ប្រពន្ធប្រធានសហជីពប្រចាំរោងចក្រ វីងស្តារ ស៊ូ ស្នើតុលាការខេត្តកំពង់ស្ពឺឱ្យដោះលែងប្តី
2024.03.04
ស្លាកសញ្ញារោងចក្រផលិតស្បែកជើង នៅខេត្តកំពង់ស្ពឺ។
រូប៖ ហ្វេសប៊ុក Wing Star Shoes Cambodia 2021-01-21
ប្រពន្ធប្រធានសហជីពប្រចាំរោងចក្រ វីងស្តារ ស៊ូ (Wing Stars Shoes Cambodia Co.,LTD.) ស្នើតុលាការខេត្តកំពង់ស្ពឺដោះលែងប្តីឱ្យមានសេរីភាព។ ចំណែកសហជីពឯករាជ្យ នៅតែចាត់ទុកករណីនេះថា មិនមែនជាការអនុវត្តច្បាប់នោះទេ តែជាករណីគំរាមកំហែង និងរំលោភលើសេរីភាពសហជីពនៅកន្លែងការងារ ដែលភាគីពាក់ព័ន្ធ រួមទាំងរដ្ឋាភិបាលផង ត្រូវធ្វើអន្តរាគមន៍ដោះស្រាយ។
គ្រួសារ និងសហជីពឯករាជ្យជំរុញដល់តុលាការខេត្តកំពង់ស្ពឺទម្លាក់ចោលការចោទប្រកាន់ និងដោះលែងតំណាងសហជីពប្រចាំរោងចក្រ វីងស្តារ ស៊ូ (Wing Stars Shoes)លោក ជា ចាន់ ឱ្យមានសេរីភាព និងស្នើឱ្យថៅកែក្រុមហ៊ុនបញ្ឈប់សកម្មភាពគំរាមកំហែង រំលោភបំពានលើសេរីភាពរបស់កម្មករ ដែលអនុវត្តសិទ្ធិធានាដោយច្បាប់។
ប្រពន្ធរបស់ប្រធានសហជីពកម្ពុជានៅរោងចក្រ វីងស្តារ ស៊ូ លោក ជា ចាន់ គឺលោកស្រី ឆែ ចាន់រ៉ា ប្រាប់វិទ្យុអាស៊ីសេរីក្រោយចូលសួរសុខទុក្ខប្ដី នៅពន្ធនាគារខេត្តកំពង់ស្ពឺ នៅព្រឹកថ្ងៃទី៤ ខែមីនាថា ប្តីលោកស្រីមានបញ្ហាសុខភាពគួរឱ្យបារម្ភជាខ្លាំង ដោយសារជំងឺទឹកនោមផ្អែមធ្វើទុក្ខ បន្ទប់ឃុំឃាំងតូចចង្អៀតសម្រាន្តមិនលក់ ហូបមិនបានគ្រប់គ្រាន់បណ្ដាលឱ្យស្លេកស្លាំងអស់កម្លាំងជាដើម។ លោកស្រីបន្តថា អ្វីដែលលោកស្រីកាន់តែខ្លោចចិត្ត គឺពេលឃើញប្តីរៀបរាប់រឿងរ៉ាវឈឺចាប់ ដែលអាជ្ញាធរចាប់វាយខ្នោះរុញបញ្ចូលឡាន ខណៈតុលាការចោទប្រកាន់ដាក់ពន្ធនាគារទាំងអយុត្តិធម៌ថែមទៀត។
ស្ត្រីវ័យ ៣២ឆ្នាំរូបនេះ កំពុងប្រកបមុខរបរលក់ដូរនៅផ្ទះបន្តិចបន្តួច ដោយត្រូវរ៉ាប់រងចិញ្ចឹមកូនតូចបីនាក់នៅក្នុងបន្ទុក ក្រោយពីប្តីជាមេគ្រួសារត្រូវជាប់ពន្ធនាគារ។ លោកស្រី ឆែ ចាន់រ៉ា ឱ្យដឹងថា កូនៗ តែងតែសួររកឪពុកជាប្រចាំ ប៉ុន្តែលោកស្រីបានត្រឹមតែលួចសម្រក់ទឹកភ្នែក និងកុហកប្រាប់ពួកគេថា ប្តីលោកស្រីកំពុងនៅរាជធានីភ្នំពេញ ដើម្បីត្រៀមប្រឡងទៅធ្វើរកប្រាក់នៅប្រទេសកូរ៉េ។
លោកស្រី ឆែ ចាន់រ៉ា៖ «និយាយទៅ បន្ទុកគ្រួសារ បើនិយាយវិញ នាំឱ្យទឹកភ្នែក ទឹកសំបោរទៀត អ៊ីចឹង ពិណាស់គាត់ជាប់ពន្ធនាការ២០ថ្ងៃហើយ គ្រួសារសុទ្ធតែស្នើឱ្យតុលាការដោះលែង ពីព្រោះគាត់រងនូវអយុត្តិធម៌ ដោះលែងឱ្យមកជួបជុំគ្រួសារ មកធ្វើការងារវិញ ដោយសារបើគាត់នៅហ្នឹង ខ្លាចគាត់ឈឺ ពីព្រោះគាត់មានជំងឺផ្ទាល់ខ្លួន»។
សមត្ថកិច្ចខេត្តកំពង់ស្ពឺបានឃាត់ខ្លួនលោក ជា ចាន់ នៅក្នុងរោងចក្រ វីងស្តារ ស៊ូ នៅក្នុងស្រុកគងពិសី កាលពីថ្ងៃទី១៥ ខែកុម្ភៈ ដោយគ្មានបញ្ជាក់ពីមូលហេតុ ឬបង្ហាញដីកាចាប់ខ្លួនឡើយ។ បន្ទាប់មកចៅក្រមស៊ើបសួរ នៃសាលាដំបូងខេត្តកំពង់ស្ពឺ នៅថ្ងៃទី១៨ ខែកុម្ភៈ បានចេញដីកាបង្គាប់ឱ្យឃុំខ្លួនប្រធានសហជីពកម្ពុជាប្រចាំរោងចក្រ វីងស្តារ ស៊ូ រូបនេះ ដាក់ពន្ធនាគារបណ្ដោះអាសន្នពីបទសមគំនិតក្នុងអំពើលួចសម្ភារៈ នៅក្នុងរោងចក្រ កាលអំឡុងឆ្នាំ២០២២ តាមបណ្ដឹងរបស់ថៅកែក្រុមហ៊ុន និងក្រោយពេលលោក ជា ចាន់ បានព្យាយាមបង្កើតសហជីពឯករាជ្យ ដើម្បីការពារសិទ្ធិរបស់កម្មករនៅកន្លែងធ្វើការ។
វិទ្យុអាស៊ីសេរីមិនអាចទាក់ទងនាយកក្រុមហ៊ុន វីងស្ដារ ស៊ូ ដើម្បីសុំការឆ្លើយតបរឿងនេះបានទេ នៅថ្ងៃទី៤ ខែមីនា។ ចំណែកអ្នកពាក្យអយ្យការអមសាលាដំបូងខេត្តកំពង់ស្ពឺ លោក ទិន សុចិត្រា និងអ្នកនាំពាក្យក្រសួងការងារលោក កត្តា អ៊ន វិទ្យុអាស៊ីសេរី ក៏មិនអាចទាក់ទងបានដែរ។
កាលពីពេលថ្មីៗ នេះ អង្គការសង់ត្រាល់ (CENTRAL) ចាត់ទុកការចោទប្រកាន់លោក ជា ចាន់ ថា ជាការរំលោភបំពាន និងគំរាមកំហែងធ្ងន់ធ្ងរលើសេរីភាពផ្នែកសហជីព ដែលធានាដោយច្បាប់ជាតិ និងអនុសញ្ញារបស់អង្គការអន្តរជាតិខាងការងារ (ILO) ព្រមទាំងក្រមសីលធម៌របស់ក្រុមហ៊ុនបញ្ជាទិញអាសិក ស្ដីពីធុរកិច្ច និងសិទ្ធិមនុស្ស នៅរោងចក្រ វីងស្ដារ ស៊ូ ដែលកំពុងដំណើរនៅប្រទេសកម្ពុជាបច្ចុប្បន្ន។
លើសពីនេះ អង្គការសង់ត្រាល់ថា ការស៊ើបអង្កេតផ្ទៃក្នុង ដែលធ្វើឡើងដោយក្រុមអ្នកច្បាប់បានរកឃើញថា ចាប់តាំងពីមានការបង្កើតសហជីពមូលដ្ឋានឯករាជ្យនៅក្នុងរោងចក្រ វីងស្ដារស៊ូ កាលពីដើមខែមករា ឆ្នាំ២០២៤ មក ការជ្រៀតជ្រែក និងភាពមិនប្រក្រតីជាច្រើនបានកើតឡើង ទាំងអំឡុងពេលបោះឆ្នោតបង្កើតសហជីព និងដំណើរការចុះឈ្មោះសមាជិកសហជីពថ្មីៗ។
ជុំវិញរឿងនេះ ប្រធានសហព័ន្ធសហជីពកម្ពុជា (CATU) អ្នកស្រី យ៉ាង សុភ័ណ្ឌ មានប្រសាសន៍ថា ការចាប់ខ្លួន និងចោទប្រកាន់លោក ជា ចាន់ ដាក់ពន្ធនាគារ ក្រោយពេលលោកបង្កើតសហជីព មិនមែនជាការអនុវត្តច្បាប់នោះទេ ប៉ុន្តែករណីនេះ ជាចេតនារបស់ថៅកែក្រុមហ៊ុនរៀបចំឡើងក្នុងគោលបំណងធ្វើទុក្ខបុកម្នេញលើមេដឹកនាំសហជីព ដែលការពារផលប្រយោជន៍របស់កម្មករ។
អ្នកស្រី យ៉ាង សុភ័ណ្ឌ៖ «ផ្ទុយទៅវិញ នៅពេលគាត់ប្រើប្រាស់សិទ្ធិសេរីភាព នៃការចងក្រងសហជីពត្រូវទទួលរងការគំរាមកំហែង ដោយប្រើប្រព័ន្ធតុលាការរឹតត្បិតសិទ្ធិសេរីភាពរបស់គាត់ ដើម្បីឱ្យចុះចាញ់ ឬដើរចេញពីវិថី ដែលគាត់មានសិទ្ធិ មានសេរីភាពក្នុងការចងក្រងសហជីព ចំណុចនេះ គឺជាការរំលោភបំពានសិទ្ធិរបស់សហជីពធ្ងន់ធ្ងរ។ អ៊ីចឹង ខ្ញុំឱ្យក្រសួងការងារចាត់វិធានការអនុវត្តទៅលើសិទ្ធិសេរីភាពរបស់សហជីពឱ្យកម្មករមានសិទ្ធិក្នុងការចងក្រងសហជីពឡើងវិញ»។
អង្គការសង្គមស៊ីវិល សហព័ន្ធសហជីពកម្ពុជា រួមជាមួយសហជីពសកល អ៊ិនដាសស្រ្ទី អល (IndustriAll Global Union) បានប្រតិកម្មជាបន្តបន្ទាប់ ដោយចាត់ទុកការចោទប្រកាន់នេះថា ជារឿងមិនពិត និងជាឧបាយកលបង្ក្រាបសហជីព ក្នុងគោលបំណងបញ្ឈប់សកម្មភាពរបស់សហជីពក្នុងស្រុក។ ពួកគេបានដាក់លិខិតទៅក្រុមហ៊ុនបញ្ជាទិញ ដើម្បីដាក់សម្ពាធដល់ភាគីក្រុមហ៊ុន វីងស្ដារ ស៊ូ ថា ត្រូវដកពាក្យបណ្ដឹង ហើយដោះលែងប្រធានសហជីព លោក ជា ចាន់ ជាបន្ទាន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- តុលាការចោទប្រកាន់ជំនួយការផ្ទាល់លោក ហ៊ុន សែន គឺលោក ដួង តារា ពីបទ «ឆបោក»
- អ្នកឃ្លាំមើល ស្នើអាជ្ញាធរឱ្យបង្ហាញការស៊ើបអង្កេតលើទីប្រឹក្សាលោក ហ៊ុន សែន ពាក់ព័ន្ធករណីទទួលលុយរត់ការឡើងតំណែង
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
