អ្នក​បុរី​កីឡា​ដែល​រស់​នៅ​ក្នុង​អគារ​ចាស់ ស្នើ​សុំ​សាលា​រាជធានី​ភ្នំពេញ​ផ្ដល់​សំណង​សមរម្យ​ដើម្បី​បាន​ទិញ​ផ្ទះ​រស់​នៅ​ក្នុង​ទីក្រុង

ដោយ ម៉ៅ សុធានី
2019-08-21
អ៊ីម៉ែល
មតិ
Share
បោះពុម្ព
កូន​អ្នក​បុរី​កីឡា​ឈរ​នៅ​អគារ​ស្នាក់​នៅ។
កូន​អ្នក​បុរី​កីឡា​ឈរ​នៅ​អគារ​ស្នាក់​នៅ។
Photo: RFA

អ្នក​បុរី​កីឡា ១៤​គ្រួសារ​ដែល​កំពុង​រស់​នៅ​ត្រាំត្រែង​ក្នុង​អគារ​ចាស់​ កណ្ដាល​ក្រុង​ភ្នំពេញ​ថ្លែង​ថា អាជ្ញាធរ ដាក់​សម្ពាធ​ជា​ថ្មី​ឲ្យ​ពួក​គាត់​ទទួល​យក​សំណង​មិន​សមរម្យ ជា​ថ្នូរ​នឹង​ការ​ចាកចេញ​ ដើម្បី​យក​ដី​អគារ​នោះ​ប្រគល់​ទៅ​ឲ្យ​ក្រុមហ៊ុន​ចិន។ អ្នក​បុរី​កីឡា​ ស្នើសុំ​សាលា​រាជធានី​ភ្នំពេញ ផ្ដល់​សំណង​ជា​ទឹក​ប្រាក់​មួយ​ចំនួន​ដល់​ពួក​គាត់ ​ដែល​អាច​ទិញ​ផ្ទះ​រស់​នៅ​ក្នុង​ទី​ក្រុង​បាន ប្រសិនបើ​ខាង​ក្រុមហ៊ុន​មិន​អាច​សង់​ ១០អគារ​ដូច​តាម​ការ​សន្យា។ ចំណែក​សាលា​រាជធានី​ភ្នំពេញ ដាក់​ឱសានវាទ ត្រឹម​ដំណាច់​ខែ​សីហា​នេះ ដោយ​តម្រូវ​ឲ្យ​ពលរដ្ឋ​ទៅ​ពិភាក្សា​រឿង​សំណង​នៅ​សាលា​ខណ្ឌ ៧មករា។

តំណាង​ពលរដ្ឋ​បុរី​កីឡា លោកស្រី ស ស៊ន ប្រាប់​អាស៊ី​សេរី​ នៅ​ថ្ងៃ​ទី២០ ខែ​សីហា​ថា សមត្ថកិច្ច​ជា​ច្រើន​នាក់ ចុះ​ទៅ​បិទ​សេចក្ដី​ជូន​ដំណឹង​របស់​សាលា​រាជធានី​ភ្នំពេញ នៅ​គ្រប់​ផ្ទះ​ទាំង​អស់​ក្នុង​អគារ​ចាស់ ដោយ​តម្រូវ​ឲ្យ​ពួកគាត់​ជួប​ពិភាក្សា​គ្នា​អំពី​សំណង​នៅ​រដ្ឋបាល​ខណ្ឌ ៧មករា ។

លោកស្រី ស ស៊ន លើក​ឡើង​ថា ក្នុង​ពេល​ចរចា​ កន្លង​មក ​ហើយ​ដល់​ពេល​នេះ អភិបាល​រង​សាលា​រាជធានី​ភ្នំពេញ លោក មាន ចាន់យ៉ាដា នៅ​តែ​ប្រកាន់​ជំហរ​ផ្ដល់​ផ្ទះ​នៅ​ភូមិ​អណ្ដូង ដែល​មាន​ទទឹង ៤ម៉ែត្រ បណ្ដោយ ៥ម៉ែត្រ​ដល់​ពួក​គាត់​ដដែល។ ប៉ុន្តែ​អ្នក​បុរី​ជាង ១០គ្រួសារ​ បដិសេធ​ទទួល​ ព្រោះ​ពួកគាត់​មើល​ឃើញ​ថា​ គ្រួសារ​ជាច្រើន​ដែល​ប្ដូរ​ពី​បុរី​កីឡា​ទៅ​រស់​នៅ​ភូមិ​អណ្ដូង​កន្លង​មក​ មាន​ជីវភាព​កាន់​តែ​ពិបាក​ទៅៗ ដោយ​មិន​ដឹង​ថា ត្រូវ​ប្រកប​របរ​អ្វី​ចិញ្ចឹម​គ្រួសារ​ប្រចាំ​ថ្ងៃ។

លោកស្រី ស ស៊ន បញ្ជាក់​ថា អ្នក​បុរី​កីឡា​ដែល​នៅ​សេសសល់​ក្នុង​អគារ​ចាស់​សព្វថ្ងៃ​នេះ ចង់​បាន​សំណង​ជា​ទឹក​ប្រាក់​ប្រមាណ ២ម៉ឺន ៥ពាន់​ដុល្លារ​ក្នុង ១គ្រួសារ ដើម្បី​ឲ្យ​ពួក​គាត់​មាន​លទ្ធភាព​រក​ទី​កន្លែង​ផ្សេង​រស់នៅ​បាន​ប្រសើរ​ជាង​នេះ នៅ​ក្នុង​ភ្នំពេញ។ ពួកគាត់ ​មិន​ចង់​ចាក​ចេញ​ឆ្ងាយ​ពី​ទី​ក្រុង​ឡើយ ព្រោះ​កូន​ក្នុង​បន្ទុក​កំពុង​រៀន​សូត្រ ហើយ​ក៏​ងាយ​ស្រួល​ប្រកប​របរ​បន្តិច​បន្តួច ​គ្រាន់​នឹង​បាន​ចំណូល​ខ្លះ​ដោះស្រាយ​ជីវភាព​ប្រចាំ​ថ្ងៃ៖ «មីង​គិត​ថា​ គ្មាន​ដំណោះស្រាយ​សម្រាប់​ពួក​មីង អ៊ីចឹង​ គឺជា​ការ​រំលោភ​សិទ្ធិ​មនុស្ស​លើ​ពួក​មីង​ បណ្ដេញ​ដោយ​បង្ខំ​ជា​លើក​ទី​២​ទៀត​ហើយ ព្រោះ​អី​លោក​មុន​ឈូស​ផ្ទះ​ពួក​មីង​អស់ ៣៨០​ខ្នង​ផ្ទះ។ ឥលូវ​ដោះស្រាយ​ពួក​មីង​ដោយ​បង្ខំ។ អ៊ីចឹង! បាន​ពួក​មីង​គិត​ថា ចាក់​ចេញ​គឺ​ស្លាប់​ នៅ​ក៏​ស្លាប់​ដូច​គ្នា។ អ៊ីចឹង!​ បាន​ចេះ​តែ​នៅ​ហ្នឹង។ ព្រោះ​អី​មិន​មែន​ចង់​បាន​អី​ច្រើន​ គឺ​ចង់​បាន​សំណង​ណាមួយ​ដែល​អាច​ទិញ​ផ្ទះ​បាន​ និង​សង​បំណុល​គេ​បាន​អ៊ីចឹង»

ទាក់​ទង​នឹង​រឿង​នេះ រដ្ឋបាល​សាលា​រាជធានី​ភ្នំពេញ ចេញ​លិខិត​ជូន​ដំណឹង​មួយ​ចុះ​ថ្ងៃ​ទី១៥ សីហា អំពី​ការ​កំណត់​រយៈពេល​ចុង​ក្រោយ​នៃ​ការ​ទទួល​ដោះស្រាយ​គោលនយោបាយ ជូន​ពលរដ្ឋ​នៅ​សេស​សល់​ក្នុង​តំបន់​បុរី​កីឡា។ ក្នុង​រយៈពេល​២សប្ដាហ៍ ​គិត​ចាប់​ពី​ផ្សាយ​ដំណឹង​នេះ អាជ្ញាធរ​ក្រុង​ភ្នំពេញ ស្នើ​ដល់​អ្នក​បុរី​កីឡា ១៤គ្រួសារ ដែល​មិន​ទាន់​ទទួល​យក​គោល​នយោបាយ​ សូម​ទៅ​ជួប​រដ្ឋបាល​ខណ្ឌ ៧មករា ដើម្បី​ទទួល​យក​គោលនយោបាយ​របស់​ខ្លួន។ អាជ្ញាធរ​ក្រុងភ្នំពេញ បញ្ជាក់​ថា ផុត​រយៈពេល​កំណត់​នេះ អាជ្ញាធរ​ក្រុង​ភ្នំពេញ នឹង​អនុវត្ត​វិធាន​រដ្ឋបាល​ និង​ផ្លូវ​ច្បាប់ ដោយ​មិន​ទទួល​ខុស​ត្រូវ​ចំពោះ​ការ​ខូច​ខាត​សម្ភារៈ​នានា និង​ការ​បាត់​បង់​ផល​ប្រយោជន៍​របស់​ពលរដ្ឋ​ឡើយ។

អាស៊ី​សេរី មិន​អាច​សុំ​ការ​បំភ្លឺ​បន្ថែម​រឿង​នេះ​ ពី​អភិបាល​រង​សាលា​រាជធានី​ភ្នំពេញ លោក មាន ចាន់យ៉ាដា បាន​នៅ​ឡើយ​ទេ​ ដោយ​ហៅ​ទូរស័ព្ទ​ចូល​ជាច្រើន​ដង​តែ​ត្រូវ​លោក​ចុច​បិទ​វិញ។ ប៉ុន្តែ​លោក មាន ចាន់​យ៉ាដា ធ្លាប់​បាន​ប្រាប់​អាស៊ី​សេរី​ កាល​ពី​កន្លង​មក​ថា ការ​ផ្ដល់​ផ្ទះ​នៅ​ភូមិ​អណ្ដូង ​ជា​គោលការណ៍​មនុស្ស​ធម៌ ដើម្បី​ជួយ​ពលរដ្ឋ​ឲ្យ​មាន​លំនៅឋាន​ត្រឹមត្រូវ។ អភិបាលរង​ក្រុង​រូប​នេះ បញ្ជាក់​ថា ខាង​រដ្ឋបាល​មិន​មាន​គោលនយោបាយ ឬ​លទ្ធភាព​ផ្ដល់​សំណង​ជូន​ពលរដ្ឋ​នៅ​បុរី​កីឡា ជា​ទឹក​ប្រាក់​​រាប់​ម៉ឺន​ដុល្លារ​ដូច​ដែល​ពលរដ្ឋ​ស្នើសុំ​នោះ​ទេ។

អ្នក​សម្របសម្រួល​គម្រោង​ធុរកិច្ច និង​សិទ្ធិមនុស្ស​នៃ​មជ្ឈមណ្ឌល​សិទ្ធិមនុស្ស​កម្ពុជា លោក វណ្ណ សូផាត ដែល​តាម​ករណី​ជម្លោះ​ដីធ្លី​ដ៏​រ៉ាំរ៉ៃ​នៅ​បុរី​កីឡា​នេះ សង្កេត​ឃើញ​ថា ដំណោះស្រាយ​កន្លង​ អាជ្ញាធរ មាន​ផ្ដល់​សំណង​ជា​ប្រាក់​សុទ្ធ​ឲ្យ​អ្នក​បុរី​កីឡា ហើយ​ពលរដ្ឋ​ខ្លះ​ទៀត​ក៏​ទទួល​បាន​ជា​ផ្ទះនៅ​ភូមិ​អណ្ដូង។ លោក វណ្ណ សូផាត យល់ថា​ ដំណោះស្រាយ​នៅតែ​មាន​ ប្រសិន​បើ​អាជ្ញាធរ​មាន​ឆន្ទៈ​ពិតប្រាកដ ដោះស្រាយ​បញ្ចប់​បញ្ហា​របស់​អ្នក​បុរី​កីឡា​ដែល​នៅ​សេស​សល់​១៤​គ្រួសារ​នេះ ៖«ការ​ដែល​គាត់​ស្នើ​សុំ​ឲ្យ​មាន​ដំណោះស្រាយ​ជា​ថវិកា សម្រាប់​ឲ្យ​គាត់​អាច​ទិញ​ដី​នៅ​កន្លែង​ណា​បាន​ហ្នឹង ខ្ញុំ​យល់​ថា​ វា​ការ​ដែល​គាត់​ដឹង​ពី​ស្ថាន​ភាព​ជាក់​ស្ដែង​ អ្នក​រងគ្រោះ​នៅ​ភូមិ​អណ្ដូង​ហ្នឹង​វា​យ៉ាង​មិច។ វា​ប៉ះពាល់​ដល់​ជីវភាព​ពួកគាត់​ ប្រាក់​ចំណូល​ពួកគាត់​អ៊ីចឹង។ ការ​ទទួល​បាន​របស់​ភាគី​ទាំង​សង​ខាង ហ្នឹង​វា​សមរម្យ​ហើយ ហើយ​តម្លាភាព​យ៉ាង​មិច​នោះ វា​រក​មិន​ឃើញ​ទេ»

កន្លង​ទៅ ពលរដ្ឋ​បុរី​កីឡា ២ក្រុម ដែល​អាជ្ញាធរ​បាន​ផ្ដល់​សំណង គឺ​ក្រុម​ពលរដ្ឋ​ដែល​គ្មាន​ឯកសារ​គ្រប់គ្រាន់​ចំនួន ៣២គ្រួសារ និង​ក្រុម​ពលរដ្ឋ​មាន​ឯកសារ​គ្រប់គ្រាន់​ចំនួន ១៤គ្រួសារ។ ពលរដ្ឋ​ដែល​គ្មាន​ឯកសារ​គ្រប់គ្រាន់​ជិត ២០គ្រួសារ ព្រម​ទទួល​យក​សំណង​ជា​ផ្ទះ​នៅ​ជាយ​ក្រុង​ភ្នំពេញ ដែល​មាន​ទីតាំង​ស្ថិត​នៅ​ភូមិ​អណ្ដូង សង្កាត់​កាកាប ខណ្ឌ​ពោធិ៍​សែន​ជ័យ ក្រុង​ភ្នំពេញ។ ចំណែក​ពលរដ្ឋ​១៤គ្រួសារ ដែល​មាន​ឯកសារ​គ្រប់គ្រាន់ ស្នើ​សុំ​ការ​អភិវឌ្ឍ​នៅ​នឹង​កន្លែង ដោយ​ផ្ដល់​ជា​ផ្ទះ​នៅ​បុរី​កីឡា ឬ​ទឹក​ប្រាក់​ដែល​អាច​រក​ទិញ​ផ្ទះ​បាន។

ក្នុង​រយៈពេល ៣ថ្ងៃ​ទៀត អ្នក​បុរី​កីឡា​បញ្ជាក់​ថា ពួក​គាត់​នឹង​នាំ​គ្នា​ទៅ​រក​ដំណោះ​ស្រាយ​ជាថ្មី​ពី​សាលា​ក្រុង​ភ្នំពេញ។ អ្នក​បុរី​កីឡា​ នៅ​តែ​រក្សា​ជំហរ​ទាមទារ​ផ្ទះ​នៅ​បុរី​កីឡា ឬ​សំណង​ជា​ទឹកប្រាក់​ សម្រាប់​គ្រួសារ​នីមួយ​ៗ។ ប្រសិនបើ​មិន​បាន​ដូច​ការ​ស្នើ​សុំ​នេះ​ទេ ពួក​គេ​នៅ​តែ​បន្ត​រស់​ក្នុង​អគារ​ចាស់​ត​ទៅ​ទៀត ទោះ​បី​ជា​ត្រូវ​ប្រឈម​នឹង​ការ​បណ្ដេញ​ជាថ្មី​ទៀត​ក៏​ដោយ។

ក្នុង​មួយ​រយៈពេល​ចុង​ក្រោយ​នេះ អ្នក​បុរី​កីឡា​ឃើញ​ មាន​មេការ​ជន​ជាតិ​ចិន​ជា​ច្រើន​នាក់ ដើរ​ទៅ​ថត​រូប​អគារ​ចាស់​បុរី​កីឡា​ជាច្រើន​ដង​មក​ហើយ។ ពួក​គាត់​យល់​ថា ទិដ្ឋភាព​បែប​នេះ អាច​ជា​ផ្នែក​មួយ​ ដែល​ជំរុញ​ឲ្យ​អាជ្ញាធរ​ដាក់​គំនាប​បង្ខំ​ពួកគាត់​ឲ្យ​ប្រញាប់​យក​សំណង ​ជា​ផ្ទះ ​នៅ​ភូមិ​អណ្ដូង​ ព្រោះ​ថា​ក្រុមហ៊ុន​ចិន​ទំនង​ជា​ត្រូវ​ការ​ពង្រីក​ការដ្ឋាន​របស់​ពួកគេ​ ប៉ុន្តែ​នៅ​ទើស​អគារ​ចាស់​មួយ។

ទាក់ទង​សំណង់​ថ្មី​នៅ​បុរី​កីឡា​នេះ នៅ​ក្នុង​គេហទំព័រ​អចលនទ្រព្យ​កម្ពុជា ចុះ​ផ្សាយ​កាល​ពី​ខែ​មករា ឆ្នាំ២០១៨​ ឲ្យ​ដឹង​ថា ផ្ទៃ​ដី​នៅ​បុរី​កីឡា​ ដែល​បណ្ដេញ​ពលរដ្ឋ​ចេញ​ដោយ​បង្ខំ កាល​ពី​ឆ្នាំ២០១២ នឹង​ត្រូវ​ជំនួស​មកវិញ ជា​អគារ​លំនៅឋាន​បែប​ពាណិជ្ជកម្ម​អន្តរ​ជាតិ​ដំបូង​គេ​នៅ​កម្ពុជា ឈ្មោះ​ថា CEO KT Pacific តាមរយៈ​ការ​អភិវឌ្ឍ​រួមគ្នា​រវាង​ក្រុមហ៊ុន​ចិន ឈ្មោះ លីស៊ីន គ្រុប (LiXin Group) និង​ក្រុមហ៊ុន ខេធី ប៉ាស៊ីហ្វិច គ្រុប (KT Pacific Group)។ ចំណែក​ក្រុម​ចិន​ឈ្មោះ ស៊ីឈួន ហ័រ​ស៊ី គ្រុប (Sichuan Huaxi Group) ទទួល​សិទ្ធិ​សាង​សង់​អគារ​ពាណិជ្ជកម្ម​មួយ​នេះ​ ដែល​មាន​កម្ពស់ ៣៣ជាន់ ស្ថិត​នៅ​ក្នុង​ខណ្ឌ ៧ មករា។ គេ​រំពឹង​ថា គម្រោង​នេះ​នឹង​បញ្ចប់​នៅ​ឆ្នាំ២០២០ រួម​មាន អគារ​លំនៅឋាន សាល​សន្និបាត​ពាណិជ្ជកម្ម​អន្តរជាតិ មជ្ឈមណ្ឌល​ពាណិជ្ជកម្ម​អន្តរ​ជាតិ ផ្សារ​ទំនើប កន្លែង​កម្សាន្ត និង​ភោជនីយដ្ឋាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល