ក្រុមហ៊ុន​​សុកហ្វីន​របស់​បារាំង​ច្រាន​ចោល​​ការ​​ចោទ​​ប្រកាន់​​របស់​ជនជាតិ​ដើម​ព្នង​ ពាក់ព័ន្ធ​រំលោភ​ដីធ្លី​និង​​ព្រៃឈើ​ធំធេង​ក្នុង​ខេត្តមណ្ឌលគិរី

ដោយ មាន ឫទ្ធិ
2021-07-27
Share
ក្រុមហ៊ុន​​សុកហ្វីន​របស់​បារាំង​ច្រាន​ចោល​​ការ​​ចោទ​​ប្រកាន់​​របស់​ជនជាតិ​ដើម​ព្នង​ ពាក់ព័ន្ធ​រំលោភ​ដីធ្លី​និង​​ព្រៃឈើ​ធំធេង​ក្នុង​ខេត្តមណ្ឌលគិរី បុគ្គលិកក្រុមហ៊ុនកែច្នៃកៅស៊ូ សុកហ្វីន (SOCFIN-KCD) បានថតរូបភាពអនុស្សាវរីយ៍នៅមុខក្រុមហ៊ុនកាលពីថ្ងៃទី២០ ខែវិច្ឆិកា ឆ្នាំ២០២០។
រូប៖ ​ក្រុមហ៊ុន​សុកហ្វីន (SOCFIN-KCD)

​ក្រុមហ៊ុន​សុកហ្វីន (SOCFIN-KCD) ដែល​វិនិយោគ​ដីសម្បទាន​សេដ្ឋកិច្ច​ខ្នាត​ធំ​មួយ​នៅ​ខេត្ត​មណ្ឌលគិរី ​ចេញ​សេចក្ដី​ប្រកាស​ព័ត៌មាន ​ច្រានចោល​ការចោទ​ប្រកាន់​ទាំងឡាយ​ របស់​តំណាង​ជនជាតិភាគតិច​ព្នង ៩៧​គ្រួសារ ក្នុង​រឿង​ជម្លោះដីធ្លី​កាល​ពី​ជាង ​៦​ឆ្នាំ។  ក្រុមហ៊ុន​អះអាង​ថា ​ខ្លួន​បាន​ប្រតិបត្តិការ​ត្រឹមត្រូវ​ស្រប​តាម​គោលការណ៍​វិនិយោគ​របស់​រដ្ឋាភិបាល​កម្ពុជា​ ដោយ​​វាយតម្លៃ​​ផល​ប៉ះពាល់​បរិស្ថាន ​និង​សង្គម​ត្រឹមត្រូវ​។ ប៉ុន្តែ​តំណាង​ជនជាតិដើមភាគ​តិចព្នង ​ទាត់​ចោល​ការ​លើក​ឡើង​នេះ​។

ក្រុមហ៊ុន​ដី​សម្បទាន​សេដ្ឋកិច្ច​ សុកហ្វ៊ីន​​ (SOCFIN-KCD) ​បង្ហាញ​មោទនភាព ​​ចំពោះ​ការអភិវឌ្ឍ​ប្រកប​ដោយ​ចិរភាព ​និង​ការ​គ្រប់គ្រង​ចម្ការ​កៅស៊ូ​ជាច្រើន​ពាន់​ហិកតារ ​ក្នុង​ខេត្ត​មណ្ឌលគីរី​ដោយ​ការ​ទទួល​ខុសត្រូវ​។ ​ក្រុមហ៊ុនអះអាង​ថា​ ប្រតិបត្តិការ​របស់​ខ្លួន ​បាន​គោរពច្បាប់​ ដែល​កំណត់​ដោយ​រដ្ឋាភិបាល​កម្ពុជា​យ៉ាង​ម៉ឺងម៉ាត់។ ​លើសពីនេះ ​ក្រុមហ៊ុន​ចាត់​ទុក​ការ​ចោទ​ប្រកាន់​របស់​តំណាង​ជនជាតិភាគតិច​ព្នង ​ដែល​លើក​ឡើង​ថា ​ក្រុមហ៊ុន​ឈូសឆាយ​ព្រៃ​ស្រោង​ ព្រៃ​តំណម​ និង​ព្រៃ​អារក្ស​ ផ្ទុយ​ពី​គោល​ការណ៍​វិនិយោគ​ ថែម​ទាំង​ប្រមាថ​មើល​ងាយ​ ដល់​ជនជាតិ​ដើម​ភាគ​តិច គឺជារឿងមិនពិតនោះទេ។

សេចក្ដី​ប្រកាស​ព័ត៌​មាន ​៤ទំព័រ ដែល​ចេញផ្សាយ​កាលពី​ចុង​សប្ដាហ៍​មុន (ថ្ងៃទី២៣​ កក្កដា) ឱ្យដឹងថា​ មុនពេល​ចាប់ផ្តើម​វិនិយោគ​​ដំណាំ​កៅស៊ូ លើ​ផ្ទៃដី​ ១២.៤៤០ហិកតារ ឋិត​នៅ​ឃុំ​ប៊ូស្រា ​ស្រុក​ពេជ្រាដា ខេត្ត​មណ្ឌលគិរី តាំង​ពី​ឆ្នាំ​២០០៨​  ក្រុមហ៊ុន​បាន​ចូលរួម​សន្ទនា​ជាមួយ​ពលរដ្ឋ​ក្នុងតំបន់ប៊ូស្រា ​សហការ​ជាមួយ​អាជ្ញាធរ​រដ្ឋាភិបាល​ និង​អ្នក​សង្កេតការណ៍​ឯករាជ្យ​ជាដើម​។ លើស​ពី​នេះ ​ការផ្តល់​សសំណង​មាន​ជម្រើស​ផ្សេងៗ ​គ្នា ដែល​ពលរដ្ឋ​ទាមទារ​ដី​ស្រែ​ចម្ការ​នៅ​លើ​ដី​សម្បទាន​សេដ្ឋកិច្ច​ចន្លោះ​ឆ្នាំ​២០០៩ ដល់​ឆ្នាំ២០១២។

ក្រុមហ៊ុន​ថា ​ផ្អែក​តាម​ការ​វាយ​តម្លៃ ​ដំបូង​បាន​បង្ហាញ​ថា ផ្ទៃដី​ដាំដុះ ​និង​ដី​ទំនាប​ជាង ​១ពាន់​ហិកតារ (១.១៩៣ហិកតា) បាន​ផ្ដល់​សំណង​ជូន​ជន​ជនជាតិភាគតិច​ព្នង​​ ១.៣៤៨ហិកតារ។ ​ក្រៅពីនេះ​ ក្រុមហ៊ុន​នៅតែ​បន្ត​ដោះស្រាយ​​សំណង​របស់​ពលរដ្ឋ​ ៨១៦គ្រួសារ​បន្ថែមទៀត​ដោយ​សន្តិវិធី​។

ការ​ចេញ​សេចក្តី​ប្រកាសព័ត៌​មាន​នេះ ​ក្រោយ​ពី​ជនជាតិ​ដើម​ភាគ​តិច​ព្នង​ ជិត​ ១រយ​គ្រួសារ​ បាន​ចេញ​សេចក្តី​ថ្លែង​ការណ៍​រួម​មួយ​ សំដែង​ការ​មិន​សុខ​ចិត្ត​ចំពោះ​សេចក្តី​សម្រេច​របស់​ចៅក្រម​នៃ​តុលា​ការ​ ទីក្រុង​ណង់ទែរ (The Tribunal of Nanterre) ប្រទេស​បារាំង​ ដែលបាន​សម្រេច​ឱ្យ​ពួក​គាត់​ចាញ់​ក្តី ​ក្នុង​សំណុំ​រឿង​ជម្លោះ​ដី​ធ្លី កាលពីជាង ៦ឆ្នាំមុន។

​កាល​ពី​ឆ្នាំ​២០១៥ ​ក្រុម​ពលរដ្ឋ​ទាំង​នេះ​ បាន​ប្ដឹង​ក្រុមហ៊ុន​សម្បទាន​សេដ្ឋកិច្ច​ សុកហ្វីន (SOCFIN-KCD)​ ទៅ​តុលាការ​ប្រទេស​បារាំង​ ករណី​​រំលោភ​ដីធ្លី​អាស្រ័យ​ផល​របស់​សហគមន៍​ និង​ឈូស​ឆាយ​ព្រៃ​អារក្ស​របស់​ជនជាតិ​ដើម​ភាគ​តិច​អស់​រាប់​ពាន់​គ្រួសារ។​ អ្នកភូមិថា ក្រុមហ៊ុន​នេះជា​សាខា​របស់​ក្រុមហ៊ុន​ បូឡូរ៉េ ​(BOLLORE) ​ដែល​បាន​​រំលោភ​ដីធ្លី​អាស្រ័យ​ផល​របស់​ជនជាតិ​ដើម​ភាគ​តិច​អស់​យ៉ាង​ហោច​ណាស់ ១​ពាន់​ហិកតារ​ បំពាន​តំបន់​ទី​សក្ការៈ​បូជា​ ព្រៃ​តំណម​ និង​ព្រៃ​កប់​សព​ជា​ដើម។​ រី​ឯ​តំណាង​សហគមន៍​ ១៥​នាក់​ ដែល​ចេញ​មុខ​ងើប​តវ៉ា​ទាមទារ​ដី​ធ្លី​របស់​ពួក​គាត់​ បាន​ក្លាយ​ជា​ជន​រងគ្រោះ​ជាប់​បណ្តឹង​នៅ​តុលាការ​ រហូត​មក​ដល់​បច្ចុប្បន្ន​​នេះ។

តំណាង​ជន​ជាតិ​ដើម​ភាគតិច​ព្នង​ ដែល​ជាដើម​បណ្ដឹងលោក ​ក្លាន ថូល​ ចាត់ទុក​សេចក្ដី​ថ្លែងការណ៍​នេះ ​ជា​លេស​ឆ្លើយ​ដោះសា ​មិន​ទទួលខុស​ត្រូវ​ពី​កំហុស​ឆ្គង​របស់​​ខ្លួន ​ដែល​បំផ្លិតបំផ្លាញ​ព្រៃឈើ​ ព្រៃតំណម ​ព្រៃកប់សព ​ដីចម្ការ​អ្នកភូមិ ​និង​ដី​សមូហ​ភាព ​របស់​ជនជាតិដើមភាគតិចព្នង​ជា​ម្ចាស់​ទឹកដី។ ​លោក​សង្កេត​ឃើញ​​ថា ​ក្រុមហ៊ុន​នេះ ​មិន​បាន​កាត់​ឆ្វៀល​ផល​ប៉ះពាល់ ​តាម​រូបមន្ត​ស្បែក​ខ្លា​ របស់​រដ្ឋាភិបាល​ទេ ​និង​មិន​បាន​ប្រជុំ​ពិភាក្សា​ជាមួយ ​តំណាង​ជន​ជាតិ​ដើម​ភាគតិច​ព្នង​ នៅ​ឃុំ​ប៊ូស្រា​នោះ​ឡើយ​។ ​លោក​បន្ថែម​ថា ​ពាក្យ​បណ្ដឹង​របស់​ពួកគាត់ ​គឺ​ទាមទារ​យក​ដី​ដែល​ក្រុមហ៊ុន​រំលោភ​យក​មក​វិញ​ ស្ដារ​ទឹក​អូរ​ធម្មជាតិ​ដែល​ក្រុមហ៊ុន​លុប​ចោល​ និង​ផ្ដល់​សំណង​ឱ្យ​ជនជាតិ​ដើមភាគតិចព្នង៖ «តាំង​ពី​ដូនតា​មក​ យើង​ដាំ​ចម្ការ​វិល​ជុំ​របស់​យើង​ ពេល​គាត់​ឈូស​ យើង​ស្រែក​ទៅ​ខាង​រដ្ឋាភិបាល​ឱ្យ​ឈូស​។ ​រលាយ​ហិនហោច ​គឺ​សត្វ​ព្រៃ​ រលាយ​ជីវភាព​របស់​ជន​ជាតិ​ដើម​ភាគ​តិច ​បែប​ប្រពៃណី។​ ពី​មុន ​មាន​ដំរី​គោ​ក្របី ​ហូរហែ​ច្រើន​ណាស់ ​ប៉ុន្តែ​ឥលូវ​ហ្នឹង ​គ្មាន​ទេ​»។

ទោះជាយ៉ាងណា ក្រុមហ៊ុនអះអាងថា បច្ចុប្បន្នដីចម្ការរបស់ក្រុមហ៊ុន ​មានផ្ទៃដី​ ៦៧០ហិកតារ មានប័ណ្ណកម្មសិទ្ធិដីធ្លី របស់​ពលរដ្ឋ​ដែល​កំពុង​ដាំដុះ ក្នុង​​ដី​សម្បទានសេដ្ឋកិច្ចរបស់ខ្លួន​។ លើសពីនេះ ប្រជាសហគមន៍​បានបង្កបង្កើនផលដីស្រែក្នុងតំបន់ចម្ការកៅស៊ូរបស់ក្រុមហ៊ុន។​ លើសពីនេះ ក្រុមហ៊ុន​អះអាងទៀត​ថា បាន​ការពារ​ដីធ្លីរបស់​សហគមន៍​ជនជាតិដើមភាគតិច​ព្នង​ ២៣០ហិកតារ​​ ​រួមមាន​ដីព្រៃអារក្ស​ ដីព្រៃជំនឿ​ ដី​បញ្ចុះសព​ និង​ដីបម្រុង​ ហើយ​ដី​នៅ​តំបន់​នោះ​បាន​គូស​ដៅ​ផែនទី​ កំណត់​អត្តសញ្ញាណ ​រក្សា​ទុក​ដោយ​សហការ​គ្នារវាង ​ក្រុមហ៊ុន​ អាជ្ញាធរ និងអ្នកតំណាងសហគមន៍។

ផ្ទុយពីការលើកឡើងនេះ តំណាងជនជាតិដើមភាគតិចព្នងម្នាក់ទៀត​ គឺ​លោក​ គ្រើង តុលា ​យល់​ថា ​សេចក្តីប្រកាសព័ត៌មាននេះ ពុំមែនជាយន្តការស្វែងរកដំណោះ​ស្រាយ​​ត្រឹម​ត្រូវនោះទេ​ តែ​ផ្ទុយ​ទៅ​វិញ​ ក្រុមហ៊ុន​នៅតែ​បន្ត​គេចវេះ ​មិន​ទទួលខុស​ត្រូវ​ពី​ផល​ប៉ះពាល់ដីធ្លី ព្រៃឈើនិងទឹកអូរធម្មជាតិដែល​ក្រុមហ៊ុន​បំផ្លាញ​។ លោក​បដិសេធថា​ ពុំ​ដែល​ឃើញ​ក្រុមហ៊ុន​ពិគ្រោះ​យោបល់​ជាមួយ​​ប្រជាសហគមន៍នោះ​ទេ​ មានតែបង្ខិតបង្ខំ​ពលរដ្ឋឱ្យ​ទទួល​សំណង​មិនសមរម្យ៖ «កាល​ពី​មុន ​គាត់​ឈូស​ទាំងអស់ ​ហើយ​យើង​តវ៉ា ​ពាក់ព័ន្ធ​ដី​កប់​សព​ ព្រៃតំណម ​យើង​ឃើញ​ថា​ ព្រៃ​តំណម ​ត្រូវ​បាន​អស់​ហើយ​ រាល់ថ្ងៃ​។ ​ចំណុច​ទី៣ ​គាត់​បង្ខិត​បង្ខំ​ ដី​ហ្នឹង​ដី​រដ្ឋ​ខ្ញុំ​មិន​មែន​​ជា​​អ្នក​ដោះស្រាយ​ទេ​ សូម​ឱ្យ​អ្នកឯង​ទៅ​តវ៉ា​ជាមួយ​រដ្ឋ​ទៅ ​ខ្ញុំ​ត្រូវ​តែ​ឈូស​ឆាយ​ហើយ​។ អ្នកឯង​រាប់​កូនឈើ​អ្នកឯង ​មួយ​ដើម​មួយ​ម៉ឺន​រៀល ​បាន​ប៉ុន្មាន​យក​ប៉ុណ្ណឹង​ទៅ ​បើ​មិន​យក​ខ្ញុំ​ឈូស​ បើ​មិន​យក​ក៏​ខ្ញុំ​ឈូស​។ ​គាត់​និយាយ​អ៊ីចឹង​ហ្មង ​ក្រុមហ៊ុន​ហ្នឹង​ គឺ​រំលោភ​សិទ្ធិ​ពួក​ខ្ញុំ​ទាំង​ស្រុង​ហ្មង​»។ 

អាស៊ីសេរី​បាន​ទាក់ទង​អភិបាល​ខេត្ត​មណ្ឌលគិរី​លោក​ ស្វាយ សំអ៊ាង ​ដើម្បី​សុំ​ការ​អធិប្បាយ​ ចំពោះ​សេចក្តី​ប្រកាសពត៌មាននេះ ​ប៉ុន្តែ​ពេល​ទូរសព្ទ​ចូល​ តែ​គ្មាន​អ្នក​លើក។​ ចំណែក​អ្នក​នាំ​ពាក្យ​តុលាការ​ខេត្ត​មណ្ឌលគិរី​លោក​ មាស ប្រុស ​វិញ​ លោកថ្លែងថា​ បច្ចុប្បន្ន​ដី​មាន​ជម្លោះ​នោះ​បាន​ក្លាយ​ជា​ចម្ការ​​កៅស៊ូ​របស់​ក្រុមហ៊ុន​ស្ទើរ​ទាំង​ស្រុង។ ​លោកថា ​សំណុំរឿងក្តី​ ដែល​ក្រុមហ៊ុន​ប្តឹង​ប្រជា​សហគមន៍​ ១៥​នាក់ លោក​មិន​ទាន់​ប្រាកដ​ថា ​តុលាការ​ទម្លាក់​បទ​ចោទ ​ឬ​យ៉ាង​ណា​ទេ​ ព្រោះ​ឋិត​ក្នុង​ដៃ​ចៅក្រម​នៅឡើយ​។

សហគមន៍​ថា​ ក្រុមហ៊ុន​សុកហ្វីន (SOCFIN-KCD) ទទួល​ថវិកា​វិនិយោគ​ពី​ក្រុមហ៊ុន ​បូឡូរ៉េ (BOLLORE) ដែល​មាន​ទី​ស្នាក់​ការ​នៅ​ប្រទេស​បារាំង​ ទទួល​សិទ្ធិ​វិនិ​យោគ​​ដំណាំ​​កៅស៊ូ​ លើ​ផ្ទៃដី​ ១២.៤៤០​ហិកតារ ឋិត​នៅ​ឃុំ​ប៊ូស្រា​ ស្រុក​ពេជ្រាដា ខេត្ត​មណ្ឌលគិរី​ តាំង​ពី​ឆ្នាំ​២០០៨។

មន្ត្រី​ពង្រឹង​សិទ្ធិ​អំណាច​សហគមន៍​មូលដ្ឋាន​ នៃ​សមាគម​អាដហុក​ ដែល​ចុះ​ស៊ើបអង្កេត​រឿង​នេះ​ លោក ​ប៉ែន ប៊ុណ្ណារ៍​ សង្កេត​ឃើញ​ថា​ គ្រាន់តែ​លើករឿង​តែ​មួយ​ជ្រុង ដែល​ក្រុមហ៊ុន​ឈូស​ឆាយ​ព្រៃស្រោង ក៏​បង្ហាញ​ថា ក្រុមហ៊ុន​បាន​អនុវត្ត​ផ្ទុយពី​កិច្ច​សន្យា​វិនិយោគ​ ព្រោះ​រដ្ឋាភិបាល​មិន​អនុញ្ញាត​ឱ្យ​ឈូស​ឆាយ​ព្រៃស្រោង​ដើម្បី​​ដាំ​កៅស៊ូ​ទេ ​ពោល​គឺ ​ក្រុមហ៊ុន​ត្រូវ​កាត់​ឆ្វៀល​ចេញ​ ហើយ​តំបន់​ដែល​អាច​ដាំដុះ​បាន​ គឺ​ព្រៃ​រេចរឹល​តែ​ប៉ុណ្ណោះ​។ ​លោក​ថា ​ក្រុម​អង្គការ​សង្គម​ស៊ីវិល​ ធ្លាប់​ចុះ​ពិនិត្យ​រឿង​នេះ កាល​ពី ​៥​ឆ្នាំ ​ប្រទះ​ឃើញ​​ភាព​មិន​ប្រក្រតី​ជាច្រើន ​ដែល​ក្រុមហ៊ុន​បំពាន​កិច្ច​សន្យា​វិនិយោគ​ បំផ្លាញ​ដី​ចម្ការ​វិល​ជុំ ​ព្រៃតំណម​ លុប​ទឹក​អូរ​ធម្មជាតិ ​និង​ឈូស​ឆាយ ​ព្រៃ​អារក្ស​អ្នកតា​របស់​ជនជាតិ​ដើម​ភាគតិច​។ ​លោក​បន្ថែម​ថា ​តឹកតាង​ទាំងនេះ ​ឆ្លុះ​បញ្ចាំង​ថា​ ក្រុមហ៊ុន​បាន​បំផ្លាញ​សេចក្ដី​សុខ ​និង​ កន្លែង​អាស្រ័យ​​ផល​​យ៉ាង​​សំខាន់​​របស់​​អ្នក​ស្រុក​៖ «​ដីចម្ការ​កៅស៊ូ​ ទៅ​ដោះដូរ​ជាមួយ ​ដី​ព្រៃស្រោង​ និង​ពាក់​កណ្តាល​ស្រោង​ សូម្បី​តែ​ដី​ព្រៃ រេចរឹល​ ត្រូវ​សិក្សា​ឱ្យ​ច្បាស់​លាស់​ថា ​តើ​ដី​ហ្នឹង​នៅ​បម្រើ​ប្រយោជន៍​សាធារណៈ​ទៀត​អត់​?​ ពេល​ខ្ញុំ​ចុះទៅ ​បាន​ឃើញ​ ផ្ទុយ​ពី​គោល​ការណ៍​សម្បទាន​សេដ្ឋកិច្ច ​ពីព្រោះ​​ដី​សម្បទាន​សេដ្ឋកិច្ច ​គឺ​ធ្វើ​ទៅ​លើ​ដី​ព្រៃ​រេចរឹល ​ដើម្បី​រក្សា​បរិស្ថាន​»។

កន្លងមក តុលា​ការ​ទីក្រុង​ណង់ទែរ (The Tribunal of Nanterre) ប្រទេស​បារាំង  បាន​សម្រេច​ឱ្យ​តំណាង​ជនជាតិដើម​ភាគតិចព្នង ​៩រូប ​ផ្តល់​សំណង​ ២ម៉ឺន​ដុល្លារ​អាមេរិក (២០.០០០) ឱ្យ​ក្រុមហ៊ុន​សុកហ្វ៊ីន។​ ក្រុមហ៊ុន​អះអាង​ថា ​សកម្មភាព​ផលិតកម្ម​កៅស៊ូ​របស់​ក្រុមហ៊ុន ​បាន​ផ្តល់​អត្ថ​ប្រយោជន៍ជា​ច្រើន​ដល់​បុគ្គលិក​ ម្ចាស់​សហគ្រាស​កៅស៊ូ​ខ្នាតតូច ​និង​សហគមន៍​ ដើម្បី​ជួយ​លើក​កម្ពស់​ជីវភាព​រស់នៅរបស់​ពួកគេ។ ទន្ទឹមនឹងនេះ ក្រុមហ៊ុន​អះអាងថា បេសកកម្ម​​របស់​ក្រុមហ៊ុន ​គឺ​ចូលរួម​ចំណែក ដល់​ការ​អភិវឌ្ឍសេដ្ឋកិច្ច​ និង​សង្គម​រយៈពេល​វែង​នៅ​តំបន់​ជនបទ​ដាច់ស្រយាល ​ក្នុង​ខេត្តមណ្ឌលគិរី​។ ប៉ុន្តែ​ប្រជា​សហគមន៍ លើកឡើងថា ដី​ព្រៃ​ដែល​ក្រុមហ៊ុន​កំពុង​ឈូស​ឆាយបំផ្លិតបំផ្លាញ​នោះ គឺ​ជា​ព្រៃស្រោង ជម្រក​សត្វព្រៃ​រស់នៅ រុក្ខជាតិ​កម្រ និង​ជា​ប្រភព​ចំណូល​របស់​សហគមន៍​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល