីរំលត់ក្តីបារម្ភពាក់ព័ន្ធនឹងការគាបសង្កត់សាក្សី ឬជនរងគ្រោះ បង្ការបទល្មើសកុំឱ្យកើតជាថ្មី និងរក្សារូបលោកទុកឱ្យតុលាការចាត់ការតាមនីតិវិធី។
មេធាវីសមាគម អាដហុក (ADHOC) លោក សំ ទិត្យសីហា ថ្លែងថា ខាងសហមេធាវីកំពុងរង់ចាំសេចក្ដីសម្រេចរបស់តុលាការកំពូលជុំវិញបណ្ដឹងសុំនៅក្រៅរបស់លោក រ៉ាត់ រត្នមុនី ក្រោយដាក់បណ្ដឹងសាទុក្ខ កាលពីថ្ងៃទី៦ កុម្ភៈកន្លងទៅ។ លោកបន្តថា ខាងមេធាវីបានត្រៀមខ្លួនរួចហើយជាមួយភស្តុតាងដោះបន្ទុកគ្រប់គ្រាន់ ហើយលោករំពឹងថា តុលាការកំពូលនឹងអនុញ្ញាតឱ្យកូនក្ដីរបស់លោកបាននៅក្រៅឃុំ៖ «លោក រ៉ាត់ រត្នមុនី ដែលជាជនត្រូវចោទហ្នឹង គឺគាត់គ្មានឥទ្ធិពលណាមួយទៅធ្វើឱ្យប៉ះពាល់ដល់ដំណើរការរឿងក្តីនេះទេ។ ចំណុចមួយទៀតទាក់ទងទៅនឹងការគំរាមកំហែង ឬក៏គាបសង្កត់ទៅលើសាក្សី ឬក៏ទៅលើជនពាក់ព័ន្ធណាមួយ គាត់គ្មានលទ្ធភាពនោះទេ។ ចំណុចមួយទៀត គឺគាត់ជាមនុស្សមួយសំខាន់ក្នុងការជួយទំនុកបម្រុងក្រុមគ្រួសារ»។
អ្នកស្រី ឡុង គីមហ៊ាង យល់ថា អាជ្ញាធរហាក់ព្យាយាមដាក់បន្ទុកទៅលើស្វាមីអ្នកស្រី ដែលត្រឹមតែជាអ្នកបកប្រែ និងសម្របសម្រួលការចុះថតវីដេអូរបស់ក្រុមការងារសារព័ត៌មាន RT។ អ្នកស្រីយល់ឃើញបែបនេះ ព្រោះមកទល់នឹងពេលនេះ អាជ្ញាធរមិនបានរកោះហៅអ្នកពាក់ព័ន្ធផ្សេងទៀត ជាពិសេសភាគីសារព័ត៌មាន RT ឱ្យមកឆ្លើយបំភ្លឺពីដំណើររឿងនៃការផលិតភាពយន្តឯកសារ “ម្តាយខ្ញុំ លក់ខ្ញុំ” នោះនៅឡើយទេ។
អ្នកស្រីបញ្ជាក់ថា អ្នកស្រីកំពុងរង់ចាំការសម្រេចរបស់តុលាការកំពូលជុំវិញសំណើសុំនៅក្រៅឃុំរបស់ស្វាមី មុននឹងពិចារណាក្នុងការដាក់បណ្ដឹងសុំអន្តរាគមន៍ករណីនេះទៅខុទ្ទកាល័យលោក ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។