"កម្ពុជា​ត្រូវ​ចាត់​វិធានការ​ជាក់​លាក់​ការពារ​និង​លើក​កម្ពស់​សិទ្ធិ​ស្មើគ្នា​រវាង​អ្នក​ស្រឡាញ់​ភេទ​ដូចគ្នា"

ដោយ ម៉ៅ សុធានី
2022.04.30
Share on WhatsApp
Share on WhatsApp
"កម្ពុជា​ត្រូវ​ចាត់​វិធានការ​ជាក់​លាក់​ការពារ​និង​លើក​កម្ពស់​សិទ្ធិ​ស្មើគ្នា​រវាង​អ្នក​ស្រឡាញ់​ភេទ​ដូចគ្នា" ក្រុម​អ្នក​ស្រលាញ់​ភេទ​ដូច​គ្នា​សម្ដែង​សិល្បៈ​ក្នុង​កម្មវិធី សប្ដាហ៍​មោទនភាព​អ្នក​ស្រឡាញ់​ភេទ​ដូច​គ្នា​នៅ​កម្ពុជា កាល​ពី​ថ្ងៃ​​ទី​១២ ខែ​ឧសភា ឆ្នាំ​២០១៧ នា​រាជធានី​ភ្នំពេញ។
RFA/Leng Maly

មជ្ឈមណ្ឌល​សិទ្ធិមនុស្ស​កម្ពុជា អំពាវនាវ​ដល់​រដ្ឋាភិបាល​កម្ពុជា ត្រូវ​ចាត់​វិធានការ​ជាក់​លាក់ ដើម្បី​ការពារ​និង​លើក​កម្ពស់​សិទ្ធិ​ស្មើគ្នា រវាង​អ្នក​ស្រឡាញ់​ភេទ​ដូចគ្នា។

ការ​លើក​ឡើង​នេះ ធ្វើឡើង​បន្ទាប់ពី​រដ្ឋាភិបាល​កម្ពុជា បាន​យល់​ព្រម​ទទួល​យក​អនុសាសន៍​៩​ចំណុច របស់​អង្គការ​សហប្រជាជាតិ ទាក់ទង​នឹង​និន្នាការ​ភេទ និង​អត្តសញ្ញាណ​យេនឌ័រ កាល​ពី​ឆ្នាំ​២០១៩ កន្លង​ទៅ។

មជ្ឈមណ្ឌល​សិទ្ធិមនុស្ស​កម្ពុជា (CCHR) កាលពី​ថ្ងៃទី​២៩ ខែ​មេសា បាន​ចងក្រង​លំអិត​ដោយ​ផ្តោត​សំខាន់​លើ​ការ​វិវឌ្ឍន៍​រយៈពេល​៣​ឆ្នាំ ផ្នែក​វិស័យ​និន្នាការ​ភេទ អត្តសញ្ញាណ​យេនឌ័រ និង​ការ​បង្ហាញ​ទំនោរ​យេនឌ័រ។ CCHR ឲ្យ​ដឹង​ថា ទោះបីជា​រដ្ឋាភិបាល​កម្ពុជា បាន​បង្កើន​វឌ្ឍនភាព លើ​ការ​លើកកម្ពស់ និង​ការពារ​សិទ្ធិ​របស់​អ្នក​ស្រឡាញ់​ភេទ​ដូចគ្នា តាំងពី​ឆ្នាំ​២០១៩ មក​ក្តី ក៏ប៉ុន្តែ​មក​ដល់​ពេល​នេះ រដ្ឋាភិបាល នៅ​ពុំ​ទាន់​មាន​វិធានការ​ជាក់លាក់ ក្នុង​ការ​ធ្វើ​កំណែ​ទម្រង់​ច្បាប់ ដើម្បី​ឆ្លើយតប​ទៅ​នឹង​អនុសាសន៍​ដែល​យល់ព្រម​ទទួលយក​ទាំងនោះ ដើម្បី​ធានា​និង​ការពារ​សិទ្ធិ​អ្នក​ស្រឡាញ់​ភេទ​ដូចគ្នា​នៅឡើយ​ទេ។

បញ្ហា​កង្វះខាត​ទាំងនោះ​រួមមាន រដ្ឋាភិបាល នៅ​ពុំ​ទាន់​ធ្វើ​វិសោធនកម្ម មាត្រា​៤៥ នៃ​រដ្ឋធម្មនុញ្ញ ដែល​រារាំង​សមភាព​អាពាហ៍ពិពាហ៍​សម្រាប់​អ្នក​ស្រឡាញ់​ភេទ​ដូចគ្នា នៅ​ពុំ​ទាន់​អនុម័ត ច្បាប់​ទទួល​ស្គាល់​អ្នក​ប្តូរ​ភេទ ឬ​យេនឌ័រ ច្បាប់​ហាមប្រាម​ការរើសអើង​និន្នាការ​ភេទ អត្តសញ្ញាណ​យេនឌ័រ ជាដើម​។ បញ្ហា​ទាំង​នេះ​ហើយ ដែល​ជា​មូលហេតុ​នាំ​ឲ្យ​អ្នក​ស្រឡាញ់​ភេទ​ដូចគ្នា បន្ត​ប្រឈម ការរើសអើង​ផ្នែក​ច្បាប់​និង​ក្នុង​ទម្រង់​ផ្សេងៗ​ក្នុង​សង្គម រួមមាន​ក្នុង​រង្វង់​គ្រួសារ នៅ​កន្លែង​ការងារ សាលារៀន និង​ក្នុង​វិស័យ​សុខាភិបាល​ជាដើម។

កាលពី​ខែ​កក្កដា ឆ្នាំ​២០១៩​កន្លង​ទៅ រដ្ឋាភិបាល​កម្ពុជា​បាន​យល់ព្រម​ទទួលយក​អនុសាសន៍​ចំនួន​១៧៣ ក្នុង​ចំណោម​អនុសាសន៍ ចំនួន​១៩៨ ពី​បណ្តា​ប្រទេស​ជា​សមាជិក​អង្គការសហប្រជាជាតិ​ចំនួន​៧៣​ប្រទេស​។ អនុសាសន៍​ទាំងនោះ ទាក់ទង​នឹង​វិស័យ​សិទ្ធិមនុស្ស បញ្ហា​សិទ្ធិ​ដីធ្លី សិទ្ធិ​ទទួល​បាន​ការ​ជំនុំជម្រះ ដោយ​យុត្តិធម៌ កិច្ចការពារ​អ្នកការពារ​សិទ្ធិមនុស្ស សិទ្ធិ​កុមារ សិទ្ធិ​ស្ត្រី សិទ្ធិ​និន្នាការ​ភេទ និង​អត្តសញ្ញាណ​យេនឌ័រ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។