ម្តាយ និងមេធាវីការពារក្តីសង្ឃឹមថា សាលាឧទ្ធរណ៍ភ្នំពេញ នឹងទម្លាក់ចោលការចោទប្រកាន់ដែលគ្មានមូលដ្ឋានលើក្មេងប្រុស កាក់ សុវណ្ណច្ឆ័យ ដើម្បីផ្តល់យុត្តិធម៌ និងកុំឲ្យប៉ះពាល់អនាគតរបស់គាត់។ ក្តីសង្ឃឹមនេះ គឺបន្ទាប់ពីតុលាការជាន់ខ្ពស់មួយនេះ បានបើកសវនាការលើបណ្តឹងឧទ្ធរណ៍នៅព្រឹកថ្ងៃទី១៧ ខែកុម្ភៈ ហើយគ្រោងនឹងប្រកាសសាលដីកានៅថ្ងៃទី១៤ ខែមីនា ខាងមុខ។
ប្រធានក្រុមប្រឹក្សាជំនុំជម្រះសាលាឧទ្ធរណ៍ភ្នំពេញលោក ងួន រតនា នៅព្រឹកថ្ងៃទី១៧ ខែកុម្ភៈ បានបើកសវនាការអសាធារណៈលើបណ្តឹងឧទ្ធរណ៍របស់ក្មេងប្រុស កាក់ សុណ្ណច្ឆ័យ ដែលមិនសុខចិត្តចំពោះសាលក្រមរបស់សាលាដំបូងរាជធានីភ្នំពេញ ដែលបានផ្តន្ទាទោសរូបគាត់ឲ្យជាប់ពន្ធនាគាររយៈពេល៨ ខែ ប៉ុន្តែតម្រូវឲ្យអនុវត្តទោស ៤ ខែកន្លះ ពីបទញុះញង់ និងពីបទប្រមាថមន្ត្រីរាជការសាធារណៈតាមបណ្តាញសង្គមហ្វេសប៊ុក (Facebook) និងតេឡេក្រាម (Telegram)។
ម្តាយរបស់ក្មេងប្រុស កាក់ សុវណ្ណច្ឆ័យ គឺលោកស្រី ព្រុំ ចាន់ថា ថ្លែងថា ក្នុងពេលសវនាការតុលាការ បានអានសំណុំរឿង និងបានចោទសួរកូនប្រុសរបស់លោកស្រីថា តើរូបគេបានប្រព្រឹត្តអំពើញុះញង់ និងជេរប្រមាថមន្ត្រីរាជការសាធារណៈមែនឬយ៉ាងណា? ពេលនោះ កាក់ សុវណ្ណច្ឆ័យ ឆ្លើយតបថា គាត់គ្មានបំណងញុះញង់និងប្រមាថមន្ត្រីរាជការសាធារណៈនោះទេ ប៉ុន្តែមានសកម្មជនគណបក្សប្រជាជនកម្ពុជាម្នាក់រស់នៅប្រទេសកាណាដា (Canada) បានទាញ (Add) គាត់ចូលក្នុងគ្រុប (Group) តេឡេក្រាមហើយបានជេរប្រមាថឪពុកម្តាយរបស់គាត់ ទើបបណ្តាលឲ្យគាត់ខឹងនិងជេរតបទៅវិញ។ ចំពោះការបង្ហោះរូបភាពលោកនាយករដ្ឋមន្ត្រី ហ៊ុន សែន លើបណ្តាញសង្គមហ្វេសប៊ុកវិញ កាក់ សុវណ្ណច្ឆ័យ អះអាងថា គាត់គ្រាន់តែចែកចាយបន្តពីហ្វេសប៊ុកអ្នកដទៃប៉ុណ្ណោះ។
លោកស្រី សង្ឃឹមថា សាលាឧទ្ធរណ៍ នឹងសម្រេចឲ្យកូនប្រុសរបស់លោកស្រី រួចផុតពីការចោទប្រកាន់ នៅពេលប្រកាសសាលដីកានៅថ្ងៃទី១៤ ខែមីនា ខាងមុខ៖ «ខ្ញុំសំណូមពរឲ្យតុលាការ ទម្លាក់រាល់ការចោទទាំងអស់ទៅ ព្រោះគាត់ជាក្មេងហើយណាមួយ គាត់គ្មានកំហុសអីទាំងអស់។ ចាប់ប៉ាគាត់ដាក់ពន្ធនាគារ គប់គាត់បែកក្បាល ឃុំគាត់៤៨ម៉ោង ពេលគាត់ចូលរើសទង់ជ័យនោះ បើគិតទៅវាជាសេរីភាពរបស់ក្មេង ប៉ុន្តែនេះយើងជាមនុស្សចាស់ៗអស់ទៅហើយ មកចោទចឹងវាអត់សមរម្យទេ។ ធម្មតា ក្មេងគាត់រងភាពអយុត្តិធម៌ តែងតែមានការនិយាយខ្លះហើយ ដូច្នេះមន្ត្រីសាធារណៈ គួរតែទទួលយកដើម្បីកែទម្រង់ខ្លួនឯងឬកែតម្រូវខ្លួនឯង ទៅ មិនមែនចាប់គាត់ដាក់ពន្ធនាគារចឹងទេ វាជាអំពើអយុត្តិធម៌ទាំងស្រុងហើយ»។
លោកស្រី ព្រុំ ចាន់ថា ឲ្យដឹងដែរថា ក្នុងពេលសវនាការនោះ ព្រះរាជអាជ្ញាសាលាឧទ្ធរណ៍ ក៏បានជួយសំណូមពរដល់ចៅក្រមឲ្យពិចារណាលើកលែងការចោទប្រកាន់លើ កាក់ សុវណ្ណច្ឆ័យ ដែរ ព្រោះយុវជន គឺជាទំពាំងស្នងឬស្សី។ ការសំណូមពរនេះ គឺផ្ទុយពីព្រះរាជអាជ្ញារងនៅសាលាដំបូងរាជធានីភ្នំពេញ គឺលោក ហុង គឹមសាន ដែលព្យាយាមដាក់បន្ទុកលើក្មេងប្រុស កាក់ សុវណ្ណច្ឆ័យ។
មេធាវីការពារក្តីឲ្យក្មេងប្រុស កាក់ សុវណ្ណច្ឆ័យ គឺលោក សំ សុគង់ យល់ថា ផ្អែកតាមនីតិវិធីច្បាប់ និងអង្គហេតុ តុលាការជាន់ខ្ពស់ គួរតែលុបចោលសាលក្រមរបស់សាលាដំបូងរាជធានីភ្នំពេញ ដែលផ្តន្ទាទោសកូនក្តីរបស់លោក និងប្រគល់វត្ថុចាប់យកកន្លងមក ឲ្យគាត់បានប្រើប្រាស់វិញ៖ «ចំពោះការយល់ឃើញរបស់មេធាវី ដោយសារតែកូនក្តីនេះ ជាអនីតិជនហើយគាត់មានប្រវត្តិកើតជំងឺអូទីហ្សឹមហើយទាក់ទងនឹងការប្រព្រឹត្ត របស់គាត់នេះ គាត់មិនយល់អំពីអង្គហេតុ ក៏ដូចជាព្យៈសនកម្មផ្សេងៗ គឺប្រព្រឹត្តនៅពេលដែលគាត់មានបញ្ហាខួក្បាលហ្នឹង បើយោងតាមក្រមព្រហ្មទណ្ឌ មិនត្រូវទទួលខុសត្រូវព្រហ្មទណ្ឌទេ ហើយចំណុចទី២ដើម្បីគិតអំពីផលប្រយោជន៍អនីតិជន ជាពិសេសប្រវត្តិនៃការផ្តន្ទាទោស គឺសាលាឧទ្ធរណ៍ គួរតែពិចារណាដើម្បីសម្រេចឲ្យកូនក្តីខ្ញុំរួចផុតពីបទចោទ»។
ក្មេងប្រុស កាក់ សុវណ្ណច្ឆ័យ អាយុ១៧ឆ្នាំ ត្រូវបានតុលាការដោះលែងពីពន្ធនាគារ កាលពីថ្ងៃទី១០ ខែវិច្ឆិកា ឆ្នាំ២០២១ ក្រោយជាប់ពន្ធនាគារព្រៃស អស់រយៈពេល៤ខែកន្លះ ពីបទញុះញង់ និងបទប្រមាថមន្ត្រីរាជការសាធារណៈ ពាក់ព័ន្ធនឹងការបង្ហោះសារតាមបណ្តាញសង្គមហ្វេសប៊ុក(Facebook)និងតេឡេក្រាម(Telegram)។ ថ្វីដ្បិតតែត្រូវបានដោះលែងក្តី តុលាការក្រុងភ្នំពេញ បានដាក់ក្មេងប្រុសរូបនេះឱ្យស្ថិតក្រោមការព្យួរទោសសាកល្បងរយៈពេល២ឆ្នាំ ដោយតម្រូវឱ្យបង្ហាញខ្លួននៅចំពោះមុខតុលាការ គ្រប់ពេលដែលត្រូវបានកោះហៅ ឬជូនដំណឹងទៅតុលាការ និងត្រូវសុំការអនុញ្ញាត ប្រសិនបើផ្លាស់ប្ដូរអាស័យដ្ឋាន និងចង់ចាកចេញពីប្រទេស ព្រមទាំងដាក់លក្ខខណ្ឌមួយចំនួនទៀត។
ប្រធានសមាគមការពារសិទ្ធិមនុស្សអាដហុកលោក នី សុខា មានប្រសាសន៍ថា តុលាការ គួរតែលើកលែងការចោទប្រកាន់និងផ្តល់សេរីភាពពេញលេញដល់ក្មេងប្រុស កាក់ សុវណ្ណច្ឆ័យ ឡើងវិញ ដោយមិនគួរបន្តនីតិវិធីទៀតនោះទេ ដើម្បីកុំឲ្យមានការរិះគន់លើប្រព័ន្ធតុលាការថែមទៀត៖ «តុលាការ គួរតែពិចារណាកុំយកបញ្ហាក្តីនេះ ទៅដោះស្រាយនាំឲ្យជារឿងអំពល ឬកង្វល់នៅក្នុងសង្គមទេ ជារឿងដែលល្អ ព្រោះករណីនេះ វាអត់មានរឿងអីទាល់តែសោះ ។បើនិយាយឲ្យមែនទែនទៅ វាជារឿងមួយគ្រាន់តែគាត់អនុវត្តនូវសិទ្ធិសេរីភាពរបស់គាត់នៅក្នុងការបញ្ចេញមតិនៅក្នុងការបញ្ចេញទស្សនៈ ឬក៏នៅក្នុងការដែលគាត់មិនសប្បាយចិត្តនៅពេលដែលគាត់មានបញ្ហា។ មិនមែនតែកុមារ កាក់ សុវណ្ណច្ឆ័យ មួយទេ ប្រជាពលរដ្ឋទូទៅ នៅពេលគាត់មិនសប្បាយចិសត្តទៅនឹងអ្នកដឹកនាំ គឺលោកតែងតែរិះគន់ ព្រោះនេះជារបៀបរបបនៅក្នុង ការរស់នៅក្នុងសង្គមប្រជាធិបតេយ្យដែលគេបើកសិទ្ធិសេរីភាពឲ្យប្រជាពលរដ្ឋ»។
ក្មេងប្រុស កាក់ សុវណ្ណច្ឆ័យ គឺជាកូនរបស់សកម្មជនបក្សប្រឆាំងគឺលោក កាក់ កុម្ភារ ដែលបច្ចុប្បន្នកំពុងជាប់ពន្ធនាគារព្រៃស ក្រោមបទចោទ «រួមគំនិតក្បត់» និងបទ «ញុះញង់» ខណៈអ្នកស្រី ព្រំ ចាន់ថា ដែលជាម្ដាយ តែងតែសកម្មក្នុងការចេញតវ៉ាដោយអហិង្សា ដើម្បីទាមទារឱ្យដោះលែងប្ដី និងសកម្មជនគណបក្សសង្គ្រោះជាតិដទៃទៀតដែលកំពុងជាប់ឃុំ។ ក្មេងប្រុសរូបនេះ ក៏តែងតែចេញតវ៉ាជាមួយម្តាយដែរ ហើយបានធ្វើឲ្យគាត់ទទួលរងគ្រោះផ្ទួនៗ។
កាលពីដើមខែតុលា ឆ្នាំ២០២០ អាជ្ញាធររដ្ឋាភិបាល ធ្លាប់បានចាប់ឃុំខ្លួន និងប្រើហិង្សាសួរចម្លើយ អស់រយៈពេល៤៨ម៉ោងដោយសារគាត់ចូលទៅប្រមូលទង់គណបក្សសង្គ្រោះជាតិនៅឯទីស្នាក់ការកណ្ដាលគណបក្សនេះ។ បន្ទាប់មកនៅខែមេសា ឆ្នាំ២០២១ កាក់ សុវណ្ណច្ឆ័យ ត្រូវបានជនមិនស្គាល់មុខពីរនាក់ជិះម៉ូតូតាមវាយគាត់ដោយដុំឥដ្ឋបណ្តាលឲ្យរបួសក្បាលធ្ងន់ធ្ងរ។សមត្ថកិច្ចនៅមិនទាន់ចាប់បានជនដៃដល់ណាម្នាក់យកមកផ្ដន្ទាទោសតាមច្បាប់ឡើយ។
ក្រុមអង្គការជាតិ និងអន្តរជាតិ ចាត់ទុកករណីទាំងនេះ គឺជាការគំរាមកំហែង ការយាយី និងជាការធ្វើទុក្ខបុកម្នេញផ្នែកនយោយបាយលើគ្រួសាររបស់សកម្មជនបក្សប្រឆាំង។ ក្រុមអង្គការជាតិ និងអន្តរជាតិ ទាមទារឲ្យតុលាការនិងរដ្ឋាភិបាលលោក ហ៊ុន សែន បញ្ឈប់ការយាយីជាបន្ទាន់ និងទម្លាក់ចោលការចោទប្រកាន់លើសកម្មជននយោបាយ សមាជិកគ្រួសារ ព្រមទាំងអ្នករិះគន់ឲ្យមានសេរីភាពឡើងវិញ ព្រោះអ្នកទាំងនោះ ពុំបានប្រព្រឹត្តខុសច្បាប់ឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។