ប្រធានមន្ទីររៀបចំដែនដីខេត្តក្រចេះ សន្យាជាថ្មីថា នឹងចុះទៅដោះស្រាយបញ្ហាដីធ្លីឲ្យពលរដ្ឋនៅឃុំ ២ធ្នូ នៅដើមសប្ដាហ៍ក្រោយ
2019.05.03
សកម្មភាពពលរដ្ឋមានជម្លោះដីធ្លីនៅក្នុងស្រុកស្នួល ខែត្រក្រចេះ តវ៉ាបិទផ្លូវជាតិលេខ៧៧អា នៅថ្ងៃទី៨ ខែមីនា ឆ្នាំ២០១៨។
Photo screenshot
ប្រធានមន្ទីររៀបចំដែនដីខេត្តក្រចេះ ចេញមុខមកជួបក្រុមប្រជាពលរដ្ឋប្រមាណ៥០នាក់តំណាងឲ្យ១៥៤គ្រួសារ នៅក្រសួងរៀបចំដែនដី ក្នុងរាជធានីភ្នំពេញ សន្យាថា នឹងចុះទៅដោះស្រាយបញ្ហាដីធ្លី នៅទីតាំងមានទំនាស់ ស្ថិតក្នុងភូមិជើងឃ្លេ ឃុំ២ធ្នូ ស្រុកស្នួល នៅដើមសប្ដាហ៍ក្រោយ។ ចំណែកសង្គមស៊ីវិល យល់ថា ការសន្យាពីមន្ត្រីរដ្ឋាភិបាលបែបនេះ គឺមិនអាចដោះស្រាយទំនាស់ដីធ្លីបានទេ បើសិនជាគ្មានឆន្ទៈពិតប្រាកដ ដើម្បីដោះស្រាយបញ្ចប់បញ្ហានោះ។
តំណាងពលរដ្ឋ លោក យេន សុផាឡៃ ប្រាប់អាស៊ីសេរីថា ប្រធានមន្ទីររៀបចំដែនដីនគរោបនីយកម្ម និងសំណង់ខេត្តក្រចេះ លោក កៅ ម៉ាឌីឡែន មកជួបពលរដ្ឋដោយផ្ទាល់ថា ដោយសន្យា នឹងចុះដោះស្រាយរឿងអាជ្ញាធរចុះទៅបំផ្លិចបំផ្លាញផលដំណាំអស់ជាង៣០០ហិកតារ ហើយដុតផ្ទះពលរដ្ឋអស់ជាង១០ខ្នង ដែលស្ថិតតាមបណ្ដោយព្រំដែនកម្ពុជា-វៀតណាម កាលពីថ្ងៃទី២០ មេសា។
លោក យេន សុផាឡៃ លើកឡើងថា នេះជាលើកទី២ហើយ ដែលលោក កៅ ម៉ាឌីឡែន សន្យាពលរដ្ឋថានឹងដោះស្រាយបញ្ចប់រាល់បញ្ហា នៅតំបន់ ឌី៥ ឌី៦ (D5 D6) ក្នុងភូមិជើងឃ្លេ ឃុំ២ធ្នូ ស្រុកស្នួល ខេត្តក្រចេះ ប៉ុន្តែមកដល់ពេលបញ្ហានៅតែមិនអាចដោះស្រាយបាន។ លោក យេន សុផាឡៃ បន្តថា ដោយសារគ្មានជម្រើសប្រសើរជាងនេះ ពួកគាត់ក៏សម្រេចទទួលការសន្យាជាថ្មីនេះ ប៉ុន្តែហាក់គ្មានជំនឿថា ប្រធានមន្ទីររៀបចំដែនដី ខេត្ត ក្រចេះ នឹងជួយបញ្ចប់បញ្ហាឲ្យពួកគេបាននោះទេ។ ក្រៅពីនេះ ក្រុមប្រជាពលរដ្ឋនៅតែទទូចស្នើសុំកិច្ចអន្តរាគមន៍បន្ថែមទៀតពីលោក ហ៊ុន សែន និងលោក ជា សុផារ៉ា ក្នុងរឿងនេះ៖ «ខាងលោក ម៉ាឌីឡែន លោកបានសន្យាជាមួយខ្ញុំថាបីថ្ងៃទៀតគាត់នឹងដោះស្រាយជូនប្រជាពលរដ្ឋទាំងនោះ។ ហើយពួកយើងខ្ញុំក៏បានសំណូមពរដល់គាត់ សូមឲ្យអាជ្ញាធរនៅខេត្តក្រចេះ សូមលោកកុំបន្ដដុតផ្ទះសម្បែងពួកយើងបន្តទៀត ហើយកុំបំផ្លាញនៅពូជដំណាំរបស់យើងខ្ញុំជាង៣០០ហិកតារហ្នឹង។ មានការខូចខាតយ៉ាងច្រើន បើគិតជាទឹកប្រាក់ជាង៣ម៉ឺនដុល្លាររួចទៅហើយ។ ខ្ញុំសំណូមពរគាត់ថា រង់ចាំតែពួកយើងខ្ញុំមានលទ្ធភាពដោះស្រាយគ្រប់គ្រាន់ ទៅតាផ្លូវច្បាប់។ ច្បាប់សម្រេចយ៉ាងណាៗ ខ្ញុំរង់ចាំទៀត។ ខ្ញុំសំណូមពរទៅគាត់តែប៉ុណ្ណឹងទេ»។
អាស៊ីសេរី មិនអាចសុំការបំភ្លឺរឿងដោយផ្ទាល់ពីលោក កៅ ម៉ាឌីឡែន បានទេនៅថ្ងៃទី ២ ឧសភា ដោយហៅទូរស័ព្ទចូលជាច្រើនដង តែគ្មានអ្នកទទួល។ កាលពីថ្ងៃទី៥ មីនា លោក កៅ ម៉ាឌីឡែន បានសន្យាម្ដងរួចមកហើយជាមួយពលរដ្ឋប្រមាណ៦០នាក់ នៅក្នុងវត្តសាមគ្គីរង្សី ថាលោកនឹងយកក្ដីកង្វល់និងបញ្ហាប្រឈមរបស់ពលរដ្ឋ ដាក់ជូនដើម្បីពិនិត្យនិងរកដំណោះស្រាយ។
គិតមកដល់ពេលនេះ ពលរដ្ឋថា នៅមិនទាន់ឃើញមានចំណាត់ការណាមួយពីអាជ្ញាធរថ្នាក់ខេត្តនិងក្រសួងរៀបចំដែនដី ចុះដោះស្រាយបញ្ហាឲ្យពួកគាត់នៅឡើយទេ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត លើកឡើងថា ការសន្យាពីមន្ត្រីរដ្ឋាភិបាលបែបនេះ គឺមិនអាចដោះស្រាយទំនាស់ដីធ្លីបានទេ បើគ្មានឆន្ទៈពិតប្រាកដនោះ។ លោក សំអាត បន្តថា ការសន្យាម្ដងហើយម្ដងទៀត ហើយនៅតែគ្មានលេចជាលទ្ធផល នោះរឹតតែធ្វើឲ្យប្រជាពលរដ្ឋលែងមានជំនឿចំពោះការសន្យារបស់អាជ្ញាធរ។ មន្ត្រីផ្នែកឃ្លាំមើលសិទ្ធិមនុស្សនេះ យល់ថា អាជ្ញាធរគួរពន្លឿនដំណោះស្រាយរឿងដីធ្លីឲ្យបានលឿន ដើម្បីបញ្ចៀសកុំឲ្យមានបញ្ហាផ្សេងទៀតដែលផ្ដើមចេញពីរឿងដីធ្លីនេះ៖ «បញ្ហាទាំងអស់នេះ យើងបារម្ភថាកុំឲ្យវាក្លាយទៅជាជំងឺរ៉ាំរ៉ៃបន្តទៅទៀត គួរណាស់ពន្លឿននីតិវិធីក្នុងការដោះស្រាយ ដើម្បីបញ្ចប់ទៅលើបញ្ហាដីធ្លីហ្នឹងទៅ វាជាការល្អប្រសើរ។ ហើយបើមិនអ៊ីចឹងទេ វាអាចនឹងរីករាលដាល នឹងអាចមានការលាបពណ៌ដាក់គ្នាផ្សេងបន្តទៅទៀត នាំឲ្យ ផលវិបាកវាកាន់តែកើតឡើងចំពោះប្រជាពលរដ្ឋនោះ បាទ!»។
ពលរដ្ឋ១៥០គ្រួសារអះអាងថា ពួកគេ បានរស់នៅតំបន់ឌី៥ឌី៦ក្នុងឃុំ២ធ្នូ ចាប់តាំងពីឆ្នាំ២ពាន់ដោយបានកៅស៊ូ ស្វាយចន្ទី ម្រេច ដំឡូងមី និងស្រូវ ជិត២០ឆ្នាំហើយ។ ពលរដ្ឋប្រាប់ថា លុះមកដល់ដើមខែកុម្ភៈ ឆ្នាំ២០១៩ ក៏ចាប់ផ្ដើមមានទំនាស់រវាងអាជ្ញាធរនិងប្រជាពលរដ្ឋ លើផ្ទៃសរុបជាង៧រយហិកតារ (៧៤៤) បន្ទាប់ពីអាជ្ញាធរបានប្រើគ្រឿងចក្រឈូសឆាយផលដំណាំ ហើយដុតផ្ទះអស់១២ខ្នង ក្រោមហេតុផលថារានដី យកទៅប្រគល់ឲ្យក្រុមប្រជាពលរដ្ឋផ្សេងទៀត ដែលជាក្រុមយោធិនចូលនិវត្តន៍មកពីខេត្តឆ្ងាយៗ។
ក្រុមពលរដ្ឋឃុំ២ធ្នូ ខេត្តក្រចេះ ប្រកាន់ជំហរថា បើសិនជាគ្មានដំណោះស្រាយដូចតាមការសន្យារបស់ប្រធានមន្ទីររៀបចំដែនដីនគរោបនីយកម្ម និងសំណង់ខេត្តក្រចេះ នៅថ្ងៃដើមសប្ដាហ៍ក្រោយទេ នោះពួកគេនឹងនាំគ្នាកាន់តែច្រើន ធ្វើដំណើរមករាជធានីភ្នំពេញ តវ៉ាទាមទាររកដំណោះស្រាយពីក្រសួងរៀបចំដែនដី ជាថ្មីទៀត ហើយនឹងមិនត្រឡប់វិលទៅផ្ទះវិញទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ថេង សាវឿន និងសហការីសរសេរលិខិតសុំទោសលោក ហ៊ុន សែនដើម្បីរួចពីការឃុំខ្លួន
- ហេតុអ្វីលោក ឡេង ណាវ៉ាត្រា និងអតិថិជនមិនប្រើប្រាស់តុលាការដោះស្រាយវិវាទបែរជាវាយប្រហារគ្នាតាមបណ្ដាញសង្គម?
- លោក ហ៊ុន សែន ផ្ដល់មរតកនយោបាយកំសាកដល់លោក ហ៊ុន ម៉ាណែត ជាបន្តបន្ទាប់
- កម្មករត្រូវបានបង្ខំឱ្យទៅស្ដាប់លោក ហ៊ុន សែន និយាយ
- អាមេរិកនិងប្រទេសប្រជាធិបតេយ្យធំៗព្រមានកម្ពុជាក្រោយផាត់ភ្លើងទៀនចេញពីការបោះឆ្នោត