អ្នក​ស្រាវជ្រាវ​ប្រវត្តិសាស្រ្ត​ខ្មែរ​ក្រហម​ថា សហមេធាវី​ ខៀវ សំផន សុំមោឃៈភាព​ការផ្ដន្ទាទោស​កូនក្ដី​មួយជីវិត​ជា​រឿង​ប្រមាថ​ជនរង​គ្រោះ​

ដោយ ទីន ហ្សាការីយ៉ា
2021.08.17
Share on WhatsApp
Share on WhatsApp
អ្នក​ស្រាវជ្រាវ​ប្រវត្តិសាស្រ្ត​ខ្មែរ​ក្រហម​ថា សហមេធាវី​ ខៀវ សំផន សុំមោឃៈភាព​ការផ្ដន្ទាទោស​កូនក្ដី​មួយជីវិត​ជា​រឿង​ប្រមាថ​ជនរង​គ្រោះ​ លោក ខៀវ សំផន ដែលមានវ័យ៩១ឆ្នាំ (ឆ្នាំ២០២១) បានប្រឈមនឹងសវនាការលើបណ្តឹងសាទុក្ខនៅថ្ងៃទី២ ត្រូវនិងថ្ងៃទី១៧ ខែសីហា ឆ្នាំ២០២១។
រូប៖ ECCC

អ្នក​ស្រាវជ្រាវ​ប្រវត្តិសាស្រ្តខ្មែរ​ក្រហម​បាន​ហៅការ​ស្នើសុំ​របស់​សហមេធាវី​របស់​លោក ខៀវ សំផន ឲ្យ​ទម្លាក់​ចោល​ការ​ផ្ដន្ទាទោស​លោក ខៀវ សំផន មួយ​ជីវិត​នោះ​គឺ​ជា​​ការ​​ប្រមាថ​ដល់ជន​រង​គ្រោះ​រាប់​លាន​នាក់ ដែល​ស្លាប់​នៅ​ក្នុង​របប​ខ្មែរ​ក្រហម។

លោក ឆាំង យុ នាយក​នៃ​មជ្ឈមណ្ឌល​ឯកសារ​កម្ពុជាមាន​ប្រសាសន៍​ថា សាលាក្ដី​ខ្មែរ​ក្រហម​កាត់​ទោស​លោក​ខៀវ សំផន អស់​មួយ​ជីវិ​ត​នោះ ជា​រឿង​ត្រឹមត្រូវលោកបន្ថែម​ថាភស្ដុតាង​ជា​ច្រើន​ និង​គ្រប់គ្រាន់ ដែល​ខៀវ​ សំផន សម​នឹង​ទទួល​ទោស​ធ្ងន់ធ្ងរ​បែប​នេះ។ លោក​បញ្ជាក់ថា​ ភស្ដុតាង​នេះ ខៀវ សំផន មិន​អាច​ប្រកែក​បាន​ឡើយ៖ «មិនមែន​ជាការ​សម្រេច​ដោយ​គ្មាន​តម្លាភាព​នោះ​ទេ​ ខ្ញុំ​គិត​ថា មេធាវី​លើកឡើង​គ្រាន់​តែ​ជា​ទឡ្ហីករណ៍​មួយ ដើម្បី​បំភណ្ឌ​សាធារណមតិ តែជា​ក់ស្ដែង​នោះ ​គឺ​មាន​ភស្ដុតាង​រណ្ដៅសាកសព និង​កន្លែង​ធ្វើទារុណកម្ម​ជន​រងគ្រោះ» 

សវនាការ​របស់​អង្គជំនុំជម្រះ​តុលាការកំពូល​ក្នុង​ថ្ងៃទីពីរ​នេះ បាន​ផ្ដោត​ទៅ​លើ​ប្រធាន​បទ​រួមមាន​ ទឡ្ហីករណ៍​នៃបណ្ដឹងសាទុក្ខ​ពាក់ព័ន្ធទៅនឹង​យុត្តាធិការ​របស់​អង្គជំនុំជម្រះ​សាលា​ដំបូង និង​ទឡ្ហីករណ៍​នៃបណ្ដឹង​សាទុក្ខ​ពាក់​ព័ន្ធ​នឹង​បទ​ឧក្រិដ្ឋដែល​ ជនជាប់​ចោទ​ខៀវ សំផន ត្រូវ​សម្រេច​ដាក់​ពិរុទ្ធ។

សហមេធាវី​លោក ខៀវ សំផន បាន​ស្នើទៅ​អង្គជំនុំជម្រះ​តុលាការ​កំពូល​សាលាក្តី​ខ្មែរក្រហម​បដិសេធ​ចោល​សាលក្រម​ ដែល​សម្រេច​ផ្តន្ទាទោស​លោក​ ខៀវ សំផន អតីតប្រមុខរដ្ឋ​ក្នុង​របប​ខ្មែរក្រហម ដាក់​ពន្ធនាគារ​អស់មួយ​ជីវិត​ទុកជា​មោឃៈ។

លោក គង់ សំអ៊ុន សហមេធាវី​ការពារក្ដីឲ្យ​អតីត​មេដឹកនាំ​ខ្មែរ​ក្រហម​លោក ខៀវ សំផន បាន​ឲ្យ​អាស៊ី​សេរី​ដឹង​ថា មូលហេតុដែល​លោក​ស្នើសុំ​មោឃៈភាព​សាលក្រមរបស់​​សាលាដំបូង​នោះ ​ដោយ​សារ​តែ​សាល​ក្រម​ផ្តន្ទាទោស​កូនក្ដី​របស់​លោក​នេះ ធ្វើឡើង​មិន​ត្រឹមត្រូវ​តាម​ច្បាប់ម្យ៉ាង​ទៀត​សាលក្រម​នេះបាន​ចេញ​យឺត ក្រោយ​ពី​អង្គជំនុំជម្រះ​សាលាដំបូង​ប្រកាស​រហួត​ដល់​ទៅ ​៦ ​ខែ ដែល​ធ្វើ​ឲ្យប៉ះពាល់​សិទ្ធិ​របស់​លោក ខៀវ សំផន ក្នុងការ​ដាក់​ប្ដឹង​ឧទ្ធរណ៍​ «ពេល​ប្រកាស​សាលក្រម​អង្គ​ជំនុំ​ជម្រៈ​សាលាដំបូង​មិន​មាន​សាលក្រម​ប្រកាស​ទេ​ ដូចជា​អង្គហេតុសង្ខេប ​ដែល​ធ្វើ​ឲ្យ​ប៉ះពាល់​ដល់​សិទ្ធិ​ខៀវ សំផន តែបែ​ជា​បីបួនប្រាំខែមក​បែជា​ចេញ​សាលក្រម​មួយ​ទៀត។ អីចឹង​ហើយ​បាន​យើង​សុំធ្វើមោឃៈភាព​សាលក្រមនេះ»

ទោះជាយ៉ាងណាសហ​សហព្រះរាជអាជ្ញា​ច្រាន​ចោល​ការចោទប្រកាន់​នេះ​។ សហព្រះរាជអាជ្ញា​សាលាក្តី​ខ្មែរក្រហមអ្នកស្រី ជា លាង ​ថ្លែង​ក្នុង​សវនាការនៅថ្ងៃទី១៧ ខែសីហា​ថា ​ការជំទាស់​ទៅនឹង​សាលក្រម​អង្គ​ជំនុំជម្រះ​សាលាដំបូង​ គឺជាសិទ្ធិរបស់លោក ខៀវ សំផន។ តែ​ការជំទាស់​នេះ​មិន​ទទួលបានជោគជ័យ​ទេ ដោយសារតែ ការលើកឡើង​របស់​សាលក្រម ​ផ្អែកលើ​ភាពត្រឹមតាមច្បាប់ និង​ភ័ស្តុតាង​ច្រើនទៀត។

អតីត​ជន​រង​គ្រោះ​នៅក្នុង​របបខ្មែរក្រហម និង​ជាដើម​បណ្ដឹង​រដ្ឋប្បវេណីកញ្ញា សេង ធារី មាន​ប្រសាសន៍​ថា ការទាមទារ​របស់​សហមេធាវី​លោក ខៀវ សំផន យ៉ាង​ណា​នោះ គឺ​ជាសិ​ទ្ធិ ប៉ុន្តែវា មិន​អាច​កែ​ប្រែ​ប្រវត្តិសាស្រ្តបាន​ទេ ថា​លោក ខៀវ សំផន ជាមេដឹកនាំ​នៅក្នុ​ង​របប​ខ្មែរ​ក្រហម​ដែល​សម្លាប់​មនុស្ស​រាប់លាន​នាក់៖ «លោកវ​ ខៀវ សំផន ជាមេដឹកនាំ​ខ្មែរ​ក្រហម​កំពូល​ ប្រៀប​ធៀប​នឹង​លោក​ឌុច គ្រាន់តែ​ជា​ម​នុស្សតូចតាច​ទេ​ តែលោកទាំងពីរ​មាន​ដៃ​ប្រឡាក់​ឈាម​ដូចគ្នា»

សាលាក្តី​ខ្មែរក្រហម​សម្រេច​ផ្ដន្ទាទោស ​ប្រមុខ​រដ្ឋនៃ​របប​កម្ពុជា​ប្រជាធិបតេយ្យ លោក ខៀវ សំផន និង ​អនុលេខាបក្ស​កុម្មុយនិស្ត​កម្ពុជា លោក នួន ជា ឱ្យ​ជាប់​ពន្ធនាគារ​អស់​មួយ​ជីវិត ក្នុង​សំណុំ​រឿង​ ០០២ វគ្គ ២ កាល​ពី​ឆ្នាំ២០១៦ ។ ប៉ុន្តែលោក ខៀវ សំផន មិន​ទទួល​យកការ​សម្រេច​របស់​សាលដំបូង​នេះទេលោក​បាន​ប្ដឹង​ទាស់​ទៅ​តុលាការ​កំពូល​ទៀតសំណុំរឿង០០២​វគ្គ​២​នេះ ​តុលាការ​ខ្មែរ​ក្រហម​បាន​ចោទ​ប្រកាន់​លោក ខៀវ សំផន ពីបទ​បំពាន​ច្បាប់​ព្រហ្មទណ្ឌ​អន្តរជាតិ រួម​មាន អំពើ​អមនុស្សធម៌​ប្រឆាំង​មនុស្សជាតិ អំពើ​ប្រល័យ​ពួជសាសន៍​ប្រឆាំង​ជនជាតិចាម​ និង​វៀតណាម​ និង​បទឧក្រិដ្ឋកម្ម​សង្រ្គាម​ជា​ដើម។

សវនាការលើបណ្ដឹងសាទុក្ខនេះ នឹងបន្ដ​រហូតដល់ថ្ងៃព្រហស្បតិ៍ ទី១៩ ខែ សីហា ឆ្នាំ២០២១។ ក្នុង​ករណី​ចាំបាច់ អង្គជំនុំជម្រះ​តុលាការ​កំពូល ក៏បាន​ត្រៀមថ្ងៃបម្រុង​សម្រាប់​សវនាការ គឺ​ថ្ងៃសុក្រ ទី ២០ ខែសីហា និងចាប់ពីថ្ងៃ ច័ន្ទ ទី ២៣ ដល់ថ្ងៃ សុក្រ ទី២៧ ខែសីហា ឆ្នាំ២០២១៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល