ពលរដ្ឋគ្រោងតវ៉ាឱ្យក្រុមហ៊ុនលោកឧកញ៉ា ទ្រី ភាព ប្រគល់ដីធ្លីមកវិញជាបន្ទាន់
2013.12.15
ពលរដ្ឋរស់នៅឃុំថ្មដា ស្រុកវាលវែង ខេត្តពោធិ៍សាត់ នាំគ្នាកាន់បដានៅខាងមុខសាលាខេត្ត ទាមទារឲ្យអាជ្ញាធរដោះស្រាយទំនាស់ដីធ្លីរបស់ពួកគាត់ នៅព្រឹកថ្ងៃទី២៧ ខែវិច្ឆិកា ឆ្នាំ២០១៣។
គម្រោងនេះធ្វើឡើងបន្ទាប់ពីពួកគាត់ទទួលបានព័ត៌មានថា អាជ្ញាធរខេត្តពោធិ៍សាត់ គ្រោងនឹងរៀបចំវេទិកាពិគ្រោះយោបល់ និងដោះស្រាយបញ្ហាផ្សេងៗ នៅសាលាស្រុកវាលវែង នៅព្រឹកថ្ងៃទី១៦ ខែធ្នូ ឆ្នាំ២០១៣។
ប្រជាពលរដ្ឋមកពីភូមិចំនួន៤ គឺភូមិចម្ការជ្រៃខាងត្បូង ចម្ការជ្រៃខាងជើង ក្រាំងរងៀង និងភូមិកណ្ដាល នៃឃុំអន្លង់រាប គ្រោងនឹងឡើងទៅជួបអាជ្ញាធរ និងមន្ត្រីជំនាញផ្នែកដីធ្លីខេត្តពោធិ៍សាត់ ដើម្បីបង្ហាញអំពីទុក្ខកង្វល់ និងផលប៉ះពាល់នានា ដែលកើតចេញពីក្រុមហ៊ុន អឹម.ឌី.អេស។ ក្រុមប្រជាពលរដ្ឋគ្រោងនឹងធ្វើដំណើរដោយថ្មើរជើងក្នុងចម្ងាយប្រមាណជា ៧ គីឡូម៉ែត្រ ប្រដាប់ដោយបដាពាក្យស្លោក និងឧបករណ៍បំពងសំឡេង ដើរចេញពីចំណុចភូមិកណ្ដាល នៃឃុំអន្លង់រាប ឆ្ពោះទៅកាន់សាលាស្រុកវាលវែង។
តំណាងប្រជាពលរដ្ឋម្នាក់រស់នៅភូមិចម្ការជ្រៃខាងជើងលោក ជុំ សារ៉ាត មានប្រសាសន៍ប្រាប់វិទ្យុអាស៊ីសេរី នៅថ្ងៃទី១៥ ខែធ្នូ ថា គោលបំណងសំខាន់មួយ ក្នុងចំណោមគោលបំណងសំខាន់ៗផ្សេងទៀត គឺក្រុមហ៊ុនត្រូវតែប្រគល់ដី ដែលខ្លួនបានឈូសឆាយប៉ះពាល់មកលើដីរបស់ពលរដ្ឋ ត្រូវប្រគល់មកឲ្យពួកគាត់វិញជាបន្ទាន់ និងដោយគ្មានលក្ខខណ្ឌអ្វីទាំងអស់៖ «បើសិនជាគេមិនឲ្យខ្ញុំមានមតិ ឬឲ្យបាតុករមានមតិអីទេ យើងខ្ញុំនៅតែទទូចទាល់តែគេទទួលយកឲ្យខ្ញុំឡើងវែកញែកនូវបញ្ហាទាំងអស់ហ្នឹង។ បើសិនគេចប់ការងារគេៗវិលត្រឡប់ទៅផ្ទះវិញស្អែក ឬខានស្អែក ខ្ញុំនឹងបន្ដធ្វើបាតុកម្មនេះបន្ដទៅផ្នែកខាងឃុំខ្ញុំវិញម្ដង»។
ចំណែកប្រជាពលរដ្ឋម្នាក់ទៀតលោក យក់ ប៉ាច បានបន្ថែមថា ក្រុមប្រជាពលរដ្ឋមានបញ្ហាដីធ្លីនៅក្នុងភូមិចម្ការជ្រៃខាងជើង ជាង ៣០គ្រួសារ នឹងទៅចូលរួមក្នុងក្បួនដង្ហែនេះទាំងអស់គ្នា ដោយពួកគាត់មិនអាចរង់ចាំដំណោះស្រាយ ឬការសន្យាបែបស្រពេចស្រពិលរបស់អាជ្ញាធរភូមិ និងឃុំទាក់ទិននឹងបញ្ហានេះតទៅទៀតឡើយ។ លោកបន្តថា អស់រយៈពេលជាង ៣ឆ្នាំ នៃការអភិវឌ្ឍរបស់ក្រុមហ៊ុន អឹម.ឌី.អេស បានធ្វើឲ្យប្រជាពលរដ្ឋជួបទុក្ខលំបាកជាច្រើន ដូចជាការបាត់បង់ដីធ្លីសម្រាប់ធ្វើកសិកម្ម និងការបិទផ្លូវមិនឲ្យប្រជាពលរដ្ឋធ្វើដំណើរ ឬដឹកកសិផលកាត់ដីរបស់ក្រុមហ៊ុនជាដើម។
វិទ្យុអាស៊ីសេរីមិនអាចទាក់ទងតំណាងក្រុមហ៊ុន អឹម.ឌី.អេស និងអភិបាលរងទទួលបន្ទុកដោះស្រាយទំនាស់ដីធ្លីខេត្តពោធិ៍សាត់ លោក សួន រិន្ទឌី ដើម្បីសុំការអត្ថាធិប្បាយជុំវិញបញ្ហានេះបានទេ នៅថ្ងៃទី១៥ ខែធ្នូ។ យ៉ាងណាមេឃុំអន្លង់រាប លោក អ៊ុំ សេង មានប្រសាសន៍បញ្ជាក់ថា ក្រុមប្រជាពលរដ្ឋដែលនាំគ្នាទៅតវ៉ា និងចង់ចូលទៅកាន់វេទិកាដែលរៀបចំឡើងដោយក្រុមប្រឹក្សាខេត្តពោធិ៍សាត់ នាពេលនេះ ទំនងជាមិនត្រូវបានគេអនុញ្ញាតឲ្យចូលរួមឡើយ ពីព្រោះក្បួន ឬការជួបជុំរបស់ប្រជាពលរដ្ឋទាំងនោះ គឺធ្វើឡើងដោយពុំមានច្បាប់អនុញ្ញាត៖ «បាទប៉ះច្រើន ក៏ប៉ុន្តែយើងដោះស្រាយបានច្រើនហើយកំពុងធ្វើបញ្ជីសម្រាប់របាយការណ៍ជូនខេត្តស្អែក ហើយល្ងាចបានខ្ញុំសរុប។ មានប៉ះកន្លងមកដោយក្រុមហ៊ុនឈូស ខាងបរិស្ថានឲ្យឈូសប៉ះរបស់គាត់ យើងដោះអត់ទាន់ចប់ទល់សព្វថ្ងៃគាត់អន់ចិត្ដ គាត់ចង់យករបស់គាត់ទាំងអស់វិញ ហើយបម្រុងធ្វើបាតុកម្មស្អែក ខ្ញុំឮសូរអ៊ីចឹង»។
មន្ត្រីសម្របសម្រួលសមាគមអាហុក (Adhoc) ប្រចាំខេត្តពោធិ៍សាត់ លោក ភួង សុធា មានប្រសាសន៍ថា លោកហាក់មិនសូវមានជំនឿលើការដោះស្រាយបញ្ហាដីធ្លី ឬបញ្ហាផ្សេងៗ តាមរយៈវេទិការបស់រាជរដ្ឋាភិបាលនៅពេលនេះឡើយ ពីព្រោះថា ប្រជាពលរដ្ឋដែលមានបញ្ហាពិតប្រាកដជាច្រើននាក់ មិនត្រូវបានគេអនុញ្ញាត ឬអញ្ជើញឲ្យចូលរួមនោះទេ ដូចនេះលោកគិតថា វេទិកានេះ គឺគ្រាន់តែជាឆាកល្ខោនធ្វើឲ្យល្អមើលប៉ុណ្ណោះ។
លោក ភួង សុធា ឲ្យដឹងបន្ថែមថា ប្រជាពលរដ្ឋរស់នៅភូមិឯកភាព ឃុំថ្មដា ស្រុកវាលវែង ខេត្តពោធិ៍សាត់ជាង ៣០គ្រួសារ ក៏មានគម្រោងនាំគ្នាឡើងមកជួបអាជ្ញាធរ និងមន្ត្រីជំនាញខេត្តពោធិ៍សាត់ ក្នុងគោលបំណងឲ្យអាជ្ញាធរជួយដោះស្រាយបញ្ហាដីធ្លីជាមួយក្រុមហ៊ុន អឹម.ឌី.អេស នាឱកាសរបស់លោកឧកញ៉ា ទ្រី ភាព នោះដែរ ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕
រឿងដែលគេអានច្រើនបំផុត
RFA
- លោកនាយករដ្ឋមន្ត្រី ហ៊ុន សែន ប្រកាសមិនជួបអ្នកគាំទ្រ នៅបុរីញូវយ៉ក ខណៈគណបក្សប្រឆាំងគ្រោងធ្វើបាតុកម្មប្រឆាំងលោក
- និស្សិតខ្មែរម្នាក់ខិតខំរៀនរហូតបានមេដាយវិស្វករបច្ចេកវិទ្យា នៅមហាវិទ្យាល័យប្រទេសថៃ
- ចិនផ្ដល់ជំនួយរថយន្តជាង ១០០គ្រឿង និងសម្ភារយោធាឱ្យក្រសួងការពារជាតិកម្ពុជា
- យុវជន និងអ្នកវិភាគរិះគន់សៀវភៅ "កូនប្រុសច្បងនាយករដ្ឋមន្ត្រី ដំណើរឆ្ពោះទៅបន្តវេន"
- តំណាងពលរដ្ឋជាង ១ពាន់នាក់ ដាក់ញត្តិស្នើសុំក្រសួងមហាផ្ទៃ ឱ្យឈប់ផ្ដល់អត្តសញ្ញាណប័ណ្ណជនអន្តោប្រវេសន៍