តំណាងពលរដ្ឋរស់នៅតំបន់បឹងតាមោក លោកស្រី ស៊ា ដាវី ចូលបំភ្លឺនៅសាលាដំបូងរាជធានីភ្នំពេញ ពីបទហិង្សាដោយចេតនា និងប្រឆាំងនឹងអ្នករាជការសាធារណៈ នៅព្រឹកថ្ងៃទី៣០ ខែកក្កដា។
ការចូលបំភ្លឺនៅពេលនេះ គឺធ្វើឡើងតាមដីកាបង្គាប់ឲ្យចូលខ្លួន របស់ចៅក្រមស៊ើបសួរសាលាដំបូងរាជធានីភ្នំពេញ លោក ឆែ វិវឌ្ឍនៈ កាលពីថ្ងៃទី៩ ខែកក្កដា តាមពាក្យបណ្ដឹងរបស់ដើមបណ្ដឹងឈ្មោះ រុន តាក់។
តំណាងពលរដ្ឋរស់នៅតំបន់បឹងតាមោក លោកស្រី ស៊ា ដាវី ប្រាប់វិទ្យុអាស៊ីសេរី ក្រោយចេញពីតុលាការថា លោកស្រីត្រូវបានក្រឡាបញ្ជីម្នាក់ សាកសួរពីដំណើររឿង ដែលអាជ្ញាធរបានចោទថា លោកស្រី បានរារាំងគ្រឿងចក្រ និងប្រើប្រាស់អំពើហិង្សាលើអាជ្ញាធរ ព្រមទាំងរឿងដុតស្បៃមោងជាដើម។ ប៉ុន្តែលោកស្រី បានឆ្លើយបដិសេធចំពោះការចោទប្រកាន់នេះ និងស្នើឲ្យតុលាការទម្លាក់ការចោទប្រកាន់ទាំងនេះ។
លោកស្រី ស៊ា ដាវី៖«វាអយុត្តិធម៌ ដែលចោទថា ខ្ញុំនិងប្រជាពលរដ្ឋហ្នឹង វាយអាជ្ញាធរដោយជាន់គាត់កប់ភក់ ជាន់ក្បាលអាជ្ញាធរកប់ទៅនឹងភក់ ។ ខ្ញុំជម្រាបទៅក្រឡាបញ្ជី ក្រឡាបញ្ជីថា ថ្ងៃហ្នឹង អត់មានប្រជាពលរដ្ឋណាម្នាក់វាយអាជ្ញាធរកប់ភក់ទេ មានតែប្រជាពលរដ្ឋស្រីៗ ៦ ឬ៧នាក់ចុះទៅសំណូមពរឲ្យបញ្ឈប់គ្រឿងចក្រសិន សុំជួបអភិបាលសិនដើម្បីសួរនាំគាត់ ដើម្បីបញ្ជាក់ថា ទុកដីលំនៅឋានហ្នឹង ឲ្យពួកខ្ញុំប៉ុន្មានម៉ែត្រ តែប៉ុណ្ណឹង អាជ្ញាធរគាត់អត់ស្ដាប់ហើយ បែរជារុញច្រានស្រីៗ ហ្នឹងបណ្ដាលឲ្យមានសន្លប់។ ហើយការដុតស្បៃមោងហ្នឹងគឺមិនមែនរបួសខាងអាជ្ញាធរទេ គឺរបួសប្រជាពលរដ្ឋ។ ដូច្នេះ វាជារឿងអយុត្តិធម៌ណាស់ ដែលពួកយើងអស់កន្លែងអាស្រ័យផលហើយ ហើយរងពាក្យបណ្ដឹង ហើយដាក់ឲ្យស្ថិតក្រោមការត្រួតពិនិត្យ គ្រាន់តែទៅដល់ភ្លាមនិយាយតែប៉ុន្មានមាត់ គេសំណូមពរឲ្យឃុំខ្លួន វាអយុត្តិធម៌មែនទែនសម្រាប់ពលរដ្ឋដែលរងគ្រោះពីបញ្ហាដីធ្លី»។
វិទ្យុអាស៊ីសេរីនៅមិនទាន់អាចទាក់ទងអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ដើម្បីឆ្លើយតបចំពោះបញ្ហានេះ បាននៅឡើយទេ នៅថ្ងៃទី៣០ ខែកក្កដា។
នេះជាការសាកសួរលើកទី៤ ហើយ ក្នុងសំណុំរឿងដដែលនេះ បន្ទាប់ពីចៅក្រមស៊ើបសួរសាលាដំបូងរាជធានីភ្នំពេញ លោក ឆែ វិវឌ្ឍនៈ បានសាកសួរពលរដ្ឋរស់នៅតំបន់បឹងតាមោកចំនួន ៣នាក់ គឺលោកស្រី គង់ តឿ លោស្រី អំ ភឿន និងលោក អ៊ុត អាត កាលពីពេលកន្លងទៅ។
កាលពីថ្ងៃទី២៧ ខែកុម្ភៈ អាជ្ញាធរខណ្ឌព្រែកព្នៅ បានប្រើគ្រឿងចក្រ ចំនួន ២គ្រឿង ចុះកាយដីខាងក្រោយផ្ទះពលរដ្ឋនៅតំបន់បឹងតាមោក ក្នុងសង្កាត់សំរោង ខណ្ឌព្រែកព្នៅ រាជធានីភ្នំពេញ ដោយអាជ្ញាធរអះអាងថា ដើម្បីសាងសង់ប្រឡាយ ដែលមានទទឹង ៤០ម៉ែត្រ ដើម្បីរំដោះទឹកជំនន់។ ប៉ុន្តែការដាក់គ្រឿងចក្រកាយប្រឡាយនោះ អាជ្ញាធរពុំបានជូនដំណឹងដល់ពលរដ្ឋ ដែលកំពុងអាស្រ័យផលលើផ្ទៃបឹងឡើយ ថែមទាំងបានប្រើប្រាស់អំពើហិង្សាលើស្ត្រី និងកុមារ បណ្ដាលឲ្យមានស្ត្រីម្នាក់ដួលសន្លប់ នៅពេលគាត់ព្យាយាមរារាំងមិនឲ្យអាជ្ញាធរកាយដី ដែលពលរដ្ឋកំពុងចិញ្ចឹមត្រី និងដាំបន្លែផ្សេងៗ។ ប៉ុន្តែអាជ្ញាធរបែរជាប្ដឹងពលរដ្ឋទៅតុលាការទៅវិញ។ មកទល់ពេលនេះ តំណាងពលរដ្ឋចំនួន១០នាក់ បានជាប់បណ្ដឹងក្នុងតុលាការជាច្រើនករណី ដោយសារការតស៊ូទាមទារដំណោះស្រាយដីធ្លី ហើយតំណាងសហគមន៍ម្នាក់ គឺអ្នកស្រី ប្រាក់ សុភា បានភៀសខ្លួនទៅប្រទេសថៃ ដើម្បីគេចពីការចាប់ខ្លួន។ ក្រៅពីនេះ ពលរដ្ឋទាំងនោះ ក៏រងការបង្ក្រាបដោយហិង្សាមិនឲ្យតវ៉ា ការគំរាមកំហែង ការបំផ្លិចបំផ្លាញមុខរបរ និងការបូមខ្សាច់ពន្លិចផ្ទះពួកគាត់ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។