ប្រជាពលរដ្ឋ៩នាក់ តំណាងឲ្យ១៣៥គ្រួសារនៅភូមិព្រែកខ្សាច់ ភូមិសំរុងតាកែវ និងភូមិយាយស៊ែន ឃុំព្រែកខ្សាច់ ស្រុកគីរីសាគរ ខេត្តកោះកុង ធ្វើដំណើរមករាជធានីភ្នំពេញដើម្បីដាក់ពាក្យបណ្ដឹងទៅស្ថាប័នជាតិ និងអន្តរជាតិឲ្យជួយអន្តរាគមន៍ដោះស្រាយទំនាស់ដីធ្លីពួកគាត់ជាមួយក្រុមហ៊ុន កោះកុង អែស អ៊ី ហ្សិត(KohKong S E Z) របស់លោកឧកញ៉ា លី យ៉ុងផាត់ នៅថ្ងៃទី២៤ ខែកក្កដា។
ស្ថាប័នដែលពួកគាត់គ្រោងដាក់ពាក្យប្ដឹងទាំងនោះរួមមាន ធនាគារពិភពលោក ការិយាល័យឧត្ដមស្នងការសហប្រជាជាតិទទួលបន្ទុកសិទ្ធិមនុស្ស សហគមន៍អឺរ៉ុប ក្រុមប្រឹក្សាអភិវឌ្ឍន៍កម្ពុជា និងអង្គភាពប្រឆាំងអំពើពុករលួយ។
លោក រៀម រុំ តំណាងពលរដ្ឋម្នាក់ ទទូចសុំឲ្យប្រមុខរដ្ឋាភិបាលជួយអន្តរាគមន៍ដោយសាររឿងនេះពុំមានការដោះស្រាយពីអាជ្ញាធរខេត្តកោះកុងឡើយ៖ «ពួកខ្ញុំចង់បានឲ្យក្រុមហ៊ុនមានដំណោះស្រាយជូនពួកខ្ញុំវិញ ហើយខ្ញុំសំណូមពរឲ្យសម្ដេចចុះអន្តរាគមន៍ជួយពួកខ្ញុំ១៣៥គ្រួសារផង»។
ទាក់ទងបញ្ហានេះដែរ អ្នកសម្របសម្រួលអង្គការលីកាដូ ប្រចាំ ខេត្តកោះកុងលោក អ៊ិន គង់ជិត បានឲ្យដឹងថា ករណីដែលធ្វើពលរដ្ឋឡើងតវ៉ានៅភ្នំពេញ ដោយសារពលរដ្ឋអស់ជំនឿលើអាជ្ញាធរ និងតុលាការខេត្ត ដោយពួកគាត់អះអាងថា ជាអ្នកកាន់ជើងខាងភាគីក្រុមហ៊ុន និងអ្នកមានអំណាច៖ «កន្លងមកដូចជានៅខេត្តកោះកុងវាមានបញ្ហាដីធ្លីធំ ហើយយើងឃើញរាជរដ្ឋាភិបាលបានចេញលិខិតបទបញ្ជាផ្សេងៗ ដើម្បីចូលរួមចំណែកដោះស្រាយអនុវត្តឲ្យបញ្ចប់បញ្ហាទំនាស់ដីធ្លី ប៉ុន្តែអាជ្ញាធរខេត្ត និងក្រុមហ៊ុនពុំដែលបានអនុវត្តនូវចំណុចណាមួយឲ្យបានជោគជ័យទេ ពួកគាត់អាជ្ញាធរខេត្តតែងតែលម្អៀងទៅរកក្រុមហ៊ុន»។
លោកបានបញ្ជាក់ទៀតថាកន្លងទៅរាជរដ្ឋាភិបាលបានចេញបទបញ្ជាលេខ ០១ និងលិខិតអន្តរក្រសួងលេខ១៧៧ របស់ក្រសួងកសិកម្ម និងលិខិតលេខ ២០៦ របស់ក្រសួងបរិស្ថាន ដោយឲ្យភាគីក្រុមហ៊ុន ដែលទទួលបានដីសម្បទានសេដ្ឋកិច្ចនានាត្រូវគោរពច្បាប់ និងអនុវត្តតាមរូបមន្តស្បែកខ្លា បើសិនជាទីតាំងដីសម្បទាននោះប៉ះពាល់លើដីអភិរក្ស និងដីសហគមន៍ពលរដ្ឋ ត្រូវជៀសវាងកុំឲ្យមានទំនាស់ និងធានាឲ្យបាននូវការអភិវឌ្ឍប្រកបដោយចិរភាព តម្លាភាព គណនេយ្យភាព និងប្រសិទ្ធភាព។
តែទោះជាយ៉ាងណាក៏អាជ្ញាធរបានបដិសេធថា ចំពោះការដោះស្រាយដីធ្លីណាដែលហួសសមត្ថភាពរបស់ខ្លួន គួរតែតុលាការជាអ្នកដោះស្រាយរវាងភាគីពលរដ្ឋនិងក្រុមហ៊ុនទៅតាមពាក្យបណ្ដឹង។
ចំណែកខាងប្រជាពលរដ្ឋវិញថាដំណោះស្រាយបែបនេះបង្ហាញពីការមិនទទួលខុសត្រូវរបស់អាជ្ញាធរនិងដាក់ការកៀបសង្កត់ពលរដ្ឋដោយប្រើប្រព័ន្ធតុលាការដែលមិនឯករាជ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។