ក្រុមហ៊ុន​សម្បទាន​ដី​សេដ្ឋកិច្ច​ប្រតិកម្ម​នឹង​រដ្ឋាភិបាល​ដែល​បន្ថយ​រយៈពេល​វិនិយោគ

ដោយ ថា កិត្យា
2015-07-30
Share
ចំការ​អំពៅ ព្រះវិហារ ៦២០ ៧-សីហា-២០១៤៖ ចម្ការ​អំពៅ​របស់​ក្រុមហ៊ុន​ចិន ឡាន ហ្វេង។
RFA/Hang Savyouth

តំណាង​ក្រុមហ៊ុន​សម្បទាន​ដី​សេដ្ឋកិច្ច​មួយ​ចំនួន ប្រតិកម្ម​ចំពោះ​រដ្ឋាភិបាល ដែល​សម្រេច​កាត់​បន្ថយ​រយៈពេល​នៃ​ការ​អនុវត្ត​គម្រោង​វិនិយោគ​អភិវឌ្ឍន៍​សម្បទាន​ដី​សេដ្ឋកិច្ច​ទាំងអស់ មក​នៅ ៥០​ឆ្នាំ​យ៉ាង​យូរ​បំផុត​នោះ។ ទន្ទឹម​នឹង​នេះ អ្នក​ស្រាវជ្រាវ​សង្គម​យល់​ឃើញ​ថា ការ​សម្រេច​របស់​រដ្ឋាភិបាល​នេះ គឺ​មិន​មែន​ជា​ដំណោះស្រាយ​ល្អ​ឡើយ ជាពិសេស​អាច​ធ្វើ​ឲ្យ​ប៉ះពាល់​ដល់​ទំនុក​ចិត្ត​អ្នក​វិនិយោគ​ទៀត​ផង។

តំណាង​ក្រុមហ៊ុន​សម្បទាន​ដី​សេដ្ឋកិច្ច​មួយ​ចំនួន ទាមទារ​រដ្ឋាភិបាល​ឲ្យ​រក្សា​ស្ថានភាព​កិច្ចសន្យា​ដើម​ដដែល ចំពោះ​ក្រុមហ៊ុន​ណា​ដែល​បាន​ចុះ​កិច្ចសន្យា​រួច​ហើយ ឬ​ក៏​អាច​អនុវត្ត​សម្រាប់​តែ​ក្រុមហ៊ុន​ណា​ដែល​មិន​ទាន់​ចុះ​កិច្ចសន្យា។

ក្រុមហ៊ុន​ភ្នំពេញ​ស៊ូហ្គើរ ឬ​ហៅ​ថា ក្រុមហ៊ុន​ស្ករស​ភ្នំពេញ (Phnom Penh Sugar) របស់​លោក​ឧកញ៉ា លី យ៉ុងផាត់។ រូបថត​ថ្ងៃ​ទី​២៥ ខែ​កុម្ភៈ ឆ្នាំ​២០១៥
ក្រុមហ៊ុន​ភ្នំពេញ​ស៊ូហ្គើរ ឬ​ហៅ​ថា ក្រុមហ៊ុន​ស្ករស​ភ្នំពេញ (Phnom Penh Sugar) របស់​លោក​ឧកញ៉ា លី យ៉ុងផាត់។ រូបថត​ថ្ងៃ​ទី​២៥ ខែ​កុម្ភៈ ឆ្នាំ​២០១៥
RFA/Keo Nimol

លោក​ឧកញ៉ា លី យ៉ុងផាត់ ដែល​ទទួល​សិទ្ធិ​វិនិយោគ​ដី​សម្បទាន​ដាំ​អំពៅ នៅ​ខេត្ត​កំពង់ស្ពឺ មាន​ប្រសាសន៍​ថា លោក​មិន​ទាន់​ទទួល​បាន​ព័ត៌មាន​នេះ​ជា​ផ្លូវ​ការ​នៅ​ឡើយ​ទេ ប៉ុន្តែ​យ៉ាង​ណា​ក៏ដោយ លោក​ថា​មិន​សប្បាយ​ចិត្ត​នោះ​ទេ នៅ​ពេល​ដែល​រដ្ឋាភិបាល​ក្បត់​កិច្ចសន្យា​នៅ​ពាក់​កណ្ដាល​ទី ដោយ​មិន​បាន​ជជែក​គ្នា​ជា​មុន​នោះ។ ក្នុង​នាម​ជា​អ្នក​រក​ស៊ី​ម្នាក់ លោក​ថា គឺ​ចាំបាច់​ត្រូវ​គោរព​តាម​គោលការណ៍​ច្បាប់​របស់​ប្រទេស។ លោក​ព្រួយ​បារម្ភ​ថា ការ​សម្រេច​របស់​រដ្ឋាភិបាល​នៅ​ពេល​នេះ អាច​ធ្វើ​ឲ្យ​ប៉ះពាល់​ដល់​ក្រុមហ៊ុន​វិនិយោគ​ដែល​ប្រតិបត្តិការ​ដោយ​ស្រប​ច្បាប់៖ «មុន​នឹង​រក​ស៊ី​គេ​សួរ​ច្បាប់​សិន​ហើយ ច្បាស់លាស់​ទើប​គេ​វិនិយោគ បើ​វា​មិន​ច្បាស់​អ៊ីចឹង គេ​ម៉េច​នឹង​វិនិយោគ​ជាមួយ​យើង។ និយាយ​នេះ​ក្នុង​នាម​ជា​អ្នក​រក​ស៊ី​ទេ ព្រោះ​ក្នុង​ប្រទេស និង​ក្រៅ​ប្រទេស​ដូច​តែ​គ្នា​ទេ។ បើ​យក​ច្បាប់​ចាស់​មក​ដូរ​ទៅ​ជា​គោរព​ច្បាប់​ថ្មី​នោះ អា​ហ្នឹង គឺ​ត្រូវ​តែ​ពិភាក្សា​គ្នា​មុន​សិន​ហើយ»

ការ​ប្រតិកម្ម​ពី​តំណាង​ក្រុមហ៊ុន​សម្បទាន​ដី​សេដ្ឋកិច្ច​ជា​បន្តបន្ទាប់​នេះ គឺ​ធ្វើ​ឡើង​បន្ទាប់​ពី​ក្រសួង​បរិស្ថាន បាន​ចេញ​សេចក្តី​ប្រកាស​កាល​ពី​ថ្ងៃ​ទី​២៨ ខែ​កក្កដា ថា រដ្ឋាភិបាល​សម្រេច​កាត់​បន្ថយ​រយៈពេល​នៃ​ការ​អនុវត្ត​គម្រោង​វិនិយោគ​អភិវឌ្ឍន៍​សម្បទាន​ដី​សេដ្ឋកិច្ច​ទាំងអស់ ពី​រយៈពេល ៩៩​ឆ្នាំ មក​នៅ​ត្រឹម ៥០​ឆ្នាំ​យ៉ាង​យូរ​បំផុត។

ឆ្លើយ​តប​ចំពោះ​បញ្ហា​នេះ នាយ​ខុទ្ទកាល័យ​ក្រសួង​បរិស្ថាន លោក ស្រ៊ុន ដារិទ្ធិ មាន​ប្រសាសន៍​ថា ការ​សម្រេច​ចិត្ត​បន្ថយ​រយៈពេល​ជួល​ដី​ទៅ​ឲ្យ​ក្រុមហ៊ុន​មក​នៅ​ត្រឹម ៥០​ឆ្នាំ​នេះ គឺ​បន្ទាប់​ពី​រដ្ឋាភិបាល​យល់​ថា វា​សមស្រប​សម្រាប់​ការ​អនុវត្ត​គម្រោង​សម្បទាន​ដី​សេដ្ឋកិច្ច​ក្នុង​គោល​បំណង​ធ្វើ​កសិឧស្សាហកម្ម៖ «ដូចជា​ដំណាំ​កៅស៊ូ​តាម​អ្នក​បច្ចេកទេស​គេ​ថា រយៈពេល ២៥​ឆ្នាំ គឺ​ចប់​មួយ​វដ្ដ​នៃ​ដំណាំ​កៅស៊ូ។ ដូច្នេះ ៥០​ឆ្នាំ គឺ​គ្រប់គ្រាន់​សម្រាប់​ពីរ​វដ្ដ​នៃ​ដំណាំ​កៅស៊ូ។ អ៊ីចឹង​ហេតុផល គឺ​យើង​គិត​ថា​រយៈពេល ៨០ ទៅ ៩០​ឆ្នាំ​វា​យូរ​ពេក»

ចំពោះ​ការ​ប្រែប្រួល​រយៈពេល​នៃ​ការ​អនុវត្ត​គម្រោង​មក​នៅ​ត្រឹម ៥០​ឆ្នាំ​យ៉ាង​យូរ​នេះ​ដែរ អ្នក​ស្រាវជ្រាវ​ការ​អភិវឌ្ឍ​សង្គម លោក កែម ឡី យល់​ថា វា​មិន​អាច​កាត់​បន្ថយ​ទំនាស់​ដីធ្លី​បាន​ឡើយ តែ​ផ្ទុយ​ទៅ​វិញ គឺ​អាច​នឹង​ប៉ះពាល់​ដល់​ជំហរ និង​ទំនុក​ចិត្ត​របស់​អ្នក​វិនិយោគ។ ស្រប​គ្នា​នេះ លោក​រិះគន់​ដែរ​ថា របៀប​ធ្វើ​ការ​ត្រឡប់​ថយ​ក្រោយ​នេះ គឺ​ដោយសារ​រដ្ឋាភិបាល​ខ្វះ​ទស្សនវិស័យ​ជាក់លាក់៖ «មិន​ចាំបាច់​បញ្ចុះ​ពី ៥០​ឆ្នាំ​មក ៩០​ឆ្នាំ​ទេ វា​ល្អ​ហើយ​សម្រាប់​ប្រទេស​កម្ពុជា ដើម្បី​មាន​ឱកាស​ដេញ​ថ្លៃ បន្ទាប់​ពី​ក្រុមហ៊ុន​នោះ​ចប់​អាណត្តិ ប៉ុន្តែ​ដី​សម្បទាន​សេដ្ឋកិច្ច តាម​ពិត​យើង​ត្រូវ​ពិនិត្យ​ឡើង​វិញ ហើយ​បើ​គេ​អត់​អនុវត្ត​តាម​អនុក្រឹត្យ យើង​ត្រូវ​ដក​មក​វិញ»

ឆ្លើយ​តប​ចំពោះ​បញ្ហា​នេះ នាយ​ខុទ្ទកាល័យ​ក្រសួង​បរិស្ថាន លោក ស្រ៊ុន ដារិទ្ធិ បញ្ជាក់​ថា នេះ​គឺ​ជា​ការ​សម្រេច​ជា​គោលការណ៍​របស់​រដ្ឋាភិបាល ដូច្នេះ​ចង់​ឬ​មិន​ចង់ គឺ​ក្រុមហ៊ុន​ទាំងអស់ គឺ​ត្រូវ​តែ​អនុវត្ត​តាម៖ «យើង​ក៏​ទទួល​បាន​ប្រតិកម្ម​ពី​ក្រុមហ៊ុន​មួយ​ចំនួន​ហើយ គាត់​ថា​មិន​សប្បាយ​ចិត្ត ប៉ុន្តែ​ជា​ការ​សម្រេច​របស់​រដ្ឋាភិបាល គាត់​ត្រូវ​តែ​គោរព»

ទាក់ទិន​នឹង​ការ​កាត់​បន្ថយ​រយៈពេល​នៃ​ការ​អនុវត្ត​គម្រោង​ដី​សម្បទាន​នេះ ខាង​ភាគី​តំណាង​ក្រុមហ៊ុន​មួយ​ចំនួន នៅ​មិន​ទាន់​ទទួល​បាន​ព័ត៌មាន​ច្បាស់លាស់​នៅ​ឡើយ។

១៥-មីនា-២០១៤៖ គ្រឿងចក្រ​របស់​ក្រុមហ៊ុន​អភិវឌ្ឍន៍​ចិន ឈ្មោះ ឡាន ហ្វេង កំពុង​ដាំ​ដើម​អំពៅ​នៅ​លើ​ដី​សម្បទាន​សេដ្ឋកិច្ច​​នៅ​ស្រុក​ត្បែងមានជ័យ ខេត្ត​ព្រះវិហារ។
១៥-មីនា-២០១៤៖ គ្រឿងចក្រ​របស់​ក្រុមហ៊ុន​អភិវឌ្ឍន៍​ចិន ឈ្មោះ ឡាន ហ្វេង កំពុង​ដាំ​ដើម​អំពៅ​នៅ​លើ​ដី​សម្បទាន​សេដ្ឋកិច្ច​​នៅ​ស្រុក​ត្បែងមានជ័យ ខេត្ត​ព្រះវិហារ។
RFA/Tep Soravy

យ៉ាង​ណា​ក៏ដោយ លោក ស្រ៊ុន ដារិទ្ធិ បញ្ជាក់​ទៀត​ថា ក្រសួង​បរិស្ថាន នឹង​ធ្វើ​លិខិត​ផ្លូវ​ការ​ជូន​ក្រុមហ៊ុន​ទាំងអស់​ក្នុង​ពេល​ឆាប់ៗ​ខាង​មុខ​នេះ ដើម្បី​ឲ្យ​ចុះ​កិច្ចសន្យា​ជាមួយ​គ្នា​ឡើង​វិញ ដោយ​កែ​សម្រួល​រយៈពេល​កុងត្រា។ ក្រៅ​ពី​នេះ លោក​បញ្ជាក់​ដែរ​ថា គម្រោង​មួយ​ចំនួន​ក៏​នឹង​កាត់​បន្ថយ​ផ្ទៃ​ដី​ដើម្បី​កាត់​ជូន​ប្រជាពលរដ្ឋ​ដែល​រង​ផល​ប៉ះពាល់​កន្លង​មក។

សេចក្ដី​ប្រកាស​របស់​ក្រសួង​បរិស្ថាន កាល​ពី​ថ្ងៃ​ទី​២៨ កក្កដា ឲ្យ​ដឹង​ថា ក្រសួង​បាន​ពិនិត្យ និង​វាយ​តម្លៃ​គម្រោង​វិនិយោគ​ទាំងអស់​បាន​ចំនួន ១១៣​គម្រោង​លើ​ផ្ទៃដី​សរុប​ជាង ៦២​ម៉ឺន​ហិកតារ។ ក្នុង​នោះ រដ្ឋាភិបាល​បាន​សម្រេច​ដក​ហូត​សិទ្ធិ​វិនិយោគ​ពី​គម្រោង​របស់​ក្រុមហ៊ុន​ចំនួន ២៣ លើ​ផ្ទៃ​ដី​សរុប​ជាង ៩​ម៉ឺន​ហិកតារ ក្រោយ​ពី​ពិនិត្យ​ឃើញ​ថា ក្រុមហ៊ុន​ទាំង​នោះ​មិន​បាន​គោរព​តាម​គោលការណ៍ និង​នីតិវិធី​ដែល​បាន​កំណត់​ក្នុង​កិច្ចសន្យា។

រដ្ឋាភិបាល​ធ្លាប់​បាន​បង្ហាញ​ថា ក្នុង​ឆ្នាំ​២០១៣ ក្រុមហ៊ុន​ចំនួន ២៣០ បាន​ទទួល​សិទ្ធិ​វិនិយោគ​លើ​ផ្ទៃ​ដី​សរុប​ជិត ២​លាន​ហិកតារ ប៉ុន្តែ​អង្គការ​ទិន្នន័យ​ស្ដីពី​ការ​អភិវឌ្ឍ ហៅ​កាត់​ថា អូ.ឌី.ស៊ី (ODC) កត់​សម្គាល់​ឃើញ​ថា ទិន្នន័យ​ស្ដីពី​សម្បទាន​ដី​សេដ្ឋកិច្ច​នៅ​មាន​ភាព​លាក់​បាំង​នៅ​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល